କାଠମାଣ୍ଡୁ:୨/୯(ବ୍ୟୁରୋ ରିପୋର୍ଟ)ନେପାଳରେ ଭୟାବହ ବନ୍ୟା ଯୋଗୁଁ ବ୍ୟାପକ କ୍ଷୟକ୍ଷତି ହୋଇଛି। ବନ୍ୟାରେ ଅନେକ ଘର ଓ ସମ୍ପତ୍ତି ନଷ୍ଟ ହେବା ସହ ଶହ ଶହ ଲୋକ ପ୍ରଭାବିତ ହୋଇଛନ୍ତି। ବିପର୍ଯ୍ୟୟ ପରେ ମଧ୍ୟ ଅନେକ ଭାରତୀୟଙ୍କ ସମ୍ପର୍କରେ ସୂଚନା ମିଳୁନଥିବା ଜଣାପଡ଼ିଛି। ଏଭଳି କଷ୍ଟକର ସମୟରେ ଭାରତ ସରକାର ନେପାଳ ସହ ଯୋଗାଯୋଗରେ ଥିବାବେଳେ, ବଲିଉଡ୍ ଅଭିନେତା ସୋନୁ ସୁଦ ମଧ୍ୟ ବନ୍ୟା ପ୍ରଭାବିତଙ୍କ ସହାୟତା ପାଇଁ ଆଗେଇ ଆସିଛନ୍ତି।ମାନବିକ ସହାୟତା ପାଇଁ ପରିଚିତ ସୋନୁ ସୁଦ ରିଲିଫ୍ ସାମଗ୍ରୀ ନେଇ ନେପାଳର ରାଜଧାନୀ କାଠମାଣ୍ଡୁରେ ପହଞ୍ଚିଛନ୍ତି। ସେ ବନ୍ୟା ପ୍ରଭାବିତ ପରିବାରଙ୍କୁ ଭେଟିବା ସହ ଆବଶ୍ୟକୀୟ ରିଲିଫ୍ ସାମଗ୍ରୀ ବଣ୍ଟନ କରିବାକୁ ପହଞ୍ଚିଥିବା ଜଣାପଡ଼ିଛି।ସୋନୁ ସୁଦଙ୍କ ଟିମ୍ ଭାରତରୁ ଆବଶ୍ୟକୀୟ ସାମଗ୍ରୀ ନେପାଳକୁ ଆଣିଛି। ବନ୍ୟା ପୀଡ଼ିତଙ୍କ ତୁରନ୍ତ ଆବଶ୍ୟକତା ଚିହ୍ନଟ କରି ସେହି ଅନୁଯାୟୀ ସହାୟତା ଯୋଗାଇବା ପାଇଁ ଟିମ୍ କାମ କରୁଥିବା ସୂଚନା ମିଳିଛି।ନେପାଳରେ ପହଞ୍ଚିବା ପରେ ସୋନୁ ସୁଦ ବନ୍ୟା ପ୍ରଭାବିତ ଲୋକଙ୍କୁ ଭେଟିଥିଲେ। ସେ କହିଛନ୍ତି ଯେ, ବନ୍ୟା ପୀଡ଼ିତଙ୍କ ସହାୟତା ପାଇଁ ତାଙ୍କ ଟିମ୍ ନେପାଳକୁ ଆସିଛି। ଭାରତରୁ ବହୁ ପରିମାଣର ରିଲିଫ୍ ସାମଗ୍ରୀ ଅଣାଯାଇଛି ଏବଂ ପ୍ରଭାବିତ ପରିବାରଗୁଡ଼ିକୁ ପୁଣିଥରେ ସ୍ୱାଭାବିକ ଜୀବନକୁ ଫେରାଇବା ପାଇଁ ସମ୍ଭବ ସମସ୍ତ ପ୍ରୟାସ କରାଯିବ।ସୋନୁ ସୁଦ କହିଛନ୍ତି ଯେ, ଭାରତରୁ ରିଲିଫ୍ ସାମଗ୍ରୀ ପଠାଇବା କିଛିଟା ଚ୍ୟାଲେଞ୍ଜିଂ ହୋଇଥିଲେ ମଧ୍ୟ ଆବଶ୍ୟକ ମାନବଶକ୍ତି ଓ ସହଯୋଗ ମାଧ୍ୟମରେ ଏହି କାର୍ଯ୍ୟ ଜାରି ରହିବ। କେବଳ ଚଳିତ ମାସ ନୁହେଁ, ଆଗାମୀ ମାସଗୁଡ଼ିକରେ ମଧ୍ୟ ପ୍ରଭାବିତ ଲୋକଙ୍କ ପାଖରେ ରିଲିଫ୍ ସାମଗ୍ରୀ ପହଞ୍ଚାଇବା ଉଦ୍ୟମ ଜାରି ରହିବ ବୋଲି ସେ କହିଛନ୍ତି।ବନ୍ୟା ପ୍ରଭାବିତଙ୍କ ପାଇଁ ଖାଦ୍ୟ, ପାଣି ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ନେପାଳକୁ ଅଣାଯାଇଛି। ଏହା ସହ ପ୍ରଭାବିତ ଅଞ୍ଚଳର ବାସ୍ତବ ଆବଶ୍ୟକତା ଚିହ୍ନଟ କରି ଆଗାମୀ ଦିନରେ ଅଧିକ ସହାୟତା ଯୋଗାଇବା ଦିଗରେ ସୋନୁ ସୁଦଙ୍କ ଟିମ୍ କାର୍ଯ୍ୟ କରୁଛି।
