ବାରିପଦା: ଅଡିଟ୍ ରିପୋର୍ଟ ନିଜ ସପକ୍ଷରେ ଦେବା ପାଇଁ ବିଦ୍ୟାଳୟ ଓ ଛାତ୍ରାବାସ କର୍ତ୍ତୃପକ୍ଷଙ୍କଠାରୁ ପ୍ରତି ଛାତ୍ରଙ୍କ ପିଛା ୧୦ ଟଙ୍କା ଲେଖାଏଁ ଆଦାୟ କରୁଥିବା ଅଭିଯୋଗରେ ଦୁଇଜଣ ସରକାରୀ ଅଡିଟରଙ୍କୁ ଓଡ଼ିଶା ଭିଜିଲାନ୍ସ ଗିରଫ କରିଛି। ମୟୂରଭଞ୍ଜ ଜିଲ୍ଲାର ବାରିପଦାରେ ଭିଜିଲାନ୍ସ ଚଢ଼ାଉ ବେଳେ ସେମାନଙ୍କ ନିକଟରୁ ମୋଟ ୧୪ ଲକ୍ଷ ୩୮ ହଜାର ୩୪୦ ଟଙ୍କା ନଗଦ ଜବତ ହୋଇଛି।ଗିରଫ ଅଡିଟର ଦୁଇଜଣ ହେଲେ ପ୍ରଶାନ୍ତ କୁମାର ପ୍ରଧାନ ଓ ପ୍ରଜ୍ଞାନ ପ୍ରକାଶ ପାତ୍ର। ସେମାନେ ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗର ଅଡିଟର ଭାବେ କାର୍ଯ୍ୟରତ ଥିଲେ।
ଭିଜିଲାନ୍ସ ପକ୍ଷରୁ କୁହାଯାଇଛି ଯେ, ଅଭିଯୁକ୍ତ ଅଡିଟରମାନେ ବିଭିନ୍ନ ବିଦ୍ୟାଳୟ ଓ ଛାତ୍ରାବାସର ଅଡିଟ୍ ରିପୋର୍ଟ ଅନୁକୂଳ ଭାବେ ପ୍ରସ୍ତୁତ କରିବା ପାଇଁ କର୍ତ୍ତୃପକ୍ଷଙ୍କ ଉପରେ ଚାପ ପକାଉଥିଲେ। ଏଥିପାଇଁ ପ୍ରତି ନାମଲେଖା ଛାତ୍ରଙ୍କ ପିଛା ୧୦ ଟଙ୍କା ଆଦାୟ କରୁଥିବା ଅଭିଯୋଗ ରହିଛି।ଗୁରୁବାର ବିଳମ୍ବିତ ରାତିରେ ଉଭୟ ଅଡିଟର ଏକ ସରକାରୀ ଏସ୍ୟୁଭିରେ ମୟୂରଭଞ୍ଜ ଜିଲ୍ଲା କଲ୍ୟାଣ ଅଧିକାରୀଙ୍କ କାର୍ଯ୍ୟାଳୟରୁ ବାରିପଦାସ୍ଥିତ ହୋଟେଲକୁ ଫେରୁଥିବା ସମୟରେ ଭିଜିଲାନ୍ସ ଟିମ୍ ସେମାନଙ୍କୁ ଅଟକାଇ ତଲାସୀ କରିଥିଲା।ତଲାସୀ ସମୟରେ ୫୨ଟି ଲଫାପାରେ ରଖାଯାଇଥିବା ୫ ଲକ୍ଷ ୫୧ ହଜାର ୫୧୦ ଟଙ୍କା ନଗଦ ଜବତ ହୋଇଥିଲା। ପରେ ଭିଜିଲାନ୍ସ ଅଧିକାରୀମାନେ ସେମାନଙ୍କ ହୋଟେଲ କୋଠରୀରେ ଚଢ଼ାଉ କରି ଆଉ ୮ ଲକ୍ଷ ୮୬ ହଜାର ୮୩୦ ଟଙ୍କା ଜବତ କରିଥିଲେ।ଏହିପରି ଭାବେ ଉଭୟ ଅଡିଟରଙ୍କ ନିକଟରୁ ମୋଟ ୧୪,୩୮,୩୪୦ ଟଙ୍କା ନଗଦ ଜବତ ହୋଇଛି।ସୂଚନା ଅନୁଯାୟୀ, ଉଭୟ ଅଡିଟରଙ୍କୁ ଅଗଷ୍ଟ ୩୦ ତାରିଖରେ ଭୁବନେଶ୍ୱରରୁ ବାରିପଦାକୁ ଅଡିଟ୍ ପାଇଁ ଡେପୁଟେସନରେ ପଠାଯାଇଥିଲା। ସେମାନେ ଆଶ୍ରମ ବିଦ୍ୟାଳୟ, ସେବାଶ୍ରମ ବିଦ୍ୟାଳୟ, ହାଇସ୍କୁଲ, ଉଚ୍ଚ ମାଧ୍ୟମିକ ବିଦ୍ୟାଳୟ ଓ ବିଭିନ୍ନ ଛାତ୍ରାବାସର ଅଡିଟ୍ କରୁଥିଲେ।ଘଟଣାକୁ ନେଇ ଭିଜିଲାନ୍ସ ପକ୍ଷରୁ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ରହିଛି।
