ଆବୁଧାବି/ଦୁବାଇ, ୯/୯: ଓଡ଼ିଶାର ଶିଳ୍ପ ଓ ନିବେଶ କ୍ଷେତ୍ର ପାଇଁ UAE ଗସ୍ତର ପ୍ରଥମ ଦିନରେ ବଡ଼ ସଫଳତା ମିଳିଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଚାଲିଥିବା ନିବେଶ ଆଲୋଚନାରେ IHC ଓ ଆଦାନୀ ଗ୍ରୁପ୍ ସମେତ ବିଭିନ୍ନ ସଂସ୍ଥା ସହ ୧୪ଟି ନୂଆ ପ୍ରକଳ୍ପ ପାଇଁ ବୁଝାମଣାପତ୍ର (MoU) ସ୍ୱାକ୍ଷର ହୋଇଛି।ଏହି ପ୍ରସ୍ତାବିତ ୧୪ଟି ପ୍ରକଳ୍ପରେ ପ୍ରାୟ ₹୨.୧୦ ଲକ୍ଷ କୋଟି ନିବେଶ ହେବାର ଆକଳନ କରାଯାଇଛି। ଏହା ମାଧ୍ୟମରେ ପ୍ରାୟ ୮ ଲକ୍ଷ ୬୮ ହଜାର ୨୦୦ ନିଯୁକ୍ତି ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି।
ରାୟଗଡ଼ା ଓ ସୁନ୍ଦରଗଡ଼ରେ ବଡ଼ ଆଲୁମିନିୟମ୍ ପ୍ରକଳ୍ପ
IHCର ବିଭିନ୍ନ ବ୍ୟବସାୟିକ ସଂସ୍ଥା ଓ ଗ୍ରୁପ୍ କମ୍ପାନୀ ସହ ହୋଇଥିବା ରାଉଣ୍ଡଟେବୁଲ୍ ବୈଠକରେ ଓଡ଼ିଶାରେ ଇଣ୍ଟିଗ୍ରେଟେଡ୍ ଆଲୁମିନିୟମ୍ ପ୍ରକଳ୍ପ ସ୍ଥାପନ ନେଇ ଆଲୋଚନା ହୋଇଛି।ଆଲୁମିନା ରିଫାଇନାରୀ ପାଇଁ ରାୟଗଡ଼ା ଜିଲ୍ଲାର କଲ୍ୟାଣସିଂହପୁର ତହସିଲ ଏବଂ ଆଲୁମିନିୟମ୍ ସ୍ମେଲ୍ଟର ପାଇଁ ସୁନ୍ଦରଗଡ଼ ଜିଲ୍ଲା ସଦର ତହସିଲରେ ଜମି ପ୍ରସ୍ତାବ ଦିଆଯାଇଛି।ବୈଠକରେ IHCର ଏମ୍ଡି ଓ CEO ସୟଦ ବାସର ଶୁଏବ, ଆଦାନୀ ପୋର୍ଟସ୍ର ଏମ୍ଡି କରଣ ଆଦାନୀ ଏବଂ ଆଦାନୀ ଗ୍ରୀନ୍ ଏନର୍ଜିର ଏକ୍ଜିକ୍ୟୁଟିଭ୍ ଡାଇରେକ୍ଟର ସାଗର ଆଦାନୀଙ୍କ ସମେତ ବିଭିନ୍ନ କମ୍ପାନୀର ଶୀର୍ଷ ଅଧିକାରୀ ଉପସ୍ଥିତ ଥିଲେ।
୧୪ଟି ପ୍ରକଳ୍ପରେ ହେବ ବହୁ କ୍ଷେତ୍ରରେ ନିବେଶ
ଓଡ଼ିଶା ସରକାର, IHC ଓ ଆଦାନୀ ଗ୍ରୁପ୍ ମଧ୍ୟରେ ହୋଇଥିବା MoU ଅନୁଯାୟୀ ଧାତୁ ଡାଉନଷ୍ଟ୍ରିମ୍ ଶିଳ୍ପ, ସ୍ଲରି ପାଇପ୍ଲାଇନ୍, କ୍ରିଟିକାଲ୍ ମିନେରାଲ୍ ଓ ରେୟାର ଆର୍ଥ୍, କେମିକାଲ୍ ଓ ପେଟ୍ରୋକେମିକାଲ୍ ଡେରିଭେଟିଭ୍, ଅକ୍ଷୟ ଶକ୍ତି ଉପକରଣ, ସ୍ୱାସ୍ଥ୍ୟସେବା, ଶିଳ୍ପ ଭିତ୍ତିଭୂମି, ପର୍ଯ୍ୟଟନ, ଦକ୍ଷତା ବିକାଶ ଓ କ୍ରୀଡ଼ା ଭିତ୍ତିଭୂମି ଭଳି କ୍ଷେତ୍ରରେ ନୂଆ ପ୍ରକଳ୍ପ ଆସିବାର ସମ୍ଭାବନା ରହିଛି।ଏହା ଫଳରେ ଆଲୁମିନିୟମ୍ ପ୍ରକଳ୍ପ ବ୍ୟତୀତ IHCର ଅନ୍ୟାନ୍ୟ ବ୍ୟବସାୟ ଓ ନିବେଶ ପାଇଁ ମଧ୍ୟ ଓଡ଼ିଶାରେ ନୂଆ ସୁଯୋଗ ସୃଷ୍ଟି ହୋଇପାରେ।
UAE ସହ ବାଣିଜ୍ୟ ବଢ଼ାଇବାକୁ MoC
ମୁଖ୍ୟମନ୍ତ୍ରୀ ଭାରତୀୟ ବିଜନେସ୍ ଆଣ୍ଡ ପ୍ରଫେସନାଲ୍ ଗ୍ରୁପ୍ (IBPG)ର ପ୍ରତିନିଧିଙ୍କ ସହ ମଧ୍ୟ ଆଲୋଚନା କରିଛନ୍ତି। ଓଡ଼ିଶା ସରକାର ଓ IBPG ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ବୃଦ୍ଧି ଏବଂ ଓଡ଼ିଶାରେ ନିବେଶ ସୁଯୋଗ ଖୋଜିବା ପାଇଁ Memorandum of Cooperation (MoC) ସ୍ୱାକ୍ଷର ହୋଇଛି।ଏହି ସହଯୋଗ ମାଧ୍ୟମରେ ହଳଦୀ, ଅଦା ଭଳି ମସଲା, ସାମୁଦ୍ରିକ ଉତ୍ପାଦ ଏବଂ ଅନ୍ୟାନ୍ୟ ଓଡ଼ିଆ ସାମଗ୍ରୀର UAEକୁ ରପ୍ତାନି ବଢ଼ାଇବା ଉପରେ ଗୁରୁତ୍ୱ ଦିଆଯିବ। ଏଥିସହ UAEର ବଡ଼ ବ୍ରାଣ୍ଡଗୁଡ଼ିକ ପାଇଁ ଓଡ଼ିଶାରେ କଣ୍ଟ୍ରାକ୍ଟ ମାନୁଫାକ୍ଚରିଂ ଓ ଦକ୍ଷ ମାନବସମ୍ବଳର ସୁଯୋଗ ସୃଷ୍ଟି କରିବା ନେଇ ମଧ୍ୟ ଆଲୋଚନା ହୋଇଛି।
Borougeକୁ ପେଟ୍ରୋକେମିକାଲ୍ ପ୍ରକଳ୍ପ ପାଇଁ ଆମନ୍ତ୍ରଣ
ମୁଖ୍ୟମନ୍ତ୍ରୀ Borougeର CEO ହାଜିମ୍ ସୁଲତାନ ଅଲ୍ ସୁୱାଇଦିଙ୍କ ସହ ଆଲୋଚନା କରି ଓଡ଼ିଶାରେ ବଡ଼ ଆକାରର କେମିକାଲ୍ ଡାଉନଷ୍ଟ୍ରିମ୍ କମ୍ପ୍ଲେକ୍ସ ସ୍ଥାପନ ପାଇଁ କମ୍ପାନୀକୁ ଆମନ୍ତ୍ରଣ ଦେଇଛନ୍ତି।ପାରାଦୀପରେ ପ୍ରସ୍ତାବିତ ଇଣ୍ଡିଆନ୍ ଅଏଲ୍ର ନାଫ୍ଥା କ୍ରାକର୍ ପ୍ରକଳ୍ପ ସହ ଫିଡ୍ଷ୍ଟକ୍ ଯୋଗାଣର ସମ୍ଭାବନା ନେଇ ମଧ୍ୟ ଆଲୋଚନା ହୋଇଛି। ଏହା ଓଡ଼ିଶାର ପେଟ୍ରୋକେମିକାଲ୍ ଇକୋସିଷ୍ଟମ୍କୁ ଆହୁରି ସୁଦୃଢ଼ କରିପାରେ।
PPP ମଡେଲ୍ରେ ଭିତ୍ତିଭୂମି ନିବେଶ ଉପରେ ଗୁରୁତ୍ୱ
UAEର ବିଭିନ୍ନ ନିବେଶ ସଂସ୍ଥା ସହ ହୋଇଥିବା ରାଉଣ୍ଡଟେବୁଲ୍ ବୈଠକରେ ଓଡ଼ିଶା ସରକାରଙ୍କ PPP ମଡେଲ୍ରେ ବିକଶିତ ହେବାକୁ ଥିବା ପ୍ରକଳ୍ପଗୁଡ଼ିକ ସମ୍ପର୍କରେ ନିବେଶକଙ୍କୁ ଅବଗତ କରାଯାଇଛି।ଭିତ୍ତିଭୂମି ପ୍ରକଳ୍ପରେ ପ୍ରତିଷ୍ଠାନଗତ ନିବେଶ, ପ୍ରକଳ୍ପ ମୂଲ୍ୟାୟନ ଏବଂ ଦୀର୍ଘମିଆଦୀ ନିବେଶ ସହଯୋଗ ନେଇ ଆଲୋଚନା ହୋଇଛି।UAE ନିବେଶ ଅଭିଯାନର ପ୍ରଥମ ଦିନରେ ଶିଳ୍ପ, ବନ୍ଦର, ବାଣିଜ୍ୟ ଓ ଭିତ୍ତିଭୂମି କ୍ଷେତ୍ରରେ ହୋଇଥିବା ଆଲୋଚନା ଓଡ଼ିଶାରେ ନୂଆ ନିବେଶ, ବ୍ୟାପକ ନିଯୁକ୍ତି ସୁଯୋଗ ଏବଂ ବିଶ୍ୱ ବଜାରକୁ ରାଜ୍ୟର ପ୍ରବେଶକୁ ଆହୁରି ବଢ଼ାଇବ ବୋଲି ଆଶା କରାଯାଉଛି।
