କେନ୍ଦୁଝର/ପାଟଣା, ୧/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ କେନ୍ଦେଇପଶି ହାଟପଡ଼ିଆରେ ଆନ୍ତର୍ଜାତୀୟ ବରିଷ୍ଠ ନାଗରିକ ଦିବସ ଅବସରରେ ଏକ ସ୍ୱତନ୍ତ୍ର ସଚେତନତା ଓ ସମ୍ମାନ କାର୍ଯ୍ୟକ୍ରମ ଆୟୋଜିତ ହୋଇଛି। ବରିଷ୍ଠ ନାଗରିକଙ୍କ ପ୍ରତି ସମ୍ମାନ, ସ୍ୱାସ୍ଥ୍ୟର ଯତ୍ନ ଓ ସାମାଜିକ ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା।ସକାଳ ୭ଟାରୁ ୧୦ଟା ପର୍ଯ୍ୟନ୍ତ ଚାଲିଥିବା ଏହି ଆୟୋଜନରେ ୯ଟି ଗ୍ରାମର ପ୍ରାୟ ୧୫୦ ଜଣ ବୟୋଜ୍ୟେଷ୍ଠ ଯୋଗଦେଇଥିଲେ। କାର୍ଯ୍ୟକ୍ରମରେ ବରିଷ୍ଠ ନାଗରିକମାନଙ୍କୁ ଉପଯୁକ୍ତ ଜୀବନଶୈଳୀ ସମ୍ପର୍କରେ ସଚେତନ କରାଯାଇଥିଲା। ଏଥିସହ ଫୁଲ ଓ ଚନ୍ଦନ ଦେଇ ବୟୋଜ୍ୟେଷ୍ଠମାନଙ୍କୁ ସମ୍ମାନିତ କରାଯାଇଥିଲା।ଏହି ଅବସରରେ ୯ଟି ଗ୍ରାମରୁ ଜଣେ ଲେଖାଏଁ ବୟୋଜ୍ୟେଷ୍ଠଙ୍କୁ ମିଶନ ଶକ୍ତି ପକ୍ଷରୁ ସ୍ୱତନ୍ତ୍ର ଭାବେ ସମ୍ମାନିତ କରାଯାଇଥିଲା। ଗ୍ରାମସ୍ତରୀୟ ମିଶନ ଶକ୍ତି ସହାୟିକା ମନୋରମା ପ୍ରଧାନଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ଗ୍ରାମ ପଞ୍ଚାୟତସ୍ତରୀୟ ମହିଳା ମହାସଂଘ ପକ୍ଷରୁ ପ୍ରମୁଖ ସହଯୋଗ ରହିଥିଲା।ପଞ୍ଚାୟତସ୍ତରୀୟ ସଂଘର ସଭାନେତ୍ରୀ କିରଣ ବାଳା ସେଠୀ ଓ ସମ୍ପାଦିକା ସସ୍ମିତା ମହାନ୍ତଙ୍କ ସମେତ ମିଶନ ଶକ୍ତିର ମହିଳା ଏବଂ ସ୍ୱୟଂ ସହାୟକ ଗୋଷ୍ଠୀର ସଦସ୍ୟାମାନେ ସକ୍ରିୟ ଭାବେ ସହଯୋଗ କରିଥିଲେ। ଏଥିସହ ପଞ୍ଚାୟତ କୃଷି ମିତ୍ର, ପ୍ରାଣୀ ମିତ୍ର, ବ୍ୟାଙ୍କ ମିତ୍ର ଓ ସମ୍ପ୍ରଦାୟ ସମ୍ପଦ ବ୍ୟକ୍ତିମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।ବରିଷ୍ଠ ନାଗରିକଙ୍କ ସ୍ୱାସ୍ଥ୍ୟ ପରୀକ୍ଷାକୁ ମଧ୍ୟ କାର୍ଯ୍ୟକ୍ରମରେ ଗୁରୁତ୍ୱ ଦିଆଯାଇଥିଲା। କେନ୍ଦେଇପଶି ସ୍ୱାସ୍ଥ୍ୟକେନ୍ଦ୍ରର ଷ୍ଟାଫ୍ ନର୍ସ ଦେବଶ୍ରୀ ସାହୁଙ୍କ ସମେତ ସ୍ୱାସ୍ଥ୍ୟକର୍ମୀମାନେ ଯୋଗଦେଇ ବୟୋଜ୍ୟେଷ୍ଠମାନଙ୍କ ରକ୍ତଚାପ ଯାଞ୍ଚ କରିଥିଲେ। ଏଥିସହ ସେମାନଙ୍କୁ ଆବଶ୍ୟକ ସ୍ୱାସ୍ଥ୍ୟ ପରାମର୍ଶ ମଧ୍ୟ ପ୍ରଦାନ କରାଯାଇଥିଲା।କାର୍ଯ୍ୟକ୍ରମରେ ବ୍ଲକସ୍ତରୀୟ ସମନ୍ୱୟକ ସସ୍ମିତା ସାହୁ, ପ୍ରକଳ୍ପ ଅଧିକାରୀ ଜଗବନ୍ଧୁ ଦେହୁରୀ, ସହକାରୀ ବିକାଶ ଅଧିକାରୀ ଜଗେନ୍ଦ୍ର ନାଥ ମହାନ୍ତ, ସରପଞ୍ଚ ମିନାକ୍ଷୀ ନାଏକ, ସଚ୍ଚାସେବୀ ମିତ୍ର ଭାନୁ ନାଏକ ଓ ଜୀବନଶୈଳୀ ଶିକ୍ଷକ ଦିବ୍ୟଲୋଚନ ସାହୁଙ୍କ ସମେତ ବିଭିନ୍ନ ବିଭାଗର କର୍ମକର୍ତ୍ତା ଓ ମହିଳା ସଦସ୍ୟାମାନେ ଉପସ୍ଥିତ ଥିଲେ।ବରିଷ୍ଠ ନାଗରିକଙ୍କ ସମ୍ମାନ, ସ୍ୱାସ୍ଥ୍ୟ ସଚେତନତା ଓ ସାମାଜିକ ସୁରକ୍ଷା ନେଇ ଏଭଳି କାର୍ଯ୍ୟକ୍ରମ ସମାଜରେ ବୟୋଜ୍ୟେଷ୍ଠମାନଙ୍କ ପ୍ରତି ସମ୍ମାନ ଓ ଯତ୍ନର ବାର୍ତ୍ତା ପହଞ୍ଚାଇବାରେ ସହାୟକ ହୋଇଛି।
