ଭୁବନେଶ୍ୱର: ଷଣ୍ଢ ସହ ବାଇକ୍ ଧକ୍କା ହୋଇ ଜଣେ ଯୁବ ଇଞ୍ଜିନିୟରଙ୍କ ମୃତ୍ୟୁ ଘଟିଛି। ଭୁବନେଶ୍ୱରର ୨୦୦ ଫୁଟ୍ ରୋଡ୍ରେ ଗୁରୁବାର ଘଟିଥିବା ଏହି ଦୁର୍ଘଟଣାରେ କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ୍ ଭୋଗାମୁଣ୍ଡା ପଞ୍ଚାୟତ ନୂଆଗାଁର ଜଗନ୍ନାଥ ମହାନ୍ତଙ୍କ ମୃତ୍ୟୁ ଘଟିଛି।ଜଗନ୍ନାଥ ଭୁବନେଶ୍ୱରର ଏକ ପ୍ରତିଷ୍ଠିତ ସଫ୍ଟୱେର କମ୍ପାନୀରେ ଇଞ୍ଜିନିୟର ଭାବେ କାମ କରୁଥିଲେ। ଗୁରୁବାର ଅପରାହ୍ନରେ କାମ ସାରି ଘରକୁ ଫେରୁଥିବା ବେଳେ ୨୦୦ ଫୁଟ୍ ରୋଡ୍ରେ ହଠାତ୍ ଏକ ଷଣ୍ଢ ରାସ୍ତାକୁ ଆସିଯାଇଥିଲା। ଫଳରେ ତାଙ୍କ ବାଇକ୍ ଷଣ୍ଢ ସହ ଧକ୍କା ହୋଇଥିଲା।ଦୁର୍ଘଟଣାରେ ଜଗନ୍ନାଥ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ତାଙ୍କୁ ତୁରନ୍ତ ନିକଟସ୍ଥ ଏକ ଘରୋଇ ହସ୍ପିଟାଲକୁ ନେଇଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।ପର୍ବତାରୋହଣ ଓ ସମାଜସେବାରେ ଥିଲେ ପରିଚିତଇଞ୍ଜିନିୟର ଭାବେ କାର୍ଯ୍ୟ କରିବା ସହ ଜଗନ୍ନାଥ ମହାନ୍ତ ପର୍ବତାରୋହଣ ଓ ସମାଜସେବା କ୍ଷେତ୍ରରେ ମଧ୍ୟ ପରିଚିତ ଥିଲେ। ତାଙ୍କ ପର୍ବତାରୋହଣ ସଫଳତା ପାଇଁ ତାଙ୍କ ନାମ Worldwide Book of Records, International Book of Records, Universal Book of Records ଏବଂ Indian Book of Recordsରେ ସ୍ଥାନ ପାଇଥିବା ଜଣାପଡ଼ିଛି।୨୦୨୧ ମସିହାରେ ସେ Global Change Maker Award ପାଇଥିବା ନେଇ ମଧ୍ୟ ସୂଚନା ମିଳିଛି। ପର୍ବତାରୋହଣ ସହ ସମାଜସେବା କାର୍ଯ୍ୟରେ ମଧ୍ୟ ତାଙ୍କର ଅବଦାନ ଥିଲା।ଜଗନ୍ନାଥଙ୍କ ଅକାଳ ବିୟୋଗରେ ପରିବାର, ବନ୍ଧୁବର୍ଗ ଓ ତାଙ୍କୁ ଜାଣିଥିବା ଲୋକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି।ନିଜ ଗାଁରେ ହେବ ଶେଷକୃତ୍ୟଜଗନ୍ନାଥଙ୍କ ମୃତଦେହର ବ୍ୟବଚ୍ଛେଦ ଭୁବନେଶ୍ୱର କ୍ୟାପିଟାଲ ହସ୍ପିଟାଲରେ କରାଯିବ। ଏହାପରେ ତାଙ୍କ ମରଶରୀରକୁ କେନ୍ଦୁଝର ଜିଲ୍ଲାର ନିଜ ଗାଁ ନୂଆଗାଁକୁ ନିଆଯିବ। ସେଠାରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ।
