କେନ୍ଦୁଝର, ୨/୧୦: କେନ୍ଦୁଝର ଜିଲ୍ଲା ମତ୍ସ୍ୟ ବିଭାଗରୁ କାର୍ଯ୍ୟନିବୃତ୍ତ ତଥା ଅବସରପ୍ରାପ୍ତ ଅଧିକାରୀ ଓ କର୍ମଚାରୀଙ୍କ ଜିଲ୍ଲାସ୍ତରୀୟ ବନ୍ଧୁମିଳନ ଓ ସମାବେଶ ଶୁକ୍ରବାର ଦିଗଦନ ମତ୍ସ୍ୟ ଫାର୍ମର ସଭାଗୃହରେ ଅନୁଷ୍ଠିତ ହୋଇଯାଇଛି। ଏହି ସମାବେଶରେ କେନ୍ଦୁଝର ଜିଲ୍ଲାର ମତ୍ସ୍ୟ ବିଭାଗରେ କାର୍ଯ୍ୟ କରି ଅବସର ଗ୍ରହଣ କରିଥିବା ବହୁ ଅଧିକାରୀ ଓ କର୍ମଚାରୀ ଏକତ୍ରିତ ହୋଇଥିଲେ।କାର୍ଯ୍ୟକ୍ରମରେ କେନ୍ଦୁଝର ଜୋନ୍ର ଉପ ମତ୍ସ୍ୟ ନିର୍ଦ୍ଦେଶକ ପ୍ରମୋଦ କୁମାର ରାଉତ ଏବଂ ମୁଖ୍ୟ ଜିଲ୍ଲା ମତ୍ସ୍ୟ ଅଧିକାରୀ ଉମେଶ ଚନ୍ଦ୍ର ଧରୁଆ ଯୋଗଦେଇଥିଲେ। ଅବସରପ୍ରାପ୍ତ ସହକାରୀ ମତ୍ସ୍ୟ ଅଧିକାରୀ ସରୋଜ କୁମାର ସାହୁ ମଞ୍ଚ ପରିଚାଳନା କରିଥିଲେ।କେନ୍ଦୁଝରର ଆରାଧ୍ୟ ଦେବୀ ମା’ ତାରିଣୀ ଓ ଆରାଧ୍ୟ ଦେବତା ବଳଦେବଜୀଉଙ୍କ ପୂଜାର୍ଚ୍ଚନା ପରେ ବୈଠକ ଆରମ୍ଭ ହୋଇଥିଲା। ଏହାପରେ ମତ୍ସ୍ୟ ବିଭାଗର ଦିବଂଗତ ଅଧିକାରୀ ଓ କର୍ମଚାରୀଙ୍କ ସ୍ମୃତିରେ ଏକ ମିନିଟ୍ ନୀରବ ପ୍ରାର୍ଥନା କରାଯାଇଥିଲା।ଉପ ମତ୍ସ୍ୟ ନିର୍ଦ୍ଦେଶକ ପ୍ରମୋଦ କୁମାର ରାଉତ ନିଜ ବକ୍ତବ୍ୟରେ ମତ୍ସ୍ୟ ବିଭାଗର ବିକାଶରେ ଅବସରପ୍ରାପ୍ତ ଅଧିକାରୀ ଓ କର୍ମଚାରୀଙ୍କ ଅବଦାନ ଉପରେ ଆଲୋକପାତ କରିଥିଲେ। ମୁଖ୍ୟ ଜିଲ୍ଲା ମତ୍ସ୍ୟ ଅଧିକାରୀ ଉମେଶ ଚନ୍ଦ୍ର ଧରୁଆ ଏଭଳି ବୈଠକ ଆୟୋଜନ ଜିଲ୍ଲାରେ ଏକ ଅନନ୍ୟ ପରମ୍ପରା ସୃଷ୍ଟି କରିବ ବୋଲି ମତ ପ୍ରକାଶ କରିଥିଲେ।
ଅବସରପ୍ରାପ୍ତ ପ୍ରଶାସନିକ ଅଧିକାରୀ ପୂର୍ଣ୍ଣଚନ୍ଦ୍ର ଦାସ ସମସ୍ତଙ୍କ ସ୍ୱାସ୍ଥ୍ୟ ଓ ପରିବାରର ମଙ୍ଗଳ କାମନା କରିଥିଲେ। ରାଜେନ୍ଦ୍ର ପାତ୍ର ବରିଷ୍ଠ ନାଗରିକଙ୍କ ଉନ୍ନତ ସ୍ୱାସ୍ଥ୍ୟ ପରିଚାଳନା ସମ୍ପର୍କରେ ମତ ରଖିଥିଲେ।ଅବସରପ୍ରାପ୍ତ ଅଧିକାରୀ ଅରବିନ୍ଦ ଦାସ, ପ୍ରମଥ କୁମାର ମହାପାତ୍ର, ଜନାର୍ଦ୍ଦନ ରାମ ଓ ଜ୍ଞାନେନ୍ଦ୍ର କୁମାର ରଥ ଏଭଳି ବନ୍ଧୁମିଳନ ଓ ସମାବେଶର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ସମାବେଶରେ ପରସ୍ପର ମଧ୍ୟରେ ଭାବର ଆଦାନପ୍ରଦାନ ସହ ପୁରୁଣା ସ୍ମୃତିକୁ ମନେ ପକାଇଥିଲେ ଅବସରପ୍ରାପ୍ତ ଅଧିକାରୀ ଓ କର୍ମଚାରୀ।ଏହି ଅବସରରେ ପୂର୍ଣ୍ଣଚନ୍ଦ୍ର ଦାସ, ସରୋଜ କୁମାର ସାହୁ, ଅରବିନ୍ଦ ଦାସ, ଜନାର୍ଦ୍ଦନ ଦାସ, ପ୍ରମଥ କୁମାର ମହାପାତ୍ର, ଭରତ ନାୟକ, ବାୟା ସିଂହ, ବିରେନ୍ଦ୍ର ନାଥ ସାହୁ, ବ୍ରହ୍ମାନନ୍ଦ ପଧାନ ଓ ଅଶୋକ ଜେନାଙ୍କୁ ବିଭାଗ ପ୍ରତି ସେମାନଙ୍କ ଅବଦାନ ପାଇଁ ଉତ୍ତରୀୟ ଓ ଉପଢୌକନ ପ୍ରଦାନ କରି ସମ୍ମାନିତ କରାଯାଇଥିଲା।ଶେଷରେ ଅରବିନ୍ଦ ଦାସ କାର୍ଯ୍ୟକ୍ରମରେ ଯୋଗଦାନ ଓ ସହଯୋଗ ପାଇଁ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।
