ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ବହଳଦା ଥାନା ଅଞ୍ଚଳରେ ଡକାୟତି ଯୋଜନାକୁ ପଣ୍ଡ କରିଛି ପୋଲିସ। ବାସିଙ୍ଗୀ-ଖେଜୁରୀଟାଣ୍ଡି ଛକ ନିକଟରେ ଚଢ଼ାଉ କରି ଦୁଇ ଜଣ ଆନ୍ତଃରାଜ୍ୟ ଡକାୟତଙ୍କୁ ଗିରଫ କରାଯାଇଛି। ସେମାନଙ୍କ ନିକଟରୁ ଦୁଇଟି ଦାମୀ କାର୍, ଜୀବନ୍ତ ଗୁଳି, ମାରଣାସ୍ତ୍ର, ମୋବାଇଲ ଫୋନ୍, ଲଙ୍କା ଗୁଣ୍ଡ ଓ ନଗଦ ଟଙ୍କା ଜବତ ହୋଇଛି।ପୋଲିସ ସୂଚନା ଅନୁଯାୟୀ, ମଙ୍ଗଳବାର ସନ୍ଧ୍ୟା ପ୍ରାୟ ୭ଟା ସମୟରେ ବହଳଦା ଥାନା ଅନ୍ତର୍ଗତ ଖେଜୁରୀଟାଣ୍ଡି-ବାସିଙ୍ଗୀ ଛକ ନିକଟରେ କିଛି ବ୍ୟକ୍ତି ବେଆଇନ ଅସ୍ତ୍ର କାରବାର ଓ ଡକାୟତି ପାଇଁ ଏକତ୍ରିତ ହୋଇଥିବା ନେଇ ପୋଲିସକୁ ସୂଚନା ମିଳିଥିଲା। ସୂଚନା ଆଧାରରେ ବହଳଦା ଥାନା ପୋଲିସର ଏକ ଟିମ୍ ଘଟଣାସ୍ଥଳରେ ଚଢ଼ାଉ କରିଥିଲା।ଚଢ଼ାଉ ସମୟରେ ଦୁଇ ଜଣଙ୍କୁ ପୋଲିସ କାବୁ କରିଥିବା ବେଳେ ଅନ୍ୟ ତିନି ଜଣ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଗିରଫ ଅଭିଯୁକ୍ତଙ୍କ ନିକଟରୁ ଗୋଟିଏ ୮ ଏମ୍ଏମ୍ ଅନ୍ଫାୟାର୍ଡ ଲାଇଭ୍ ଆମ୍ୟୁନିସନ, ଗୋଟିଏ ତେଲେଙ୍ଗାନା କଟୁରୀ ଏବଂ ନଗଦ ୧ ଲକ୍ଷ ୮୫ ହଜାର ୭୦୦ ଟଙ୍କା ଜବତ କରାଯାଇଛି। ଏହା ସହିତ ଦୁଇଟି କାର୍, ଦୁଇଟି ମୋବାଇଲ ଫୋନ୍ ଓ ଲଙ୍କା ଗୁଣ୍ଡ ମଧ୍ୟ ଜବତ ହୋଇଛି।ଗିରଫ ଦୁଇ ଅଭିଯୁକ୍ତ ହେଲେ ଝାଡ଼ଖଣ୍ଡର ସରାଇକେଲା-ଖରସୁଆଁ ଜିଲ୍ଲା ଚାଣ୍ଡିଲ ଥାନା ଅଧୀନ କାପାଲି ଓପି ଅଞ୍ଚଳର ଟପ୍ ଛକ ନିବାସୀ ଫରହାନ ରଶିଦ ଓରଫ ସୁରଜ (୨୪) ଏବଂ ପୂର୍ବ ସିଂହଭୂମ ଜିଲ୍ଲା ଜାମସେଦପୁର ମାନଗୋ ଅଞ୍ଚଳର ଜାକିର ନଗର ନିବାସୀ ମହମ୍ମଦ ହାଇଦର (୩୩)।ଏହି ଘଟଣାକୁ ନେଇ ବହଳଦା ଥାନାରେ କେସ୍ ନମ୍ବର ୧୭୪/୨୦୨୬ ରେ ମାମଲା ରୁଜୁ ହୋଇଛି। ବିଏନ୍ଏସ୍ର ଧାରା ୩୧୦(୪)/୩୧୦(୫) ଏବଂ ଆର୍ମସ୍ ଆକ୍ଟର ଧାରା ୨୫/୨୭ ଅନୁଯାୟୀ ପୋଲିସ ତଦନ୍ତ ଜାରି ରଖିଛି।ରାଇରଙ୍ଗପୁର ନୂତନ ପୋଲିସ ଜିଲ୍ଲା ଏସ୍ପି ସୁରେଶ ଚନ୍ଦ୍ର ପାତ୍ରଙ୍କ ସୂଚନା ଅନୁଯାୟୀ, ଉଭୟ ଅଭିଯୁକ୍ତଙ୍କ ନାମରେ ଝାଡ଼ଖଣ୍ଡର ଚାଣ୍ଡିଲ ଥାନାରେ ବିଭିନ୍ନ ଅପରାଧିକ ମାମଲା ରହିଛି।ପର୍ବପର୍ବାଣୀକୁ ଦୃଷ୍ଟିରେ ରଖି ଅପରାଧୀ ଓ ଅସାମାଜିକ ବ୍ୟକ୍ତିଙ୍କ ବିରୋଧରେ ଚାଲିଥିବା ସ୍ୱତନ୍ତ୍ର ଏନ୍ଫୋର୍ସମେଣ୍ଟ ଡ୍ରାଇଭ୍ ‘ଦମନ’ ଅଭିଯାନ ଅଧୀନରେ ଏହି କାର୍ଯ୍ୟାନୁଷ୍ଠାନ ହୋଇଛି। ଓଡ଼ିଶା ଡିଜିପି ଓ ପୂର୍ବାଞ୍ଚଳ ଡିଆଇଜି ପିନାକ ମିଶ୍ରଙ୍କ ନିର୍ଦ୍ଦେଶକ୍ରମେ ବହଳଦା ଥାନା ଅଧିକାରୀ ଭାସ୍କର ପ୍ରଧାନ ଓ ତାଙ୍କ ଟିମ୍ ଏହି ଡକାୟତି ଯୋଜନାକୁ ପଣ୍ଡ କରିଥିବା ଏସ୍ପି ସୂଚନା ଦେଇଛନ୍ତି।
