ଭୁବନେଶ୍ୱର, ୨୯/୦୯: ଓଡ଼ିଶାରେ ବଢ଼ିଚାଲିଛି ସାଇବର ଠକେଇ। ନୂଆ ନୂଆ କୌଶଳ ଆପଣାଇ ସାଇବର ଅପରାଧୀମାନେ ଲୋକଙ୍କୁ ଠକି ବିପୁଳ ଟଙ୍କା ଲୁଟୁଥିବା ନେଇ ବିଧାନସଭାରେ ସରକାରଙ୍କ ପକ୍ଷରୁ ତଥ୍ୟ ଦିଆଯାଇଛି।
ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକଙ୍କ ଲିଖିତ ପ୍ରଶ୍ନର ଉତ୍ତରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟରେ ସାଇବର ଠକେଇ ସମ୍ପର୍କିତ ତଥ୍ୟ ରଖିଛନ୍ତି।ସରକାରଙ୍କ ତଥ୍ୟ ଅନୁସାରେ, ୨୦୨୩ରୁ ୨୦୨୫ ମଧ୍ୟରେ ଓଡ଼ିଶାରେ ୭,୬୫୨ଟି ସାଇବର ଠକେଇ ମାମଲା ରୁଜୁ ହୋଇଛି। ଏହି ସମୟ ମଧ୍ୟରେ ସାଇବର ଅପରାଧୀମାନେ ଲୋକଙ୍କଠାରୁ ମୋଟ ୩୭୦ କୋଟି ୭୧ ଲକ୍ଷ ୯୨ ହଜାର ୮୭୯ ଟଙ୍କା ଠକି ନେଇଥିବା ଜଣାପଡ଼ିଛି।ସେହିପରି, ଏହି ଠକେଇ ଟଙ୍କା ମଧ୍ୟରୁ ୯ କୋଟି ୯୬ ଲକ୍ଷ ୮୦ ହଜାର ୪୪୬ ଟଙ୍କା ଉଦ୍ଧାର ହୋଇପାରିଛି ବୋଲି ମୁଖ୍ୟମନ୍ତ୍ରୀ ଉତ୍ତରରେ ଦର୍ଶାଇଛନ୍ତି।ସାଇବର ଠକମାନେ ବିଭିନ୍ନ ଡିଜିଟାଲ୍ ମାଧ୍ୟମ ଓ ଠକେଇର କୌଶଳ ବ୍ୟବହାର କରି ଲୋକଙ୍କୁ ଟାର୍ଗେଟ୍ କରୁଥିବା ବେଳେ, ଅଜଣା ଲିଙ୍କ୍ରେ କ୍ଲିକ୍ କରିବା, OTP କିମ୍ବା ବ୍ୟାଙ୍କ ସମ୍ପର୍କିତ ଗୋପନୀୟ ତଥ୍ୟ ଅନ୍ୟକୁ ଦେବା ଭଳି ଅସାବଧାନତା ଠକେଇର ଶିକାର ହେବାର ମୁଖ୍ୟ କାରଣ ହୋଇପାରେ।
