ନୂଆଦିଲ୍ଲୀ, ୧୨/୦୯: ଇଣ୍ଡୋନେସିଆରେ ଶନିବାର ବଡ଼ ଧରଣର ଭୂମିକମ୍ପ ଝଟକା ଅନୁଭୂତ ହୋଇଛି। ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା ୬.୨ ରେକର୍ଡ କରାଯାଇଥିବା ଜଣାପଡ଼ିଛି। ଭୂମିକମ୍ପ ପରେ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଥିଲା।ଜର୍ମାନ ରିସର୍ଚ୍ଚ ସେଣ୍ଟର ଫର୍ ଜିୟୋସାଇନ୍ସ (GFZ) ଅନୁସାରେ, ଭୂମିକମ୍ପର କେନ୍ଦ୍ରସ୍ଥଳ ଭୂପୃଷ୍ଠରୁ ପ୍ରାୟ ୩୭୬ କିଲୋମିଟର ଗଭୀରରେ ରହିଥିଲା। ଗଭୀରତା ଅଧିକ ଥିବାରୁ ବଡ଼ଧରଣର କ୍ଷୟକ୍ଷତି ସମ୍ପର୍କରେ ଏପର୍ଯ୍ୟନ୍ତ କୌଣସି ବଡ଼ ଖବର ମିଳିନାହିଁ।ଭୂମିକମ୍ପ ଝଟକାରେ କିଛି ଘରର କାନ୍ଥରେ ଫାଟ ସୃଷ୍ଟି ହୋଇଥିବା ଜଣାପଡ଼ିଛି। ବିଳମ୍ବିତ ରାତିରେ ଭୂମିକମ୍ପ ହୋଇଥିବାରୁ ଅଧିକାଂଶ ଲୋକ ଘରେ ଶୋଇଥିଲେ। ହଠାତ୍ ଝଟକା ଅନୁଭୂତ ହେବା ପରେ ଅନେକ ଲୋକ ଭୟରେ ଘରୁ ବାହାରକୁ ଚାଲି ଆସିଥିଲେ।ଏପର୍ଯ୍ୟନ୍ତ ଭୂମିକମ୍ପରେ କାହାର ମୃତ୍ୟୁ କିମ୍ବା ଆହତ ହେବା ନେଇ ସୂଚନା ମିଳିନାହିଁ। ସ୍ଥାନୀୟ ପ୍ରଶାସନ ପକ୍ଷରୁ ପରିସ୍ଥିତି ଉପରେ ନଜର ରଖାଯାଇଛି।ଶନିବାର ଇଣ୍ଡୋନେସିଆର ଜାଭା ଦ୍ୱୀପ ଅଞ୍ଚଳରେ ଭୂମିକମ୍ପର ଝଟକା ଅନୁଭୂତ ହୋଇଥିଲା। ଏହାର ଗୋଟିଏ ଦିନ ପୂର୍ବରୁ, ଶୁକ୍ରବାର ମାଲୁକୁ ଦ୍ୱୀପ ଅଞ୍ଚଳରେ ମଧ୍ୟ ଭୂମିକମ୍ପ ଝଟକା ଅନୁଭୂତ ହୋଇଥିଲା।
ତେବେ ଏପର୍ଯ୍ୟନ୍ତ ସୁନାମି ନେଇ କୌଣସି ଆଲର୍ଟ ଜାରି ହୋଇନାହିଁ। ତଥାପି ସତର୍କତା ଦୃଷ୍ଟିରୁ ସ୍ଥାନୀୟ ଏଜେନ୍ସିଗୁଡ଼ିକୁ ସଜାଗ ରହିବାକୁ ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି।
