ଘଟଗାଁ, ୩/୯: କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ବାଲିଯୋଡି ନିକଟରେ ଘଟିଛି ଏକ ଭୟାବହ ସଡ଼କ ଦୁର୍ଘଟଣା। ଜାତୀୟ ରାଜପଥରେ ଏକ ଷୋହଳ ଚକିଆ ଟ୍ରକକୁ ମୋଟରସାଇକେଲ ଧକ୍କା ଦେବାରୁ ବାଇକ୍ ଚାଳକଙ୍କ ମୃତ୍ୟୁ ଘଟିଛି।ମୃତକ ହେଲେ ବାଲେଶ୍ୱର ଜିଲ୍ଲା ରାଜବରହମପୁର ଅଞ୍ଚଳର ସରୋଜ କୁମାର ସାହୁ (୩୭)। ସରୋଜ ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (OSRTC)ର କେନ୍ଦୁଝର-ବାଲେଶ୍ୱର ମଧ୍ୟରେ ଚଳାଚଳ କରୁଥିବା ବସ୍ରେ ଡ୍ରାଇଭର ଭାବେ କାର୍ଯ୍ୟ କରୁଥିଲେ।ସୂଚନା ଅନୁସାରେ, ଗତକାଲି ଡ୍ୟୁଟି ସାରିବା ପରେ ଆଜି ଛୁଟି ନେଇ ସରୋଜ ନିଜ ମୋଟରସାଇକେଲ ଯୋଗେ କେନ୍ଦୁଝରରୁ ଘରକୁ ଯାଉଥିଲେ। ଏହି ସମୟରେ ବାଲିଯୋଡି ନିକଟରେ ଜାତୀୟ ରାଜପଥ ଉପରେ ସାମ୍ନା ପଟୁ ଆସୁଥିବା ଏକ ଷୋହଳ ଚକିଆ ଟ୍ରକ ସହ ତାଙ୍କ ବାଇକ୍ର ଧକ୍କା ହୋଇଥିଲା।ଦୁର୍ଘଟଣାରେ ମୋଟରସାଇକେଲଟି ଗୁରୁତର ଭାବେ କ୍ଷତିଗ୍ରସ୍ତ ହୋଇଥିଲା। ଦୁର୍ଘଟଣା ପରେ ସରୋଜଙ୍କୁ ଘଟଗାଁ ଡାକ୍ତରଖାନାକୁ ନିଆଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।ଖବର ପାଇ ଘଟଗାଁ ପୋଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଟ୍ରକ ଓ ମୋଟରସାଇକେଲକୁ ଜବତ କରିଛି। ଏହି ସଡ଼କ ଦୁର୍ଘଟଣାର କାରଣ ସମ୍ପର୍କରେ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି।
