ଘଟଗାଁ ଆଦର୍ଶ ବିଦ୍ୟାଳୟରେ ୧୧ତମ ପ୍ରତିଷ୍ଠା ଦିବସ ପାଳିତ

ଘଟଗାଁ, ୧୧/୯: ଘଟଗାଁ ବ୍ଲକ ଅନ୍ତର୍ଗତ ଢେଙ୍କିକୋଟ ଟିକିରାସ୍ଥିତ ଆଦର୍ଶ ବିଦ୍ୟାଳୟର ୧୧ତମ ପ୍ରତିଷ୍ଠା ଦିବସ ଗୁରୁବାର ବିଦ୍ୟାଳୟ ପରିସରରେ ଉତ୍ସାହ ଓ ଆନନ୍ଦର ସହ ପାଳିତ ହୋଇଯାଇଛି।ଭାରପ୍ରାପ୍ତ ଅଧ୍ୟକ୍ଷ ଭ୍ରମରବର ମଲ୍ଲିକଙ୍କ ଅଧ୍ୟକ୍ଷତାରେ ଆୟୋଜିତ ଏହି ପ୍ରତିଷ୍ଠା ଦିବସ ସମାରୋହରେ ମୁଖ୍ୟ ଅତିଥି ଭାବେ ସାଂସଦ ପ୍ରତିନିଧି ଅଖିଳ ପାତ୍ର ଯୋଗଦେଇଥିଲେ। ମୁଖ୍ୟ ବକ୍ତା ଭାବେ ଘଟଗାଁ ବ୍ଲକ ଶିକ୍ଷାଧିକାରୀ ହରେକୃଷ୍ଣ ନାୟକ ଯୋଗଦେଇ ଶିକ୍ଷାର ଗୁରୁତ୍ୱ ଓ ଛାତ୍ରଛାତ୍ରୀଙ୍କ ଭବିଷ୍ୟତ ଗଠନରେ ବିଦ୍ୟାଳୟର ଭୂମିକା ସମ୍ପର୍କରେ ଆଲୋକପାତ କରିଥିଲେ।ସମ୍ମାନିତ ଅତିଥି ଭାବେ ବିଡିଓ ଖଗେଶ୍ୱର ବରାଳ ଓ ସିଆରସିସି ଜିତେନ୍ଦ୍ର କୁମାର ଗିରି ଯୋଗଦେଇଥିଲେ। ସେମାନେ ବିଦ୍ୟାଳୟର ଗୁରୁତ୍ୱ, ଶିକ୍ଷା କ୍ଷେତ୍ରରେ ଏହାର ସଫଳତା, ଗୁଣାତ୍ମକ ଶିକ୍ଷା ପ୍ରଦାନ ସହ ସମାଜ ପ୍ରତି ବିଦ୍ୟାଳୟର ଦାୟିତ୍ୱ ଓ ପ୍ରତିବଦ୍ଧତା ଉପରେ ମତବ୍ୟକ୍ତ କରିଥିଲେ।ଏହି ଅବସରରେ ବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ୱାରା ଏକ ମନୋରଞ୍ଜନଧର୍ମୀ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ବିଭିନ୍ନ ସାଂସ୍କୃତିକ ପ୍ରଦର୍ଶନ ମାଧ୍ୟମରେ ଛାତ୍ରଛାତ୍ରୀମାନେ ନିଜର ପ୍ରତିଭା ଓ ସୃଜନଶୀଳତାର ପରିଚୟ ଦେଇଥିଲେ।

କାର୍ଯ୍ୟକ୍ରମକୁ ଶିକ୍ଷକ ଲକ୍ଷ୍ମୀଧାର ସାମଲ ଓ ଶିକ୍ଷୟିତ୍ରୀ କଲ୍ୟାଣୀ ମଲ୍ଲିକ ପରିଚାଳନା କରିଥିବା ବେଳେ ରମାକାନ୍ତ ସେଠୀ ଧନ୍ୟବାଦ ଅର୍ପଣ କରିଥିଲେ।

ପ୍ରତି ଛାତ୍ରଙ୍କଠାରୁ ୧୦ ଟଙ୍କା ଆଦାୟ ଅଭିଯୋଗ: ୧୪.୩୮ ଲକ୍ଷ ଟଙ୍କା ସହ ୨ ସରକାରୀ ଅଡିଟର ଗିରଫ

ବାରିପଦା: ଅଡିଟ୍ ରିପୋର୍ଟ ନିଜ ସପକ୍ଷରେ ଦେବା ପାଇଁ ବିଦ୍ୟାଳୟ ଓ ଛାତ୍ରାବାସ କର୍ତ୍ତୃପକ୍ଷଙ୍କଠାରୁ ପ୍ରତି ଛାତ୍ରଙ୍କ ପିଛା ୧୦ ଟଙ୍କା ଲେଖାଏଁ ଆଦାୟ କରୁଥିବା ଅଭିଯୋଗରେ ଦୁଇଜଣ ସରକାରୀ ଅଡିଟରଙ୍କୁ ଓଡ଼ିଶା ଭିଜିଲାନ୍ସ ଗିରଫ କରିଛି। ମୟୂରଭଞ୍ଜ ଜିଲ୍ଲାର ବାରିପଦାରେ ଭିଜିଲାନ୍ସ ଚଢ଼ାଉ ବେଳେ ସେମାନଙ୍କ ନିକଟରୁ ମୋଟ ୧୪ ଲକ୍ଷ ୩୮ ହଜାର ୩୪୦ ଟଙ୍କା ନଗଦ ଜବତ ହୋଇଛି।ଗିରଫ ଅଡିଟର ଦୁଇଜଣ ହେଲେ ପ୍ରଶାନ୍ତ କୁମାର ପ୍ରଧାନ ଓ ପ୍ରଜ୍ଞାନ ପ୍ରକାଶ ପାତ୍ର। ସେମାନେ ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗର ଅଡିଟର ଭାବେ କାର୍ଯ୍ୟରତ ଥିଲେ।

ଭିଜିଲାନ୍ସ ପକ୍ଷରୁ କୁହାଯାଇଛି ଯେ, ଅଭିଯୁକ୍ତ ଅଡିଟରମାନେ ବିଭିନ୍ନ ବିଦ୍ୟାଳୟ ଓ ଛାତ୍ରାବାସର ଅଡିଟ୍ ରିପୋର୍ଟ ଅନୁକୂଳ ଭାବେ ପ୍ରସ୍ତୁତ କରିବା ପାଇଁ କର୍ତ୍ତୃପକ୍ଷଙ୍କ ଉପରେ ଚାପ ପକାଉଥିଲେ। ଏଥିପାଇଁ ପ୍ରତି ନାମଲେଖା ଛାତ୍ରଙ୍କ ପିଛା ୧୦ ଟଙ୍କା ଆଦାୟ କରୁଥିବା ଅଭିଯୋଗ ରହିଛି।ଗୁରୁବାର ବିଳମ୍ବିତ ରାତିରେ ଉଭୟ ଅଡିଟର ଏକ ସରକାରୀ ଏସ୍‌ୟୁଭିରେ ମୟୂରଭଞ୍ଜ ଜିଲ୍ଲା କଲ୍ୟାଣ ଅଧିକାରୀଙ୍କ କାର୍ଯ୍ୟାଳୟରୁ ବାରିପଦାସ୍ଥିତ ହୋଟେଲକୁ ଫେରୁଥିବା ସମୟରେ ଭିଜିଲାନ୍ସ ଟିମ୍ ସେମାନଙ୍କୁ ଅଟକାଇ ତଲାସୀ କରିଥିଲା।ତଲାସୀ ସମୟରେ ୫୨ଟି ଲଫାପାରେ ରଖାଯାଇଥିବା ୫ ଲକ୍ଷ ୫୧ ହଜାର ୫୧୦ ଟଙ୍କା ନଗଦ ଜବତ ହୋଇଥିଲା। ପରେ ଭିଜିଲାନ୍ସ ଅଧିକାରୀମାନେ ସେମାନଙ୍କ ହୋଟେଲ କୋଠରୀରେ ଚଢ଼ାଉ କରି ଆଉ ୮ ଲକ୍ଷ ୮୬ ହଜାର ୮୩୦ ଟଙ୍କା ଜବତ କରିଥିଲେ।ଏହିପରି ଭାବେ ଉଭୟ ଅଡିଟରଙ୍କ ନିକଟରୁ ମୋଟ ୧୪,୩୮,୩୪୦ ଟଙ୍କା ନଗଦ ଜବତ ହୋଇଛି।ସୂଚନା ଅନୁଯାୟୀ, ଉଭୟ ଅଡିଟରଙ୍କୁ ଅଗଷ୍ଟ ୩୦ ତାରିଖରେ ଭୁବନେଶ୍ୱରରୁ ବାରିପଦାକୁ ଅଡିଟ୍ ପାଇଁ ଡେପୁଟେସନରେ ପଠାଯାଇଥିଲା। ସେମାନେ ଆଶ୍ରମ ବିଦ୍ୟାଳୟ, ସେବାଶ୍ରମ ବିଦ୍ୟାଳୟ, ହାଇସ୍କୁଲ, ଉଚ୍ଚ ମାଧ୍ୟମିକ ବିଦ୍ୟାଳୟ ଓ ବିଭିନ୍ନ ଛାତ୍ରାବାସର ଅଡିଟ୍ କରୁଥିଲେ।ଘଟଣାକୁ ନେଇ ଭିଜିଲାନ୍ସ ପକ୍ଷରୁ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ରହିଛି।

ଅଧ୍ୟାପକ ପଦବୀ ପୂରଣ ଦାବିରେ ମହାବିଦ୍ୟାଳୟ ଫାଟକରେ ଛାତ୍ରଛାତ୍ରୀଙ୍କ ଧାରଣା

ପାଟଣା, ୯/୯: କେନ୍ଦୁଝର ଜିଲ୍ଲା ପାଟଣା ବ୍ଲକ ମୁଖ୍ୟାଳୟସ୍ଥିତ ସ୍ୱାମପାଟଣା ଆଞ୍ଚଳିକ ମହାବିଦ୍ୟାଳୟରେ ଅଧ୍ୟାପକ ଅଭାବକୁ ନେଇ ଛାତ୍ରଛାତ୍ରୀଙ୍କ ଆନ୍ଦୋଳନ ଦେଖିବାକୁ ମିଳିଛି। +୩ ଶ୍ରେଣୀରେ ଖାଲି ପଡ଼ିଥିବା ୯ଟି ଅଧ୍ୟାପକ ପଦବୀ ପୂରଣ ଦାବିରେ ବୁଧବାର ସକାଳୁ ଛାତ୍ରଛାତ୍ରୀମାନେ ମହାବିଦ୍ୟାଳୟ ମୁଖ୍ୟ ଫାଟକରେ ତାଲା ପକାଇ ଧାରଣା ଦେଇଥିଲେ।ଛାତ୍ରଛାତ୍ରୀମାନେ ସକାଳ ୬ଟାରୁ ଧାରଣାରେ ବସି ଅଧ୍ୟାପକ ନିଯୁକ୍ତି ଦାବିରେ ବିକ୍ଷୋଭ ପ୍ରଦର୍ଶନ କରିଥିଲେ। ମହାବିଦ୍ୟାଳୟର ଉଦ୍ଭିଦ ବିଜ୍ଞାନ ବିଭାଗରେ ୧ଟି, ଇତିହାସରେ ୨ଟି, ଇଂରାଜୀରେ ୨ଟି, ଓଡ଼ିଆରେ ୧ଟି, ରାଜନୀତି ବିଜ୍ଞାନରେ ୧ଟି, ଅର୍ଥନୀତିରେ ୧ଟି ଏବଂ ଦର୍ଶନ ଶାସ୍ତ୍ରରେ ୧ଟି ପଦବୀ ଖାଲି ପଡ଼ିଛି। ଇଂରାଜୀ ବିଭାଗରେ ମାତ୍ର ଜଣେ ଅଧ୍ୟାପକ ଥିବା ଛାତ୍ରଛାତ୍ରୀମାନେ କହିଛନ୍ତି।ଆବଶ୍ୟକ ସଂଖ୍ୟକ ଅଧ୍ୟାପକ ନଥିବାରୁ ମହାବିଦ୍ୟାଳୟରେ ପାଠପଢ଼ା ଗୁରୁତର ଭାବେ ବାଧାପ୍ରାପ୍ତ ହେଉଛି ବୋଲି ଆନ୍ଦୋଳନରତ ଛାତ୍ରଛାତ୍ରୀ ଅଭିଯୋଗ କରିଛନ୍ତି। ଏନେଇ ପୂର୍ବରୁ ଉପଜିଲ୍ଲାପାଳଙ୍କୁ ଅବଗତ କରାଯାଇଥିଲେ ମଧ୍ୟ ସମସ୍ୟାର ସମାଧାନ ହୋଇନଥିବା ସେମାନେ କହିଛନ୍ତି।ଅନ୍ୟପକ୍ଷରେ ଅତିଥି ଅଧ୍ୟାପକ ନିଯୁକ୍ତି ପାଇଁ ମହାବିଦ୍ୟାଳୟରେ ପର୍ଯ୍ୟାପ୍ତ ପାଣ୍ଠି ନଥିବାରୁ ସମସ୍ତ ଖାଲି ପଦବୀ ପୂରଣ କରିବା କଷ୍ଟସାଧ୍ୟ ବୋଲି ମହାବିଦ୍ୟାଳୟ ଅଧ୍ୟକ୍ଷ ଜଗନ୍ନାଥ ମହାନ୍ତ କହିଛନ୍ତି।ଖବର ପାଇ କେନ୍ଦୁଝର ସହକାରୀ ଜିଲ୍ଲାପାଳ ପ୍ରକାଶ କୁମାର ସେଠୀ ଓ ଶେଖର ଚନ୍ଦ୍ର ଜେନା, ପାଟଣା ବିଡିଓ ମାନସ କୁମାର ଦଣ୍ଡପାଟ ଏବଂ ପାଟଣା ଅତିରିକ୍ତ ତହସିଲଦାର ରବି ଶଙ୍କର ହେମ୍ବ୍ରମ ଘଟଣାସ୍ଥଳରେ ପହଞ୍ଚି ଆନ୍ଦୋଳନରତ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ।ଅତିଥି ଅଧ୍ୟାପକ ନିଯୁକ୍ତି ନେଇ ବିଜ୍ଞାପନ ପ୍ରକାଶ ପାଇସାରିଥିବା ଅଧିକାରୀମାନେ ଛାତ୍ରଛାତ୍ରୀଙ୍କୁ ସୂଚନା ଦେଇଥିଲେ। ଆସନ୍ତା ସେପ୍ଟେମ୍ବର ୨୫ ତାରିଖ ସୁଦ୍ଧା ଅତିଥି ଅଧ୍ୟାପକ ନିଯୁକ୍ତି କରାଯିବ ବୋଲି ସହକାରୀ ଜିଲ୍ଲାପାଳଦ୍ୱୟ ପ୍ରତିଶ୍ରୁତି ଦେବା ପରେ ଛାତ୍ରଛାତ୍ରୀମାନେ ଧାରଣାରୁ ଉଠିଥିଲେ। ଅପ୍ରୀତିକର ପରିସ୍ଥିତି ଏଡ଼ାଇବା ପାଇଁ ଘଟଣାସ୍ଥଳରେ ପାଟଣା ପୁଲିସ ଉପସ୍ଥିତ ଥିଲେ।

ମହାବିଦ୍ୟାଳୟର ଆର୍ଥିକ କାରବାର ନେଇ ଯାଞ୍ଚ

ଅନ୍ୟପକ୍ଷରେ ମହାବିଦ୍ୟାଳୟରେ ବ୍ୟାପକ ଦୁର୍ନୀତି ଅଭିଯୋଗ ଯୋଗୁଁ ଏହା ପାଣ୍ଠିଶୂନ୍ୟ ହୋଇଥିବା ନେଇ କେନ୍ଦୁଝର ଉପଜିଲ୍ଲାପାଳଙ୍କ ନିକଟରେ ଅଭିଯୋଗ ହୋଇଥିବା ଜଣାପଡ଼ିଛି।ଏହି ଅଭିଯୋଗକୁ ନେଇ ସହକାରୀ ଜିଲ୍ଲାପାଳ ରହିମ ଭୁଇ, ଡେପୁଟି କଲେକ୍ଟର ଦିନେଶ ପୂର୍ତ୍ତି ଏବଂ ପୂର୍ବୋକ୍ତ ଦୁଇ ସହକାରୀ ଜିଲ୍ଲାପାଳ ମହାବିଦ୍ୟାଳୟ କାର୍ଯ୍ୟାଳୟକୁ ଯାଇ ଅଧ୍ୟକ୍ଷ ଜଗନ୍ନାଥ ମହାନ୍ତଙ୍କ ସହ ଆଲୋଚନା କରିଥିଲେ। ଏହାସହ ଆର୍ଥିକ କାରବାର ସମ୍ପର୍କିତ କିଛି ନଥିପତ୍ର ମାଗିଥିବା ସୂଚନା ମିଳିଛି। ତେବେ ନଥିପତ୍ର ଦାୟିତ୍ୱରେ ଥିବା କର୍ମଚାରୀ ଅଧିକାରୀମାନଙ୍କୁ ସେସବୁ ନଥି ଦେଇପାରିନଥିବା ଜଣାପଡ଼ିଛି।

ଭଦ୍ରକରେ ଜମି ବିବାଦରୁ ରକ୍ତାକ୍ତ ସଂଘର୍ଷ; ପୁଅଙ୍କୁ ଛୁରି ଭୁସି ହତ୍ୟା ଅଭିଯୋଗ, ବାପା ଅଟକ

ଭଦ୍ରକ: ୯/୯: ଭଦ୍ରକ ଜିଲ୍ଲାରେ ଜମି ବିବାଦକୁ କେନ୍ଦ୍ର କରି ରକ୍ତାକ୍ତ ସଂଘର୍ଷରୁ ଜଣେ ଯୁବକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ଭଦ୍ରକ ରୁରାଲ ଥାନା ଅଧୀନ ଚୁନିଡ଼ା ଗାଁରେ ବୁଧବାର ଏହି ଘଟଣା ଘଟିଛି। ମୃତକ ହେଉଛନ୍ତି ବିକାଶ ସାହୁ। ତାଙ୍କ ବାପା ରବି ସାହୁଙ୍କ ବିରୋଧରେ ପୁଅଙ୍କୁ ଛୁରିରେ ଆକ୍ରମଣ କରି ହତ୍ୟା କରିଥିବା ଅଭିଯୋଗ ଆସିଛି।ଘଟଣା ପରେ ପୁଲିସ ରବି ସାହୁଙ୍କୁ ଅଟକ ରଖି ତଦନ୍ତ ଆରମ୍ଭ କରିଛି। ଜମି ବିବାଦ ସହ ପାରିବାରିକ କଳହକୁ ନେଇ ଏହି ଘଟଣା ଘଟିଥିବା ପ୍ରାଥମିକ ଭାବେ ଜଣାପଡ଼ିଛି।

ଯୁକ୍ତିତର୍କ ପରେ ଛୁରିରେ ଆକ୍ରମଣ ଅଭିଯୋଗ

ପ୍ରାଥମିକ ସୂଚନା ଅନୁଯାୟୀ, ବୁଧବାର ସକାଳେ ରବି ସାହୁ ଓ ତାଙ୍କ ପୁଅ ବିକାଶଙ୍କ ମଧ୍ୟରେ କୌଣସି କଥାକୁ ନେଇ ଯୁକ୍ତିତର୍କ ହୋଇଥିଲା। ଏହାପରେ ବିକାଶଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିବା ଅଭିଯୋଗ ହୋଇଛି।ଆକ୍ରମଣରେ ବିକାଶ ଗୁରୁତର ଆହତ ହୋଇଥିଲେ। ପରିବାର ଲୋକ ତାଙ୍କୁ ତୁରନ୍ତ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ହେଲେ ଚିକିତ୍ସାଧୀନ ଅବସ୍ଥାରେ ଡାକ୍ତର ବିକାଶଙ୍କୁ ମୃତ ଘୋଷଣା କରିଥିଲେ।

ବୋହୂଙ୍କ ଗୁରୁତର ଅଭିଯୋଗ

ବିକାଶଙ୍କ ପତ୍ନୀ ସ୍ମୃତି ସାହୁ ତାଙ୍କ ଶ୍ୱଶୁରଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସ୍ମୃତିଙ୍କ କହିବା ଅନୁଯାୟୀ, ରବି ସାହୁ ସେମାନଙ୍କୁ ଘରେ ରହିବାକୁ ଚାହୁଁନଥିଲେ। ଏହାକୁ ନେଇ ପୂର୍ବରୁ ମଧ୍ୟ ବିବାଦ ରହିଥିବା ସେ ଅଭିଯୋଗ କରିଛନ୍ତି।

ବୁଧବାର ବିକାଶ ତାଙ୍କ ବାପାଙ୍କୁ କିଛି ପଚାରିବାକୁ ଯାଇଥିବା ବେଳେ ରବିଙ୍କ ହାତରେ ଛୁରି ଥିଲା ଏବଂ ବିକାଶ କିଛି କହିବା ପୂର୍ବରୁ ତାଙ୍କୁ ଆକ୍ରମଣ କରାଯାଇଥିବା ସ୍ମୃତି ଅଭିଯୋଗ କରିଛନ୍ତି। ଆକ୍ରମଣକୁ ରୋକିବାକୁ ଯାଇ ତାଙ୍କ ଆଙ୍ଗୁଠିରେ ମଧ୍ୟ ଆଘାତ ଲାଗିଥିବା ସେ କହିଛନ୍ତି।

ମୃତ୍ୟୁ ପରେ ଗାଁରେ ଉତ୍ତେଜନା

ବିକାଶଙ୍କ ମୃତ୍ୟୁ ପରେ ଚୁନିଡ଼ା ଗାଁରେ ଉତ୍ତେଜନା ଦେଖାଦେଇଛି। ଭଦ୍ରକ ସରକାରୀ ହସ୍ପିଟାଲ ପରିସରରେ ମଧ୍ୟ ଶତାଧିକ ଲୋକ ଏକାଠି ହୋଇଥିବା ଜଣାପଡ଼ିଛି। ପରିସ୍ଥିତିକୁ ନଜରରେ ରଖି ପୁଲିସ ଘଟଣାସ୍ଥଳ ଓ ହସ୍ପିଟାଲରେ ପହଞ୍ଚିଥିଲା।

ଅଭିଯୁକ୍ତ ବାପା ରବି ସାହୁଙ୍କ ସହ ବିକାଶଙ୍କ ସାବତ ମାଆଙ୍କୁ ମଧ୍ୟ ପୁଲିସ ନଜରରେ ରଖିଥିବା ସୂଚନା ମିଳିଛି।

ଘଟଣାର ପ୍ରକୃତ କାରଣ ଓ ସମ୍ପୂର୍ଣ୍ଣ ଘଟଣାକ୍ରମ ନେଇ ପୁଲିସ ତଦନ୍ତ ଜାରି ରଖିଛି। ଜମି ବିବାଦ ଓ ପାରିବାରିକ କଳହ ସମେତ ସମସ୍ତ ଦିଗରୁ ତଦନ୍ତ କରାଯାଉଛି। ପୁଲିସର ତଦନ୍ତ ପରେ ଘଟଣାର ସତ୍ୟତା ଓ ହତ୍ୟାର ପ୍ରକୃତ କାରଣ ସ୍ପଷ୍ଟ ହେବ।

ଭୋଗରାଇ ଜଙ୍ଗଲରୁ ୫ ବିରଳ ଓରାଙ୍ଗଉଟାଙ୍ଗ ଉଦ୍ଧାର, ଆନ୍ତର୍ଜାତୀୟ ସ୍ମଗଲିଂ ସନ୍ଦେହ

ବାଲେଶ୍ୱର: ୮/୯: ବାଲେଶ୍ୱର ଭୋଗରାଇ ଅଞ୍ଚଳରୁ ୫ଟି ବିରଳ ପ୍ରଜାତିର ଓରାଙ୍ଗଉଟାଙ୍ଗ ଉଦ୍ଧାର ହୋଇଛି। ଭୋଗରାଇ ବ୍ଲକ ଅନ୍ତର୍ଗତ ରଣକୋଠା PRFର ବଡ଼ପାହି ନିକଟ ଜଙ୍ଗଲରେ ଏହି ବିରଳ ଜୀବଗୁଡ଼ିକୁ ଠାବ କରାଯାଇଥିଲା। ଏକାଥରେ ୫ଟି ଓରାଙ୍ଗଉଟାଙ୍ଗ ଜଙ୍ଗଲରେ ଦେଖାଯିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା।ଖବର ପ୍ରଚାର ପରେ ବିଚିତ୍ରପୁର ଜଙ୍ଗଲ ନିକଟରେ ଏହି ବିରଳ ଜୀବଗୁଡ଼ିକୁ ଦେଖିବା ପାଇଁ ଲୋକଙ୍କ ଭିଡ଼ ଜମିଥିଲା। ପରେ ବନବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ୫ଟି ଓରାଙ୍ଗଉଟାଙ୍ଗକୁ ସୁରକ୍ଷିତ ଭାବେ ଉଦ୍ଧାର କରିଥିଲେ।ଦେଖିବାକୁ ବଣମଣିଷ ଭଳି ଲାଗୁଥିବା ଏହି ଜୀବଗୁଡ଼ିକୁ ଉଦ୍ଧାର ପରେ ସ୍ୱାସ୍ଥ୍ୟ ପରୀକ୍ଷା ପାଇଁ ପଶୁ ଚିକିତ୍ସାଳୟକୁ ନିଆଯାଇଥିଲା। ୫ଟି ଓରାଙ୍ଗଉଟାଙ୍ଗ ମଧ୍ୟରୁ ଗୋଟିଏ ଡିହାଇଡ୍ରେସନରେ ଆକ୍ରାନ୍ତ ଥିବାରୁ ତାକୁ ORS ଦିଆଯାଇଥିବା ସୂଚନା ମିଳିଛି। ଅନ୍ୟ ସମସ୍ତେ ସୁସ୍ଥ ଥିବା କହିଛନ୍ତି PCCF ପ୍ରେମ ଝା।

କେଉଁଠୁ ଆସିଲେ ୫ ଓରାଙ୍ଗଉଟାଙ୍ଗ?

ଭାରତୀୟ ଜଙ୍ଗଲରେ ସାଧାରଣତଃ ଓରାଙ୍ଗଉଟାଙ୍ଗ ଦେଖାଯାଆନ୍ତି ନାହିଁ। ତେଣୁ ବାଲେଶ୍ୱରର ଉଦୟପୁର ଓ ଭୋଗରାଇ ଅଞ୍ଚଳର ଜଙ୍ଗଲକୁ ଏହି ୫ଟି ବିରଳ ଜୀବ କେଉଁଠୁ ଏବଂ କିପରି ଆସିଲେ, ତାହାକୁ ନେଇ ବଡ଼ ପ୍ରଶ୍ନ ଉଠିଛି।କେହି ଏମାନଙ୍କୁ ପୋଷିଥିଲେ କି? କୌଣସି ସ୍ଥାନରୁ ଏମାନଙ୍କୁ ଏଠାକୁ ଅଣାଯାଇଥିଲା କି? ନା ଏହା ପଛରେ ଅନ୍ୟ କୌଣସି କାରଣ ରହିଛି? ଏସବୁ ଦିଗକୁ ନେଇ ବନବିଭାଗ ତଦନ୍ତ ଆରମ୍ଭ କରିଛି।

ଆନ୍ତର୍ଜାତୀୟ ସ୍ମଗଲିଂ ସନ୍ଦେହ

ଘଟଣାକୁ ନେଇ PCCF ପ୍ରେମ ଝା ଏହା ଆନ୍ତର୍ଜାତୀୟ ସ୍ମଗଲିଂ ସହ ଜଡ଼ିତ ହୋଇପାରେ ବୋଲି ସନ୍ଦେହ ପ୍ରକାଶ କରିଛନ୍ତି। ତେଣୁ ଓରାଙ୍ଗଉଟାଙ୍ଗଗୁଡ଼ିକ କେଉଁଠୁ ଆସିଥିଲେ ଏବଂ କିଏ ସେମାନଙ୍କୁ ଏଠାକୁ ଆଣିଥିଲା, ସେନେଇ ତଦନ୍ତ ଜୋରଦାର କରାଯାଉଛି।

ନନ୍ଦନକାନନ ଯିବେ ୫ ଓରାଙ୍ଗଉଟାଙ୍ଗ

ଉଦ୍ଧାର ହୋଇଥିବା ୫ଟି ଓରାଙ୍ଗଉଟାଙ୍ଗକୁ ନନ୍ଦନକାନନ ଅଣାଯିବ। ଏଥିପାଇଁ ନନ୍ଦନକାନନରୁ ଏକ ସ୍ୱତନ୍ତ୍ର ଟିମ୍ ବାଲେଶ୍ୱର ଅଭିମୁଖେ ବାହାରିଥିବା ସୂଚନା ମିଳିଛି। ନନ୍ଦନକାନନରେ ସେମାନଙ୍କର ସମ୍ପୂର୍ଣ୍ଣ ସ୍ୱାସ୍ଥ୍ୟ ପରୀକ୍ଷା କରାଯିବ।ଏହାସହିତ ଏହି ୫ଟି ବିରଳ ଜୀବ କେଉଁଠୁ ଆସିଲେ, କିପରି ବାଲେଶ୍ୱରରେ ପହଞ୍ଚିଲେ ଏବଂ ଏହା ପଛରେ କାହାର ସମ୍ପୃକ୍ତି ରହିଛି, ସେନେଇ ତଦନ୍ତ କରାଯିବ। ତଦନ୍ତ ପରେ ଘଟଣାର ପ୍ରକୃତ ରହସ୍ୟ ସାମ୍ନାକୁ ଆସିବ।