ଭୁବନେଶ୍ୱର, ୩/୧୦: ଆଗାମୀ ପଞ୍ଚାୟତ ଓ ପୌର ନିର୍ବାଚନକୁ ନଜରରେ ରଖି ଓଡ଼ିଶାରେ ଭାରତୀୟ ଜନତା ପାର୍ଟି (ବିଜେପି) ପକ୍ଷରୁ ସଂଗଠନକୁ ଆହୁରି ସୁଦୃଢ଼ କରିବା ଦିଗରେ ପ୍ରସ୍ତୁତି ଆରମ୍ଭ ହୋଇଛି। ଦଳର ସଂଗଠନ ବୈଠକରେ ଆଗାମୀ ଦିନର କାର୍ଯ୍ୟପନ୍ଥା ସହ ସରକାର ଓ ସଂଗଠନ ମଧ୍ୟରେ ସମନ୍ୱୟ ଉପରେ ଗୁରୁତ୍ୱ ଦିଆଯାଇଛି।ବିଜେପି ରାଜ୍ୟ ସଭାପତି ମନମୋହନ ସାମଲ ଗଣମାଧ୍ୟମକୁ ପ୍ରତିକ୍ରିୟା ଦେଇ ଦଳର ସଂଗଠନ ଓ ଆଗାମୀ କାର୍ଯ୍ୟପନ୍ଥା ସମ୍ପର୍କରେ ସୂଚନା ଦେଇଛନ୍ତି।
ସଂଗଠନ ବୁଝିବାରେ ଅଧିକ ସମୟ ଲାଗିବ ନାହିଁ
ଦଳୀୟ ନେତୃତ୍ୱ ସମ୍ପର୍କରେ ମନମୋହନ ସାମଲ କହିଛନ୍ତି ଯେ, ପୁରନ୍ଦେଶ୍ୱରୀ ଦୀର୍ଘ ସମୟ ଧରି ଓଡ଼ିଶାର ବିଜେପି ସଂଗଠନ ସହ ଜଡ଼ିତ ରହିଛନ୍ତି। ଓଡ଼ିଶାର ସଂଗଠନ ଓ କାର୍ଯ୍ୟକର୍ତ୍ତାଙ୍କ ସହ ତାଙ୍କର ଦୀର୍ଘଦିନର ପରିଚୟ ରହିଛି।ପୂର୍ବରୁ ହୋଇଥିବା ନିର୍ବାଚନରେ ରଣନୀତି ପ୍ରସ୍ତୁତିରେ ମଧ୍ୟ ସେ ଜଡ଼ିତ ଥିବାରୁ ରାଜ୍ୟ ସଂଗଠନକୁ ବୁଝିବା ପାଇଁ ଅଧିକ ସମୟ ଲାଗିବ ନାହିଁ ବୋଲି ସାମଲ କହିଛନ୍ତି। ଦଳର ଟିମ୍କୁ ସାଙ୍ଗରେ ନେଇ ଆଗକୁ କାମ କରାଯିବ। ଦାୟିତ୍ୱ ଗ୍ରହଣ ପରେ ବିଭିନ୍ନ ନେତା ଓ କାର୍ଯ୍ୟକର୍ତ୍ତାଙ୍କ ସହ ପରିଚୟାତ୍ମକ ବୈଠକ, ଆଲୋଚନା ଓ ଚର୍ଚ୍ଚା କରାଯିବ ବୋଲି ସେ କହିଛନ୍ତି।
ମହିଳା ଓ ଯୁବ ନେତୃତ୍ୱକୁ ଗୁରୁତ୍ୱ
ସରକାର ଓ ସଂଗଠନ ମଧ୍ୟରେ ତାଳମେଳ ରଖି ଆଗକୁ ବଢ଼ିବା ଦଳର ମୁଖ୍ୟ ଲକ୍ଷ୍ୟ ବୋଲି ମନମୋହନ ସାମଲ କହିଛନ୍ତି। ସମସ୍ତଙ୍କୁ ଏକାଠି ନେଇ କାମ କଲେ ସଂଗଠନ ଆହୁରି ମଜବୁତ ହେବ ବୋଲି ସେ ମତ ଦେଇଛନ୍ତି।ଏଥିସହ ଯୁବବର୍ଗଙ୍କୁ ସଂଗଠନର ଭବିଷ୍ୟତ ଭାବେ ଗୁରୁତ୍ୱ ଦିଆଯିବା ସହ ମହିଳା ଓ ଯୁବ ନେତୃତ୍ୱକୁ ଅଧିକ ସୁଯୋଗ ଦେବା ଉପରେ ଗୁରୁତ୍ୱ ରହିବ ବୋଲି ସେ କହିଛନ୍ତି।ଆଗାମୀ ପଞ୍ଚାୟତ ଓ ପୌର ନିର୍ବାଚନକୁ ନଜରରେ ରଖି ଯୁବବର୍ଗଙ୍କୁ ଅଗ୍ରଭାଗରେ ରଖି ଏବଂ ସମସ୍ତ ନେତା ଓ କାର୍ଯ୍ୟକର୍ତ୍ତାଙ୍କୁ ସାଙ୍ଗରେ ନେଇ ସଂଗଠନକୁ ଆଗକୁ ନେବା ଦିଗରେ କାର୍ଯ୍ୟ କରାଯିବ ବୋଲି ସାମଲ ସୂଚନା ଦେଇଛନ୍ତି।
