କେନ୍ଦୁଝର/ଘଟଗାଁ, ୨୯/୯: ଓଡ଼ିଶା ଅବସରପ୍ରାପ୍ତ ଗ୍ରାମ ପଞ୍ଚାୟତ ସମ୍ପାଦକ ସଂଘର ରାଜ୍ୟ କାର୍ଯ୍ୟକାରିଣୀ ସଦସ୍ୟମାନଙ୍କ ଏକ ବୈଠକ ଘଟଗାଁସ୍ଥିତ ମା’ ତାରିଣୀ ପୀଠରେ ଅନୁଷ୍ଠିତ ହୋଇଯାଇଛି। ଜିଲ୍ଲା ସଭାପତି ବବ୍ରୁବାହନ ନାଏକଙ୍କ ସଭାପତିତ୍ୱରେ ଆୟୋଜିତ ଏହି ବୈଠକରେ ସମ୍ପାଦକ ବିରଞ୍ଚି ନାରାୟଣ ବେହେରା ସମ୍ପାଦକୀୟ ବିବରଣୀ ପାଠ କରିଥିଲେ।ବୈଠକରେ ବିଶେଷ କରି ଅବସରପ୍ରାପ୍ତ ପଞ୍ଚାୟତ ସମ୍ପାଦକମାନେ ଅବସର ପରେ ଅବସରକାଳୀନ ସରକାରୀ ସୁବିଧାରୁ ବଞ୍ଚିତ ହେଉଥିବା ପ୍ରସଙ୍ଗ ଉପରେ ଆଲୋଚନା ହୋଇଥିଲା। ପଞ୍ଚାୟତ ସମ୍ପାଦକମାନଙ୍କ ବିଭିନ୍ନ ସମସ୍ୟା ପ୍ରତି ସରକାର ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାକୁ ବୈଠକରେ ଗୁରୁତ୍ୱ ଦିଆଯାଇଥିଲା।ଏହି ବୈଠକରେ ଜିଲ୍ଲା ଅବସରପ୍ରାପ୍ତ ପିଇଓ ସଂଘର ସଭାପତି ମାୟାଧର ବାରିକ, ରାଜ୍ୟ ପିଇଓ ସଂଘର ସଭାପତି ଗୋବିନ୍ଦ ଚନ୍ଦ୍ର ଶତପଥୀ, ପୂର୍ବତନ ରାଜ୍ୟ ସଂଘର ସାଧାରଣ ସମ୍ପାଦକ ସ୍ୱର୍ଗତ ଭଗବାନ ମହାପାତ୍ରଙ୍କ ଝିଅ ତଥା ସମାଜସେବୀ ଶୁଭଲକ୍ଷ୍ମୀ ମହାପାତ୍ର, ସଦସ୍ୟ ବୃନ୍ଦାବନ ପଣ୍ଡା, ପ୍ରଶାନ୍ତ ରାଉତ, ସାରଙ୍ଗଧର ରଣା, ମାଧବାନନ୍ଦ ସାହୁ, ହିମାଂଶୁ ଶେଖର ବାରିକ, ଶେଷଦେବ ବେହେରା ପ୍ରମୁଖ ଯୋଗଦେଇଥିଲେ।ବୈଠକରେ ବାଲେଶ୍ୱର ଜିଲ୍ଲାରୁ ଗୋକୁଳାନନ୍ଦ କର, ଭଦ୍ରକ ଜିଲ୍ଲାରୁ ପ୍ରଫୁଲ୍ଲ କୁମାର ରାୟ ଓ ଜଗନ୍ନାଥ ସ୍ୱାଇଁ, କେନ୍ଦୁଝର ଜିଲ୍ଲାରୁ ଦୀନବନ୍ଧୁ ବାରିକ, ରଘୁନାଥ ମହାନ୍ତ, ଶୁକଦେବ ସାହୁ, ହରିହର ମହାନ୍ତ, ନବୀନ ଚନ୍ଦ୍ର ବିନ୍ଧାଣି ଓ ଘସର ମହାନ୍ତ, ଯାଜପୁରରୁ ବାବାଜୀ ବିଶ୍ୱାଳ, ମୟୂରଭଞ୍ଜରୁ ଭାସ୍କର ଚନ୍ଦ୍ର ମହାପାତ୍ର, କଳାହାଣ୍ଡିରୁ ଦେବେନ୍ଦ୍ର ବଳ, ବରଗଡ଼ରୁ ସନ୍ତୋଷ ସେଠ ଏବଂ ବଲାଙ୍ଗୀରରୁ ବୃନ୍ଦାବନ ବେହେରାଙ୍କ ସମେତ ବିଭିନ୍ନ ଜିଲ୍ଲାର ପ୍ରତିନିଧି ଯୋଗଦେଇ ଆଲୋଚନାରେ ଭାଗ ନେଇଥିଲେ।ବୈଠକ ପୂର୍ବରୁ ଅବସରପ୍ରାପ୍ତ ପଞ୍ଚାୟତ ସମ୍ପାଦକମାନେ ମା’ ତାରିଣୀଙ୍କ ଦର୍ଶନ କରି ଆଶୀର୍ବାଦ କାମନା କରିଥିଲେ। ଏହାସହ ପରବର୍ତ୍ତୀ ରାଜ୍ୟ କାର୍ଯ୍ୟକାରିଣୀ ବୈଠକ ରାଜଧାନୀ ଭୁବନେଶ୍ୱରରେ ଅନୁଷ୍ଠିତ କରିବାକୁ ନିଷ୍ପତ୍ତି ହୋଇଛି।ରାଜ୍ୟ ସଂଘ ଗଠିତ ହେବା ପରେ ପଞ୍ଚାୟତ ସମ୍ପାଦକମାନଙ୍କ ସମସ୍ୟା ସମ୍ପର୍କରେ ସରକାରଙ୍କୁ ଏକ ସ୍ମାରକପତ୍ର ପ୍ରଦାନ କରାଯିବ ବୋଲି ସମ୍ପାଦକ ବିରଞ୍ଚି ନାରାୟଣ ବେହେରା ପ୍ରକାଶ କରିଥିଲେ।
