ଭୁବନେଶ୍ୱର: ରାଜ୍ୟରେ ସୋସିଆଲ ମିଡିଆର ବ୍ୟବହାରକୁ ଅଧିକ ସୁଦୃଢ଼ କରିବା ପାଇଁ ନୂଆ ସୋସିଆଲ ମିଡିଆ ନୀତି ଆଣିବାକୁ ଯୋଜନା କରୁଛନ୍ତି ଓଡ଼ିଶା ସରକାର। ସୋସିଆଲ ମିଡିଆ ମନିଟରିଂ ଜରିଆରେ ଲୋକଙ୍କ ମତାମତ ଜାଣିବା ସହ ସରକାରୀ ସୂଚନା ଓ ଜନସମ୍ପର୍କ ବ୍ୟବସ୍ଥାକୁ ଅଧିକ ପ୍ରଭାବଶାଳୀ କରାଯିବ। ଏନେଇ ସୂଚନା ଓ ଲୋକସମ୍ପର୍କ ବିଭାଗର ଅଧିକାରୀଙ୍କୁ ଦିଗ୍ଦର୍ଶନ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ।
ସୋସିଆଲ ମିଡିଆ ଉପରେ ଅଧିକ ଫୋକସ୍
ସୂଚନା ଓ ଲୋକସମ୍ପର୍କ ବିଭାଗର ସମୀକ୍ଷା ବୈଠକରେ ମୁଖ୍ୟମନ୍ତ୍ରୀ ସୋସିଆଲ ମିଡିଆରେ ସରକାରୀ ସୂଚନାର ପ୍ରସାରକୁ ଅଧିକ ସକ୍ରିୟ କରିବା ଉପରେ ଗୁରୁତ୍ୱ ଦେଇଛନ୍ତି। ନକାରାତ୍ମକ ଖବର ଅପେକ୍ଷା ସକାରାତ୍ମକ ଓ ଜନହିତକର ସୂଚନା ପ୍ରସାରଣକୁ ପ୍ରାଥମିକତା ଦେବାକୁ ସେ ପରାମର୍ଶ ଦେଇଛନ୍ତି।ଏଥିସହ ଆଧୁନିକ ଜ୍ଞାନକୌଶଳ, କୃତ୍ରିମ ବୁଦ୍ଧିମତ୍ତା (AI) ଏବଂ ChatGPT ଭଳି ଉପକରଣର ଉପଯୋଗ ଉପରେ ମଧ୍ୟ ଗୁରୁତ୍ୱ ଦିଆଯାଇଛି। ତେବେ ଏହି ପ୍ରଯୁକ୍ତିର ସଠିକ୍ ଓ ଦାୟିତ୍ୱପୂର୍ଣ୍ଣ ବ୍ୟବହାର ହେବା ଆବଶ୍ୟକ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ସୂଚନା ଅଧିକାରୀଙ୍କୁ 3S ଫର୍ମୁଲା
ସରକାରୀ ସୂଚନାକୁ ଲୋକଙ୍କ ପାଖରେ ସହଜରେ ପହଞ୍ଚାଇବା ପାଇଁ ସୂଚନା ସେବା ଅଧିକାରୀଙ୍କୁ 3S ଫର୍ମୁଲା ଆପଣାଇବାକୁ ପରାମର୍ଶ ଦିଆଯାଇଛି। ଏହି ଫର୍ମୁଲା ଅନୁସାରେ ଖବର ହେବା ଦରକାର ସଠିକ୍, ଶୀଘ୍ର ଓ ସରଳ।ସୋସିଆଲ ମିଡିଆରେ ଲୋକମାନେ କେଉଁ ପ୍ରସଙ୍ଗରେ କ’ଣ ମତ ରଖୁଛନ୍ତି, ତାହା ମନିଟରିଂ କରିବା ସହ ସେମାନଙ୍କ ମତାମତକୁ ଗୁରୁତ୍ୱ ଦେବାକୁ କୁହାଯାଇଛି।
Gen-Z ଓ ନୂଆ ସୋସିଆଲ ମିଡିଆ ଟ୍ରେଣ୍ଡ ଉପରେ ଗୁରୁତ୍ୱ
ବର୍ତ୍ତମାନର ଯୁବପିଢ଼ି, ବିଶେଷକରି Gen-Z, ସୋସିଆଲ ମିଡିଆରେ ଅଧିକ ସକ୍ରିୟ ରହୁଥିବାରୁ ସେମାନଙ୍କ ନିକଟରେ ସରକାରୀ ଯୋଜନା ଓ ଜନହିତକର ସୂଚନା ପହଞ୍ଚାଇବା ଉପରେ ଫୋକସ୍ କରିବାକୁ ପରାମର୍ଶ ଦିଆଯାଇଛି। ଏଥିପାଇଁ ସୋସିଆଲ ମିଡିଆରେ ଉଦୀୟମାନ ଟ୍ରେଣ୍ଡ ଓ ନୂଆ ପ୍ରଯୁକ୍ତିକୁ ଉପଯୋଗ କରିବାକୁ କୁହାଯାଇଛି।ସୂଚନା ଅଧିକାରୀଙ୍କ କାର୍ଯ୍ୟ କେବଳ ପ୍ରେସ ବିଜ୍ଞପ୍ତି ଜାରି କରିବାରେ ସୀମିତ ନୁହେଁ। ସରକାର ଓ ଜନସାଧାରଣଙ୍କ ମଧ୍ୟରେ ଯୋଗସୂତ୍ର ସ୍ଥାପନ କରିବା ସହ ସରକାରୀ ଯୋଜନାର ସୁଫଳ ଲୋକଙ୍କ ପାଖରେ ପହଞ୍ଚାଇବା ସେମାନଙ୍କର ପ୍ରମୁଖ ଦାୟିତ୍ୱ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ସୁଭଦ୍ରା ଯୋଜନା ଓ ଲକ୍ଷପତି ଦିଦି ଉପରେ ଗୁରୁତ୍ୱ
ମହିଳା ସଶକ୍ତୀକରଣ କ୍ଷେତ୍ରରେ ସୁଭଦ୍ରା ଯୋଜନାର ଗୁରୁତ୍ୱ ଏବଂ ଲକ୍ଷପତି ଦିଦି ସୃଷ୍ଟି କରିବାରେ ଓଡ଼ିଶାର ଭୂମିକା ସମ୍ପର୍କରେ ଲୋକଙ୍କୁ ଅବଗତ କରାଇବାକୁ ମଧ୍ୟ ପରାମର୍ଶ ଦିଆଯାଇଛି।
ସରକାରୀ ବିଜ୍ଞାପନ ପାଇଁ ‘ଇ-ସଞ୍ଚାର’ ଆପ୍ ଶୁଭାରମ୍ଭ
ଏହି ଅବସରରେ ସରକାରୀ ବିଜ୍ଞାପନ ବ୍ୟବସ୍ଥାରେ ଶତପ୍ରତିଶତ ପାରଦର୍ଶିତା ଆଣିବା ଲକ୍ଷ୍ୟରେ ‘ଇ-ସଞ୍ଚାର’ ଆପ୍ର ଶୁଭାରମ୍ଭ କରାଯାଇଛି। ଏହି ଆପ୍ ଜରିଆରେ ସରକାରୀ ବିଜ୍ଞାପନ ପରିଚାଳନା ବ୍ୟବସ୍ଥାକୁ ଅଧିକ ସ୍ୱଚ୍ଛ ଓ ସୁବ୍ୟବସ୍ଥିତ କରିବା ଉପରେ ଗୁରୁତ୍ୱ ଦିଆଯାଇଛି।
ରାଜ୍ୟରେ ପ୍ରସ୍ତାବିତ ସୋସିଆଲ ମିଡିଆ ନୀତି ଏବଂ ନୂଆ ପ୍ରଯୁକ୍ତିର ଉପଯୋଗ ଦ୍ୱାରା ସରକାରୀ ସୂଚନା ପ୍ରସାରଣ ଓ ଜନସାଧାରଣଙ୍କ ସହ ଯୋଗାଯୋଗ ବ୍ୟବସ୍ଥା କେତେ ଅଧିକ ସୁଦୃଢ଼ ହେଉଛି, ତାହା ଆଗାମୀ ଦିନରେ ଗୁରୁତ୍ୱପୂର୍ଣ୍ଣ ହେବ।
