କେନ୍ଦୁଝର/ପାଟଣା, ୧୧/୧୦: କେନ୍ଦୁଝର ଜିଲ୍ଲା ପାଟଣା ବନାଞ୍ଚଳ ଅନ୍ତର୍ଗତ ବାଉଁଶୁଳି ସଂରକ୍ଷିତ ଜଙ୍ଗଲ ସୀମାରେ ଖୋଲାଯାଇଥିବା ଏକ ବିଦେଶୀ ମଦ ଦୋକାନକୁ ନେଇ ବିବାଦ ଦେଖାଦେଇଛି। ଦୋକାନଟିକୁ ଆସନ୍ତା ୩ ଦିନ ମଧ୍ୟରେ ଅନ୍ୟ ସ୍ଥାନକୁ ସ୍ଥାନାନ୍ତର କରିବାକୁ ବନ ବିଭାଗ ପକ୍ଷରୁ ଲଟକା ଜାରି କରାଯାଇଛି।ସୂଚନା ଅନୁଯାୟୀ, ପ୍ରାୟ ୩ ସପ୍ତାହ ପୂର୍ବରୁ ଗୋଡ଼ିପୋଖରୀ ଗ୍ରାମରେ ଏକ ବିଦେଶୀ ମଦ ଦୋକାନ ଖୋଲାଯାଇଥିଲା। ଗ୍ରାମବାସୀଙ୍କ ତୀବ୍ର ବିରୋଧ ପରେ ଦୋକାନ ମାଲିକ ଏହାକୁ ବାଉଁଶୁଳି ସଂରକ୍ଷିତ ଜଙ୍ଗଲ ସୀମାକୁ ସ୍ଥାନାନ୍ତର କରିଥିଲେ।ତେବେ ସଂରକ୍ଷିତ ଜଙ୍ଗଲ ସୀମାରେ ମଦ ଦୋକାନ ଥିବାରୁ ଖିରେଇଟାଙ୍ଗିରି ବନପାଳ ପୂର୍ଣ୍ଣଚନ୍ଦ୍ର ମହାନ୍ତ ଏହାକୁ ହଟାଇବାକୁ ଦୋକାନ ମାଲିକଙ୍କୁ କହିଥିଲେ। କିନ୍ତୁ ଦୋକାନ ହଟାଯାଇନଥିବାରୁ ବନ ବିଭାଗ ପକ୍ଷରୁ ଆଜି ଅପରାହ୍ନରେ ଲଟକା ଜାରି କରାଯାଇଛି।ଲଟକାରେ ଆସନ୍ତା ୩ ଦିନ ମଧ୍ୟରେ ମଦ ଦୋକାନଟିକୁ ଅନ୍ୟ ସ୍ଥାନକୁ ସ୍ଥାନାନ୍ତର ନକଲେ ଜଙ୍ଗଲ ଆଇନ ଅନୁଯାୟୀ ପଦକ୍ଷେପ ନିଆଯିବ ବୋଲି ଚେତାବନୀ ଦିଆଯାଇଛି।
