ଭୁବନେଶ୍ୱର:୧୯/୯,ଏସୀୟ କ୍ରୀଡ଼ା ୨୦୨୬ ପାଇଁ ଭାରତୀୟ କ୍ରୀଡ଼ା ଦଳରେ KIIT-KISSର ୫୪ ଜଣ କ୍ରୀଡ଼ାବିତ ସ୍ଥାନ ପାଇଛନ୍ତି। ଜାପାନର ଆଇଚି-ନାଗୋୟାରେ ଆୟୋଜିତ ହେବାକୁ ଥିବା ୨୦ତମ ଏସୀୟ କ୍ରୀଡ଼ାରେ ଏହି କ୍ରୀଡ଼ାବିତମାନେ ଭାରତର ପ୍ରତିନିଧିତ୍ୱ କରିବେ।
KIIT-KISS ପକ୍ଷରୁ କୁହାଯାଇଛି ଯେ, ଏସୀୟ କ୍ରୀଡ଼ାରେ ଗୋଟିଏ ଭାରତୀୟ ବିଶ୍ୱବିଦ୍ୟାଳୟରୁ ଅଂଶଗ୍ରହଣ କରୁଥିବା ଏହା ଏକ ବୃହତ୍ କ୍ରୀଡ଼ାବିତ ଦଳ। ମୋଟ ୭ଟି କ୍ରୀଡ଼ା ବିଭାଗରେ KIIT-KISSର କ୍ରୀଡ଼ାବିତମାନେ ଭାରତ ପାଇଁ ଖେଳିବେ।
୭ଟି କ୍ରୀଡ଼ାରେ KIIT-KISSର ପ୍ରତିନିଧିତ୍ୱ
KIIT-KISSର ୫୪ ଜଣ କ୍ରୀଡ଼ାବିତଙ୍କ ମଧ୍ୟରୁ ଆଥଲେଟିକ୍ସରେ ୪୫ ଜଣ ରହିଛନ୍ତି। ଏଥିରେ ୨୩ ଜଣ ପୁରୁଷ ଓ ୨୨ ଜଣ ମହିଳା ଆଥଲେଟ୍ ସାମିଲ ଅଛନ୍ତି।
ଅନ୍ୟ ୯ ଜଣ କ୍ରୀଡ଼ାବିତ ଫେନ୍ସିଂ, ରୋଇଂ, ସାଇକ୍ଲିଂ, ପୁରୁଷ ଓ ମହିଳା ହକି, ସୁଇମିଂ ଏବଂ ମହିଳା ରଗ୍ ବିରେ ଭାଗ ନେବେ।
ଆଥଲେଟିକ୍ସ ଦଳରେ ଏମ୍. ଶ୍ରୀଶଙ୍କର, ପ୍ରବୀଣ ଚିତ୍ରଭେଲ୍, ତେଜସ୍ୱିନ ଶଙ୍କର, ତଜିନ୍ଦରପାଲ ସିଂହ ତୁର୍, ଜ୍ୟୋତି ୟାରାଜୀ, ପାରୁଲ ଚୌଧୁରୀ, ଶ୍ରାବଣୀ ନନ୍ଦ ଓ ଆନ୍ସି ସୋଜାନଙ୍କ ଭଳି ପ୍ରମୁଖ ଭାରତୀୟ ଆଥଲେଟ୍ ରହିଛନ୍ତି।
୨୦୨୩ ଏସୀୟ କ୍ରୀଡ଼ାରେ ମଧ୍ୟ ଚମକିଥିଲେ KIITର କ୍ରୀଡ଼ାବିତ
୨୦୨୩ ମସିହାର ହାଙ୍ଗଝୋ ଏସୀୟ କ୍ରୀଡ଼ାରେ KIITର ୧୪ ଜଣ କ୍ରୀଡ଼ାବିତ ଭାରତୀୟ ଦଳରେ ସାମିଲ ହୋଇଥିଲେ। ସେମାନଙ୍କ ମଧ୍ୟରୁ ତଜିନ୍ଦରପାଲ ସିଂହ ତୁର୍ ଶଟ୍ ପୁଟ୍ରେ ସ୍ୱର୍ଣ୍ଣ ପଦକ, ଅମିତ ରୋହିଦାସ ପୁରୁଷ ହକିରେ ସ୍ୱର୍ଣ୍ଣ ପଦକ ଏବଂ କିଶୋର କୁମାର ଜେନା ଜାଭେଲିନ୍ ଥ୍ରୋରେ ରୌପ୍ୟ ପଦକ ଜିତିଥିଲେ। ଏହାସହ ତେଜସ୍ୱିନ ଶଙ୍କର ଡେକାଥଲନ୍ରେ ରୌପ୍ୟ ପଦକ ହାସଲ କରିଥିଲେ।
ଏଥର ୫୪ ଜଣ କ୍ରୀଡ଼ାବିତ ଭାରତୀୟ ଦଳରେ ସାମିଲ ହେବା ୨୦୨୩ ତୁଳନାରେ KIIT-KISSର କ୍ରୀଡ଼ା କ୍ଷେତ୍ରର ବୃହତ୍ ଉପସ୍ଥିତିକୁ ଦର୍ଶାଉଛି।
ତଜିନ୍ଦରପାଲ ସିଂହ ତୁର୍ ହେବେ ଭାରତର ଧ୍ୱଜାବାହକ
ଏଥର KIIT ପାଇଁ ଆଉ ଏକ ଗୌରବର ବିଷୟ ହେଉଛି ତଜିନ୍ଦରପାଲ ସିଂହ ତୁର୍ଙ୍କ ଅଂଶଗ୍ରହଣ। ସେ ଏସୀୟ କ୍ରୀଡ଼ାରେ ଶଟ୍ ପୁଟ୍ରେ ଭାରତକୁ ପ୍ରତିନିଧିତ୍ୱ କରିବେ। ଏହାସହ ଉଦ୍ଘାଟନୀ ସମାରୋହରେ ଭାରତର ଦୁଇ ଜଣ ଧ୍ୱଜାବାହକଙ୍କ ମଧ୍ୟରୁ ତାଙ୍କୁ ଜଣେ ଭାବେ ଚୟନ କରାଯାଇଛି। ଅନ୍ୟ ଧ୍ୱଜାବାହକ ହେଉଛନ୍ତି ଦୁଇଥର ଅଲିମ୍ପିକ୍ ପଦକ ବିଜେତା ମନୁ ଭାକର।
ଓଡ଼ିଶାର ୯ କ୍ରୀଡ଼ାବିତଙ୍କୁ ସୁଯୋଗ
KIIT-KISSର ଏହି ଦଳରେ ଓଡ଼ିଶାର ୯ ଜଣ କ୍ରୀଡ଼ାବିତ ଭାରତୀୟ ଦଳରେ ସ୍ଥାନ ପାଇଛନ୍ତି। ଅମିତ ରୋହିଦାସ, ଅନିମେଶ କୁଜୁର ଓ ଶ୍ରାବଣୀ ନନ୍ଦଙ୍କ ସମେତ ଉଦୀୟମାନ ଆଦିବାସୀ କ୍ରୀଡ଼ା ପ୍ରତିଭାମାନେ ହକି, ରୋଇଂ, ସାଇକ୍ଲିଂ ଓ ରଗ୍ ବିରେ ଭାରତ ପାଇଁ ଖେଳିବେ।
ସୁନେଲିତା ଟୋପ୍ପୋ, ମାମା ନାଏକ, ନିର୍ମଲ୍ୟ ରାଉତ ଓ ଦୁମୁନି ମାର୍ଣ୍ଡିଙ୍କ ଭଳି କ୍ରୀଡ଼ାବିତ ଓଡ଼ିଶାର ଆଦିବାସୀ ଅଞ୍ଚଳରୁ ଉଦୀୟମାନ କ୍ରୀଡ଼ା ପ୍ରତିଭାର ପରିଚୟ ଦେଇଛନ୍ତି।
ଡ. ଅଚ୍ୟୁତ ସାମନ୍ତଙ୍କ ଅଭିନନ୍ଦନ
KIIT-KISSର ୫୪ ଜଣ କ୍ରୀଡ଼ାବିତ ଭାରତୀୟ ଦଳରେ ମନୋନୀତ ହୋଇଥିବାରୁ KIIT-KISS ପ୍ରତିଷ୍ଠାତା ଡ. ଅଚ୍ୟୁତ ସାମନ୍ତ ସମସ୍ତ କ୍ରୀଡ଼ାବିତଙ୍କୁ ଅଭିନନ୍ଦନ ଜଣାଇଛନ୍ତି। ଏସୀୟ କ୍ରୀଡ଼ା ପାଇଁ ସେ ସମସ୍ତଙ୍କୁ ଶୁଭେଚ୍ଛା ଜଣାଇବା ସହ କ୍ରୀଡ଼ାବିତମାନଙ୍କ ପ୍ରସ୍ତୁତି ଓ ଅନ୍ତର୍ଜାତୀୟ ପ୍ରତିଯୋଗିତାରେ ଅଂଶଗ୍ରହଣ ପାଇଁ KIIT-KISS ପକ୍ଷରୁ ସହଯୋଗ ଜାରି ରହିବ ବୋଲି କହିଛନ୍ତି।
ବିଶ୍ୱସ୍ତରୀୟ ପ୍ରଶିକ୍ଷଣ ସୁବିଧା, ପେସାଦାର କୋଚିଂ, ଆଧୁନିକ କ୍ରୀଡ଼ା ଭିତ୍ତିଭୂମି ଓ ଆର୍ଥିକ ସହାୟତା ମାଧ୍ୟମରେ କ୍ରୀଡ଼ାବିତଙ୍କୁ ପ୍ରସ୍ତୁତ କରାଯାଉଛି।
