ଭୁବନେଶ୍ୱର: ବିଜେପି ରାଜ୍ୟ ପ୍ରଭାରୀ ଡି. ପୁରନ୍ଦେଶ୍ୱରୀଙ୍କ ଦୁଇ ଦିନିଆ ଓଡ଼ିଶା ଗସ୍ତ ଶେଷ ହୋଇଛି। ଆଗାମୀ ପଞ୍ଚାୟତ ଓ ପୌର ନିର୍ବାଚନକୁ ନଜରରେ ରଖି ଏହି ଗସ୍ତ ସମୟରେ ଦଳର ସାଂଗଠନିକ ସ୍ଥିତି ଓ ନିର୍ବାଚନୀ ରଣନୀତି ନେଇ ବିସ୍ତୃତ ଆଲୋଚନା ହୋଇଛି।ପୁରନ୍ଦେଶ୍ୱରୀ ଦଳୀୟ ପଦାଧିକାରୀଙ୍କ ସହ ୱାନ୍-ଟୁ-ୱାନ୍ ଆଲୋଚନା କରିବା ସହ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିଜେପି ରାଜ୍ୟ ସଭାପତି ମନମୋହନ ସାମଲ, ମନ୍ତ୍ରୀମଣ୍ଡଳର ସଦସ୍ୟ ଓ ଦଳର ବରିଷ୍ଠ ପଦାଧିକାରୀଙ୍କ ସହ ରୁଦ୍ଧଦ୍ୱାର ବୈଠକ କରିଛନ୍ତି। ଆଗାମୀ ନିର୍ବାଚନରେ ବିରୋଧୀଙ୍କ ରଣନୀତିକୁ କିପରି କାଉଣ୍ଟର କରାଯିବ, ସେନେଇ ମଧ୍ୟ ଆଲୋଚନା ହୋଇଥିବା ଜଣାପଡ଼ିଛି।
ପଞ୍ଚାୟତ ନିର୍ବାଚନ ପାଇଁ ଗ୍ରାଉଣ୍ଡ ରଣନୀତି
ପଞ୍ଚାୟତ ଓ ପୌର ନିର୍ବାଚନକୁ ନେଇ ବିଜେପି ଏବେଠାରୁ ସାଂଗଠନିକ ପ୍ରସ୍ତୁତି ଆରମ୍ଭ କରିଛି। କେଉଁ ଅଞ୍ଚଳରେ ଦଳର ସ୍ଥିତି ମଜବୁତ ରହିଛି ଏବଂ କେଉଁଠି ଅଧିକ ସାଂଗଠନିକ ଶକ୍ତି ବଢ଼ାଇବା ଆବଶ୍ୟକ, ସେନେଇ ରାଜ୍ୟ ନେତୃତ୍ୱ ସହ ପୁରନ୍ଦେଶ୍ୱରୀ ଆଲୋଚନା କରିଛନ୍ତି।ଗ୍ରାଉଣ୍ଡ ସ୍ତରରେ ସଂଗଠନକୁ ଆହୁରି ମଜବୁତ କରିବା, ଲୋକଙ୍କ ନିକଟରେ ସରକାରଙ୍କ ଜନାଭିମୁଖୀ କାର୍ଯ୍ୟକ୍ରମ ପହଞ୍ଚାଇବା ଏବଂ ବିରୋଧୀଙ୍କ ରଣନୀତିର ମୁକାବିଲା କରିବା ଉପରେ ଦଳ ଗୁରୁତ୍ୱ ଦେଉଥିବା ଚର୍ଚ୍ଚା ହେଉଛି।
ବିଜେଡିର ମଧ୍ୟ ପ୍ରସ୍ତୁତି
ଅନ୍ୟପଟେ ଆଗାମୀ ପଞ୍ଚାୟତ ନିର୍ବାଚନକୁ ନେଇ ବିଜେଡି ମଧ୍ୟ ଗ୍ରାଉଣ୍ଡରେ ସକ୍ରିୟ ହୋଇଛି। ଦଳ ପକ୍ଷରୁ ମାସେ ବ୍ୟାପୀ ପଦଯାତ୍ରା ମାଧ୍ୟମରେ ଗାଁ-ଗାଁରେ ପହଞ୍ଚିବାକୁ ପ୍ରୟାସ କରାଯାଉଛି। ବିଜେଡି ସବୁବେଳେ ଗ୍ରାଉଣ୍ଡରେ ରହିଥିବା ଦାବି କରି ଦଳୀୟ ନେତାମାନେ ଶାସକ ବିଜେପିକୁ ଚ୍ୟାଲେଞ୍ଜ କରିଛନ୍ତି।
କଂଗ୍ରେସର ମଧ୍ୟ ଦାବି
ସେହିପରି ସରକାରଙ୍କ ଅଢ଼େଇ ବର୍ଷର କାର୍ଯ୍ୟକାଳରେ ବିଜେପିର ଲୋକପ୍ରିୟତା କମୁଥିବା ଦାବି କରିଛି କଂଗ୍ରେସ। ରାଜ୍ୟରେ କଂଗ୍ରେସ ପ୍ରତି ଲୋକଙ୍କ ଆସ୍ଥା ବଢ଼ୁଥିବା ଦଳ ଦାବି କରିବା ସହ ସରକାରଙ୍କ ଯୋଜନା ଓ କାର୍ଯ୍ୟକଳାପକୁ ନେଇ ଲୋକଙ୍କ ନିକଟକୁ ଯିବାକୁ ପ୍ରସ୍ତୁତି କରୁଛି।ଆଗାମୀ ଦିନରେ ଶାସକ ବିଜେପି ନିଜର ଜନାଭିମୁଖୀ କାର୍ଯ୍ୟକୁ ନେଇ ଭୋଟରଙ୍କ ଆସ୍ଥା ଜିତିବାକୁ ଚେଷ୍ଟା କରିବ। ଅନ୍ୟପଟେ ବିଜେଡି ଓ କଂଗ୍ରେସ ସରକାରଙ୍କ ଦୋଷ-ଦୁର୍ବଳତାକୁ ପ୍ରସଙ୍ଗ କରି ଲୋକଙ୍କ ପାଖକୁ ଯିବେ। ଶେଷରେ ଆଗାମୀ ପଞ୍ଚାୟତ ଓ ପୌର ନିର୍ବାଚନରେ ଓଡ଼ିଶାର ଭୋଟର କାହାକୁ ଭରସା କରିବେ, ତାହା ନିର୍ବାଚନ ଫଳାଫଳ ପରେ ସ୍ପଷ୍ଟ ହେବ।
