ଅନୁଗୋଳ/ଛେଣ୍ଡିପଦା, ୦୫/୧୦: ଘରେ ୧୫ ଜଣ ଶୋଇଥିବା ବେଳେ ଦୋକାନ ଭାଙ୍ଗି ଘର ଭିତରକୁ ପଶିଗଲା ହାଇୱା। ତେବେ ଅଳ୍ପକେ ବଡ଼ ଦୁର୍ଘଟଣାରୁ ବର୍ତ୍ତିଗଲେ ଘରେ ଥିବା ୧୫ ଜଣ। ଅନୁଗୋଳ ଜିଲ୍ଲା ଛେଣ୍ଡିପଦା ଅଞ୍ଚଳର ନିଶା ଛକରେ ଏହି ଦୁର୍ଘଟଣା ଘଟିଛି।ସୂଚନା ଅନୁସାରେ, ଅନୁଗୋଳରୁ ଛେଣ୍ଡିପଦା ଯାଇଥିବା ୬୩ ନମ୍ବର ରାଜ୍ୟ ରାଜପଥର ନିଶା ଶିଳ୍ପାଞ୍ଚଳ ଥାନା ଅନ୍ତର୍ଗତ ନିଶା ଛକରେ ଦ୍ରୁତ ଗତିରେ ଆସୁଥିବା ଏକ ହାଇୱା ଭାରସାମ୍ୟ ହରାଇଥିଲା। ଫଳରେ ହାଇୱାଟି ଏକ ଜଳଖିଆ ଦୋକାନକୁ ଧକ୍କା ଦେଇ ଦୋକାନ ଭାଙ୍ଗିବା ସହ ନିକଟସ୍ଥ ଘର ଭିତରକୁ ପଶିଯାଇଥିଲା।ଦୁର୍ଘଟଣା ସମୟରେ ଘର ଭିତରେ ୧୫ ଜଣ ଶୋଇଥିଲେ। ହାଇୱା ଘର ଭିତରକୁ ପଶିଯାଇଥିଲେ ମଧ୍ୟ ସମସ୍ତେ ଅଳ୍ପକେ ରକ୍ଷା ପାଇଛନ୍ତି। ଫଳରେ ଏକ ବଡ଼ ଅଘଟଣ ଟଳିଯାଇଛି।ସୂଚନା ମୁତାବକ, ହାଇୱାଟି ଚଣ୍ଡିଖୋଲରୁ ଛେଣ୍ଡିପଦାସ୍ଥିତ ନୟନୀ କୋଇଲା ଖଣିକୁ କୋଇଲା ଲୋଡିଂ ପାଇଁ ଯାଉଥିଲା। ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ଏହି ରାସ୍ତାରେ ସ୍ଥାୟୀ ପ୍ରତିକାର ଦାବି କରି ସ୍ଥାନୀୟ ଲୋକେ ଦାବି ଉଠାଇଛନ୍ତି।ଦୁର୍ଘଟଣା ଯୋଗୁଁ ରାସ୍ତାର ଉଭୟ ପାର୍ଶ୍ୱରେ ଶହ ଶହ ଟ୍ରକ୍ ଅଟକି ରହିଥିବା ଜଣାପଡ଼ିଛି। ଘଟଣାସ୍ଥଳରେ ପୁଲିସ ପହଞ୍ଚି ସ୍ଥିତି ନିୟନ୍ତ୍ରଣ ଓ ଯାତାୟାତ ସ୍ୱାଭାବିକ କରିବାକୁ ପ୍ରୟାସ କରୁଛି।
