ଭଦ୍ରକ:୬/୯,ଭଦ୍ରକ ଜିଲ୍ଲାରେ ସାପ କାମୁଡ଼ାରେ ସ୍ୱାମୀ-ସ୍ତ୍ରୀଙ୍କ ମୃତ୍ୟୁକୁ ନେଇ ଚାଞ୍ଚଲ୍ୟ ଖେଳିଯାଇଛି। ତିହିଡି ବ୍ଲକ ଗୋବିନ୍ଦପୁର ପଞ୍ଚାୟତ ଅନ୍ତର୍ଗତ ମଧୁପୁର ଗାଁରେ ମାତ୍ର ପ୍ରାୟ ୨୪ ଘଣ୍ଟା ବ୍ୟବଧାନରେ ଏକ ଦମ୍ପତିଙ୍କ ମୃତ୍ୟୁ ଘଟିଛି। ମୃତକ ଦମ୍ପତି ହେଉଛନ୍ତି ଗାଁର ପରମାନନ୍ଦ ବାରିକ (୫୦) ଓ ତାଙ୍କ ପତ୍ନୀ ପ୍ରମିଳା ବାରିକ।
ସୂଚନା ଅନୁସାରେ, ଗତ ଗୁରୁବାର, ସେପ୍ଟେମ୍ବର ୩ ତାରିଖ ରାତିରେ ପରମାନନ୍ଦ ଓ ପ୍ରମିଳା ଘରେ ଶୋଇଥିବା ସମୟରେ ପ୍ରମିଳାଙ୍କୁ ସାପ କାମୁଡ଼ିଥିବା ଜଣାପଡ଼ିଥିଲା। ଏହାପରେ ତାଙ୍କ ପେଟରେ ଯନ୍ତ୍ରଣା ଓ ପାଟି ଶୁଖିଯିବା ଭଳି ଲକ୍ଷଣ ଦେଖାଦେଇଥିଲା। ପରିବାର ଲୋକେ ତୁରନ୍ତ ତାଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ପ୍ରମିଳାଙ୍କୁ ମୃତ ଘୋଷଣା କରିଥିଲେ।
ପରିବାର ଲୋକେ ଏହାକୁ ସାଧାରଣ ମୃତ୍ୟୁ ବୋଲି ଭାବି ଶୁକ୍ରବାର ସକାଳେ ପ୍ରମିଳାଙ୍କ ମରଶରୀରକୁ ପୋତି ଦେଇଥିଲେ।
ସ୍ତ୍ରୀଙ୍କ ମୃତ୍ୟୁ ପରେ ସ୍ୱାମୀଙ୍କୁ ମଧ୍ୟ ସାପ କାମୁଡ଼ିଲା
ପ୍ରମିଳାଙ୍କ ଅନ୍ତ୍ୟେଷ୍ଟି କ୍ରିୟା ସାରିବା ପରେ ଶୁକ୍ରବାର ରାତିରେ ଘରେ ଶୋଇଥିବା ସମୟରେ ସ୍ୱାମୀ ପରମାନନ୍ଦଙ୍କୁ ମଧ୍ୟ ସାପ କାମୁଡ଼ିଥିବା ଅଭିଯୋଗ ହୋଇଛି। ତାଙ୍କଠାରେ ମଧ୍ୟ ସମାନ ପ୍ରକାରର ଲକ୍ଷଣ ଦେଖାଦେଇଥିଲା।
ପରିବାର ଲୋକେ ତୁରନ୍ତ ପରମାନନ୍ଦଙ୍କୁ ପ୍ରଥମେ ତିହିଡି ଡାକ୍ତରଖାନା ଏବଂ ପରେ ଭଦ୍ରକ ମୁଖ୍ୟ ଚିକିତ୍ସାଳୟକୁ ନେଇଥିଲେ। ତାଙ୍କ ଅବସ୍ଥା ଗୁରୁତର ହେବାରୁ କଟକ ସ୍ଥାନାନ୍ତର କରାଯାଉଥିଲା। ତେବେ ଭଣ୍ଡାରୀପୋଖରୀ ନିକଟରେ ଆମ୍ବୁଲାନ୍ସରେ ହିଁ ପରମାନନ୍ଦଙ୍କ ମୃତ୍ୟୁ ଘଟିଥିବା ଜଣାପଡ଼ିଛି।
ସନ୍ଦେହ ପରେ ମାଟି ଖୋଳି ବାହାର କରାଗଲା ମୃତଦେହ
ଗୋଟିଏ ଦମ୍ପତିଙ୍କ ଅଳ୍ପ ସମୟ ବ୍ୟବଧାନରେ ସମାନ ଲକ୍ଷଣରେ ମୃତ୍ୟୁ ହେବା ପରେ ପରିବାର ଓ ଗ୍ରାମବାସୀଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା। ଖବର ପାଇ ପୀରହାଟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା।
ପୋଲିସ ମାଟି ଖୋଳି ପୋତାଯାଇଥିବା ପ୍ରମିଳାଙ୍କ ମୃତଦେହକୁ ବାହାର କରିଥିଲା। ପରେ ସ୍ୱାମୀ-ସ୍ତ୍ରୀ ଉଭୟଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିବା ଜଣାପଡ଼ିଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସମ୍ପର୍କରେ ଅଧିକ ସ୍ପଷ୍ଟତା ମିଳିପାରେ।
ଘରୁ ଉଦ୍ଧାର ହେଲା ବିଷାକ୍ତ ସାପ
ଘଟଣା ପରେ ଜଣେ ସର୍ପଧରା ମିର୍ଜା ଘଟଣାସ୍ଥଳରେ ପହଞ୍ଚି ବନ୍ୟା ପ୍ରଭାବିତ ମାଟିଘର ଭିତରୁ ଏକ ବିଷାକ୍ତ ଚନ୍ଦ୍ରବୋଡ଼ା ସାପ ଉଦ୍ଧାର କରିଥିବା ସୂଚନା ମିଳିଛି।
ବର୍ତ୍ତମାନ ଅଞ୍ଚଳରେ ବନ୍ୟା ପାଣି ଯୋଗୁଁ ସାପ ଓ ଅନ୍ୟାନ୍ୟ ସରୀସୃପ ସୁରକ୍ଷିତ ସ୍ଥାନ ଖୋଜି ଘର ଭିତରକୁ ପ୍ରବେଶ କରିବାର ଆଶଙ୍କା ରହିଛି। ତେଣୁ ଗ୍ରାମାଞ୍ଚଳରେ ରହୁଥିବା ଲୋକମାନେ ରାତିରେ ଶୋଇବା ପୂର୍ବରୁ ଶଯ୍ୟା, ଘରର କୋଣ ଓ ଅନ୍ଧାର ସ୍ଥାନଗୁଡ଼ିକ ଯାଞ୍ଚ କରିବା ସହ ସତର୍କ ରହିବା ଆବଶ୍ୟକ।
ଏହି ଦୁଃଖଦ ଘଟଣାରେ ମଧୁପୁର ଗାଁରେ ଶୋକର ଛାୟା ଖେଳିଯାଇଛି। ଘଟଣାକୁ ନେଇ ପୀରହାଟ ପୋଲିସ ତଦନ୍ତ ଜାରି ରଖିଥିବା ବେଳେ ବ୍ୟବଚ୍ଛେଦ ରିପୋର୍ଟ ଉପରେ ସମସ୍ତଙ୍କ ନଜର ରହିଛି।
