କେନ୍ଦୁଝର,୧୨/୯,: କେନ୍ଦୁଝର ସାଂସଦ ଅନନ୍ତ ନାୟକ ଆଜି ଢେଙ୍କିକୋଟ ନିକଟସ୍ଥ ସାନ୍ତରାପୁର ଗ୍ରାମରେ ଥିବା ଲକ୍ଷ୍ମୀନାରାୟଣ ଉଚ୍ଚ ବିଦ୍ୟାଳୟ ପରିଦର୍ଶନ କରିଛନ୍ତି। ସକାଳୁଆ ବିଦ୍ୟାଳୟ ଚାଲିଥିବା ସମୟରେ ସକାଳ ପ୍ରାୟ ୭ଟାରେ ସାଂସଦଙ୍କ ବିଦ୍ୟାଳୟ ପରିଦର୍ଶନ ଏବେ ଚର୍ଚ୍ଚାର ବିଷୟ ହୋଇଛି।ପରିଦର୍ଶନ ସମୟରେ ସାଂସଦ ଡ୍ରିଲ୍ କ୍ଲାସରେ ଛାତ୍ରଛାତ୍ରୀଙ୍କୁ ଭେଟି ସେମାନଙ୍କ ପାଠପଢ଼ା ଓ ଶିକ୍ଷା ସମ୍ପର୍କରେ ଆଲୋଚନା କରିଥିଲେ। ଛାତ୍ରଛାତ୍ରୀଙ୍କ ଶିକ୍ଷା ସହ କ୍ରୀଡ଼ା ଓ ଶାରୀରିକ ବିକାଶ ଉପରେ ମଧ୍ୟ ଗୁରୁତ୍ୱ ଦେଇଥିଲେ।
ବିଦ୍ୟାଳୟର ପ୍ରଧାନ ଶିକ୍ଷକ ସନ୍ତୋଷ କୁମାର ଶତପଥି ଓ କ୍ରୀଡ଼ା ଶିକ୍ଷକ ଲକ୍ଷ୍ମୀଧର ମହାନ୍ତଙ୍କ ତତ୍ତ୍ୱାବଧାନରେ ଚାଲିଥିବା ଡ୍ରିଲ୍ କ୍ଲାସ ପରିଦର୍ଶନ କରିବା ପରେ ସାଂସଦ ବିଦ୍ୟାଳୟର ସ୍ମାର୍ଟ କ୍ଲାସରୁମ୍, ଖେଳ ପଡ଼ିଆ ଓ ପରିବେଶ ବୁଲି ଦେଖିଥିଲେ।
ଏହି ସମୟରେ ପ୍ରଧାନ ଶିକ୍ଷକ ଶ୍ରୀ ଶତପଥି ବିଦ୍ୟାଳୟରେ ଲାଇବ୍ରେରୀ ରୁମ୍ ନଥିବା ସହ ଅନ୍ୟାନ୍ୟ ଆବଶ୍ୟକତା ସମ୍ପର୍କରେ ସାଂସଦଙ୍କୁ ଅବଗତ କରାଇଥିଲେ।
ସକାଳ ସମୟରେ ସାଂସଦଙ୍କ ଏଭଳି ବିଦ୍ୟାଳୟ ପରିଦର୍ଶନ ଓ ଛାତ୍ରଛାତ୍ରୀଙ୍କ ସହ ସିଧାସଳଖ ଆଲୋଚନା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ପ୍ରସଙ୍ଗ ହୋଇଛି।
