ନୂଆଦିଲ୍ଲୀ, ୯/୯: ପଶ୍ଚିମବଙ୍ଗ, ଝାଡ଼ଖଣ୍ଡ, ଓଡ଼ିଶା, ମଧ୍ୟପ୍ରଦେଶ ଓ ଛତିଶଗଡ଼ର ୧୪ଟି ଜିଲ୍ଲାକୁ ନେଇ ୩ଟି ମଲ୍ଟି-ଟ୍ରାକିଂ ରେଳ ପ୍ରକଳ୍ପକୁ କେନ୍ଦ୍ର କ୍ୟାବିନେଟ୍ ମଞ୍ଜୁରି ଦେଇଛି। ଏହି ପ୍ରକଳ୍ପଗୁଡ଼ିକ ପାଇଁ ମୋଟ ୧୦,୭୮୩ କୋଟି ଟଙ୍କା ବ୍ୟୟ ହେବ। ୨୦୨୯-୩୦ ସୁଦ୍ଧା ପ୍ରକଳ୍ପଗୁଡ଼ିକୁ ସମ୍ପୂର୍ଣ୍ଣ କରିବାର ଲକ୍ଷ୍ୟ ରହିଛି।ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ ଅର୍ଥନୈତିକ ବ୍ୟାପାର ସମ୍ପର୍କିତ କ୍ୟାବିନେଟ୍ କମିଟି ବୈଠକରେ ରେଳ ମନ୍ତ୍ରଣାଳୟର ଏହି ୩ଟି ପ୍ରକଳ୍ପକୁ ଅନୁମୋଦନ ମିଳିଛି।
କେଉଁ ରେଳ ପ୍ରକଳ୍ପକୁ ମିଳିଲା ମଞ୍ଜୁରି?
ମଞ୍ଜୁର ହୋଇଥିବା ପ୍ରକଳ୍ପଗୁଡ଼ିକ ହେଲା ଖଡ଼ଗପୁର–ଝାରସୁଗୁଡ଼ା (ବାଗଡେହି) ଚତୁର୍ଥ ରେଳ ଲାଇନ୍, କଟନୀ–ପେଣ୍ଡ୍ରା ରୋଡ୍ ଚତୁର୍ଥ ରେଳ ଲାଇନ୍ ଏବଂ ବିଳାସପୁର (ଉସଲାପୁର)–ପେଣ୍ଡ୍ରା ରୋଡ୍ ତୃତୀୟ ରେଳ ଲାଇନ୍।ଅତିରିକ୍ତ ରେଳ ଲାଇନ୍ ନିର୍ମାଣ ହେବା ଫଳରେ ରେଳ ଚଳାଚଳ କ୍ଷମତା ବଢ଼ିବ। ଏହା ସହିତ ରେଳପଥରେ ଭିଡ଼ ଓ ଚାପ କମିବା ସହ ଯାତ୍ରୀ ଓ ମାଲ ପରିବହନ ବ୍ୟବସ୍ଥା ଅଧିକ ସୁଗମ ହେବ। ରେଳବାଇର କାର୍ଯ୍ୟକ୍ଷମତା ଓ ସେବାର ନିର୍ଭରଯୋଗ୍ୟତା ମଧ୍ୟ ବୃଦ୍ଧି ପାଇବ।
୬୫୬ କିଲୋମିଟର ନୂଆ ରେଳପଥ ଯୋଡ଼ିବ
ଏହି ୩ଟି ପ୍ରକଳ୍ପ ପଶ୍ଚିମବଙ୍ଗ, ଝାଡ଼ଖଣ୍ଡ, ଓଡ଼ିଶା, ମଧ୍ୟପ୍ରଦେଶ ଓ ଛତିଶଗଡ଼ର ୧୪ଟି ଜିଲ୍ଲାକୁ କଭର୍ କରିବ। ପ୍ରକଳ୍ପ ମାଧ୍ୟମରେ ଭାରତୀୟ ରେଳବାଇ ନେଟୱର୍କରେ ପ୍ରାୟ ୬୫୬ କିଲୋମିଟର ରେଳପଥ ଯୋଡ଼ି ହେବ।ପ୍ରସ୍ତାବିତ ମଲ୍ଟି-ଟ୍ରାକିଂ ପ୍ରକଳ୍ପ ଦ୍ୱାରା ପ୍ରାୟ ୪,୭୯୦ଟି ଗାଁ ରେଳ ସଂଯୋଗ ପାଇବ। ଏହି ଗାଁଗୁଡ଼ିକରେ ପ୍ରାୟ ୫୬ ଲକ୍ଷ ଲୋକ ବସବାସ କରୁଥିବା ଜଣାପଡ଼ିଛି।
ପର୍ଯ୍ୟଟନ ଓ ଅର୍ଥନୀତିକୁ ମିଳିବ ଗତି
ଏହି ରେଳ ପ୍ରକଳ୍ପଗୁଡ଼ିକ ଅଞ୍ଚଳର ଯାତାୟାତ ସହିତ ପର୍ଯ୍ୟଟନ ଓ ଅର୍ଥନୈତିକ ବିକାଶକୁ ମଧ୍ୟ ଗତି ଦେବ। ପ୍ରକଳ୍ପ ଅଧୀନରେ ତାରାତାରିଣୀ ମନ୍ଦିର, ଶ୍ରୀକ୍ଷେତ୍ର ଜଗନ୍ନାଥ ମନ୍ଦିର, ବାନ୍ଧବଗଡ଼ ବ୍ୟାଘ୍ର ଅଭୟାରଣ୍ୟ, ବିରାଟେଶ୍ୱର ମନ୍ଦିର, ଅମରକଣ୍ଟକ ମନ୍ଦିର, ଜ୍ୱାଳେଶ୍ୱର ଧାମ, ଅଚାନକମାର ବ୍ୟାଘ୍ର ଅଭୟାରଣ୍ୟ, ଖୁଟାଘାଟ ଡ୍ୟାମ୍, ମଲହାର ପ୍ରତ୍ନତାତ୍ତ୍ୱିକ ସ୍ଥଳୀ ଓ ରତନପୁର ମହାମାୟା ମନ୍ଦିର ଭଳି ପ୍ରମୁଖ ସ୍ଥାନ ଅନ୍ତର୍ଭୁକ୍ତ ରହିଛି।ଏହି ପ୍ରକଳ୍ପଗୁଡ଼ିକୁ ପିଏମ୍ ଗତି ଶକ୍ତି ଜାତୀୟ ମାଷ୍ଟର ପ୍ଲାନ୍ ଅଧୀନରେ ଯୋଜନା କରାଯାଇଛି। ଏହା ମାଧ୍ୟମରେ ଲୋକ, ସାମଗ୍ରୀ ଓ ସେବାର ସୁଗମ ପରିବହନ ସହ ଲଜିଷ୍ଟିକ୍ସ କ୍ଷମତା ବଢ଼ିବ। ଏଥିସହ ଅଞ୍ଚଳରେ ରୋଜଗାର ଓ ସ୍ୱୟଂରୋଜଗାରର ସୁଯୋଗ ବୃଦ୍ଧି ପାଇବ ବୋଲି ଆଶା କରାଯାଉଛି।
