ଭୁବନେଶ୍ୱର: ଓଡ଼ିଶାରେ ମିଳିଥିବା ୫ଟି ଓରାଙ୍ଗଉଟାନ୍ ଶାବକକୁ ନେଇ ତଦନ୍ତ ଯେତିକି ଆଗକୁ ବଢ଼ୁଛି, ସେତିକି ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ଏହି ଘଟଣାରେ ବଙ୍ଗୀୟ ବାପା-ପୁଅଙ୍କ ସମେତ ୩ ଜଣଙ୍କୁ ଏସ୍ଟିଏଫ୍ ଅଟକ ରଖି ପଚରାଉଚରା କରୁଥିବା ସୂଚନା ମିଳିଛି।ସୂଚନା ଅନୁସାରେ, ବାପା-ପୁଅ ଦୀଘା ଯାଇଥିବା ନେଇ ତଦନ୍ତକାରୀ ସଂସ୍ଥା ତଥ୍ୟ ପାଇଛି। ସେମାନଙ୍କୁ ଧରିବା ପାଇଁ ଏସ୍ଟିଏଫ୍ର ଏକାଧିକ ଟିମ୍ କୋଲକାତାର ବିଭିନ୍ନ ସ୍ଥାନରେ ଖୋଜାଖୋଜି କରିଥିବା ଜଣାପଡ଼ିଛି। ହାଓଡ଼ାସ୍ଥିତ ସେମାନଙ୍କ ଘରେ ମଧ୍ୟ ଏସ୍ଟିଏଫ୍ ଖୋଜାଖୋଜି କରିଥିଲେ ମଧ୍ୟ କାହାରି ସନ୍ଧାନ ମିଳିନଥିବା ସୂଚନା ରହିଛି।ଅନ୍ୟପକ୍ଷରେ, ବାଲେଶ୍ୱରର ଜଣେ ପ୍ରଭାବଶାଳୀ ବ୍ୟକ୍ତି ଘଟଣା ଦିନ ହୋଟେଲକୁ ଯାଇନଥିବା ତଦନ୍ତରୁ ଜଣାପଡ଼ିଥିବା ସୂଚନା ମିଳିଛି।ଦୀଘାର ହୋଟେଲରେ ଏସ୍ଟିଏଫ୍ର ଛାନଭିନ୍ ନ୍ୟୁ-ଦୀଘାର ଏକ ହୋଟେଲରେ ଏସ୍ଟିଏଫ୍ ଟିମ୍ ଛାନଭିନ୍ କରିଛି। ହୋଟେଲ ରେଜିଷ୍ଟାର ଯାଞ୍ଚ ସମୟରେ ୬ ଜଣ ଲୋକ ରହୁଥିବା ତଥ୍ୟ ସାମ୍ନାକୁ ଆସିଛି। ସେମାନଙ୍କ ମଧ୍ୟରୁ ୩ ଜଣଙ୍କ ନାମ ହୋଟେଲ ରେଜିଷ୍ଟାରରେ ଥିବାବେଳେ ବାକି ୩ ଜଣଙ୍କ ସମ୍ପର୍କରେ କୌଣସି ସ୍ପଷ୍ଟ ଠିକଣା ମିଳିନଥିବା ଜଣାପଡ଼ିଛି।ଅଟକ ୩ ଜଣଙ୍କ ମଧ୍ୟରୁ ଜଣେ କଳା ରଙ୍ଗର ଥର୍ ଗାଡ଼ିର ଚାଳକ ବୋଲି ବିଶେଷ ସୂତ୍ରରୁ ସୂଚନା ମିଳିଛି।ସିସିଟିଭିରେ କଳା ଥର୍ ଓ ଧଳା କାର୍
ତଦନ୍ତରେ ସିସିଟିଭି ଫୁଟେଜ୍ ଏବେ ଗୁରୁତ୍ୱପୂର୍ଣ୍ଣ ସୁରାଗ ଦେଇଛି। ନ୍ୟୁ-ଦୀଘାର ଏକ ଦୋକାନର ସିସିଟିଭି ଫୁଟେଜ୍ରେ ସୋମବାର ରାତି ୧୦ଟା ୫୬ ମିନିଟ୍ରେ ଏକ କଳା ରଙ୍ଗର ଥର୍ ଗାଡ଼ି ଯାଉଥିବା ଦେଖାଯାଇଛି। ଏହା ପଛରେ ଆଉ ଏକ ଧଳା କାର୍ ଯାଉଥିବା ମଧ୍ୟ ଫୁଟେଜ୍ରେ ଦେଖାଯାଇଛି।ଏହି ଦୁଇଟି ଗାଡ଼ି ମୁଖ୍ୟ ରାସ୍ତା ଛାଡ଼ି ବିଭିନ୍ନ ଗଳିକନ୍ଦିରେ ଘୂରି ବୁଲିଥିବା ତଦନ୍ତରୁ ଜଣାପଡ଼ିଛି।ପରେ ରାତି ପ୍ରାୟ ୧୧ଟା ୩୫ ମିନିଟ୍ରେ ଥର୍ ଗାଡ଼ିଟି ଭୋଗରାଇର ଓରାଙ୍ଗଉଟାନ୍ ଉଦ୍ଧାରସ୍ଥଳ ନିକଟକୁ ଯାଇଥିବା ଦୃଶ୍ୟ ଏକ ସାର ବିକ୍ରୟ କେନ୍ଦ୍ରର ସିସିଟିଭି କ୍ୟାମେରାରେ କଏଦ ହୋଇଛି। ପ୍ରାୟ ୧୨ ମିନିଟ୍ ପରେ ଗାଡ଼ିଟି ସେଠାରୁ ଫେରିଥିବା ମଧ୍ୟ ଫୁଟେଜ୍ରେ ଦେଖାଯାଇଛି।
ଦୀଘାରୁ ଉଦ୍ଧାରସ୍ଥଳକୁ ୨୨ କିମି ଦୀଘାରୁ ବଡ଼ପାହିର ଦୂରତା ପ୍ରାୟ ୨୨ କିଲୋମିଟର। ତେଣୁ ଥର୍ ଗାଡ଼ିଟି ଅଧଘଣ୍ଟା ମଧ୍ୟରେ ଏହି ଦୂରତା ଅତିକ୍ରମ କରି ଉଦ୍ଧାରସ୍ଥଳରେ ପହଞ୍ଚିଥିବା ନେଇ ତଦନ୍ତକାରୀଙ୍କ ସନ୍ଦେହ ଆହୁରି ଘନୀଭୂତ ହୋଇଛି।ଏହି ସିସିଟିଭି ଫୁଟେଜ୍ ଓ ହୋଟେଲ ରେଜିଷ୍ଟାର ତଥ୍ୟକୁ ଆଧାର କରି ଏସ୍ଟିଏଫ୍ ତଦନ୍ତକୁ ଆଗକୁ ବଢ଼ାଉଛି।ଉଦ୍ଧାରସ୍ଥଳରେ ୨୪ ଘଣ୍ଟିଆ ପହରା ଆଜି ଓରାଙ୍ଗଉଟାନ୍ ଶାବକ ଉଦ୍ଧାରସ୍ଥଳକୁ କୌଣସି ଅଧିକାରୀ ତଦନ୍ତ ପାଇଁ ଆସିନଥିବା ଜଣାପଡ଼ିଛି। ତେବେ ସ୍ଥାନୀୟ ବନ ବିଭାଗ ପକ୍ଷରୁ ଉଦ୍ଧାରସ୍ଥଳରେ ୨୪ ଘଣ୍ଟିଆ ପହରା ଦିଆଯାଉଛି।ଉଦ୍ଧାରସ୍ଥଳକୁ ବ୍ୟାରିକେଡ୍ କରାଯିବା ସହ ଜାଲ ଘେରାଯାଇଛି। ସେଠାରେ ‘ନୋ ଏଣ୍ଟ୍ରି’ ବୋର୍ଡ ମଧ୍ୟ ଲଗାଯାଇଛି।ନନ୍ଦନକାନନରେ ଓରାଙ୍ଗଉଟାନ୍ ଶାବକଙ୍କ ସ୍ୱାସ୍ଥ୍ୟ ଠିକ୍ପିସିସିଏଫ୍ (ବନ୍ୟପ୍ରାଣୀ) ପ୍ରେମ କୁମାର ଝାଙ୍କ ସୂଚନା ଅନୁସାରେ, ନନ୍ଦନକାନନରେ ରଖାଯାଇଥିବା ଓରାଙ୍ଗଉଟାନ୍ ଶାବକମାନଙ୍କ ସ୍ୱାସ୍ଥ୍ୟାବସ୍ଥା ଠିକ୍ଠାକ୍ ରହିଛି। ସେମାନଙ୍କର ଡିଏନ୍ଏ ପରୀକ୍ଷା କରାଯିବ।ପ୍ରଥମେ ଶାବକମାନଙ୍କୁ ଓଡ଼ିଶାର ପାଣିପାଗ ସହ ଖାପ ଖୁଆଇବାକୁ ଚେଷ୍ଟା କରାଯାଉଛି। ପରେ ସେମାନଙ୍କୁ ଇଣ୍ଡୋନେସିଆ ପଠାଯିବ କିମ୍ବା ନନ୍ଦନକାନନରେ ପର୍ଯ୍ୟଟକଙ୍କ ପାଇଁ ରଖାଯିବ, ସେନେଇ ନିଷ୍ପତ୍ତି ନିଆଯିବ।ଚୋରା ଚାଲାଣ ଚେର ଖୋଜୁଛି ଏସ୍ଟିଏଫ୍ ବାଲେଶ୍ୱର ବନଖଣ୍ଡର ଏକ ଟିମ୍ ଓ ଏସ୍ଟିଏଫ୍ ମିଳିତ ଭାବେ ଏହି ଚୋରା ଚାଲାଣ ମାମଲାର ଚେର ଖୋଜୁଛନ୍ତି। ଓରାଙ୍ଗଉଟାନ୍ ଭଳି ବିରଳ ବନ୍ୟପ୍ରାଣୀଙ୍କୁ କେଉଁଠାରୁ ଅଣାଯାଇଥିଲା ଏବଂ ଏହି ଚୋରା ଚାଲାଣ ପଛରେ ଆଉ କେଉଁମାନେ ଅଛନ୍ତି, ସେନେଇ ତଦନ୍ତ ଜାରି ରହିଛି।
ସୂଚନାଯୋଗ୍ୟ, ପଶ୍ଚିମବଙ୍ଗର ଦୀଘା ଅଞ୍ଚଳ ଅନ୍ତଃରାଜ୍ୟ ଚୋରାଚାଲାଣ ଘଟଣାରେ ପୂର୍ବରୁ ମଧ୍ୟ ତଦନ୍ତକାରୀଙ୍କ ନଜରରେ ରହିଆସିଛି। ଓଡ଼ିଶାର ପ୍ରଶ୍ନପତ୍ର ଲିକ୍ ଘଟଣା ହେଉ କିମ୍ବା ଉପମୁଖ୍ୟମନ୍ତ୍ରୀଙ୍କ ପିଏ ପରିଚୟ ଦେଇ ୧ କୋଟି ଟଙ୍କା ଠକେଇ ଅଭିଯୋଗରେ ଅଭିଯୁକ୍ତଙ୍କ ଗିରଫ—ପୂର୍ବରୁ ଦୀଘାରୁ ମଧ୍ୟ ଅଭିଯୁକ୍ତଙ୍କୁ ଧରାଯାଇଥିବା ନଜିର ରହିଛି।
ଏବେ ୫ ଓରାଙ୍ଗଉଟାନ୍ ଶାବକ ଉଦ୍ଧାର ଘଟଣାରେ ଦୀଘା ଲିଙ୍କ୍ ଓ କଳା ଥର୍ ଗାଡ଼ିକୁ ନେଇ ତଦନ୍ତ କେଉଁ ଦିଗକୁ ଯାଉଛି, ତାହା ଉପରେ ନଜର ରହିଛି।
