ନୂଆଦିଲ୍ଲୀ: ସଂଘର୍ଷରୁ ସଫଳତା, ଟ୍ରାକ୍ରୁ ପୋଡିୟମ୍। ଭାରତୀୟ ଆଥଲେଟ୍ ବିଥ୍ୟା ରାମରାଜ ଏସୀୟ କ୍ରୀଡ଼ାରେ ଚମତ୍କାର ପ୍ରଦର୍ଶନ କରି ସ୍ୱର୍ଣ୍ଣ, ରୌପ୍ୟ ଓ ବ୍ରୋଞ୍ଜ—ତିନିଟି ପଦକ ଜିତି ଦେଶ ପାଇଁ ଗର୍ବ ଆଣିଛନ୍ତି। ଏହି ସଫଳତା ସହ ସେ ଭାରତୀୟ ଆଥଲେଟିକ୍ସର କିମ୍ବଦନ୍ତୀ ପିଟି ଉଷାଙ୍କ ଦୀର୍ଘଦିନର ରେକର୍ଡ ମଧ୍ୟ ଭାଙ୍ଗିଛନ୍ତି।ମହିଳା ୪୦୦ ମିଟର ହର୍ଡଲ୍ସରେ ବିଥ୍ୟା ରାମରାଜ ୫୪.୭୫ ସେକେଣ୍ଡ ସମୟରେ ଦୌଡ଼ ଶେଷ କରି ବ୍ରୋଞ୍ଜ ପଦକ ଜିତିଥିଲେ। ଏହି ପ୍ରଦର୍ଶନ ସହ ସେ ୧୯୮୪ ଲସ୍ ଆଞ୍ଜେଲସ୍ ଅଲିମ୍ପିକ୍ସରେ ପିଟି ଉଷାଙ୍କ ରେକର୍ଡକୁ ପଛରେ ପକାଇଥିଲେ। ଉଷା ସେତେବେଳେ ୫୫.୪୨ ସେକେଣ୍ଡ ସମୟ ନେଇଥିଲେ।ଏହା ସହ ବିଥ୍ୟା ରାମରାଜ ୫୫ ସେକେଣ୍ଡରୁ କମ୍ ସମୟରେ ୪୦୦ ମିଟର ହର୍ଡଲ୍ସ ଶେଷ କରିଥିବା ପ୍ରଥମ ଭାରତୀୟ ମହିଳା ଆଥଲେଟ୍ ହୋଇଛନ୍ତି।ରିଲେ ପ୍ରତିଯୋଗିତାରେ ମଧ୍ୟ ବିଥ୍ୟାଙ୍କ ଦମଦାର ପ୍ରଦର୍ଶନ ଦେଖିବାକୁ ମିଳିଥିଲା। ୪୦୦ ମିଟର ରିଲେରେ ସେ ଆଙ୍କର ରନର୍ ଭାବେ ଦଳକୁ ବିଜୟ ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ। କିରଣ ପାହଲ, ଏମ୍.ଆର୍. ପୁଭାମ୍ମା ଓ ପ୍ରାଚୀଙ୍କ ସହ ମିଶି ଭାରତୀୟ ଦଳ ସ୍ୱର୍ଣ୍ଣ ପଦକ ହାସଲ କରିଥିଲା।ବିଥ୍ୟା ଶେଷ ମୁହୂର୍ତ୍ତରେ ଦମଦାର ଦୌଡ଼ ପ୍ରଦର୍ଶନ କରି ବାହାରିନର ଅଲିମ୍ପିକ୍ ପଦକ ବିଜେତା ସାଲୱା ଇଦ୍ ନାସେରଙ୍କୁ ପଛରେ ପକାଇ ଭାରତକୁ ବିଜୟ ଦେଇଥିଲେ। ଏହା ପୂର୍ବରୁ ମଧ୍ୟ ରିଲେରେ ଭାରତ ପାଇଁ ରୌପ୍ୟ ପଦକ ଜିତିବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ।ଅଭାବ ଓ ଅନାଟନ ମଧ୍ୟରେ ବଢ଼ିଥିବା ବିଥ୍ୟା ରାମରାଜ ନିଜର କଠିନ ପରିଶ୍ରମ, ଦୃଢ଼ ମନୋବଳ ଓ ଲକ୍ଷ୍ୟ ପ୍ରତି ନିଷ୍ଠା ବଳରେ ଅନ୍ତର୍ଜାତୀୟ ଆଥଲେଟିକ୍ସ ମଞ୍ଚରେ ନିଜର ସ୍ୱତନ୍ତ୍ର ପରିଚୟ ତିଆରି କରିଛନ୍ତି। ତାଙ୍କ ବାପା ଟ୍ରକ୍ ଚଲାନ୍ତି, ଆଉ ଝିଅ ଟ୍ରାକ୍ରେ ଦୌଡ଼ି ଦେଶ ପାଇଁ ପଦକ ଜିତୁଛନ୍ତି। ବିଥ୍ୟାଙ୍କ ଏହି ସଫଳତା ଆଜି ଲକ୍ଷ ଲକ୍ଷ ଯୁବ ଆଥଲେଟ୍ଙ୍କ ପାଇଁ ପ୍ରେରଣା ପାଲଟିଛି।
