ତ୍ରିଲୋଚନ ହତ୍ୟାକାଣ୍ଡ ମାମଲାରେ ଭଡ଼ାଟିଆ ଗିରଫ, ଭଡ଼ାଘର ଛାଡ଼ିଲେ ପତ୍ନୀ ଓ ଶିଶୁ କନ୍ୟା

କେନ୍ଦୁଝର/ପାଟଣା, ୧/୧୧: ପାଟଣା ବ୍ଲକ ମୁଖ୍ୟାଳୟସ୍ଥିତ ସାଧୁପଡ଼ାରେ ଭଡ଼ାଘରେ ରହୁଥିବା ଜଣେ ବ୍ୟକ୍ତି ତ୍ରିଲୋଚନ ହତ୍ୟାକାଣ୍ଡ ମାମଲାରେ ଗିରଫ ହେବା ପରେ ତାଙ୍କ ପତ୍ନୀ ଓ ଶିଶୁ କନ୍ୟା ଭଡ଼ାଘର ଛାଡ଼ିଥିବା ଜଣାପଡ଼ିଛି।ସୂଚନା ଅନୁଯାୟୀ, ରାମଚନ୍ଦ୍ରପୁର ଥାନା ଅନ୍ତର୍ଗତ ସାଇଁକୁଳ ପାଣ୍ଡୁଆ ଗ୍ରାମର ଦୀପକ କୁମାର ସେଠୀ (୪୭) ପାଟଣାର ସାଧୁପଡ଼ାରେ ପରିବାର ସହ ଭଡ଼ାଘରେ ରହୁଥିଲେ। ଗତ ୨୭ ତାରିଖ ସନ୍ଧ୍ୟାରେ ସେ ଚିକେନ କିଣିବା ପାଇଁ ପାଟଣା ବଜାରକୁ ଯାଇ ଆଉ ଫେରି ନଥିବା ନେଇ ତାଙ୍କ ପତ୍ନୀ ଦୀପାଞ୍ଜଳି ନାୟକ (୨୭) ପାଟଣା ଥାନାରେ ନିଖୋଜ ଅଭିଯୋଗ କରିଥିଲେ।ତେବେ ପରବର୍ତ୍ତୀ ସମୟରେ ଦୀପକ ନିଖୋଜ ନଥିବା ବରଂ ତ୍ରିଲୋଚନ ହତ୍ୟାକାଣ୍ଡ ମାମଲାରେ ତୁରୁମୁଙ୍ଗା ପୁଲିସ ତାଙ୍କୁ ଗିରଫ କରିଥିବା ଜଣାପଡ଼ିଥିଲା। ପୁଲିସର ସୂଚନା ଅନୁସାରେ, ଦୀପକ ପାଟଣା ଅଞ୍ଚଳରେ ରହି ବିଭିନ୍ନ ବ୍ୟବସାୟୀଙ୍କ ବ୍ୟବସାୟ ଓ ଆୟ ସମ୍ପର୍କିତ ତଥ୍ୟ ଡକାୟତମାନଙ୍କୁ ଯୋଗାଉଥିବା ଅଭିଯୋଗ ରହିଛି।ଏହି ଘଟଣା ପରେ ଦୀପକଙ୍କ ନିଖୋଜ ଅଭିଯୋଗକୁ ନେଇ ପାଟଣା ଅଞ୍ଚଳରେ ଚର୍ଚ୍ଚା ଜୋର ଧରିଛି। ଅନ୍ୟପକ୍ଷରେ, ଭଡ଼ାଘର ମାଲିକ ନଭେମ୍ବର ପହିଲାରୁ ଘର ଛାଡ଼ିବାକୁ କହିଥିବାରୁ ଦୀପାଞ୍ଜଳି ତାଙ୍କ ଶିଶୁ କନ୍ୟାକୁ ସାଙ୍ଗରେ ନେଇ ରବିବାର ଘର ଛାଡ଼ିଥିବା ସୂଚନା ମିଳିଛି।

ମହିଳା କନଷ୍ଟେବଳଙ୍କ ସ୍ୱାମୀ ହତ୍ୟା ଘଟଣାର ପର୍ଦ୍ଦାଫାସ, ୩ ନାବାଳକଙ୍କ ସମେତ ୯ ଗିରଫ

କେନ୍ଦୁଝର: ୩୦/୧୦: କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନା ଅଞ୍ଚଳରେ ମହିଳା କନଷ୍ଟେବଳଙ୍କ ସ୍ୱାମୀ ତ୍ରିଲୋଚନ ମହନ୍ତଙ୍କ ହତ୍ୟା ଘଟଣାର ପର୍ଦ୍ଦାଫାସ କରିଛି କେନ୍ଦୁଝର ପୁଲିସ। ଏହି ଘଟଣାରେ ୩ ଜଣ ନାବାଳକଙ୍କ ସମେତ ମୋଟ ୯ ଜଣଙ୍କୁ ଗିରଫ କରାଯାଇଛି। ଲୁଟ୍ ଉଦ୍ଦେଶ୍ୟରେ ଏହି ହତ୍ୟାକାଣ୍ଡ ଘଟାଯାଇଥିବା କେନ୍ଦୁଝର ଏସ୍‌ପି ନୀତିନ କୁଶଲକର ସୂଚନା ଦେଇଛନ୍ତି। ଗିରଫ ସମସ୍ତ ଅଭିଯୁକ୍ତ ଯାଜପୁର ଜିଲ୍ଲା  ଏରାଗୋଳା ଗ୍ୟାଙ୍ଗର ସଦସ୍ୟ ବୋଲି ଜଣାପଡ଼ିଛି।ପୁଲିସ ସୂଚନା ଅନୁଯାୟୀ, ଏରାଗୋଳା ଗ୍ୟାଙ୍ଗର ସଦସ୍ୟମାନେ ସାଧାରଣତଃ ସୁନା ଚେନ୍ ଛିନତାଇ ଏବଂ ବାଇକ୍ ଡିକି ଭାଙ୍ଗି ଟଙ୍କା ଲୁଟ୍ ଭଳି ଅପରାଧରେ ସମ୍ପୃକ୍ତ ରହିଥାନ୍ତି। ଗିରଫ ଅଭିଯୁକ୍ତଙ୍କ ମଧ୍ୟରୁ ୬ ଜଣଙ୍କୁ ପୁଲିସ ଘଟଣାସ୍ଥଳକୁ ନେଇ ସିନ୍ ରିକ୍ରିଏସନ୍ କରାଇଛି। ଏହି ସମୟରେ ମୃତକଙ୍କ ମା’ ଓ ପରିବାର ସଦସ୍ୟ ଭାବବିହ୍ୱଳ ହୋଇପଡ଼ିଥିଲେ। ଅଭିଯୁକ୍ତମାନଙ୍କୁ କଠୋର ଦଣ୍ଡ ଦେବାକୁ ପରିବାର ପକ୍ଷରୁ ଦାବି କରାଯାଇଛି।ସୂଚନାଯୋଗ୍ୟ, ମୃତ ତ୍ରିଲୋଚନ ମହନ୍ତଙ୍କ ପତ୍ନୀ ପାଟଣା ଥାନାରେ କନଷ୍ଟେବଳ ଭାବେ କାର୍ଯ୍ୟରତ ଅଛନ୍ତି। ତ୍ରିଲୋଚନ କେନ୍ଦେଇପଶିଠାରେ ଏକ ଜନସେବା କେନ୍ଦ୍ର ଚଳାଉଥିଲେ। ପ୍ରତିଦିନ ରାତିରେ ଦୋକାନ ବନ୍ଦ କରି ଟଙ୍କା ଧରି ସ୍କୁଟିରେ ପାଟଣାସ୍ଥିତ ନିଜ ଘରକୁ ଫେରୁଥିଲେ।ଗତ ସେପ୍ଟେମ୍ବର ୨୮ ତାରିଖ ରାତିରେ ମଧ୍ୟ ସେ ଦୋକାନ ବନ୍ଦ କରି ଘରକୁ ଫେରୁଥିବା ସମୟରେ ଲୁଟ୍ ଉଦ୍ଦେଶ୍ୟରେ ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଥିଲେ। ପ୍ରଥମେ ଧାରୁଆ ଅସ୍ତ୍ରରେ ଆକ୍ରମଣ ପରେ ତାଙ୍କୁ ଗୁଳି କରି ହତ୍ୟା କରାଯାଇଥିଲା। ଘଟଣା ପରେ ପୁଲିସ ଲୁଟ୍ ଉଦ୍ଦେଶ୍ୟରେ ହତ୍ୟା ହୋଇଥିବା ସନ୍ଦେହ କରି ତଦନ୍ତ ଆରମ୍ଭ କରିଥିଲା। ଅଭିଯୁକ୍ତଙ୍କୁ ଧରିବା ପାଇଁ ୩ଟି ସ୍ୱତନ୍ତ୍ର ଟିମ୍ ଗଠନ ହୋଇଥିଲା। ଶେଷରେ ପୁଲିସ ୯ ଜଣଙ୍କୁ ଗିରଫ କରି ଘଟଣାର ପର୍ଦ୍ଦାଫାସ କରିଛି।ଏହି ମାମଲାର ତଦନ୍ତ ସମ୍ପର୍କିତ ଅନ୍ୟାନ୍ୟ ବିସ୍ତୃତ ସୂଚନା ପରବର୍ତ୍ତୀ ସମୟରେ ଦିଆଯିବ ବୋଲି ଏସ୍‌ପି କହିଛନ୍ତି।

ଭିଜିଲାନ୍ସ ପଞ୍ଝାରେ ଫୁଲନଖରା ଡେପୁଟି ଫରେଷ୍ଟ ରେଞ୍ଜର, ୧ ଲକ୍ଷ ଟଙ୍କା ଲାଞ୍ଚ ନେଇ ଧରାପଡ଼ିଲେ

କଟକ, ୨୯/୧୦: ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡ଼ିଲେ କଟକ ଫୁଲନଖରାର ଡେପୁଟି ଫରେଷ୍ଟ ରେଞ୍ଜର ମୌସୁମୀ ବେହେରା। ବୃକ୍ଷରୋପଣ ସମ୍ପର୍କିତ ବିଲ୍ ପାସ୍ କରିବା ପାଇଁ ଜଣେ କର୍ମଚାରୀଙ୍କଠାରୁ ୧ ଲକ୍ଷ ଟଙ୍କା ଲାଞ୍ଚ ନେଉଥିବା ସମୟରେ ତାଙ୍କୁ ଭିଜିଲାନ୍ସ ଟିମ୍ ଧରିଥିବା ଜଣାପଡ଼ିଛି।ସୂଚନା ଅନୁସାରେ, ଜୁଲାଇରୁ ସେପ୍ଟେମ୍ବର ମାସ ମଧ୍ୟରେ ହୋଇଥିବା ବୃକ୍ଷରୋପଣ କାର୍ଯ୍ୟ ସମ୍ପର୍କିତ ବିଲ୍ ପାସ୍ କରିବା ପାଇଁ ଜଣେ କର୍ମଚାରୀଙ୍କଠାରୁ ସେ ଏହି ଟଙ୍କା ନେଉଥିଲେ। ଏହି ସମୟରେ ଭିଜିଲାନ୍ସ ଟିମ୍ ଚଢ଼ାଉ କରି ତାଙ୍କଠାରୁ ସମସ୍ତ ଲାଞ୍ଚ ଟଙ୍କା ଜବତ କରିଥିବା ସୂଚନା ମିଳିଛି।ଏହି ଘଟଣା ପରେ ମୌସୁମୀ ବେହେରାଙ୍କ ସହ ସମ୍ପୃକ୍ତ ଦୁଇଟି ସ୍ଥାନରେ ଭିଜିଲାନ୍ସ ଟିମ୍ ପକ୍ଷରୁ ଚଢ଼ାଉ ଜାରି ରହିଛି। ଚଢ଼ାଉ ସମୟରେ ଆଉ କ’ଣ ତଥ୍ୟ ସାମ୍ନାକୁ ଆସୁଛି, ତାହା ଉପରେ ନଜର ରହିଛି।

ବାଣପୁରରେ ବଡ଼ଧରଣର ଡକାୟତି: ସୁନା ଦୋକାନରୁ ୪୦୦ ଗ୍ରାମ ସୁନା, ୨୫ କିଲୋ ରୂପା ଓ ୫ ଲକ୍ଷ ଟଙ୍କା ଲୁଟ୍‌ ଅଭିଯୋଗ

ଥାନା ନିକଟରେ ଡକାୟତିକୁ ନେଇ ପୁଲିସର ସୁରକ୍ଷା ବ୍ୟବସ୍ଥା ଉପରେ ଉଠିଲା ପ୍ରଶ୍ନ

ବାଣପୁର, ୨୯/୧୦: ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳରେ ଏକ ସୁନା ଦୋକାନରୁ ବଡ଼ଧରଣର ଡକାୟତି ହୋଇଥିବା ଅଭିଯୋଗ ସାମ୍ନାକୁ ଆସିଛି। ଦୋକାନର କାଚ ତାଡ଼ି ଦୁର୍ବୃତ୍ତମାନେ ପ୍ରାୟ ୪୦୦ ଗ୍ରାମ ସୁନା, ୨୫ କିଲୋ ରୂପା ଓ ନଗଦ ୫ ଲକ୍ଷ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି। ଥାନା ନିକଟରେ ଏଭଳି ଡକାୟତି ଘଟଣାକୁ ନେଇ ପୁଲିସର ସୁରକ୍ଷା ବ୍ୟବସ୍ଥା ଓ ରାତ୍ରିକାଳୀନ ପାଟ୍ରୋଲିଂକୁ ନେଇ ବିଭିନ୍ନ ପ୍ରଶ୍ନ ଉଠିଛି।ପ୍ରାପ୍ତ ସୂଚନା ଅନୁଯାୟୀ, ଦୁର୍ବୃତ୍ତମାନେ ସୁନା ଦୋକାନକୁ ଟାର୍ଗେଟ୍‌ କରି ଏହି ଲୁଟ୍‌ ଘଟାଇଥିବା ଅଭିଯୋଗ ରହିଛି। ଦୋକାନରୁ ବିପୁଳ ପରିମାଣର ସୁନା ଓ ରୂପା ଅଳଙ୍କାର ସହ ନଗଦ ଟଙ୍କା ଲୁଟ୍‌ ହୋଇଥିବାରୁ ବ୍ୟବସାୟୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି।

ସୁରକ୍ଷା ବ୍ୟବସ୍ଥାକୁ ନେଇ ଉଠିଲା ପ୍ରଶ୍ନ

ଥାନା ନିକଟରେ ଏତେ ବଡ଼ଧରଣର ଡକାୟତି ଘଟିଥିବା ଅଭିଯୋଗ ପୁଲିସର ସୁରକ୍ଷା ବ୍ୟବସ୍ଥାକୁ ନେଇ ଚର୍ଚ୍ଚା ବଢ଼ାଇଛି। ବିଶେଷକରି ରାତି ସମୟରେ ବଜାର ଅଞ୍ଚଳରେ ପୁଲିସ ପାଟ୍ରୋଲିଂ କେତେ ପ୍ରଭାବଶାଳୀ, ଦୋକାନଗୁଡ଼ିକରେ ଲାଗିଥିବା ସିସିଟିଭି କ୍ୟାମେରା କାର୍ଯ୍ୟକ୍ଷମ ଅଛି କି ନାହିଁ ଏବଂ ବ୍ୟବସାୟିକ ପ୍ରତିଷ୍ଠାନର ସୁରକ୍ଷା ପାଇଁ କି ପଦକ୍ଷେପ ନିଆଯାଉଛି, ସେନେଇ ଆଲୋଚନା ଜୋର୍‌ ଧରିଛି।

ଦୁର୍ବୃତ୍ତଙ୍କୁ ଧରିବା ପୁଲିସ ପାଇଁ ଚ୍ୟାଲେଞ୍ଜ

ଏହି ଡକାୟତି ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କୁ ଚିହ୍ନଟ କରିବା ଏବଂ ଲୁଟ୍‌ ସାମଗ୍ରୀ ଉଦ୍ଧାର କରିବା ପୁଲିସ ପାଇଁ ଏକ ବଡ଼ ଚ୍ୟାଲେଞ୍ଜ ହୋଇପାରେ। ଘଟଣାସ୍ଥଳରୁ ମିଳୁଥିବା ପ୍ରମାଣ, ସିସିଟିଭି ଫୁଟେଜ୍‌ ଓ ଅନ୍ୟାନ୍ୟ ସୂତ୍ରକୁ ଆଧାର କରି ତଦନ୍ତ ଆଗକୁ ବଢ଼ାଇବା ଗୁରୁତ୍ୱପୂର୍ଣ୍ଣ।ଦୁର୍ବୃତ୍ତମାନେ ପୂର୍ବରୁ ଦୋକାନ ଉପରେ ନଜର ରଖିଥିଲେ କି ନାହିଁ ଏବଂ ଏହି ଲୁଟ୍‌ ପଛରେ କେଉଁମାନଙ୍କ ହାତ ରହିଛି, ତାହା ତଦନ୍ତ ପରେ ସ୍ପଷ୍ଟ ହେବ। ଅପରାଧୀଙ୍କୁ ଶୀଘ୍ର ଗିରଫ କରିବା ସହ ଲୁଟ୍‌ ସାମଗ୍ରୀ ଉଦ୍ଧାର କରିବାକୁ ସାଧାରଣରେ ଦାବି ହେଉଛି।ଏଭଳି ଘଟଣାର ପୁନରାବୃତ୍ତି ରୋକିବା ପାଇଁ ବଜାର ଅଞ୍ଚଳରେ ପୁଲିସ ପାଟ୍ରୋଲିଂ ବୃଦ୍ଧି ଓ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରିବା ଆବଶ୍ୟକ ବୋଲି ମତ ପ୍ରକାଶ ପାଇଛି।

ସାଢ଼େ ୪ ମାସ ପରେ ନିଖୋଜ ମହିଳାଙ୍କ କଙ୍କାଳ ଉଦ୍ଧାର, ହତ୍ୟା ଅଭିଯୋଗ ଆଣିଲେ ବାପା

କେନ୍ଦୁଝର/ପାଟଣା, ୨୮/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଡୁମୁରିଆ ପଞ୍ଚାୟତ ଅନ୍ତର୍ଗତ ଘାଟବାଲିଯୋଡ଼ି ଗ୍ରାମର ଜଣେ ନିଖୋଜ ମହିଳାଙ୍କ କଙ୍କାଳର କିଛି ହାଡ଼, ଖପୁରୀ, ଚୁଡ଼ି, ମାଳି ଏବଂ ଗଛରେ ଝୁଲୁଥିବା ଏକ ଶାଢ଼ୀକୁ ଘଟଗାଁ ପୁଲିସ ଉଦ୍ଧାର କରିଛି। ଉଦ୍ଧାର ସାମଗ୍ରୀଗୁଡ଼ିକ ନିଖୋଜ କୁନି ମହାନ୍ତ (୩୮)ଙ୍କର ବୋଲି ପ୍ରାଥମିକ ଭାବେ ସନ୍ଦେହ କରାଯାଉଛି। ଅନ୍ୟପକ୍ଷରେ ଝିଅକୁ ହତ୍ୟା କରାଯାଇଥିବା ନେଇ ତାଙ୍କ ବାପା ଅଭିଯୋଗ ଆଣିଛନ୍ତି।ସୂଚନା ଅନୁଯାୟୀ, ଘାଟବାଲିଯୋଡ଼ି ଗ୍ରାମର ତ୍ରିଲୋଚନ ମହାନ୍ତଙ୍କ ପତ୍ନୀ କୁନି ଗତ ଜୁନ୍ ୪ ତାରିଖରୁ ନିଖୋଜ ଥିଲେ। ଏନେଇ ପୁଲିସରେ ଅଭିଯୋଗ ହୋଇଥିଲେ ମଧ୍ୟ ଦୀର୍ଘ ସାଢ଼େ ୪ ମାସ ଧରି ତାଙ୍କର କୌଣସି ପତ୍ତା ମିଳିନଥିଲା।ଗତକାଲି ଘାଟବାଲିଯୋଡ଼ି ଗ୍ରାମ ନିକଟସ୍ଥ ଅଟେଇ ଜଙ୍ଗଲରେ କଙ୍କାଳ ପଡ଼ିଥିବା ନେଇ ଗ୍ରାମରକ୍ଷୀଙ୍କଠାରୁ ସୂଚନା ପାଇ ଘଟଗାଁ ଏସ୍‌ଡିପିଓ ପ୍ରଭାତ ଚନ୍ଦ୍ର ତ୍ରିପାଠୀ, ଥାନାଧିକାରୀ ସୁଭ୍ରାନ୍ତ କୁମାର ଜେନା, ଏସ୍‌ଆଇ ଗାଙ୍ଗିଆ ଲାକ୍ରା ଓ ଏଏସ୍‌ଆଇ ପଞ୍ଚମୀ ମହାନ୍ତ ପ୍ରମୁଖ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ସେଠାରୁ କଙ୍କାଳର କିଛି ହାଡ଼, ଖପୁରୀ, ଚୁଡ଼ି, ମାଳି ଓ ଶାଢ଼ୀ ଜବତ କରାଯାଇଥିଲା।ଏହି ଘଟଣାରେ ପୁଲିସ କୁନିଙ୍କ ସ୍ୱାମୀ ତ୍ରିଲୋଚନ ମହାନ୍ତ (୪୨)ଙ୍କୁ ଥାନାକୁ ଆଣି ପଚରାଉଚରା କରୁଥିବା ସୂଚନା ମିଳିଛି। ଆଜି ଅପରାହ୍ନରେ ବର୍ଷା ସତ୍ତ୍ୱେ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି।ଅନ୍ୟପକ୍ଷରେ ଭୀମାପଡ଼ା ଗ୍ରାମର କୁନିଙ୍କ ବାପା ଚନ୍ଦ୍ରମଣି ମହାନ୍ତ ଝିଅକୁ ହତ୍ୟା କରି ଘଟଣାକୁ ଆତ୍ମହତ୍ୟାର ରୂପ ଦିଆଯାଇଥିବା ଅଭିଯୋଗ କରି ଆଜି ସକାଳେ ଘଟଗାଁ ଥାନାରେ ଏତଲା ଦେଇଛନ୍ତି। ଏହାକୁ ଆଧାର କରି ପୁଲିସ ୫୪୦/୨୦୨୬ ନମ୍ବରରେ ଏକ ମାମଲା ରୁଜୁ କରିଛି।ସୂଚନା ଅନୁଯାୟୀ, କୁନିଙ୍କର ଦୁଇ ଝିଅ ଓ ଗୋଟିଏ ପୁଅ ଅଛନ୍ତି। ସ୍ୱାମୀଙ୍କ ନିର୍ଯାତନା ଯୋଗୁଁ ସେ ଅଧିକାଂଶ ସମୟରେ ନିଜ ବାପଘର ଭୀମାପଡ଼ା ଗ୍ରାମରେ ରହୁଥିବା କୁହାଯାଉଛି। ପିଲାମାନଙ୍କ ପାଇଁ ସେ ପୁଣି ଘାଟବାଲିଯୋଡ଼ି ଗ୍ରାମକୁ ଫେରିଥିବା ବେଳେ ଘରେ ଗାଳିଗୁଲଜ ହେବା ପରେ ସେ ଜଙ୍ଗଲକୁ ଯାଇଥିବା ନେଇ ଅଞ୍ଚଳରେ ଚର୍ଚ୍ଚା ହେଉଛି।ତେବେ ମହିଳାଙ୍କ ମୃତ୍ୟୁର ପ୍ରକୃତ କାରଣ କ’ଣ, ତାହା ତଦନ୍ତ ପରେ ସ୍ପଷ୍ଟ ହେବ। ଏସ୍‌ଆଇ ଗାଙ୍ଗିଆ ଲାକ୍ରା ଘଟଣାର ତଦନ୍ତ ଭାର ନେଇଛନ୍ତି। ପୁଲିସର ତଦନ୍ତ ଓ ବୈଜ୍ଞାନିକ ପରୀକ୍ଷା ରିପୋର୍ଟ ପରେ ଘଟଣାର ସତ୍ୟାସତ୍ୟ ଜଣାପଡ଼ିବ।

ଗୋଚାଲାଣ ମାମଲାରେ ଫେରାର ଥିବା ଦୁଇ ଅଭିଯୁକ୍ତ ଗିରଫ

କେନ୍ଦୁଝର/ପାଟଣା, ୨୭/୧୦: କେନ୍ଦୁଝର ଜିଲ୍ଲା ପାଟଣା ଥାନା ଅଞ୍ଚଳରେ ଗୋଚାଲାଣ ମାମଲାରେ ଫେରାର ଥିବା ଦୁଇ ଅଭିଯୁକ୍ତଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି। ଗତ ସେପ୍ଟେମ୍ବର ୨୮ ତାରିଖରେ ଖଜୁରିଡିହା ନିକଟ ୨୨୦ ନମ୍ବର ଜାତୀୟ ରାଜପଥରେ ଗୋଚାଲାଣ ହେଉଥିବା ବେଳେ ପାଟଣା ପୁଲିସ ଏକ ଗୋରୁ ବୋଝେଇ ପିକଅପ୍ ଗାଡ଼ିକୁ ଜବତ କରିଥିଲା। ଏହା ସହ ଗାଡ଼ି ଭିତରୁ ୧୧ଟି ଗୋରୁଙ୍କୁ ଉଦ୍ଧାର କରାଯାଇଥିଲା।ତେବେ ଏହି ଗୋଚାଲାଣ ଘଟଣାରେ ସମ୍ପୃକ୍ତ ଥିବା ଦୁଇ ଜଣ ଅଭିଯୁକ୍ତ ଅନ୍ଧାରର ସୁଯୋଗ ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏହା ପରେ ପୁଲିସ ଘଟଣାର ତଦନ୍ତ ଜାରି ରଖିଥିଲା।ପାଟଣା ଥାନା ଅଧିକାରୀ କିରଣ ପ୍ରସାଦ ସାହୁଙ୍କ ନେତୃତ୍ୱରେ ଏକ ପୁଲିସ ଟିମ୍ ଚଢ଼ାଉ କରି ଗତକାଲି ଉଭୟ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ମୟୂରଭଞ୍ଜ ଜିଲ୍ଲା ବାଦାମପାହାଡ଼ ଥାନା ଅନ୍ତର୍ଗତ ସାତପୌଟିଆ ଗ୍ରାମର ଏସ୍‌.କେ. ସାହିମ (୩୧) ଏବଂ ଯଶିପୁର ଥାନା ଅନ୍ତର୍ଗତ ବକୋଲା ଗ୍ରାମର ଏସ୍‌.କେ. ରହମତୁଲା (୪୦)। ପୁଲିସ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି .

ହାତ ତିଆରି ବୋମାରେ ବାରାହା ଶିକାର ଓ ମାଂସ ବିକ୍ରି ଅଭିଯୋଗରେ ୨ ଗିରଫ

କେନ୍ଦୁଝର/ପାଟଣା, ୨୧/୧୦: ହାତ ତିଆରି ବୋମା ବ୍ୟବହାର କରି ଜଙ୍ଗଲୀ ବାରାହା ଶିକାର କରିବା ଏବଂ ଏହାର ମାଂସ କାଟି ବିକ୍ରି କରିବା ଅଭିଯୋଗରେ ପାଟଣା ବନବିଭାଗ ଦୁଇ ଜଣଙ୍କୁ ଗିରଫ କରିଛି। ଗିରଫ ଦୁଇ ଅଭିଯୁକ୍ତ ହେଲେ ପଲାଣଘାଟି ଗ୍ରାମର ବଗଲ ମୁଣ୍ଡାଙ୍କ ପୁଅ ରଞ୍ଜିତ ମୁଣ୍ଡା ଏବଂ ବଣମହୁଲଡିହା ଗ୍ରାମର ଜୟକୃଷ୍ଣ ନାୟକଙ୍କ ପୁଅ କହ୍ନେଇ ନାୟକ।ବନବିଭାଗ ଅଭିଯୁକ୍ତଙ୍କ ନିକଟରୁ ଏକ ଜଙ୍ଗଲୀ ବାରାହାର ୯ କିଲୋ ୨୦୦ ଗ୍ରାମ ଓଜନର କଟା ମୁଣ୍ଡ ଏବଂ ମୃତ ବାରାହାର ଦୁଇଟି ପଛ ଗୋଡ଼ ଜବତ କରିଛି।

ପୂର୍ବରୁ ଜବତ ହୋଇଥିଲା ବିସ୍ଫୋରକ ଓ ବୋମା ତିଆରି ସାମଗ୍ରୀ

ସୂଚନା ଅନୁଯାୟୀ, ଚଳିତ ମାସ ୭ ଓ ୮ ତାରିଖରେ ବନବିଭାଗ ବଣମହୁଲଡିହା ଗ୍ରାମରେ ଚଢ଼ାଉ କରି ବାରାହା ଶିକାର ପାଇଁ ବ୍ୟବହୃତ ବିସ୍ଫୋରକ ଥିବା ବୋମା ଏବଂ ବୋମା ତିଆରିରେ ବ୍ୟବହୃତ ବିଭିନ୍ନ ସାମଗ୍ରୀ ଜବତ କରିଥିଲା। ଏହି ଘଟଣାରେ ଜଡ଼ିତ ଦୁଇ ଜଣଙ୍କଠାରୁ ମିଳିଥିବା ସୂଚନା ଆଧାରରେ ଅଧିକ ତଦନ୍ତ କରାଯାଇଥିଲା।ବଣମହୁଲଡିହା ଗ୍ରାମର ମଙ୍ଗଳା ମୁଣ୍ଡାଙ୍କ ଘରେ ହାତ ତିଆରି ବୋମା ଓ ବୋମା ତିଆରି ସାମଗ୍ରୀ ସମ୍ପର୍କରେ ତଦନ୍ତ ବେଳେ ରଞ୍ଜିତ ମୁଣ୍ଡା ଏହି ଘଟଣାର ମୁଖ୍ୟ ସୂତ୍ରଧର ବୋଲି ସ୍ୱୀକାର କରିଥିବା ବନବିଭାଗ ପକ୍ଷରୁ କୁହାଯାଇଛି। ଏଥିସହ ବଣମହୁଲଡିହା ଗ୍ରାମର ଆଉ କିଛି ବ୍ୟକ୍ତି ଏହି ଘଟଣାରେ ଜଡ଼ିତ ଥିବା ସୂଚନା ମିଳିଛି। ବୋମା ତିଆରି ସାମଗ୍ରୀ ହରିଚନ୍ଦନପୁର ଥାନା ଅଞ୍ଚଳର ଜଣେ ବ୍ୟକ୍ତିଙ୍କଠାରୁ ଅଣାଯାଇଥିବା ନେଇ ମଧ୍ୟ ତଦନ୍ତରେ ତଥ୍ୟ ମିଳିଛି।

ବାରାହା ମାଂସ ପଠାଇବା ଘଟଣାରେ କହ୍ନେଇଙ୍କ ସମ୍ପୃକ୍ତି

ଗତ ୭ ତାରିଖରେ ସୁନିଆ ମୁଣ୍ଡାଙ୍କ ଘରୁ ଜବତ ହୋଇଥିବା ବାରାହା ମାଂସ ସମ୍ପର୍କରେ ପଚରାଉଚରା ବେଳେ କହ୍ନେଇ ନାୟକ ମାଂସ ପଠାଇଥିବା ସ୍ୱୀକାର କରିଥିବା ବନବିଭାଗ ସୂତ୍ରରୁ ଜଣାପଡ଼ିଛି।ଏହି ଘଟଣାରେ ରଞ୍ଜିତ ମୁଣ୍ଡା ଓ କହ୍ନେଇ ନାୟକଙ୍କୁ ତଦନ୍ତକାରୀ ଅଧିକାରୀ ତଥା କେନ୍ଦୁଝର ସହକାରୀ ବନଖଣ୍ଡ ଅଧିକାରୀ ଡକ୍ଟର ସୁଦୀପ୍ତ କୁମାର ପଣ୍ଡା ଗିରଫ କରି ଜେଲ ହାଜତକୁ ପଠାଇଛନ୍ତି। ଘଟଣାରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ, ସେନେଇ ବନବିଭାଗର ଅଧିକ ତଦନ୍ତ ଜାରି ରହିଛି।ଏହି ଚଢ଼ାଉରେ ବନପାଳ ନିରଞ୍ଜନ ସେଠୀ, ବନରକ୍ଷୀ ରଞ୍ଜିତା ମହାନ୍ତ ଏବଂ ପାରା କର୍ମଚାରୀମାନେ ସାମିଲ ହୋଇଥିଲେ।

ଯୌତୁକ ନିର୍ଯାତନା ପରେ ସ୍ତ୍ରୀଙ୍କୁ ହତ୍ୟା ଅଭିଯୋଗ: ସ୍ୱାମୀ ଗିରଫ, ଅହମଦାବାଦରୁ ଧରିଲା ଖଇରା ପୋଲିସ

ବାଲେଶ୍ୱର/ଖଇରା, ୧୩/୧୦: ସ୍ତ୍ରୀଙ୍କୁ ହତ୍ୟା କରିବା ଅଭିଯୋଗରେ ସ୍ୱାମୀ ସଞ୍ଜୀବ ଲେଙ୍କାଙ୍କୁ ଗିରଫ କରିଛି ବାଲେଶ୍ୱର ଜିଲ୍ଲାର ଖଇରା ପୋଲିସ। ଅଭିଯୁକ୍ତଙ୍କୁ ଗୁଜରାଟର ଅହମଦାବାଦରୁ ଗିରଫ କରାଯାଇଥିବା ବେଳେ ଘଟଣାର ତଦନ୍ତ ଜାରି ରହିଛି।ଅଭିଯୋଗ ଅନୁଯାୟୀ, ବାଲେଶ୍ୱର ଜିଲ୍ଲା ସୋର ଥାନା ଅନ୍ତର୍ଗତ କ୍ଷୀରକୋଣି ଗ୍ରାମର ଶିବପ୍ରସାଦ ପାତ୍ରଙ୍କ ବଡ଼ଝିଅ ହରପ୍ରିୟା (୨୩)ଙ୍କ ବିବାହ ଖଇରା ଥାନା ଅନ୍ତର୍ଗତ ଫଗୁଣା ଗ୍ରାମର ହରିହର ଲେଙ୍କାଙ୍କ ପୁଅ ସଞ୍ଜୀବଙ୍କ ସହ ବୈଦିକ ରୀତିନୀତିରେ ହୋଇଥିଲା।ବିବାହ ପରେ ଅଧିକ ଯୌତୁକ ଦାବି କରି ଶାଶୁଘର ଲୋକେ ହରପ୍ରିୟାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଉଥିବା ପରିବାର ପକ୍ଷରୁ ଅଭିଯୋଗ ହୋଇଛି। ତାଙ୍କୁ ହତ୍ୟା କରି ଘଟଣାକୁ ଆତ୍ମହତ୍ୟାର ରୂପ ଦେବାକୁ ଉଦ୍ୟମ କରାଯାଇଥିବା ନେଇ ମଧ୍ୟ ମୃତକଙ୍କ ପରିବାର ଲୋକେ ପୋଲିସରେ ଅଭିଯୋଗ କରିଥିଲେ।ସ୍ତ୍ରୀଙ୍କ ମୃତ୍ୟୁ ପରେ ସଞ୍ଜୀବ ଫେରାର ହୋଇଯାଇଥିଲେ। ଏହି ଘଟଣାରେ ଖଇରା ପୋଲିସ ମାମଲା ନମ୍ବର ୨୬୦/୨୬ ରୁଜୁ କରି ତଦନ୍ତ ଆରମ୍ଭ କରିଥିଲା। ପରେ ପୋଲିସ ତାଙ୍କୁ ଅହମଦାବାଦରୁ ଗିରଫ କରିଛି।ଅନ୍ୟପକ୍ଷରେ, ବିବାହ ସମୟରେ ଦିଆଯାଇଥିବା ଯୌତୁକ ସାମଗ୍ରୀ ମୃତକଙ୍କ ବାପଘର ଲୋକଙ୍କୁ ହସ୍ତାନ୍ତର କରାଯାଇଛି। ଅଭିଯୁକ୍ତ ସଞ୍ଜୀବଙ୍କ ଡାକ୍ତରୀ ପରୀକ୍ଷା ପରେ ତାଙ୍କୁ କୋର୍ଟ ଚାଲାଣ କରାଯିବ ବୋଲି ଖଇରା ପୋଲିସ ସୂଚନା ଦେଇଛି।ଘଟଣାର ଅଧିକ ତଦନ୍ତ ଜାରି ରହିଛି।

ମୁରୁସୁଆଁରେ ବନ୍ଧୁକ ଦେଖାଇ ଲୁଟ୍ ଉଦ୍ୟମ: ମହିଳାଙ୍କ ସାହସ ଦେଖି ଛୁ ମାରିଲେ ୩ ମୁଖାପିନ୍ଧା ଦୁର୍ବୃତ୍ତ

କେନ୍ଦୁଝର/ପାଟଣା, ୧୩/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ମୁରୁସୁଆଁ ଗ୍ରାମରେ ବନ୍ଧୁକ ଦେଖାଇ ଲୁଟ୍ ଉଦ୍ୟମ। ଘରେ ପଶି ସୁନା ଗହଣା ଦେବାକୁ ଧମକ ଦେଇଥିବା ୩ ଜଣ ମୁଖାପିନ୍ଧା ଦୁର୍ବୃତ୍ତ ମହିଳାଙ୍କ ସାହସିକ ପ୍ରତିବାଦ ଦେଖି ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ମଙ୍ଗଳବାର ମଧ୍ୟାହ୍ନରେ ଘଟିଥିବା ଏହି ଘଟଣାକୁ ନେଇ ଅଞ୍ଚଳରେ ଆତଙ୍କ ଖେଳିଯାଇଛି।ସୂଚନା ଅନୁଯାୟୀ, ମୁରୁସୁଆଁ ଗ୍ରାମର ପ୍ରଶାନ୍ତ ସାହୁଙ୍କ ଘରର ବାଡ଼ିପଟ ପାଚେରି ଡେଇଁ ୩ ଜଣ ମୁଖାପିନ୍ଧା ଦୁର୍ବୃତ୍ତ ଘର ଭିତରକୁ ପଶିଥିଲେ। ଏହି ସମୟରେ ଘରେ ଥିବା ପ୍ରଶାନ୍ତଙ୍କ ପତ୍ନୀ ସୁପ୍ରିୟା ସାହୁଙ୍କୁ ବନ୍ଧୁକ ଦେଖାଇ ସୁନା ଗହଣା ଦେବାକୁ ଧମକ ଦେଇଥିଲେ।ତେବେ ଦୁର୍ବୃତ୍ତଙ୍କ ଧମକରେ ଭୟଭୀତ ନହୋଇ ସୁପ୍ରିୟା ସାହସର ସହ ପ୍ରତିବାଦ କରିଥିଲେ। ଏପରିକି ଦୁର୍ବୃତ୍ତଙ୍କ ଉପରକୁ ପନିକି ଫିଙ୍ଗିଥିଲେ। ତାଙ୍କର ଏଭଳି ସାହସିକ ପଦକ୍ଷେପ ଦେଖି ୩ ଜଣ ଯାକ ଭୟଭୀତ ହୋଇ ବାଡ଼ିପଟ ପାଚେରି ଡେଇଁ ଫେରାର ହୋଇଯାଇଥିଲେ।ଘଟଣା ସମୟରେ ପ୍ରଶାନ୍ତ ସାହୁ ଘରେ ନଥିଲେ। ସେ ମଙ୍ଗଳବାର ସନ୍ଧ୍ୟାରେ ଘରକୁ ଫେରିଥିବା ଜଣାପଡ଼ିଛି।ଅନ୍ୟପକ୍ଷରେ, ଏହି ଘଟଣା ସମ୍ପର୍କରେ ତୁରୁମୁଙ୍ଗା ଥାନାଧିକାରୀ ଦୀପ୍ତିରଞ୍ଜନ ସାହୁଙ୍କୁ ଯୋଗାଯୋଗ କରାଯିବାରୁ ସେ ଘଟଣା ବିଷୟରେ ସୂଚନା ପାଇଥିବା କହିଛନ୍ତି। ଏହାର ତଦନ୍ତ ପାଇଁ ଏକ ପୋଲିସ ଟିମ୍ ଗଠନ କରାଯାଇଥିବା ସେ ସୂଚନା ଦେଇଛନ୍ତି।ଏହି ଘଟଣା ପରେ ମୁରୁସୁଆଁ ଓ ଆଖପାଖ ଅଞ୍ଚଳରେ ଭୟର ବାତାବରଣ ଦେଖାଦେଇଛି। ଫେରାର ଦୁର୍ବୃତ୍ତଙ୍କୁ ଚିହ୍ନଟ କରିବା ପାଇଁ ପୋଲିସର ତଦନ୍ତ ଜାରି ରହିଛି।

ଚାକିରି ଦେବା ନାଁରେ ୩.୭୦ ଲକ୍ଷ ଠକେଇ ଅଭିଯୋଗ, ପ୍ରଧାନଶିକ୍ଷକ ଗିରଫ

କେନ୍ଦୁଝର/ପାଟଣା, ୧୨/୧୦: ଚାକିରି କରାଇଦେବା ନାଁରେ ଜଣେ ବି.ଇଡି. ଡିଗ୍ରୀଧାରୀ ଯୁବତୀଙ୍କଠାରୁ ୩ ଲକ୍ଷ ୭୦ ହଜାର ଟଙ୍କା ଠକେଇ ଅଭିଯୋଗରେ ଜଣେ ପ୍ରଧାନଶିକ୍ଷକଙ୍କୁ ଗିରଫ କରିଛି କେନ୍ଦୁଝର ଟାଉନ ଥାନା ପୁଲିସ। ଗିରଫ ଅଭିଯୁକ୍ତ ହେଉଛନ୍ତି ସାହାରପଡ଼ା ବ୍ଲକ ଦିଗିପଶି ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ବିଜୟ କୁମାର ନାୟକ (୪୫)।ସୂଚନା ଅନୁଯାୟୀ, ଯୁବତୀଙ୍କୁ ପିଇଓ (ପଞ୍ଚାୟତ ନିର୍ବାହୀ ଅଧିକାରୀ) ଚାକିରି କରାଇଦେବାର ପ୍ରତିଶ୍ରୁତି ଦେଇ ଅଭିଯୁକ୍ତ ଜଣକ ଟଙ୍କା ନେଇଥିବା ଅଭିଯୋଗ ହୋଇଛି। ଯୁବତୀଙ୍କ ପିତା ଏନେଇ କେନ୍ଦୁଝର ଟାଉନ ଥାନାରେ ଅଭିଯୋଗ କରିଥିଲେ। ଏହାକୁ ଆଧାର କରି ପୁଲିସ କେସ୍‌ ନଂ ୯୮୪/୨୦୨୬ରେ ମାମଲା ରୁଜୁ କରି ତଦନ୍ତ ଚଳାଇଥିଲା। ପରେ ପୁଲିସ କରଞ୍ଜିଆ ଅଞ୍ଚଳରୁ ଅଭିଯୁକ୍ତଙ୍କୁ ଗିରଫ କରିଛି।ଉଲ୍ଲେଖଯୋଗ୍ୟ, ଗତ ମାସ ୨୩ ତାରିଖରେ ଚାକିରି ଦେବା ନାଁରେ ଠକେଇ ଅଭିଯୋଗରେ ସାହାରପଡ଼ା ବ୍ଲକ କୁଣ୍ଡଳା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ତାରାଚାନ୍ଦ ମହାନ୍ତଙ୍କୁ ରରୁଆଁ ପୁଲିସ ଗିରଫ କରିଥିଲା। ଏହି ଘଟଣା ପରେ ସାହାରପଡ଼ା ବ୍ଲକ ଅଞ୍ଚଳରେ ଏଭଳି ଅଭିଯୋଗରେ ଆଉ ଜଣେ ପ୍ରଧାନଶିକ୍ଷକଙ୍କ ଗିରଫଦାରୀ ଚର୍ଚ୍ଚାର ବିଷୟ ହୋଇଛି।

ଢେଙ୍କିକୋଟରେ ୮୮୦ ଛେଳି ଉଦ୍ଧାର, ୪ ଟ୍ରକ୍ ଓ ୧ ପିକ୍‌ଅପ୍ ଜବତ; ୧୦ ଅଟକ

କେନ୍ଦୁଝର/ଢେଙ୍କିକୋଟ, ୮/୧୦: କେନ୍ଦୁଝର ଜିଲ୍ଲାର ଢେଙ୍କିକୋଟ ନିକଟରେ ୨୦ ନମ୍ବର ଜାତୀୟ ରାଜପଥରୁ ୮୮୦ଟି ଛେଳିକୁ ଉଦ୍ଧାର କରିଛି ଘଟଗାଁ ପୁଲିସ। ଅମାନୁଷିକ ଭାବେ ଛେଳି ପରିବହନ ଅଭିଯୋଗରେ ୪ଟି ଆଇଚର ଟ୍ରକ୍ ଓ ଗୋଟିଏ ପିକ୍‌ଅପ୍ ଗାଡ଼ିକୁ ଜବତ କରାଯିବା ସହ ଗାଡ଼ିରେ ଥିବା ୧୦ ଜଣଙ୍କୁ ଅଟକ ରଖାଯାଇଛି।ସୂଚନା ଅନୁଯାୟୀ, ଓଡ଼ିଶା ବନ୍ଦ ଚାଲିଥିବା ବେଳେ ବାହାର ରାଜ୍ୟରୁ ଛେଳିଗୁଡ଼ିକୁ ନେଇ ୫ଟି ଗାଡ଼ି କଟକ ଓ ଭୁବନେଶ୍ୱର ଅଭିମୁଖେ ଯାଉଥିଲା। ପାର୍ବଣ ଋତୁ ପାଇଁ ଏହି ଛେଳିଗୁଡ଼ିକୁ ନିଆଯାଉଥିବା ଜଣାପଡ଼ିଛି।ଗଦାଧରପୁର ନିକଟରେ ଘଟଗାଁ ଥାନାର ଏସ୍‌ଆଇ ପ୍ରଶାନ୍ତ କୁମାର ବେହେରା ଗାଡ଼ିଗୁଡ଼ିକୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ସମୟରେ ଛେଳିଗୁଡ଼ିକୁ ଅତ୍ୟଧିକ ସଂଖ୍ୟାରେ ଗାଡ଼ିରେ ଭର୍ତ୍ତି କରି ପରିବହନ କରାଯାଉଥିବା ଜଣାପଡ଼ିଥିଲା।ପ୍ରତ୍ୟେକ ଆଇଚର ଟ୍ରକ୍‌ରେ ସର୍ବାଧିକ ୫୦ଟି ଛେଳି ପରିବହନ କରିବା ପରିବର୍ତ୍ତେ ପ୍ରାୟ ୨୦୦ଟି ଲେଖାଏଁ ଛେଳି ନିଆଯାଉଥିଲା। ଏହିପରି ୪ଟି ଟ୍ରକ୍‌ରୁ ୮୦୦ଟି ଏବଂ ଗୋଟିଏ ପିକ୍‌ଅପ୍‌ରୁ ୮୦ଟି ଛେଳିକୁ ମିଶାଇ ମୋଟ ୮୮୦ଟି ଛେଳି ଉଦ୍ଧାର କରାଯାଇଥିଲା।ଏହି ଘଟଣାରେ ଘଟଗାଁ ଥାନାରେ କେସ୍ ନମ୍ବର ୪୯୫/୨୦୨୬ ଅନୁଯାୟୀ ମାମଲା ରୁଜୁ ହୋଇଛି। ଉଦ୍ଧାର ହୋଇଥିବା ଛେଳିଗୁଡ଼ିକୁ ମେଲାଣ ଗୋଶାଳାକୁ ପଠାଯାଇଛି। ଢେଙ୍କିକୋଟ ପୁଲିସ ବିଟ୍ ଅଧିକାରୀ ତ୍ରିନାଥ ନାଏକ ଏହି ଘଟଣାର ତଦନ୍ତ ଦାୟିତ୍ୱ ନେଇଛନ୍ତି।

ପାଟଣାରେ ଅବକାରୀ ବିଭାଗର ଚଢ଼ାଉ: ୫୬ ଲିଟର ମହୁଲି ମଦ ଜବତ, ୪ ଗିରଫ

କେନ୍ଦୁଝର/ପାଟଣା, ୭/୧୦: କେନ୍ଦୁଝର ଜିଲ୍ଲା ପାଟଣା ଅଞ୍ଚଳରେ ଅବକାରୀ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇ ୫୬ ଲିଟର ମହୁଲି ମଦ ଜବତ କରାଯାଇଛି। ଏହି ଘଟଣାରେ ୪ ଜଣଙ୍କୁ ଗିରଫ କରାଯାଇଥିବା ସୂଚନା ମିଳିଛି।ଅବକାରୀ ବିଭାଗର ସୂଚନା ଅନୁସାରେ, ଧଉଳିସାହିର ବାସୁଦେବ ମୁଣ୍ଡା (୫୦)ଙ୍କ ଠାରୁ ୧୫ ଲିଟର, ମହିଷାମୁଣ୍ଡିର ସୁମିତ୍ରା ମୁଣ୍ଡା (୨୫)ଙ୍କ ଠାରୁ ୧୧ ଲିଟର ଏବଂ ବୁଧୁନୀ ମୁଣ୍ଡା (୪୨)ଙ୍କ ଠାରୁ ୧୨ ଲିଟର ମହୁଲି ମଦ ଜବତ ହୋଇଛି।ସେହିପରି ପାଟଣାର ସୁରେନ୍ଦ୍ର କାରୁଆ (୫୦)ଙ୍କ ଠାରୁ ୧୮ ଲିଟର ମହୁଲି ମଦ ଜବତ କରାଯାଇଛି। ମୋଟ ୫୬ ଲିଟର ମହୁଲି ମଦ ଜବତ କରିବା ସହ ଅବକାରୀ ବିଭାଗ ସମସ୍ତ ୪ ଜଣଙ୍କୁ ଗିରଫ କରିଛି।

ଗୋରୁ ବୋଝେଇ ବୋଲେରୋ ଜବତ, ୨ ଗୋରୁ ମୃତ; ଡ୍ରାଇଭର ଅଟକ

କେନ୍ଦୁଝର/ଘଟଗାଁ, ୬/୧୦: କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ପିପିଳିଆ-ସରାସପଶି ରାସ୍ତାରେ ବେଆଇନ ଗୋରୁ ଚାଲାଣ ଅଭିଯୋଗରେ ଏକ ଗୋରୁ ବୋଝେଇ ବୋଲେରୋ ପିକ୍‌ଅପ୍‌ ଭ୍ୟାନ୍‌କୁ ଜବତ କରାଯାଇଛି। ଗାଡ଼ିଟି ଦୁର୍ଘଟଣାଗ୍ରସ୍ତ ହୋଇ ରାସ୍ତାକଡ଼ ଆକାଶିଆ ଜଙ୍ଗଲ ଭିତରକୁ ପଶିଯିବାରୁ ୨ଟି ଗୋରୁଙ୍କର ମୃତ୍ୟୁ ଘଟିଛି। ଘଟଣାରେ ଗାଡ଼ି ଚାଳକଙ୍କୁ ପୁଲିସ ହେପାଜତକୁ ନେଇଛି।ମିଳିଥିବା ସୂଚନା ଅନୁଯାୟୀ, ମଙ୍ଗଳବାର ସକାଳେ ଏକ ବୋଲେରୋ ପିକ୍‌ଅପ୍‌ ଭ୍ୟାନ୍‌ରେ ଅମାନୁଷିକ ଭାବେ ଗୋରୁ ଚାଲାଣ ହେଉଥିବା ଦେଖି ସ୍ଥାନୀୟ ଲୋକଙ୍କ ସନ୍ଦେହ ହୋଇଥିଲା। ଗ୍ରାମବାସୀ ଗାଡ଼ିଟିକୁ ପିଛା କରିବାରୁ ଡ୍ରାଇଭର ଦ୍ରୁତଗତିରେ ଖସି ପଳାଇବାକୁ ଚେଷ୍ଟା କରିଥିଲେ। ଏହି ସମୟରେ ଗାଡ଼ିଟି ଭାରସାମ୍ୟ ହରାଇ ରାସ୍ତାକଡ଼ ଆକାଶିଆ ବଣ ଭିତରକୁ ପଶିଯାଇଥିଲା।ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ଡ୍ରାଇଭରଙ୍କୁ କାବୁ କରିଥିଲେ। ଗାଡ଼ି ଭିତରେ ଚାପି ହୋଇ ରହିଥିବା ୨ଟି ଗୋରୁଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା।ଖବର ପାଇ ଢେଙ୍କିକୋଟ ପୁଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ବୋଲେରୋ ପିକ୍‌ଅପ୍‌ ଭ୍ୟାନ୍‌କୁ ଜବତ କରିବା ସହ ଡ୍ରାଇଭରଙ୍କୁ ହେପାଜତକୁ ନେଇଥିଲେ। ମୃତ ଗୋରୁଙ୍କ ଶବ ବ୍ୟବଚ୍ଛେଦ କରାଯାଇଛି।ଗାଡ଼ିରେ ମୋଟ ୪ଟି ଗୋରୁ ଥିବା ଜଣାପଡ଼ିଛି। ଉଦ୍ଧାର ସମୟରେ ଗୋଟିଏ ଗୋରୁ ଜଙ୍ଗଲ ଭିତରକୁ ଦୌଡ଼ି ପଳାଇଥିବା ବେଳେ ଅନ୍ୟ ୩ଟି ଗୋରୁଙ୍କୁ ଉଦ୍ଧାର କରି ଗୋଶାଳାକୁ ପଠାଯାଇଛି।ପୁଲିସର ନାକାବନ୍ଦି ସତ୍ତ୍ୱେ ଗାଁ ଗହଳିର ବିଭିନ୍ନ ଗଳାବାଟ ଦେଇ ଗୋରୁ ଚାଲାଣ ହେଉଥିବା ଘଟଣା ପୁଣିଥରେ ସାମ୍ନାକୁ ଆସିଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିବା ବେଳେ ପୁଲିସ ଘଟଣାର ତଦନ୍ତ ଜାରି ରଖିଛି।

ଭୀମକୁଣ୍ଡରେ ନାକାବନ୍ଦୀ ବେଳେ ୨ ଦେଶୀ ବନ୍ଧୁକ ସହ ମାରଣାସ୍ତ୍ର ଜବତ, ୩ ଗିରଫ

କେନ୍ଦୁଝର/ଘଟଗାଁ, ୬/୧୦: କେନ୍ଦୁଝର ଜିଲ୍ଲା ଘଟଗାଁ ଥାନା ଅଞ୍ଚଳର ଭୀମକୁଣ୍ଡ ନିକଟରେ ନାକାବନ୍ଦୀ ସମୟରେ ପୁଲିସ ବିପୁଳ ମାରଣାସ୍ତ୍ର ଜବତ କରିବା ସହ ୩ ଜଣ ଯୁବକଙ୍କୁ ଗିରଫ କରିଛି। ଜବତ ସାମଗ୍ରୀ ମଧ୍ୟରେ ୨ଟି ଦେଶୀ ବନ୍ଧୁକ, ୨ଟି ଲୁହା ନଳ, ୫ଟି ମୁନିଆ ତୀର, ଗୋଟିଏ ଧନୁ ଏବଂ ଗୋଟିଏ ଲୁହା ରଡ୍‌ ରହିଛି। ଏଥିସହ ଅଭିଯୁକ୍ତମାନେ ବ୍ୟବହାର କରୁଥିବା ଏକ ହିରୋ ଏଚ୍‌ଏଫ୍‌ ଡିଲକ୍ସ ବାଇକ୍‌କୁ ମଧ୍ୟ ପୁଲିସ ଜବତ କରିଛି।ସୂଚନା ଅନୁଯାୟୀ, ପାଟଣା ବ୍ଲକ ତଥା ଘଟଗାଁ ଥାନା ଅଧୀନ ଡୁମୁରିଆ ପଞ୍ଚାୟତର ଘାଟବାଲିଯୋଡ଼ି ଗ୍ରାମ ଭୀମକୁଣ୍ଡ ନିକଟରେ ଘଟଗାଁ ପୁଲିସ ପକ୍ଷରୁ ନାକାବନ୍ଦୀ କରାଯାଇଥିଲା। ପ୍ରାୟ ସାଢ଼େ ୮ଟା ସମୟରେ କରଞ୍ଜିଆ ଉପଖଣ୍ଡ ଅଞ୍ଚଳରୁ ଏକ ବାଇକ୍‌ରେ ୩ ଜଣ ଯୁବକ ଆସୁଥିବା ପୁଲିସ ଦେଖିଥିଲା।ଯୁବକମାନଙ୍କ ଗତିବିଧି ଉପରେ ସନ୍ଦେହ ହେବାରୁ ପୁଲିସ ବାଇକ୍‌ଟିକୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ସମୟରେ ବାଇକ୍‌ରେ ଥିବା ଏକ ଅଖା ବ୍ୟାଗ୍‌ରୁ ୨ଟି ଦେଶୀ ବନ୍ଧୁକ, ୨ଟି ଲୁହା ନଳ, ୫ଟି ମୁନିଆ ତୀର, ଗୋଟିଏ ଧନୁ ଓ ଗୋଟିଏ ଲୁହା ରଡ୍‌ ମିଳିଥିଲା। ପୁଲିସ ସମସ୍ତ ମାରଣାସ୍ତ୍ର ଜବତ କରିବା ସହ ୩ ଅଭିଯୁକ୍ତଙ୍କୁ ଗିରଫ କରିଛି।ଗିରଫ ଅଭିଯୁକ୍ତମାନେ ହେଲେ କରଞ୍ଜିଆ ଥାନା କୋଳିପଶି ଗ୍ରାମର ଲକ୍ଷ୍ମଣ ହାସଦାଙ୍କ ପୁଅ ରାମ ହାସଦା (୨୩), ସୁନାରାମ ମାରାଣ୍ଡିଙ୍କ ପୁଅ ଭାଦା ମାରାଣ୍ଡି (୨୫) ଏବଂ ଜିତୁରାମ ହାସଦାଙ୍କ ପୁଅ ମୋହନ ହାସଦା (୨୪)।ପୁଲିସର ପଚରାଉଚରା ସତ୍ତ୍ୱେ ଅଭିଯୁକ୍ତମାନେ ଜବତ ଅସ୍ତ୍ରଶସ୍ତ୍ର ସମ୍ପର୍କରେ ସନ୍ତୋଷଜନକ ସୂଚନା ଦେଇପାରିନଥିବା ଜଣାପଡ଼ିଛି। ସେମାନଙ୍କ ପାଖରେ ବନ୍ଧୁକର କୌଣସି ଲାଇସେନ୍ସ ମଧ୍ୟ ନଥିବା ପୁଲିସ କହିଛି। ସେମାନେ କେବଳ ଘଟଗାଁ ଯାଉଥିବା ପୁଲିସକୁ କହିଥିବା ସୂଚନା ମିଳିଛି।ଏନେଇ ଘଟଗାଁ ପୁଲିସ ପକ୍ଷରୁ ଅଭିଯୁକ୍ତମାନଙ୍କ ବିରୋଧରେ ଆର୍ମସ୍‌ ଆକ୍ଟର ଧାରା ୨୫ ଅନୁଯାୟୀ ମାମଲା ରୁଜୁ କରାଯାଇଛି। ଘଟଣାର ଅଧିକ ତଦନ୍ତ ଜାରି ରହିଥିବା ଘଟଗାଁ ଥାନାଧିକାରୀ ଶୁଭ୍ରାନ୍ତ କୁମାର ଜେନା ସୂଚନା ଦେଇଛନ୍ତି।

ପାଟଣାରେ ବନବିଭାଗର ଚଢ଼ାଉ: ବେଆଇନ ବାଲି ଚାଲାଣ ବେଳେ ୨ ଟ୍ରାକ୍ଟର ଜବତ

କେନ୍ଦୁଝର/ପାଟଣା, ୬/୧୦: କେନ୍ଦୁଝର ଜିଲ୍ଲା ପାଟଣା ବନାଞ୍ଚଳରେ ବେଆଇନ ବାଲି ଉତ୍ତୋଳନ ଓ ଚୋରାଚାଲାଣ ବିରୋଧରେ ବନବିଭାଗ ପକ୍ଷରୁ ଚଢ଼ାଉ କରାଯାଇଛି। ଏହି ଚଢ଼ାଉ ସମୟରେ ବାଲି ବୋଝେଇ ୨ଟି ଟ୍ରାକ୍ଟର ଜବତ କରାଯାଇଛି।ପାଟଣା ବନାଞ୍ଚଳ ଅନ୍ତର୍ଗତ ପାଟଣା ବିଟ୍‌ର ଜାମୁପଶି ଗ୍ରାମ ସୀମାରେ ଥିବା ବୈତରଣୀ ଘାଟରୁ ବେଆଇନ ଭାବେ ବାଲି ଉତ୍ତୋଳନ କରି ଟ୍ରାକ୍ଟର ଯୋଗେ ଚୋରାଚାଲାଣ କରାଯାଉଥିବା ବେଳେ ବନବିଭାଗ ଏହି ଦୁଇଟି ଟ୍ରାକ୍ଟରକୁ ଧରିଥିଲା।ପାଟଣା ବନାଞ୍ଚଳ ଅଧିକାରୀ ଆର୍ତ୍ତତ୍ରାଣ ମିର୍ଦ୍ଧା ଓ ପାଟଣା ବନପାଳ ନିରଞ୍ଜନ ସେଠୀଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଥିଲା। ଜିଲ୍ଲା ବନଖଣ୍ଡ ଅଧିକାରୀ ଧନରାଜ ଏଚ୍.ଡି.ଙ୍କ ନିର୍ଦ୍ଦେଶକ୍ରମେ ବନବିଭାଗ ପକ୍ଷରୁ ଏହି କାର୍ଯ୍ୟାନୁଷ୍ଠାନ ହୋଇଥିବା ଜଣାପଡ଼ିଛି।ଜବତ ହୋଇଥିବା ଦୁଇଟି ଟ୍ରାକ୍ଟରକୁ ପାଟଣା ବନାଞ୍ଚଳ କାର୍ଯ୍ୟାଳୟକୁ ଅଣାଯାଇଛି। ନିୟମ ଅନୁଯାୟୀ ଜୋରିମାନା ଆଦାୟ ପରେ ଟ୍ରାକ୍ଟର ଦୁଇଟିକୁ ଛାଡ଼ି ଦିଆଯିବ ବୋଲି ବନବିଭାଗ ପକ୍ଷରୁ ସୂଚନା ମିଳିଛି।

ଆୟ ବହିର୍ଭୂତ ସମ୍ପତ୍ତି ଅଭିଯୋଗ: AEE ଅରବିନ୍ଦ ମହାନ୍ତିଙ୍କ ୧୦ଟି ସ୍ଥାନରେ ଭିଜିଲାନ୍ସ ଚଢ଼ାଉ

ଭୁବନେଶ୍ୱର:୫/୧୦, ଆୟଠାରୁ ଅଧିକ ସମ୍ପତ୍ତି  ଠୁଳ କରିଥିବା ଅଭିଯୋଗରେ ମୟୂରଭଞ୍ଜ ଜିଲ୍ଲା ବେତନଟୀ R&B ସବ୍-ଡିଭିଜନର ସହକାରୀ ନିର୍ବାହୀ ଯନ୍ତ୍ରୀ (AEE) ଅରବିନ୍ଦ ମହାନ୍ତିଙ୍କ ସମ୍ପତ୍ତି ଉପରେ ଓଡ଼ିଶା ଭିଜିଲାନ୍ସ ପକ୍ଷରୁ ସୋମବାର ଏକକାଳୀନ ଚଢ଼ାଉ କରାଯାଇଛି।ସ୍ୱତନ୍ତ୍ର ଭିଜିଲାନ୍ସ ଜଜ୍‌, ବାରିପଦାଙ୍କ ଦ୍ୱାରା ଜାରି ସର୍ଚ୍ଚ ୱାରେଣ୍ଟ ଆଧାରରେ ଏହି ଚଢ଼ାଉ ଚାଲିଛି। ଚଢ଼ାଉରେ ୫ ଜଣ DSP, ୮ ଜଣ ଇନ୍ସପେକ୍ଟରଙ୍କ ସମେତ ଅନ୍ୟାନ୍ୟ ଭିଜିଲାନ୍ସ କର୍ମଚାରୀ ସାମିଲ ଅଛନ୍ତି।ଭିଜିଲାନ୍ସ ପକ୍ଷରୁ ଜାରି ସୂଚନା ଅନୁସାରେ, ମୟୂରଭଞ୍ଜ, ବାଲେଶ୍ୱର ଓ ଖୋର୍ଦ୍ଧା ଜିଲ୍ଲାର ବିଭିନ୍ନ ସ୍ଥାନରେ ମୋଟ ୧୦ଟି ସ୍ଥାନରେ ଚଢ଼ାଉ ଚାଲିଛି।ଅରବିନ୍ଦ ମହାନ୍ତିଙ୍କ ଅଙ୍ଗାରଗଡ଼ିଆସ୍ଥିତ ତିନି ମହଲା କୋଠା, ଖୋର୍ଦ୍ଧା ଜିଲ୍ଲା ବାଲିଅନ୍ତାସ୍ଥିତ ଦୁଇ ମହଲା କୋଠା ଏବଂ ବସନ୍ତପୁରସ୍ଥିତ ଫାର୍ମହାଉସ୍‌ରେ ମଧ୍ୟ ଭିଜିଲାନ୍ସ ଟିମ୍‌ ଯାଞ୍ଚ କରୁଛି।ଏହା ସହିତ ବେତନଟୀସ୍ଥିତ ତାଙ୍କ କାର୍ଯ୍ୟାଳୟ ଓ ସରକାରୀ ବାସଭବନ, ବାଲେଶ୍ୱର ଜିଲ୍ଲା ଜଳେଶ୍ୱରର ରାୟଣ-ରାମଚନ୍ଦ୍ରପୁରସ୍ଥିତ ପୈତୃକ ଘର ଏବଂ ବାମପଦାସ୍ଥିତ ଅନ୍ୟ ଏକ ଘରେ ମଧ୍ୟ ଚଢ଼ାଉ ଜାରି ରହିଛି।ତାଙ୍କର ତିନିଜଣ ଘନିଷ୍ଠ ସହଯୋଗୀଙ୍କ ଅଙ୍ଗାରଗଡ଼ିଆ, ବୈଶିଙ୍ଗା ଓ ବାମପଦାସ୍ଥିତ ଘରେ ମଧ୍ୟ ଭିଜିଲାନ୍ସ ପକ୍ଷରୁ ଏକକାଳୀନ ତଲାସି ଚାଲିଛି।ଖବର ଲେଖାଯିବା ପର୍ଯ୍ୟନ୍ତ ଚଢ଼ାଉ ଓ ତଲାସି ଅଭିଯାନ ଜାରି ରହିଥିଲା। ତଲାସି ପରେ ଅରବିନ୍ଦ ମହାନ୍ତିଙ୍କ ମୋଟ ସମ୍ପତ୍ତି ଓ ଅନ୍ୟାନ୍ୟ ତଥ୍ୟ ସମ୍ପର୍କରେ ଅଧିକ ସୂଚନା ମିଳିବାର ସମ୍ଭାବନା ରହିଛି।

ଭାଇବୋହୂଙ୍କ ପେଟରେ ଖଣତି ଭୁସିଦେଲେ ଦେଢ଼ଶୁର, ଗୁରୁତର ମହିଳା ବ୍ରହ୍ମପୁର ସ୍ଥାନାନ୍ତର

ଗଞ୍ଜାମ/ଦିଗପହଣ୍ଡି, ୦୪/୧୦: ଭାଇବୋହୂଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରିବା ଅଭିଯୋଗରେ ଚାଞ୍ଚଲ୍ୟ। ଗଞ୍ଜାମ ଜିଲ୍ଲା ସାନଖେମୁଣ୍ଡି ବ୍ଲକ ଏରେଣ୍ଡ୍ରା ପଞ୍ଚାୟତ ଅନ୍ତର୍ଗତ ଡି.ଆମ୍ବଠା ଗ୍ରାମରେ ଏହି ଘଟଣା ଘଟିଥିବା ଜଣାପଡ଼ିଛି।ସୂଚନା ଅନୁସାରେ, ଗ୍ରାମର ବାବୁଲା ନାହାକ ତାଙ୍କ ସାନଭାଇଙ୍କ ସ୍ତ୍ରୀଙ୍କୁ ଏକ ଖଣତିରେ ପେଟରେ ଭୁସିଦେଇଥିବା ଅଭିଯୋଗ ହୋଇଛି। ଆକ୍ରମଣ ପରେ ମହିଳା ଗୁରୁତର ଆହତ ହୋଇ ରାସ୍ତା ଉପରେ ଛଟପଟ ହେଉଥିଲେ।ଘଟଣା ଦେଖି ସ୍ଥାନୀୟ ଲୋକେ ତୁରନ୍ତ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଆଡ଼ାପଡ଼ା ମେଡିକାଲରେ ଭର୍ତ୍ତି କରିଥିଲେ। ତେବେ ମହିଳାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ପରେ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି।ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ଦେଖାଦେଇଥିବା ବେଳେ ଆକ୍ରମଣର ପ୍ରକୃତ କାରଣ ଓ ଘଟଣା ସମ୍ପର୍କରେ ପୋଲିସର ତଦନ୍ତ ପରେ ଅଧିକ ସୂଚନା ସ୍ପଷ୍ଟ ହେବ।

ବସ୍‌ରୁ ଛାତ୍ରୀଙ୍କୁ ଓହ୍ଲାଇ ହୋଟେଲକୁ ନେଇ ଦୁଷ୍କର୍ମ ଅଭିଯୋଗ, ଯୁବକ ଗିରଫ

ଆନନ୍ଦପୁର/କେନ୍ଦୁଝର, ୩/୧୦: କେନ୍ଦୁଝର ଜିଲ୍ଲା ସୋସୋ ଥାନା ଅଞ୍ଚଳରେ ଯୁକ୍ତ ୩ ଛାତ୍ରୀଙ୍କୁ ବସ୍‌ରୁ ଓହ୍ଲାଇ ଏକ ହୋଟେଲକୁ ନେଇ ଦୁଷ୍କର୍ମ କରାଯାଇଥିବା ନେଇ ଗୁରୁତର ଅଭିଯୋଗ ହୋଇଛି। ଏହି ଅଭିଯୋଗ ଆଧାରରେ ପୋଲିସ ମୁଣ୍ଡୁକାଟ ଗାଁର ରଶ୍ମି ରଞ୍ଜନ ସେଠୀଙ୍କୁ ଗିରଫ କରି ତଦନ୍ତ ଜାରି ରଖିଛି। ଅଭିଯୋଗ  ଅନୁସାରେ, ଯୁକ୍ତ ୩ରେ ପଢ଼ୁଥିବା ଛାତ୍ରୀଙ୍କୁ ତାଙ୍କ ବାପା କଲେଜ ଯିବା ପାଇଁ ଏକ ଘରୋଇ ବସ୍‌ରେ ବସାଇ ଦେଇଥିଲେ। କିଛି ବାଟ ଯିବା ପରେ କଲେଜର ଜଣେ ଛାତ୍ର ରଶ୍ମି ରଞ୍ଜନ କିଛି କାମ ଥିବା କହି ତାଙ୍କୁ ବସ୍‌ରୁ ଓହ୍ଲାଇବାକୁ କହିଥିବା ଅଭିଯୋଗ ହୋଇଛି।ଛାତ୍ରୀ ବସ୍‌ରୁ ଓହ୍ଲାଇବା ପରେ ତାଙ୍କୁ ସାଳବଣୀ ଛକ ନିକଟସ୍ଥ ଏକ ହୋଟେଲକୁ ନେଇ ସେଠାରେ ଦୁଷ୍କର୍ମ କରାଯାଇଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି।ଘଟଣା ପରେ ଛାତ୍ରୀ ଘରକୁ ଫେରି ପରିବାର ଲୋକଙ୍କୁ ସମସ୍ତ ଘଟଣା ସମ୍ପର୍କରେ ଜଣାଇଥିଲେ। ଏହାପରେ ପରିବାର ପକ୍ଷରୁ ସୋସୋ ଥାନାରେ ଲିଖିତ ଅଭିଯୋଗ ଦାଏର କରାଯାଇଥିଲା।ଅଭିଯୋଗ ପରେ ପୋଲିସ ମାମଲାର ତଦନ୍ତ ଆରମ୍ଭ କରିଥିଲା। ଛାତ୍ରୀଙ୍କ ଡାକ୍ତରୀ ପରୀକ୍ଷା କରାଯିବା ସହ ଅଭିଯୋଗରେ ନାମ ଥିବା ରଶ୍ମି ରଞ୍ଜନ ସେଠୀଙ୍କୁ ପୋଲିସ ଗିରଫ କରିଛି।ପୀଡ଼ିତାଙ୍କ ମାଆଙ୍କ ଅଭିଯୋଗ ଅନୁସାରେ, ଝିଅକୁ ନେଇ ଯାଉଥିବା ଘରୋଇ ବସ୍‌କୁ ରଶ୍ମି ଅଟକାଇଥିଲେ ଏବଂ ତାଙ୍କ ଝିଅକୁ ହୋଟେଲକୁ ନେଇଯାଇଥିଲେ। ପରେ ହୋଟେଲ ମ୍ୟାନେଜରଙ୍କ ଫୋନ୍‌ ମାଧ୍ୟମରେ ପରିବାର ଘଟଣା ସମ୍ପର୍କରେ ଜାଣି ଝିଅକୁ ଉଦ୍ଧାର କରିଥିବା ସେ କହିଛନ୍ତି।ଏହି ଘଟଣାକୁ ନେଇ ସୋସୋ ପୋଲିସ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରିଛି। ଘଟଣାର ସମସ୍ତ ଦିଗ ନେଇ ପୋଲିସର ତଦନ୍ତ ଜାରି ରହିଛି।

ସମ୍ବଲପୁରରେ ୩୩୦ ବୋତଲ ନିଶା କଫ୍ ସିରପ୍ ଜବତ, ମହିଳା ଗିରଫ

ସମ୍ବଲପୁର: ଆଗାମୀ ପାର୍ବପର୍ବାଣୀକୁ ଦୃଷ୍ଟିରେ ରଖି ଅବକାରୀ ବିଭାଗ ପକ୍ଷରୁ ସମ୍ବଲପୁର ଜିଲ୍ଲାର ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି। ଏହି କ୍ରମରେ ଠେଲକୋଲେଇ ଥାନା ଅନ୍ତର୍ଗତ ଶ୍ରଦ୍ଧାପାଲି ଗ୍ରାମରେ ଚଢ଼ାଉ କରି ବିପୁଳ ପରିମାଣର ନିଶା କଫ୍ ସିରପ୍ ଜବତ କରାଯାଇଛି।ନିଶା କଫ୍ ସିରପ୍ କାରବାର ସମ୍ପର୍କରେ ସୂଚନା ପାଇ ଗୁରୁବାର ଅବକାରୀ ବିଭାଗର ଏକ ଟିମ୍ ଶ୍ରଦ୍ଧାପାଲି ଗ୍ରାମରେ ଚଢ଼ାଉ କରିଥିଲା। ଚଢ଼ାଉ ସମୟରେ ଗ୍ରାମର ପୁଷ୍ପଲତା ବେହେରା (୫୨)ଙ୍କୁ ଧରାଯାଇଥିଲା।ତାଙ୍କ ନିକଟରୁ ୩୩୦ଟି ନିଶା କଫ୍ ସିରପ୍ ବୋତଲ ଜବତ କରାଯାଇଥିବା ଅବକାରୀ ବିଭାଗ ପକ୍ଷରୁ ସୂଚନା ମିଳିଛି। ଏହି କଫ୍ ସିରପ୍ ଅବୈଧ ଭାବେ ରଖାଯାଇଥିବା ଅଭିଯୋଗରେ ମହିଳାଙ୍କ ବିରୋଧରେ ମାମଲା ରୁଜୁ କରାଯାଇଛି।ଏହାପରେ ଅବକାରୀ ବିଭାଗ ପକ୍ଷରୁ ପୁଷ୍ପଲତା ବେହେରାଙ୍କୁ ଗିରଫ କରାଯାଇ ଜବତ କଫ୍ ସିରପ୍‌ଗୁଡ଼ିକୁ ଜବତ କରାଯାଇଛି। ଗିରଫ ମହିଳାଙ୍କୁ ଆଜି ଅଦାଲତକୁ ଚାଲାଣ କରାଯାଇଥିବା ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି।

ତ୍ରିଲୋଚନ ମହାନ୍ତ ହତ୍ୟା ଘଟଣା: କେନ୍ଦେଇପଶିରେ ୨୪ ଘଣ୍ଟିଆ ପୁଲିସ ତନାଘନା

କେନ୍ଦୁଝର/ପାଟଣା: କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନା ଅଧୀନ କେନ୍ଦେଇପଶି–ପାଟଣା ରାସ୍ତାର ଖୁଣ୍ଟାପଡ଼ା ୟୁକାଲିପଟାସ ଜଙ୍ଗଲ ନିକଟରେ ଜନସେବା କେନ୍ଦ୍ର ମାଲିକ ତ୍ରିଲୋଚନ ମହାନ୍ତଙ୍କ ହତ୍ୟା ଘଟଣାର ତଦନ୍ତକୁ ଜୋରଦାର କରିଛି ତୁରୁମୁଙ୍ଗା ପୁଲିସ। ଗତ ଦୁଇଦିନ ଧରି କେନ୍ଦେଇପଶି ଓ ଏହାର ଆଖପାଖ ଅଞ୍ଚଳରେ ପୁଲିସ ପକ୍ଷରୁ ତନାଘନା ଜାରି ରହିଛି।ତୁରୁମୁଙ୍ଗା ଥାନା ଅଧିକାରୀ ଦୀପ୍ତିରଞ୍ଜନ ସାହୁଙ୍କ ନେତୃତ୍ୱରେ ପୁଲିସ ଟିମ୍‌ ବିଭିନ୍ନ ଦିଗରୁ ଘଟଣାର ତଦନ୍ତ କରୁଛି। ବିଶେଷକରି କେନ୍ଦେଇପଶି ବଜାରର ବିଭିନ୍ନ ସ୍ଥାନରେ ଲାଗିଥିବା CCTV କ୍ୟାମେରାର ଫୁଟେଜ୍ ଯାଞ୍ଚ କରାଯାଉଛି। ହତ୍ୟାକାଣ୍ଡ ପୂର୍ବରୁ ଓ ପରେ ସନ୍ଦେହଜନକ ଗତିବିଧି ଏବଂ ଯାତାୟାତ ସମ୍ପର୍କରେ ସୂଚନା ପାଇବାକୁ ପୁଲିସ ଫୁଟେଜ୍‌ଗୁଡ଼ିକୁ ଖୋଜୁଥିବା ଜଣାପଡ଼ିଛି।ଅନ୍ୟପକ୍ଷରେ, କେନ୍ଦେଇପଶି ବଜାର ଓ ଆଖପାଖ ଅଞ୍ଚଳରେ ତୁରୁମୁଙ୍ଗା ପୁଲିସର ନିୟମିତ ପେଟ୍ରୋଲିଂ ଜାରି ରହିଛି। ଦିନ ଓ ରାତିରେ ପୁଲିସ ଟିମ୍‌ ଗସ୍ତ କରୁଥିବା ବେଳେ ଘଟଣାସ୍ଥଳ ଓ ଏହାର ଆଖପାଖ ଅଞ୍ଚଳ ଉପରେ ମଧ୍ୟ କଡ଼ା ନଜର ରଖାଯାଉଛି।ସୂଚନା ଅନୁସାରେ, ତ୍ରିଲୋଚନ ମହାନ୍ତଙ୍କୁ ପ୍ରଥମେ ଗୁଳିମାଡ଼ ଏବଂ ପରେ ଭୁଜାଲିରେ ଆକ୍ରମଣ କରି ହତ୍ୟା କରାଯାଇଥିଲା। ଘଟଣାସ୍ଥଳରୁ ୩ଟି ଗୁଳି ଖୋକା ମିଳିଥିବା ଜଣାପଡ଼ିଛି। ଅଭିଯୁକ୍ତଙ୍କୁ ଚିହ୍ନଟ କରିବା ସହ ହତ୍ୟାର ପ୍ରକୃତ କାରଣ ଜାଣିବା ପାଇଁ ପୁଲିସ ବିଭିନ୍ନ ସୂତ୍ରରୁ ତଥ୍ୟ ସଂଗ୍ରହ କରୁଛି।ଏହି ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ସୁରକ୍ଷାକୁ ନେଇ ଚିନ୍ତା ବଢ଼ିଛି। କେନ୍ଦେଇପଶିରେ ନୂଆ ପୁଲିସ ଫାଣ୍ଡି ପ୍ରତିଷ୍ଠା ସହ ଅଞ୍ଚଳରେ ନିୟମିତ ପୁଲିସ ପେଟ୍ରୋଲିଂ ବଢ଼ାଇବାକୁ ସ୍ଥାନୀୟ ଲୋକଙ୍କ ପକ୍ଷରୁ ଦାବି ହୋଇଛି।