ସୁନ୍ଦରଗଡ଼: ଅବକାରୀ ବିଭାଗର ଚଢ଼ାଉ ବେଳେ ଅବକାରୀ ଏସ୍ଆଇ ଫୁଲ ସାହୁଙ୍କୁ ସଂଘବଦ୍ଧ ଆକ୍ରମଣ ଘଟଣାରେ ପୋଲିସ କଡ଼ା କାର୍ଯ୍ୟାନୁଷ୍ଠାନ ନେଇଛି। ଧରୁଆଡିହି ଥାନା ଅନ୍ତର୍ଗତ ଅଳଙ୍ଗ ପାଣି ଜଙ୍ଗଲରେ ଘଟିଥିବା ଏହି ଆକ୍ରମଣ ମାମଲାରେ ପୋଲିସ ୫ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତଙ୍କ ନିକଟରୁ ୩ଟି ବାଇକ୍ ମଧ୍ୟ ଜବତ କରାଯାଇଛି।ପୋଲିସ ସୂଚନା ଅନୁସାରେ, ଅଳଙ୍ଗ ପାଣି ଜଙ୍ଗଲରେ ଅବକାରୀ ବିଭାଗ ଓ ଧରୁଆଡିହି ପୋଲିସର ମିଳିତ ଚଢ଼ାଉ ଚାଲିଥିଲା। ଏହି ସମୟରେ କିଛି ବ୍ୟକ୍ତି ଅବକାରୀ ଏସ୍ଆଇ ଫୁଲ ସାହୁଙ୍କ ଉପରେ ସଂଘବଦ୍ଧ ଭାବେ ଆକ୍ରମଣ କରିଥିବା ଅଭିଯୋଗ ହୋଇଛି। ଆକ୍ରମଣକାରୀମାନେ ପଥର ଓ ଇଟାରେ ଆକ୍ରମଣ କରିଥିବା ଜଣାପଡ଼ିଛି।ଏହି ଆକ୍ରମଣରେ ଫୁଲ ସାହୁଙ୍କ ମୁଣ୍ଡରେ ଆଘାତ ଲାଗିଥିବା ବେଳେ ଆଉ ଦୁଇ ଜଣ ମଧ୍ୟ ଆହତ ହୋଇଥିଲେ। ଆହତମାନଙ୍କୁ ତୁରନ୍ତ ଉଦ୍ଧାର କରାଯାଇ ଚିକିତ୍ସାଳୟରେ ଭର୍ତ୍ତି କରାଯାଇଥିଲା।ଘଟଣା ପରେ ଧରୁଆଡିହି ପୋଲିସ ତଦନ୍ତକୁ ଜୋରଦାର କରି ୫ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ବାବୁଲି କିଶାନ, ହଳଧର କିଶାନ, ବେଣୁଧର କିଶାନ, ବିନୋଦ କିଶାନ ଓ ଭରତ କିଶାନ।ପୋଲିସର ସୂଚନା ଅନୁସାରେ, ବାବୁଲି କିଶାନ ଓ ହଳଧର କିଶାନଙ୍କ ଘର ମାନମୁଣ୍ଡା ଅଞ୍ଚଳରେ ହୋଇଥିବା ବେଳେ ବେଣୁଧର, ବିନୋଦ ଓ ଭରତ କିଶାନଙ୍କ ଘର ଅଳଙ୍ଗ ପାଣି ବୋଲି ଜଣାପଡ଼ିଛି। ଗିରଫ ଅଭିଯୁକ୍ତଙ୍କ ନିକଟରୁ ୩ଟି ବାଇକ୍ ଜବତ କରାଯାଇଛି।ତେବେ ଏହି ଘଟଣାରେ ଆହୁରି ୧୩ ଜଣ ଅଭିଯୁକ୍ତ ଫେରାର ଥିବା ପୋଲିସ ପକ୍ଷରୁ ସୂଚନା ମିଳିଛି। ଫେରାର ଅଭିଯୁକ୍ତମାନଙ୍କୁ ଧରିବା ସହ ଘଟଣାର ସମ୍ପୂର୍ଣ୍ଣ ତଦନ୍ତ ପାଇଁ ଧରୁଆଡିହି ପୋଲିସର ଉଦ୍ୟମ ଜାରି ରହିଛି।
