ଆନନ୍ଦପୁର, ୨୬/୯: ଲଗାଣ ବର୍ଷା ଯୋଗୁଁ ଘସିପୁରା ବ୍ଲକ ଅନ୍ତର୍ଗତ ରେମାଳ ନଦୀର ଦରଳିପାଲ ପୋଲର ଗୋଟିଏ ସ୍ପାନ୍ ଦବିଯାଇଛି। ପ୍ରାୟ ୨୫ ବର୍ଷ ତଳେ ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ନିର୍ମିତ ଏହି ପୋଲ ଦୁର୍ବଳ ହୋଇପଡ଼ିବାରୁ ଏବେ ଅଘଟଣ ଆଶଙ୍କା ସୃଷ୍ଟି ହୋଇଛି।ପୋଲର ଗୋଟିଏ ସ୍ପାନ୍ ଦବିଯିବା ପରେ ଏହା ବିପଦସଙ୍କୁଳ ହୋଇପଡ଼ିଛି। ଏହାକୁ ଦୃଷ୍ଟିରେ ରଖି ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପୋଲ ଉପରେ ଭାରିଯାନ ଚଳାଚଳ ଉପରେ କଟକଣା ଲଗାଯାଇଛି।
ପୋଲର ଉଭୟ ପାର୍ଶ୍ୱରେ ରାସ୍ତା ଅବରୋଧ
ଘଟଣାର ଗୁରୁତ୍ୱକୁ ଦେଖି ବିଭାଗ ପକ୍ଷରୁ ପୋଲର ଉଭୟ ପାର୍ଶ୍ୱ ରାସ୍ତାରେ ମାଟି ପକାଇ ଅଧା ରାସ୍ତାକୁ ବ୍ଲକ୍ କରାଯାଇଛି। ଫଳରେ ଭାରିଯାନ ଚଳାଚଳ ଉପରେ ରୋକ୍ ଲାଗିଥିବାବେଳେ ସାଧାରଣ ଯାତାୟାତ ନେଇ ମଧ୍ୟ ଲୋକଙ୍କ ମଧ୍ୟରେ ଚିନ୍ତା ବଢ଼ିଛି।
୧୦ ପଞ୍ଚାୟତର ଲୋକେ ଚିନ୍ତାରେ
ଦରଳିପାଲ ପୋଲ ଉପରେ ଘସିପୁରା ବ୍ଲକର ପ୍ରାୟ ୧୦ଟି ପଞ୍ଚାୟତର ଲୋକେ ଯାତାୟାତ ପାଇଁ ନିର୍ଭର କରୁଥିବା ଜଣାପଡ଼ିଛି। ଦୀର୍ଘ ବର୍ଷ ଧରି ଏହି ପୋଲ ଅଞ୍ଚଳବାସୀଙ୍କ ଯାତାୟାତର ଏକ ପ୍ରମୁଖ ମାଧ୍ୟମ ହୋଇଆସିଛି।
ପୋଲର ଗୋଟିଏ ସ୍ପାନ୍ ଦବିଯିବା ପରେ ଏହାର ସୁରକ୍ଷାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଆଶଙ୍କା ବଢ଼ିଛି। ବିଶେଷକରି ଲଗାଣ ବର୍ଷା ଜାରି ରହିଲେ ପରିସ୍ଥିତି ଆହୁରି ଗମ୍ଭୀର ହେବା ନେଇ ଲୋକେ ଚିନ୍ତା ପ୍ରକାଶ କରିଛନ୍ତି।
ନୂତନ ପୋଲ ନିର୍ମାଣ ଦାବି
ଦବିଯାଇଥିବା ପୋଲକୁ ତୁରନ୍ତ ମରାମତି କରିବା ସହ ଭବିଷ୍ୟତରେ ଯାତାୟାତ ସମସ୍ୟାର ସ୍ଥାୟୀ ସମାଧାନ ପାଇଁ ଏଠାରେ ଏକ ନୂତନ ପୋଲ ନିର୍ମାଣ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି।
