କେନ୍ଦୁଝର/ପାଟଣା, ୨୦/୯: ଓଡ଼ିଶା ଆଦର୍ଶ ବିଦ୍ୟାଳୟର ପ୍ରତିଷ୍ଠା ଦିବସ ଅବସରରେ କେନ୍ଦୁଝର ଜିଲ୍ଲାସ୍ତରୀୟ ‘ସ୍ପାର୍କ-୨୦୨୭’ ପ୍ରତିଯୋଗିତା ଆୟୋଜିତ ହୋଇଥିଲା। ଏହି ପ୍ରତିଯୋଗିତାରେ ପାଟଣା ବ୍ଲକ ଅନ୍ତର୍ଗତ କେନ୍ଦେଇପଶି ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀ ବିଭିନ୍ନ ବିଭାଗରେ ଉଲ୍ଲେଖନୀୟ କୃତିତ୍ୱ ହାସଲ କରି ବିଦ୍ୟାଳୟର ଗୌରବ ବଢ଼ାଇଛନ୍ତି।
ଶୁକ୍ରବାର ଆୟୋଜିତ ଏହି ଜିଲ୍ଲାସ୍ତରୀୟ ପ୍ରତିଯୋଗିତାର ପୁରସ୍କାର ବିତରଣ ଉତ୍ସବ ନୋଡାଲ ଅଧ୍ୟକ୍ଷ ଦିଲୀପ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା। ଉତ୍ସବରେ ପାଟଣା ବିଧାୟକ ଅଖିଳ ଚନ୍ଦ୍ର ନାଏକ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଜିଲ୍ଲା ଶିକ୍ଷାଧିକାରୀ ପୂର୍ଣ୍ଣଚନ୍ଦ୍ର ବରିହା, ଅତିରିକ୍ତ ଜିଲ୍ଲାପାଳ ମନ୍ଦରଧର ମହାଲିକ ଓ ସ୍ଥାନୀୟ ଅଧ୍ୟକ୍ଷ ବିଶ୍ୱରଞ୍ଜନ ସାହୁ ସମ୍ମାନିତ ଅତିଥି ଭାବେ ଯୋଗଦେଇଥିଲେ।
ଅତିଥିମାନେ ବିଭିନ୍ନ ବିଭାଗରେ ସଫଳତା ହାସଲ କରିଥିବା କେନ୍ଦେଇପଶି ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀଙ୍କୁ ମାନପତ୍ର ଓ ଟ୍ରଫି ପ୍ରଦାନ କରି ସମ୍ବର୍ଦ୍ଧିତ କରିଥିଲେ।
ବିଭିନ୍ନ ପ୍ରତିଯୋଗିତାରେ କେନ୍ଦେଇପଶି ବିଦ୍ୟାଳୟର ସଫଳତା
ଜୁନିୟର କୁଇଜ୍ ପ୍ରତିଯୋଗିତା: ଅର୍ଚିତ ଅବନିଶ ନାୟକ – ପ୍ରଥମ ସ୍ଥାନ
ଜୁନିୟର ରଚନା ପ୍ରତିଯୋଗିତା: ଶୁଭଶ୍ରୀ ତ୍ରିପାଠୀ – ଦ୍ୱିତୀୟ ସ୍ଥାନ
ସିନିୟର ପ୍ରବନ୍ଧ ପ୍ରତିଯୋଗିତା: ଜ୍ୟୋସ୍ନାରାଣୀ ବେହେରା – ଦ୍ୱିତୀୟ ସ୍ଥାନ
ଜୁନିୟର ଏକକ ଓ ଲୋକନୃତ୍ୟ ପ୍ରତିଯୋଗିତା: ଶ୍ରୀୟାଂଶି ସାହୁ – ଦ୍ୱିତୀୟ ସ୍ଥାନ
ସିନିୟର ଡ୍ରଇଙ୍ଗ ଓ ପେଣ୍ଟିଂ ପ୍ରତିଯୋଗିତା: ଆୟେଶା ପ୍ରଧାନ – ଦ୍ୱିତୀୟ ସ୍ଥାନ
ଛାତ୍ରଛାତ୍ରୀଙ୍କ ଏହି ସଫଳତା ପାଇଁ କେନ୍ଦେଇପଶି ଆଦର୍ଶ ବିଦ୍ୟାଳୟ ପକ୍ଷରୁ ସେମାନଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଯାଇଛି।
ପ୍ରତିଯୋଗିତାରେ ଅଂଶଗ୍ରହଣ କରିଥିବା ଛାତ୍ରଛାତ୍ରୀଙ୍କୁ ବିଦ୍ୟାଳୟର ଅଧ୍ୟକ୍ଷ ସୁବାଷ ଚନ୍ଦ୍ର ବେହେରାଙ୍କ ସମେତ ଶିକ୍ଷକ ସତ୍ୟାନନ୍ଦ ପାଣିଗ୍ରାହୀ, ଚନ୍ଦ୍ରକାନ୍ତ ନାଏକ, ପ୍ରିୟଦର୍ଶନ ସାହୁ, ରଶ୍ମିରେଖା ଦାସ ଓ ପଲ୍ଲବୀ ନିବେଦିତା ପ୍ରମୁଖ ମାର୍ଗଦର୍ଶନ କରିଥିଲେ।
‘ସ୍ପାର୍କ-୨୦୨୭’ ଜିଲ୍ଲାସ୍ତରୀୟ ପ୍ରତିଯୋଗିତାରେ କେନ୍ଦେଇପଶି ଆଦର୍ଶ ବିଦ୍ୟାଳୟର ଏହି ସଫଳତା ବିଦ୍ୟାଳୟର ଛାତ୍ରଛାତ୍ରୀଙ୍କ ସୃଜନଶୀଳତା ଓ ପ୍ରତିଭାର ପରିଚୟ ଦେଇଛି। ଏହି ସଫଳତା ଅନ୍ୟ ଛାତ୍ରଛାତ୍ରୀଙ୍କୁ ମଧ୍ୟ ପ୍ରତିଯୋଗିତାରେ ଆଗକୁ ବଢ଼ିବା ପାଇଁ ପ୍ରେରଣା ଯୋଗାଇବ ବୋଲି ଆଶା କରାଯାଉଛି।
