କେନ୍ଦୁଝର, ୨୬/୯: ବାଦାମପାହାଡ଼ରୁ ଟାଟାନଗର, କେନ୍ଦୁଝରଗଡ଼, କଟକ ଓ ଭୁବନେଶ୍ୱର ଦେଇ ପୁରୀ ପର୍ଯ୍ୟନ୍ତ ଦୈନିକ ପାସେଞ୍ଜର ଟ୍ରେନ୍ ଚଳାଚଳ କରିବାକୁ ଦାବି ଜୋର ଧରିଛି। ଏନେଇ ଯୁବ ଓ ଶ୍ରମ ବିକାଶ ମଞ୍ଚ ପକ୍ଷରୁ ଦାବି ଉଠାଯାଇଛି।ମଞ୍ଚର ସାଧାରଣ ସମ୍ପାଦିକା ଶୈଳବାଳା ପରିଡ଼ା ଏନେଇ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ରେଳ ମନ୍ତ୍ରୀ ଏବଂ ପୂର୍ବତଟ ରେଳପଥର ସାଧାରଣ ପରିଚାଳକଙ୍କୁ ଚିଠି ଲେଖି ଦାବି ସମ୍ପର୍କରେ ଅବଗତ କରିଛନ୍ତି।ଦାବି ଅନୁଯାୟୀ, ବାଦାମପାହାଡ଼ରୁ ସନ୍ଧ୍ୟା ୬ଟାରେ ଟ୍ରେନ୍ ଛାଡ଼ି ଟାଟାନଗର, କେନ୍ଦୁଝରଗଡ଼, କଟକ ଓ ଭୁବନେଶ୍ୱର ଦେଇ ସକାଳ ୮ଟା ସୁଦ୍ଧା ପୁରୀରେ ପହଞ୍ଚିବା ବ୍ୟବସ୍ଥା କରାଗଲେ ଉତ୍ତର ଓଡ଼ିଶା ଏବଂ ଝାଡ଼ଖଣ୍ଡ ଅଞ୍ଚଳର ଲୋକମାନେ ବିଭିନ୍ନ କାମ ପାଇଁ କଟକ ଓ ଭୁବନେଶ୍ୱର ଯାତାୟାତ ସହିତ ପୁରୀ ଯାଇ ଶ୍ରୀଜଗନ୍ନାଥଙ୍କ ଦର୍ଶନ କରିପାରିବେ।ସେହିପରି ପୁରୀରୁ ସନ୍ଧ୍ୟା ୬ଟାରେ ଟ୍ରେନ୍ ଛାଡ଼ି ଭୁବନେଶ୍ୱର, କଟକ, କେନ୍ଦୁଝରଗଡ଼ ଓ ଟାଟାନଗର ଦେଇ ବାଦାମପାହାଡ଼ରେ ପହଞ୍ଚିବା ବ୍ୟବସ୍ଥା କରାଗଲେ ଯାତ୍ରୀମାନେ ଦିନର ବିଭିନ୍ନ କାମ ସାରି ନିଜ ଅଞ୍ଚଳକୁ ଫେରିପାରିବେ ବୋଲି ମଞ୍ଚ ପକ୍ଷରୁ କୁହାଯାଇଛି।ବାଦାମପାହାଡ଼–କେନ୍ଦୁଝରଗଡ଼–ପୁରୀ ମଧ୍ୟରେ ଏଭଳି ଦୈନିକ ଟ୍ରେନ୍ ସେବା ଆରମ୍ଭ ହେଲେ ଉତ୍ତର ଓଡ଼ିଶା ଓ ଝାଡ଼ଖଣ୍ଡ ଅଞ୍ଚଳର ଲୋକଙ୍କ ଯାତାୟାତ ସୁବିଧା ବଢ଼ିବା ସହ ଚିକିତ୍ସା, ଶିକ୍ଷା, ସରକାରୀ କାର୍ଯ୍ୟ ଓ ଧାର୍ମିକ ଯାତ୍ରାରେ ଉପକାର ମିଳିବ ବୋଲି ଦାବିରେ ଉଲ୍ଲେଖ କରାଯାଇଛି।
