ବିନିକା, ୨୬/୦୯: ବିନିକାରେ ଯାତ୍ରା ପରିବେଷଣ ସମୟରେ ଏକ ଦୃଶ୍ୟକୁ ନେଇ ଉତ୍ତେଜନା ସୃଷ୍ଟି ହୋଇଛି। ଡୁଙ୍ଗୁରୀପାଲି ବ୍ଲକ ଅନ୍ତର୍ଗତ ଏସ୍. ରାମପୁରଠାରେ ଚାଲିଥିବା ଯାତ୍ରା ମଞ୍ଚରେ ‘ଧଉଳି ଅପେରା’ ପକ୍ଷରୁ ‘ଲଭ୍ ଜିହାଦ୍’ ନାଟକ ପରିବେଷଣ ବେଳେ ଏହି ଘଟଣା ଘଟିଥିବା ଜଣାପଡ଼ିଛି।ନାଟକର ଏକ ଦୃଶ୍ୟକୁ ନେଇ କିଛି ଦର୍ଶକ ଅସନ୍ତୋଷ ପ୍ରକାଶ କରିବା ପରେ ପରିସ୍ଥିତି ଧୀରେଧୀରେ ଉତ୍ତେଜିତ ହୋଇଥିଲା। ଏହାପରେ କିଛି ଦର୍ଶକ ମଞ୍ଚ ଆଡ଼କୁ ଚେୟାର, ପାଣି ବୋତଲ ଓ ଅନ୍ୟାନ୍ୟ ସାମଗ୍ରୀ ଫିଙ୍ଗିଥିବା ଅଭିଯୋଗ ହୋଇଛି।ଘଟଣା ସମୟରେ ମଞ୍ଚ ଉପରେ ଅଭିନୟ କରୁଥିବା କଳାକାରମାନେ କିଛି ସମୟ ପାଇଁ ଭୟଭୀତ ହୋଇପଡ଼ିଥିଲେ। ଏପରିକି କିଛି ଉତ୍ତେଜିତ ଦର୍ଶକ ମଞ୍ଚ ଉପରକୁ ଚଢ଼ିଯାଇଥିବା ମଧ୍ୟ ଜଣାପଡ଼ିଛି।
ଖବର ପାଇ ଅପେରା ଆୟୋଜକ କମିଟିର ସଦସ୍ୟମାନେ ଘଟଣାସ୍ଥଳରେ ପହଞ୍ଚି ଉତ୍ତେଜିତ ଲୋକଙ୍କୁ ବୁଝାଶୁଝା କରିଥିଲେ। କମିଟିର ବରିଷ୍ଠ ସଦସ୍ୟଙ୍କ ହସ୍ତକ୍ଷେପ ଓ ମଧ୍ୟସ୍ଥତା ପରେ ପରିସ୍ଥିତି ନିୟନ୍ତ୍ରଣକୁ ଆସିଥିବା ଜଣାପଡ଼ିଛି।ଆଠଗଡ଼ ଓ ତିଗିରିଆରେ ମଧ୍ୟ ଘଟିଥିଲା ସମାନ ଘଟଣା ଯାତ୍ରା ମଞ୍ଚରେ ଦୃଶ୍ୟକୁ ନେଇ ଦର୍ଶକଙ୍କ ଉତ୍ତେଜନାର ଏହା ପ୍ରଥମ ଘଟଣା ନୁହେଁ। ଗତ ୧୮ ତାରିଖରେ ଆଠଗଡ଼ରେ ଯାତ୍ରା ପରିବେଷଣ ସମୟରେ ମଞ୍ଚ ଉପରକୁ ଚେୟାର ଓ ପାଣି ବୋତଲ ଫିଙ୍ଗାଯାଇଥିବା ଖବର ସାମ୍ନାକୁ ଆସିଥିଲା।ସେହିପରି କଟକ ଜିଲ୍ଲା ତିଗିରିଆ ଅଞ୍ଚଳର ନୂଆପାଟଣାରେ ‘ଅପେରା ଯାଜ୍ଞସେନୀ’ ପକ୍ଷରୁ ‘ସନାତନୀ’ ନାଟକ ପରିବେଷଣ ବେଳେ ମଧ୍ୟ ଏକ ଦୃଶ୍ୟକୁ ନେଇ ଦର୍ଶକଙ୍କ ମଧ୍ୟରେ ଉତ୍ତେଜନା ହୋଇଥିବା ଖବର ଆସିଥିଲା। ଧର୍ମାନ୍ତରୀକରଣ ସମ୍ପର୍କିତ ଦୃଶ୍ୟକୁ ନେଇ କିଛି ଦର୍ଶକ ମଞ୍ଚ ଉପରକୁ ଚେୟାର ଓ ପାଣି ବୋତଲ ଫିଙ୍ଗିଥିବା ଜଣାପଡ଼ିଥିଲା।ଯାତ୍ରା ମଞ୍ଚରେ ଦୃଶ୍ୟକୁ ନେଇ ଦର୍ଶକଙ୍କ ଆପତ୍ତି ଥିଲେ ମଧ୍ୟ ଏଭଳି ଭାବେ ମଞ୍ଚ ଉପରକୁ ସାମଗ୍ରୀ ଫିଙ୍ଗିବା ଘଟଣା ନେଇ ଚର୍ଚ୍ଚା ଆରମ୍ଭ ହୋଇଛି। ଅନ୍ୟପକ୍ଷରେ ବିନିକା ଘଟଣାକୁ ନେଇ ଆୟୋଜକ କମିଟି କିମ୍ବା ସମ୍ପୃକ୍ତ କଳାକାରଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ବିସ୍ତୃତ ପ୍ରତିକ୍ରିୟା ମିଳିନାହିଁ।
