ଭୁବନେଶ୍ୱର: ସେପ୍ଟେମ୍ବର ୩୦ ବୁଧବାର ରାଜ୍ୟବ୍ୟାପୀ ‘ଓଡ଼ିଶା ବନ୍ଦ’ ଡାକରାକୁ ନେଇ ସତର୍କ ହୋଇଛି ଓଡ଼ିଶା ପ୍ରଶାସନ। ନବ ନିର୍ମାଣ କୃଷକ ସଂଗଠନ (NNKS) ଏବଂ ନବ ନିର୍ମାଣ ଯୁବ ଛାତ୍ର ସଂଗଠନ ପକ୍ଷରୁ ଦିଆଯାଇଥିବା ଏହି ବନ୍ଦ ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ପାଳନ ପାଇଁ ଆହ୍ୱାନ ଦିଆଯାଇଛି।
ବନ୍ଦ ଡାକରାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ଗୃହ ବିଭାଗ ସମସ୍ତ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟଙ୍କୁ ସତର୍କ ରହିବା ସହ ଆବଶ୍ୟକ ପ୍ରତିଷେଧକ ଓ ସୁରକ୍ଷାମୂଳକ ପଦକ୍ଷେପ ନେବାକୁ କହିଛି। ସମ୍ଭାବ୍ୟ ଆଇନଶୃଙ୍ଖଳା ପରିସ୍ଥିତି ଉପରେ ନିରନ୍ତର ନଜର ରଖିବାକୁ ମଧ୍ୟ ନିର୍ଦ୍ଦେଶ ରହିଛି।
ରାସ୍ତାରୋକ ଓ ଯାତାୟାତ ବାଧା ଆଶଙ୍କା
ବନ୍ଦ ସମୟରେ ରାସ୍ତାରୋକ, ଯାନବାହନ ଚଳାଚଳରେ ବାଧା, ଟ୍ରାଫିକ ସମସ୍ୟା ଏବଂ ଅନ୍ୟାନ୍ୟ ଆଇନଶୃଙ୍ଖଳା ସମସ୍ୟା ଦେଖାଦେବାର ଆଶଙ୍କା ରହିଛି। ଏଥିପାଇଁ ସମ୍ବେଦନଶୀଳ ସ୍ଥାନରେ ଆବଶ୍ୟକ ସୁରକ୍ଷା ବ୍ୟବସ୍ଥା କରିବାକୁ ଜିଲ୍ଲା ପ୍ରଶାସନକୁ କୁହାଯାଇଛି।
ସରକାରୀ କାର୍ଯ୍ୟାଳୟ ଓ ଜରୁରୀ ସେବା ଉପରେ ଗୁରୁତ୍ୱ
ବନ୍ଦ ସମୟରେ ସରକାରୀ କାର୍ଯ୍ୟାଳୟର କାର୍ଯ୍ୟ ସ୍ୱାଭାବିକ ରହିବା ସହ ହସ୍ପିଟାଲ, ଆମ୍ବୁଲାନ୍ସ ଓ ଅନ୍ୟାନ୍ୟ ଜରୁରୀକାଳୀନ ସେବା ଯେପରି ବାଧାପ୍ରାପ୍ତ ନହୁଏ, ସେଥିପ୍ରତି ପ୍ରଶାସନକୁ ବିଶେଷ ଧ୍ୟାନ ଦେବାକୁ କୁହାଯାଇଛି।
ପାଠ୍ୟପୁସ୍ତକ ତ୍ରୁଟିକୁ ନେଇ ବନ୍ଦ ଡାକରା
ସମ୍ପ୍ରତି ପ୍ରକାଶିତ ରିପୋର୍ଟ ଅନୁସାରେ, ବିଦ୍ୟାଳୟ ପାଠ୍ୟପୁସ୍ତକରେ ଥିବା କଥିତ ତ୍ରୁଟିକୁ ନେଇ ନବ ନିର୍ମାଣ ଯୁବ ଛାତ୍ର ସଂଗଠନ ପକ୍ଷରୁ ଆନ୍ଦୋଳନ ଓ ବନ୍ଦ ଡାକରା ଦିଆଯାଇଛି। ସଂଗଠନ ପକ୍ଷରୁ ପାଠ୍ୟପୁସ୍ତକ ପ୍ରତ୍ୟାହାର ଏବଂ ସଂଶୋଧିତ ପୁସ୍ତକ ବଣ୍ଟନ ସମେତ ବିଭିନ୍ନ ଦାବି ଉଠାଯାଇଛି।
ଏହି ପରିପ୍ରେକ୍ଷୀରେ ବୁଧବାର ‘ଓଡ଼ିଶା ବନ୍ଦ’କୁ ନେଇ ରାଜ୍ୟର ବିଭିନ୍ନ ଜିଲ୍ଲାରେ ପ୍ରଶାସନ ଓ ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ ଜୋରଦାର କରାଯାଉଛି।
