କେନ୍ଦୁଝର/ସାହାରପଡ଼ା, ୮/୧୦: ଓଡ଼ିଶା ବନ୍ଦ ଡାକରାକୁ ସମର୍ଥନ କରି କେନ୍ଦୁଝର ଜିଲ୍ଲା ସାହାରପଡ଼ାରେ କଂଗ୍ରେସ ପକ୍ଷରୁ ଜୋରଦାର ପ୍ରତିବାଦ କରାଯାଇଛି। ସାହାରପଡ଼ା ମୁଖ୍ୟ ରାସ୍ତାରେ କଂଗ୍ରେସ କର୍ମୀ ଓ ସମର୍ଥକମାନେ ଏକତ୍ରିତ ହୋଇ ବ୍ୟାନର ଧରି ନାରାବାଜି କରିବା ସହ ବନ୍ଦକୁ ସଫଳ କରିବା ପାଇଁ ଲୋକଙ୍କୁ ଆହ୍ୱାନ ଦେଇଥିଲେ।ଏହି ପ୍ରତିବାଦ ଯୋଗୁଁ କିଛି ସମୟ ପାଇଁ ସାହାରପଡ଼ା ମୁଖ୍ୟ ରାସ୍ତାରେ ଯାନବାହନ ଚଳାଚଳ ପ୍ରଭାବିତ ହୋଇଥିଲା। ବନ୍ଦ ସମୟରେ କେତେକ ଯାନବାହନ ରାସ୍ତାରେ ଅଟକି ରହିଥିବା ଜଣାପଡ଼ିଛି।
ଏହି ପ୍ରତିବାଦରେ ସାହାରପଡ଼ା ବ୍ଲକ କଂଗ୍ରେସ ସଭାପତି ସରୋଜ କୁମାର ବଘେଲ ବାବୁଙ୍କ ସମେତ ଗୌରହରି ଦାସ, ମଧୁସୂଦନ ସାହୁ, ବେଣୁଧର ନାଏକ ଓ ମୁକୁନ୍ଦ ମହାନ୍ତ ପ୍ରମୁଖ ଉପସ୍ଥିତ ଥିଲେ। ଏଥିସହ ବହୁ କଂଗ୍ରେସ କର୍ମୀ ଓ ସମର୍ଥକ ଏହି ଆନ୍ଦୋଳନରେ ସାମିଲ ହୋଇଥିଲେ।ଅନ୍ୟପକ୍ଷରେ, ବନ୍ଦ ସମୟରେ ପୁଲିସ ପକ୍ଷରୁ ପରିସ୍ଥିତି ଉପରେ ନଜର ରଖାଯାଇଥିଲା। ଜରୁରୀକାଳୀନ ଯାନବାହନ ଓ ସାଧାରଣ ଲୋକଙ୍କ ଯାତାୟାତ ଯେପରି ବାଧାପ୍ରାପ୍ତ ନହୁଏ, ସେଥିପ୍ରତି ମଧ୍ୟ ଧ୍ୟାନ ଦିଆଯାଇଥିଲା।
