ମୁମ୍ବାଇ: ରିଲିଜ୍ ପୂର୍ବରୁ ବଡ଼ ସଫଳତା ହାସଲ କରିଛି ଅଲ୍ଲୁ ଅର୍ଜୁନ ଓ ନିର୍ଦ୍ଦେଶକ ଅଟଲିଙ୍କ ବହୁପ୍ରତୀକ୍ଷିତ ଫିଲ୍ମ ‘ରାକା’। ଚଳଚ୍ଚିତ୍ରଟି ଏକାସାଙ୍ଗରେ ସର୍ବାଧିକ କଳାକାରଙ୍କ ରିଅଲ୍-ଟାଇମ୍ ମୋସନ୍-କ୍ୟାପଚର କରିବା ନେଇ ଗିନିଜ୍ ୱାର୍ଲ୍ଡ ରେକର୍ଡସରେ ସ୍ଥାନ ପାଇଛି।
ନିର୍ଦ୍ଦେଶକ ଅଟଲିଙ୍କ ୪୦ତମ ଜନ୍ମଦିନ ଅବସରରେ ସେପ୍ଟେମ୍ବର ୨୧ରେ ଏହି ରେକର୍ଡ ସମ୍ପର୍କରେ ଘୋଷଣା କରାଯାଇଛି। ପ୍ରଯୋଜନା ସଂସ୍ଥା ସନ୍ ପିକ୍ଚର୍ସ ପକ୍ଷରୁ ଅଲ୍ଲୁ ଅର୍ଜୁନ ଓ ଅଟଲି ଗିନିଜ୍ ୱାର୍ଲ୍ଡ ରେକର୍ଡସର ଅଫିସିଆଲ୍ ସାର୍ଟିଫିକେଟ୍ ଗ୍ରହଣ କରୁଥିବା ଫଟୋ ମଧ୍ୟ ସେୟାର କରାଯାଇଛି।
୩୭ ଜଣ କଳାକାରଙ୍କ ରିଅଲ୍-ଟାଇମ୍ ମୋସନ୍-କ୍ୟାପଚର
‘ରାକା’ର ଏକ ବିଶେଷ ସିନ୍ରେ ଏକାସାଙ୍ଗରେ ୩୭ ଜଣ କଳାକାରଙ୍କ ରିଅଲ୍-ଟାଇମ୍ ମୋସନ୍-କ୍ୟାପଚର କରାଯାଇଥିବା ଜଣାପଡ଼ିଛି। ଏହି ପ୍ରଯୁକ୍ତିରେ କଳାକାରମାନଙ୍କ ଶରୀରର ଗତିବିଧିକୁ ଡିଜିଟାଲ୍ ଭାବେ ରେକର୍ଡ କରି ସିନେମାର ଭିଜୁଆଲ୍ ଦୃଶ୍ୟରେ ବ୍ୟବହାର କରାଯାଏ।
ସନ୍ ପିକ୍ଚର୍ସ ନିଜର ‘X’ ଆକାଉଣ୍ଟରେ ଏହି ରେକର୍ଡ ସମ୍ପର୍କରେ ଘୋଷଣା କରିବା ସହ ଅଲ୍ଲୁ ଅର୍ଜୁନ ଓ ଅଟଲିଙ୍କ ଫଟୋ ସେୟାର କରିଛି। ଏହା ସହ ରେକର୍ଡ ସୃଷ୍ଟି କରାଯାଇଥିବା ସିନ୍ର ବିହାଇଣ୍ଡ-ଦି-ସିନ୍ସ ଭିଡିଓ ମଧ୍ୟ ପ୍ରକାଶ କରାଯାଇଛି।
https://x.com/sunpictures/status/2102007425884901743
ରେକର୍ଡକୁ ନେଇ ଅଲ୍ଲୁ ଅର୍ଜୁନଙ୍କ ପ୍ରତିକ୍ରିୟା
ଏହି ସଫଳତାକୁ ନେଇ ଅଲ୍ଲୁ ଅର୍ଜୁନ ଖୁସି ପ୍ରକାଶ କରିଛନ୍ତି। ସେ ଏହାକୁ ସମଗ୍ର ଟିମ୍ ପାଇଁ ଗର୍ବର ମୁହୂର୍ତ୍ତ ବୋଲି କହିବା ସହ ଏହି ପ୍ରଚେଷ୍ଟାକୁ ଅଫିସିଆଲ୍ ଭାବେ ସ୍ୱୀକୃତି ଦେଇଥିବାରୁ ଗିନିଜ୍ ୱାର୍ଲ୍ଡ ରେକର୍ଡସ ପ୍ରତି କୃତଜ୍ଞତା ଜଣାଇଛନ୍ତି।
ବିହାଇଣ୍ଡ-ଦି-ସିନ୍ସ ଭିଡିଓରେ ୩୭ ଜଣ କଳାକାର ସ୍ପେଶାଲ୍ ମୋସନ୍-କ୍ୟାପଚର ସୁଟ୍ ପିନ୍ଧି ଏକାସାଙ୍ଗରେ ସୁଟିଂ କରୁଥିବା ଦେଖିବାକୁ ମିଳିଛି।
‘ରାକା’ରେ ଅଲ୍ଲୁ ଅର୍ଜୁନଙ୍କ ୪ଟି ଚରିତ୍ର!
‘ରାକା’କୁ ନେଇ ଦର୍ଶକଙ୍କ ମଧ୍ୟରେ ଆଗ୍ରହ ବଢ଼ୁଥିବା ବେଳେ ଫିଲ୍ମର କାହାଣୀକୁ ନେଇ ମଧ୍ୟ ବିଭିନ୍ନ ଚର୍ଚ୍ଚା ହେଉଛି। ସୂଚନା ଅନୁଯାୟୀ, ଅଲ୍ଲୁ ଅର୍ଜୁନ ଫିଲ୍ମରେ ୪ଟି ଭିନ୍ନ ଚରିତ୍ରରେ ନଜର ଆସିପାରନ୍ତି। ଏଥିରେ ଜେଜେବାପା, ବାପା ଏବଂ ଦୁଇ ପୁଅଙ୍କ ଚରିତ୍ର ଥିବା ଚର୍ଚ୍ଚା ହେଉଛି।
ଫିଲ୍ମରେ ମଲ୍ଟିଭର୍ସ କନସେପ୍ଟ ରହିଥିବା ନେଇ ମଧ୍ୟ ଚର୍ଚ୍ଚା ଚାଲିଛି। ତେବେ ଏହାକୁ ନେଇ ନିର୍ମାତାଙ୍କ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ।
ଫିଲ୍ମରେ ନଜର ଆସିବେ ଏକାଧିକ ଷ୍ଟାର୍
‘ରାକା’ ଏକ ସାଇନ୍ସ-ଫିକ୍ସନ୍ ଆକ୍ସନ୍ ଡ୍ରାମା ବୋଲି ଜଣାପଡ଼ିଛି। ଫିଲ୍ମରେ ଅଲ୍ଲୁ ଅର୍ଜୁନଙ୍କ ସହ ଦୀପିକା ପାଦୁକୋନ୍, ରଶ୍ମିକା ମନ୍ଦାନା, ଜାହ୍ନବୀ କପୁର ଏବଂ ମୃଣାଳ ଠାକୁର ପ୍ରମୁଖ ଭୂମିକାରେ ଥିବା ସୂଚନା ରହିଛି।
ଅଲ୍ଲୁ ଅର୍ଜୁନ ଓ ଅଟଲିଙ୍କ ଏହା ପ୍ରଥମ ଫିଲ୍ମ। ରିଲିଜ୍ ପୂର୍ବରୁ ଗିନିଜ୍ ୱାର୍ଲ୍ଡ ରେକର୍ଡ ସୃଷ୍ଟି କରିଥିବାରୁ ଏହି ଫିଲ୍ମକୁ ନେଇ ସିନେପ୍ରେମୀଙ୍କ ଉତ୍ସୁକତା ଆହୁରି ବଢ଼ିଛି।
