ଢେଙ୍କିକୋଟରେ ଆମ ପୁଲିସ ସମିତି ବୈଠକ, ରାଷ୍ଟ୍ରୀୟ ଏକତା ଦିବସ ପାଳିତ

କେନ୍ଦୁଝର/ଢେଙ୍କିକୋଟ, ୩୧/୧୦: ଢେଙ୍କିକୋଟ ପୁଲିସ ବିଟ୍ ହାଉସ୍‌ ପରିସରରେ ଘଟଗାଁ ପୁଲିସ ପକ୍ଷରୁ ଆମ ପୁଲିସ ସମିତି ବୈଠକ ସହ ରାଷ୍ଟ୍ରୀୟ ଏକତା ଦିବସ ପାଳନ କରାଯାଇଛି।ଏହି କାର୍ଯ୍ୟକ୍ରମରେ ଅଞ୍ଚଳର ବହୁ ବୁଦ୍ଧିଜୀବୀ ଓ ବଣିକ ସଂଘର ପ୍ରତିନିଧିମାନେ ଯୋଗଦେଇଥିଲେ। ଘଟଗାଁ ଏସ୍‌ଡିପିଓ ପ୍ରଭାତ ଚନ୍ଦ୍ର ତ୍ରିପାଠୀ ଓ ଘଟଗାଁ ଥାନାଧିକାରୀ ସୁଭ୍ରାନ୍ତ କୁମାର ଜେନା ବୈଠକରେ ଯୋଗଦେଇ ପୁଲିସ ଓ ଜନସାଧାରଣଙ୍କ ମଧ୍ୟରେ ସୁସମ୍ପର୍କ ଓ ସମନ୍ୱୟର ଗୁରୁତ୍ୱ ଉପରେ ଆଲୋକପାତ କରିଥିଲେ।ଏଥିସହ ଦେଶର ଏକତା ଓ ଅଖଣ୍ଡତା ରକ୍ଷା କରିବାରେ ଜନସାଧାରଣଙ୍କ ଭୂମିକା ଏବଂ ସମାଜରୁ ନିଶା ନିବାରଣ ପାଇଁ ସଚେତନତାର ଆବଶ୍ୟକତା ସମ୍ପର୍କରେ ବାର୍ତ୍ତା ଦେଇଥିଲେ।କାର୍ଯ୍ୟକ୍ରମରେ ଢେଙ୍କିକୋଟ ବିଟ୍ ଅଧିକାରୀ ତ୍ରିନାଥ ନାଏକ ଓ ଏଏସ୍‌ଆଇ କ୍ଷୀରୋଦିନୀ ନିଆଲ ଉପସ୍ଥିତ ଥିଲେ।

କନ୍ୟାରତ୍ନ ଲାଭ ପାଇଁ ୧୨ ବର୍ଷ ଧରି ଲକ୍ଷ୍ମୀ ପୂଜା କରୁଛନ୍ତି ମଣ୍ଡଳ ପରିବାର

କେନ୍ଦୁଝର/ଢେଙ୍କିକୋଟ, ୨୮/୧୦: ଆଜିର ଆଧୁନିକ ସମାଜରେ ମଧ୍ୟ କନ୍ୟା ସନ୍ତାନକୁ ନେଇ କେତେକଙ୍କ ମନରେ ଭେଦଭାବ ରହିଥିବା ବେଳେ କନ୍ୟାରତ୍ନଙ୍କ ଆଗମନକୁ ମା’ ଲକ୍ଷ୍ମୀଙ୍କ ଆଶୀର୍ବାଦ ଭାବେ ଗ୍ରହଣ କରି ଏକ ନିଆରା ପରମ୍ପରା ସୃଷ୍ଟି କରିଛନ୍ତି କେନ୍ଦୁଝର ଜିଲ୍ଲା ଢେଙ୍କିକୋଟର ମଣ୍ଡଳ ପରିବାର। ଦୀର୍ଘ ୧୨ ବର୍ଷ ଧରି ପରିବାର ପକ୍ଷରୁ ପ୍ରତିବର୍ଷ ଧୁମ୍‌ଧାମ୍‌ରେ ଗଜଲକ୍ଷ୍ମୀ ପୂଜା ଆୟୋଜନ କରାଯାଉଛି।ଢେଙ୍କିକୋଟର ଅବସରପ୍ରାପ୍ତ ପ୍ରଧାନଶିକ୍ଷକ କୁଲ୍ହିଆ ମଣ୍ଡଳଙ୍କ ପୁଅ ସୌମ୍ୟ ପ୍ରକାଶ ମଣ୍ଡଳ ଓରଫ ମଣ୍ଟୁ ୨୦୧୩ ମସିହାରେ ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ଅଞ୍ଚଳର ଦେବସ୍ମିତା ସାହୁଙ୍କୁ ବିବାହ କରିଥିଲେ। ବୋହୂଙ୍କୁ ଘରକୁ ପାଇ ମଣ୍ଡଳ ପରିବାର ବେଶ୍ ଖୁସି ହୋଇଥିଲେ। ଏହି ସମୟରେ ପ୍ରଥମ ସନ୍ତାନ କନ୍ୟା ହେଲେ ପ୍ରତିବର୍ଷ ମା’ ଗଜଲକ୍ଷ୍ମୀଙ୍କ ପୂଜା କରିବେ ବୋଲି ମାନସିକ ରଖିଥିଲେ।ପରିବାରର ଏହି ମାନସିକ ୨୦୧୫ ମସିହାରେ ପୂରଣ ହୋଇଥିଲା। ସୌମ୍ୟ ପ୍ରକାଶଙ୍କ ପ୍ରଥମ ସନ୍ତାନ ଭାବେ କନ୍ୟାରତ୍ନ ଜନ୍ମ ନେଇଥିଲେ। ତାଙ୍କ ନାମ ସାଇ ସମ୍ପୂର୍ଣ୍ଣା ରଖାଯାଇଥିଲା। ସେହି ବର୍ଷଠାରୁ ପରିବାର ପକ୍ଷରୁ ପ୍ରତିବର୍ଷ ଗଜଲକ୍ଷ୍ମୀ ପୂଜା ଆୟୋଜନ କରାଯାଉଛି। ପୂଜା ଅବସରରେ ଗ୍ରାମବାସୀ ଓ ଶ୍ରଦ୍ଧାଳୁଙ୍କୁ ପ୍ରସାଦ ବଣ୍ଟନ କରାଯାଉଛି।ଏହା ପରେ ସୌମ୍ୟ ପ୍ରକାଶ ଦ୍ୱିତୀୟ କନ୍ୟାରତ୍ନ ଦୀପାଂଶିଙ୍କ ପିତା ହୋଇଛନ୍ତି। କନ୍ୟା ସନ୍ତାନଙ୍କ ପ୍ରତି ଭଲପାଇବା ଓ ସମ୍ମାନର ଏହି ପରମ୍ପରାକୁ ମଣ୍ଡଳ ପରିବାର ଆଜି ମଧ୍ୟ ଜାରି ରଖିଛି।ଅବସରପ୍ରାପ୍ତ ପ୍ରଧାନଶିକ୍ଷକ କୁଲ୍ହିଆ ମଣ୍ଡଳ ଓ ତାଙ୍କ ଭାଇ ପୂର୍ଣ୍ଣଚନ୍ଦ୍ର ମଣ୍ଡଳ ଏହି ମହତ୍ କାର୍ଯ୍ୟରେ ସୌମ୍ୟ ପ୍ରକାଶଙ୍କୁ ପୂର୍ଣ୍ଣ ସହଯୋଗ କରିଆସୁଛନ୍ତି।କନ୍ୟା ସନ୍ତାନଙ୍କୁ ଭାର ନୁହେଁ, ବରଂ ଆଶୀର୍ବାଦ ଭାବେ ଗ୍ରହଣ କରିବାର ବାର୍ତ୍ତା ଦେଉଛି ମଣ୍ଡଳ ପରିବାରର ଏହି ପରମ୍ପରା। କନ୍ୟାଭ୍ରୂଣ ହତ୍ୟା ଓ ଲିଙ୍ଗଗତ ଭେଦଭାବ ଭଳି ସାମାଜିକ ସମସ୍ୟା ମଧ୍ୟରେ ଏପରି ଉଦ୍ୟମ ଅନ୍ୟମାନଙ୍କ ପାଇଁ ପ୍ରେରଣାଦାୟକ ଉଦାହରଣ ପାଲଟିଛି।

ଢେଙ୍କିକୋଟରେ ୫୩ତମ ଗଜଲକ୍ଷ୍ମୀ ପୂଜା ମହୋତ୍ସବ ଆରମ୍ଭ, ୨୮ରେ ଆସିବେ କଣ୍ଠଶିଳ୍ପୀ ଅର୍ପିତା ଚୌଧୁରୀ

କେନ୍ଦୁଝର/ପାଟଣା, ୨୫/୧୦: କେନ୍ଦୁଝର ଜିଲ୍ଲା ଢେଙ୍କିକୋଟରେ ମହାଲକ୍ଷ୍ମୀ ପୂଜା କମିଟି ପକ୍ଷରୁ ୫୩ତମ ଗଜଲକ୍ଷ୍ମୀ ପୂଜା ମହୋତ୍ସବ ଯଥାବିଧି ଆରମ୍ଭ ହୋଇଛି। ଏହି ଅବସରରେ ଅଞ୍ଚଳରେ ଭକ୍ତିମୟ ପରିବେଶ ସୃଷ୍ଟି ହୋଇଥିବାବେଳେ ଆକର୍ଷଣୀୟ ସାଜସଜ୍ଜା ଓ ଆଲୋକମାଳା ଶ୍ରଦ୍ଧାଳୁଙ୍କ ମନ ମୋହୁଛି।ଅପରାହ୍ନ ୧ଟା ସମୟରେ କଳସ ଯାତ୍ରା ମଣ୍ଡପରେ ପହଞ୍ଚିବା ପରେ ପୂଜାକାର୍ଯ୍ୟ ଆରମ୍ଭ ହୋଇଥିଲା। ପୂଜକ ପ୍ରଦୀପ କୁମାର ପଣ୍ଡା ଓ ପୁରୁଷୋତ୍ତମ ପଣ୍ଡାଙ୍କ ଦ୍ୱାରା ପୂଜାବିଧି ସମ୍ପନ୍ନ ହୋଇଥିଲା। ଏଥିରେ କର୍ତ୍ତା ଭାବେ ରାମଚନ୍ଦ୍ର ସାହୁ, ମକରଧ୍ୱଜ ସାହୁ, ସଞ୍ଜୀବ କୁମାର ସାହୁ, ସୁଶାନ୍ତ ସେନାପତି ଓ ତାପସ ଓଝା ଉପସ୍ଥିତ ଥିଲେ।ପୂଜା ମଣ୍ଡପରେ ସୁଦୃଶ୍ୟ ମୃଣ୍ମୟୀ ମା’ ଗଜଲକ୍ଷ୍ମୀଙ୍କ ମୂର୍ତ୍ତି ସ୍ଥାପନ କରାଯାଇଛି। ମଣ୍ଡପକୁ ଆକର୍ଷଣୀୟ ଭାବେ ସଜାଯିବା ସହ ସୁନ୍ଦର ତୋରଣ ଓ ୪୦ ଫୁଟ ଉଚ୍ଚର ଆଲୋକ ଗେଟ୍ ନିର୍ମାଣ କରାଯାଇଛି। ଏହା ସହ ପାର୍ଶ୍ୱ ବାରୁଆଳି ଦେଖିବା ପାଇଁ ମଧ୍ୟ ଦର୍ଶକଙ୍କ ମଧ୍ୟରେ ବେଶ୍ ଆଗ୍ରହ ଦେଖିବାକୁ ମିଳୁଛି।ପୂଜା କମିଟିର ସଭାପତି ରାମଚନ୍ଦ୍ର ସାହୁ ଓ ସମ୍ପାଦକ ସଞ୍ଜୀବ କୁମାର ସାହୁଙ୍କ ସହ ଶଙ୍କର୍ଷଣ ସାହୁ, ରମେଶ ଚନ୍ଦ୍ର ମହାନ୍ତ, ଉପେନ୍ଦ୍ର ଓଝା, ରବିନ୍ଦ୍ର ପୃଷ୍ଟି, ବିଜୟ କୁମାର ସାହୁ, ବିଜୟ କୁମାର ମଣ୍ଡଳ, ନୀଳମଣି ମଣ୍ଡଳ, ଲକ୍ଷ୍ମୀଧର ସାହୁ ଓ ତୃପ୍ତି ରଞ୍ଜନ ସାହୁ ପ୍ରମୁଖ ମହୋତ୍ସବ ପରିଚାଳନାରେ ସହଯୋଗ କରୁଛନ୍ତି।ମହୋତ୍ସବ ଅବସରରେ ମଙ୍ଗଳବାର ସାମୂହିକ ପ୍ରସାଦ ସେବନର ଆୟୋଜନ କରାଯିବ। ସେହିପରି ଅକ୍ଟୋବର ୨୮ ତାରିଖରେ ସାଂସ୍କୃତିକ କାର୍ଯ୍ୟକ୍ରମ ସହ ମେଲୋଡି ପରିବେଷଣ ହେବ। ଏହି କାର୍ଯ୍ୟକ୍ରମରେ କଣ୍ଠଶିଳ୍ପୀ ଅର୍ପିତା ଚୌଧୁରୀ ଯୋଗଦେବାର କାର୍ଯ୍ୟକ୍ରମ ରହିଛି।ଅନ୍ୟପକ୍ଷରେ ଢେଙ୍କିକୋଟରେ ବିପିନି ବିହାରୀ ସାହୁ, ନବକିଶୋର ସାହୁ, ଶରତ ପାଲ, ନରୋତ୍ତମ ବେହେରା, ରଞ୍ଜନ କୁମାର ସାହୁ ଓ ସୌମ୍ୟପ୍ରକାଶ ମଣ୍ଡଳଙ୍କ ବ୍ୟକ୍ତିଗତ ଉଦ୍ୟମରେ ମଧ୍ୟ ମୃଣ୍ମୟୀ ମୂର୍ତ୍ତି ସ୍ଥାପନ କରାଯାଇ ପ୍ରତିବର୍ଷ ଭଳି ମା’ ଲକ୍ଷ୍ମୀଙ୍କ ପୂଜା ଆୟୋଜନ କରାଯାଉଛି। ଏହାଦ୍ୱାରା ଅଞ୍ଚଳରେ ଧାର୍ମିକ ଓ ସାଂସ୍କୃତିକ ପରମ୍ପରା ଆହୁରି ଉଜ୍ଜ୍ୱଳ ହେଉଛି।

ମହାଷ୍ଟମୀ ବ୍ରତ ପାଇଁ ଢେଙ୍କିକୋଟ ଦୁର୍ଗା ମଣ୍ଡପରେ ମହିଳାଙ୍କ ପ୍ରବଳ ଭିଡ଼

କେନ୍ଦୁଝର/ଢେଙ୍କିକୋଟ, ୧୮/୧୦: ପବିତ୍ର ମହାଷ୍ଟମୀ ଅବସରରେ ମା’ ଦୁର୍ଗାଙ୍କ ଆଶୀର୍ବାଦ ଲାଭ ପାଇଁ ଢେଙ୍କିକୋଟ ଟିକିରାସ୍ଥିତ ଶ୍ରୀ ଦୁର୍ଗାପୂଜା କମିଟି ଓ ଦେବୀ ମଣ୍ଡପରେ ମହିଳାଙ୍କ ପ୍ରବଳ ଭିଡ଼ ଦେଖିବାକୁ ମିଳିଥିଲା। ଶତାଧିକ ମହିଳାଙ୍କ ଉପସ୍ଥିତିରେ ଉଭୟ ପୂଜା ମଣ୍ଡପ ଉତ୍ସବମୁଖର ହୋଇଉଠିଥିଲା।ଏହି ଅବସରରେ ମହିଳାମାନେ ନୂତନ ବସ୍ତ୍ର ପରିଧାନ କରି ଲାଲ ବ୍ରତ, ନଡ଼ିଆ, କଦଳୀ ସମେତ ବିଭିନ୍ନ ଫଳମୂଳ, ଧୂପ, ଦୀପ ଓ ଶଙ୍ଖା ଆଦି ପୂଜା ସାମଗ୍ରୀ ଧରି ମା’ଙ୍କ ପୂଜାର୍ଚ୍ଚନା କରିଥିଲେ। ମାନସିକ ପୂରଣ ହୋଇଥିବାରୁ କିଛି ମହିଳା ମା’ ଦୁର୍ଗାଙ୍କୁ ନୂତନ ଶାଢ଼ୀ ସମର୍ପଣ କରିଥିବା ବେଳେ ଅନ୍ୟ କିଛି ମହିଳା ନୂତନ ଶାଢ଼ୀ ପୂଜା କରିଥିଲେ।

ଶ୍ରୀ ଦୁର୍ଗାପୂଜା କମିଟି ମଣ୍ଡପରେ ମୁଖ୍ୟ ପୂଜକ ରବୀନ୍ଦ୍ର ପାଢ଼ୀ ଓ ତାଙ୍କ ସହଯୋଗୀମାନେ ପୂଜାର୍ଚ୍ଚନା କରିଥିବା ବେଳେ ଦେବୀ ମଣ୍ଡପରେ ମୁଖ୍ୟ ପୂଜକ ପ୍ରଦୀପ ପଣ୍ଡା ଓ ତାଙ୍କ ସହଯୋଗୀମାନେ ବ୍ରତ ପୂଜା କାର୍ଯ୍ୟକୁ ଶୃଙ୍ଖଳିତ ଭାବେ ସମ୍ପନ୍ନ କରିଥିଲେ।ସୂଚନା ଅନୁଯାୟୀ, ଆଗ୍ରହୀ ମହିଳାମାନେ ସୋମବାର ପୂର୍ବାହ୍ନ ୯ଟା ପୂର୍ବରୁ ମଧ୍ୟ ମଣ୍ଡପରେ ପହଞ୍ଚି ମହାଷ୍ଟମୀ ବ୍ରତ ପୂଜା କରିପାରିବେ।

ଢେଙ୍କିକୋଟରେ ପାର୍ବଣ ଓ ଭସାଣି ପାଇଁ ଶାନ୍ତି କମିଟି ବୈଠକ, ଶୃଙ୍ଖଳିତ ଉତ୍ସବ ପାଳନ ଉପରେ ଗୁରୁତ୍ୱ

କେନ୍ଦୁଝର/ଢେଙ୍କିକୋଟ, ୧୦/୧୦: ଦୁର୍ଗାପୂଜା, ଗଣେଶ ପୂଜା ସମେତ ଆଗାମୀ ପାର୍ବଣ ଓ ଭସାଣି ଉତ୍ସବକୁ ଶାନ୍ତିଶୃଙ୍ଖଳାର ସହ ପାଳନ କରିବା ପାଇଁ ଘଟଗାଁ ପୁଲିସ ପକ୍ଷରୁ ଢେଙ୍କିକୋଟରେ ଏକ ଶାନ୍ତି କମିଟି ବୈଠକ ଅନୁଷ୍ଠିତ ହୋଇଛି।ଶୁକ୍ରବାର ସନ୍ଧ୍ୟା ୭ଟାରେ ଢେଙ୍କିକୋଟ ପୁଲିସ ବିଟ୍‌ ହାଉସ ପରିସରରେ ଘଟଗାଁ ଏସଡିପିଓ ପ୍ରଭାତ ଚନ୍ଦ୍ର ତ୍ରିପାଠୀଙ୍କ ସଭାପତିତ୍ୱରେ ଏହି ବୈଠକ ହୋଇଥିଲା। ବିଟ୍‌ ହାଉସ ଅଧିକାରୀ ତ୍ରିନାଥ ନାଏକ ବୈଠକର ଆୟୋଜନ କରିଥିବା ବେଳେ ଆଇଆଇସି ଶୁଭ୍ରାନ୍ତ କୁମାର ଜେନା ସଭା ପରିଚାଳନା କରିଥିଲେ।ଢେଙ୍କିକୋଟ ବଜାରରେ ପାର୍ବଣ ଉତ୍ସବ ଓ ଭସାଣି ଦେଖିବା ପାଇଁ କେନ୍ଦୁଝର ଜିଲ୍ଲା ସମେତ ବାହାର ଅଞ୍ଚଳରୁ ହଜାର ହଜାର ଦର୍ଶକଙ୍କ ସମାଗମ ହୋଇଥାଏ। ଏହାକୁ ଦୃଷ୍ଟିରେ ରଖି ଭସାଣି ଉତ୍ସବକୁ ଶୃଙ୍ଖଳିତ କରିବା ସହ ନିର୍ଦ୍ଧାରିତ ନିୟମ ଅନୁଯାୟୀ ଡିଜେ ବଜାଇବାକୁ ଆଇଆଇସି ସମସ୍ତ ପୂଜା କମିଟି ଓ ବୁଦ୍ଧିଜୀବୀଙ୍କୁ ପରାମର୍ଶ ଦେଇଥିଲେ।ବୈଠକରେ ଜନମଙ୍ଗଳ ଯୁବକ ସଂଘ, ବିନ୍ଦାସ କ୍ଲବ, ଦିଲଦାର କ୍ଲବ, ଶାରଦୀୟ ଦୁର୍ଗାପୂଜା କମିଟି, ଶ୍ରୀ ଦୁର୍ଗାପୂଜା କମିଟି, ଲକ୍ଷ୍ମୀପୂଜା ଓ କାଳୀପୂଜା କମିଟିର ବରିଷ୍ଠ କର୍ମକର୍ତ୍ତା, ଉପଦେଷ୍ଟା ମଣ୍ଡଳୀ ଓ ଢେଙ୍କିକୋଟର ବୁଦ୍ଧିଜୀବୀମାନେ ଉପସ୍ଥିତ ଥିଲେ। ଶେଷରେ ବିଟ୍‌ ହାଉସ ଅଧିକାରୀ ତ୍ରିନାଥ ନାଏକ ଧନ୍ୟବାଦ ଅର୍ପଣ କରିଥିଲେ।

ଚିକିଣିଆ ଜିଲ୍ଲା ପାର୍କରେ ପାଲାକାରଙ୍କ ତୃତୀୟ ସାଂଗଠନିକ ବୈଠକ

କେନ୍ଦୁଝର/ଢେଙ୍କିକୋଟ, ୧୦/୧୦: ମା’ ତାରିଣୀ ଯୁବ ପାଲା କଳାକାର ପରିଷଦ, କେନ୍ଦୁଝର ଆନୁକୂଲ୍ୟରେ ତୃତୀୟ ସାଂଗଠନିକ ବୈଠକ ଚିକିଣିଆସ୍ଥିତ ଜିଲ୍ଲା ପାର୍କଠାରେ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଯୁବ ପାଲା କଳାକାରଙ୍କ ବିଭିନ୍ନ ସମସ୍ୟା, ପାଲା କଳାର ବିକାଶ ଓ କଳାକାରଙ୍କ ମଧ୍ୟରେ ଏକତା ଏବଂ ସମାନତା ବଜାୟ ରଖିବା ଉପରେ ଆଲୋଚନା ହୋଇଥିଲା।ବୈଠକ ପ୍ରାରମ୍ଭରେ ଗାୟକ ମଦନ ଦାସ ମଙ୍ଗଳାଚରଣ ପାଠ କରିଥିଲେ। ଗାୟକ ବିଦ୍ୱାନ ଲିଙ୍ଗରାଜ ମହାନ୍ତଙ୍କ ସଭାପତିତ୍ୱରେ ସଭାକାର୍ଯ୍ୟ ଆରମ୍ଭ ହୋଇଥିଲା।

ମୁଖ୍ୟ ଅତିଥି ଭାବେ ଗାୟକ ସୁଶାନ୍ତ କୁମାର ନାଥ ଏବଂ ମୁଖ୍ୟବକ୍ତା ଭାବେ ଗାୟକ କୈଳାସ ବାରିକ ଯୋଗଦେଇ ପାଲା କଳାର ବିକାଶ ଓ ଭବିଷ୍ୟତ ଦିଗଦର୍ଶନ ସମ୍ପର୍କରେ ନିଜର ମତ ରଖିଥିଲେ।ଏହି ଅବସରରେ ଗାୟକ ଅର୍ଜୁନ ପଲେଇ, ବିଭୂତିଭୂଷଣ ପାତ୍ର, ପ୍ରଭାକର ପାଣି, ଚନ୍ଦ୍ରଶେଖର ବାରିକ, ଚୈତନ୍ୟ ମହାନ୍ତ, ସଞ୍ଜୀବ ମହାନ୍ତ, ମନୋଜ କୁମାର ମହାନ୍ତ, ଅଯୋଧ୍ୟା ଘଣା, ବୀରବର ବାରିକ, କିଶୋର ମହାନ୍ତି, ସଞ୍ଜୟ ଗିରି, ସୁଫଳ ବେହେରା, ମଦନ ଦାସ, ଲିଙ୍ଗରାଜ ମହାନ୍ତ ଓ ରତ୍ନାକର ବାରିକଙ୍କ ସମେତ ବହୁ କଳାକାର ଉପସ୍ଥିତ ରହି ନିଜ ନିଜର ମତାମତ ରଖିଥିଲେ।ସମାଜସେବୀ ଭରତ କୁମାର ମହାନ୍ତଙ୍କ ଉପସ୍ଥିତି ବୈଠକକୁ ଆହୁରି ଆକର୍ଷଣୀୟ କରିଥିଲା।

ଢେଙ୍କିକୋଟରେ ସଡ଼କ ସୁରକ୍ଷା ସଚେତନତା, ୩୦ରୁ ଊର୍ଦ୍ଧ୍ୱ ଦୁଇଚକିଆ ଚାଳକଙ୍କୁ ମାଗଣା ହେଲମେଟ ବଣ୍ଟନ

କେନ୍ଦୁଝର/ଢେଙ୍କିକୋଟ, ୯/୧୦: କେନ୍ଦୁଝର ଜିଲ୍ଲାରେ ସଡ଼କ ଦୁର୍ଘଟଣା ରୋକିବା ଓ ଜନସାଧାରଣଙ୍କୁ ଟ୍ରାଫିକ୍ ନିୟମ ସମ୍ପର୍କରେ ସଚେତନ କରିବା ଲକ୍ଷ୍ୟରେ ଜିଲ୍ଲା ପରିବହନ ବିଭାଗ ପକ୍ଷରୁ ଏକ ସଡ଼କ ସୁରକ୍ଷା ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଛି। ଏହି ଅବସରରେ ୩୦ରୁ ଊର୍ଦ୍ଧ୍ୱ ପୁରୁଷ ଓ ମହିଳା ଦୁଇଚକିଆ ଯାନ ଚାଳକଙ୍କୁ ମାଗଣାରେ ହେଲମେଟ ବଣ୍ଟନ କରାଯାଇଛି।କେନ୍ଦୁଝର ଜିଲ୍ଲାର ୨୦ ନମ୍ବର ଜାତୀୟ ରାଜପଥରେ ଢେଙ୍କିକୋଟ ନିକଟସ୍ଥ ଖଣ୍ଟଘର ପଥକର ଫାଟକ ନିକଟରେ ଶୁକ୍ରବାର ପୂର୍ବାହ୍ନରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ କେନ୍ଦୁଝର ସାଂସଦ ଅନନ୍ତ ନାୟକ ଯୋଗଦେଇ ଦୁଇଚକିଆ ଯାନ ଚାଳକଙ୍କୁ ହେଲମେଟ ପ୍ରଦାନ କରିଥିଲେ। ବାଇକ୍ ଚଳାଇବା ସମୟରେ ନିଜର ସୁରକ୍ଷା ପାଇଁ ହେଲମେଟ ବ୍ୟବହାର କରିବା ସହ ଟ୍ରାଫିକ୍ ନିୟମ ମାନିବାକୁ ସେ ସମସ୍ତ ଚାଳକଙ୍କୁ ନିବେଦନ କରିଥିଲେ।ସମ୍ମାନିତ ଅତିଥି ଭାବେ ସ୍ୱତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷା ମମିତା ନାଏକ ଯୋଗଦେଇଥିଲେ। ଜିଲ୍ଲା ପରିବହନ ଅଧିକାରୀ ମାନସ ରଞ୍ଜନ ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସଡ଼କ ସୁରକ୍ଷା ସଚେତନତା ଓ ହେଲମେଟ ବଣ୍ଟନ କାର୍ଯ୍ୟକ୍ରମ ହୋଇଥିଲା।ଏଥିରେ ଘଟଗାଁ ଥାନାଧିକାରୀ ଶୁଭ୍ରାନ୍ତ କୁମାର ଜେନା, ବରିଷ୍ଠ ମୋଟର ଯାନ ନିରୀକ୍ଷକ ସନ୍ଦୀପ ପାଇକରାୟ, ଡେପୁଟି କମିଶନର ରମାକାନ୍ତ ନାୟକ, ଟିଆଇ ସୁକୁରାମ ସୋରେନ, ସହକାରୀ ଏମଭିଆଇ ଦିବ୍ୟଜ୍ୟୋତି ମହାନ୍ତ, ଟିଆଇ ସସ୍ମିତା ପଣ୍ଡା, ପହଲି ନାଏକ, ରୋସନ ବୁଡ, ସୁଷମା ବେହେରା, ଢେଙ୍କିକୋଟ ବିଟ୍ ଅଧିକାରୀ ତ୍ରିନାଥ ନାଏକ ଓ ଏଏସଆଇ କ୍ଷୀରୋଦିନୀ ନିଆଲଙ୍କ ସମେତ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।ଏହି ଅବସରରେ ପରିବହନ ବିଭାଗ ପକ୍ଷରୁ ‘ସଡ଼କ ସୁରକ୍ଷା, ଜୀବନ ରକ୍ଷା’ ଏବଂ ପ୍ରଯୁକ୍ତିର ଉପଯୋଗ ମାଧ୍ୟମରେ ସଡ଼କ ସୁରକ୍ଷା ସମ୍ପର୍କିତ ବାର୍ତ୍ତା ପ୍ରଦାନ କରାଯାଇଥିଲା। ହେଲମେଟ ବ୍ୟବହାର ଓ ଟ୍ରାଫିକ୍ ନିୟମ ପାଳନ ଦ୍ୱାରା ଅମୂଲ୍ୟ ଜୀବନ ରକ୍ଷା କରାଯାଇପାରିବ ବୋଲି ସଚେତନ କରାଯାଇଥିଲା।

ଢେଙ୍କିକୋଟରେ ଓଡ଼ିଶା ବନ୍ଦର ଆଂଶିକ ପ୍ରଭାବ, ରାଜପଥରେ ଅଟକିଲା ଯାନବାହନ

କେନ୍ଦୁଝର/ଢେଙ୍କିକୋଟ, ୮/୧୦: ଇଣ୍ଡି ମେଣ୍ଟ ପକ୍ଷରୁ ଦିଆଯାଇଥିବା ଓଡ଼ିଶା ବନ୍ଦ ଡାକରାର ପ୍ରଭାବ କେନ୍ଦୁଝର ଜିଲ୍ଲାର ଢେଙ୍କିକୋଟରେ ଆଂଶିକ ଭାବେ ଦେଖିବାକୁ ମିଳିଥିଲା। ବନ୍ଦକୁ ସମର୍ଥନ କରି କଂଗ୍ରେସ କର୍ମୀମାନେ ସକାଳ ୬ଟାରୁ ଜାତୀୟ ରାଜପଥ ନମ୍ବର ୨୦ ଓ ୨୨୦ରେ ଯାନବାହନ ଚଳାଚଳ ବନ୍ଦ କରିଥିଲେ।ଏହାର ପ୍ରଭାବରେ ଜାତୀୟ ରାଜପଥ ନମ୍ବର ୨୦ରେ ପ୍ରାୟ ୩ କିଲୋମିଟର ପର୍ଯ୍ୟନ୍ତ ଯାନବାହନ ଅଟକି ରହିଥିଲା। ଏଥିସହ ବନ୍ଦ ସମର୍ଥକମାନେ ବିଭିନ୍ନ ବ୍ୟାଙ୍କ, ଦୋକାନ ଓ ବଜାର ବନ୍ଦ କରାଇଥିଲେ।

ତେବେ ମଧ୍ୟାହ୍ନ ପରେ ଆନ୍ଦୋଳନକାରୀମାନେ ଯାନବାହନ ଚଳାଚଳ ପାଇଁ ରାସ୍ତା ଛାଡ଼ି ଦେଇଥିଲେ। ଦୋକାନ ବଜାର ବନ୍ଦ ରହିବା ଯୋଗୁଁ ସାଧାରଣ ଲୋକଙ୍କୁ ବିଭିନ୍ନ ଅସୁବିଧାର ସାମ୍ନା କରିବାକୁ ପଡ଼ିଥିଲା।ଏହି ବନ୍ଦରେ ରଣଜିତ୍ ଜେନା, ଟଙ୍କଧର ମାଝୀ, ବିଶ୍ୱନାଥ ନାଏକ, ଜନାର୍ଦ୍ଦନ ମହାନ୍ତ, ଶରତ ନାଏକ, ଜୁଲଫିକର ଅଲ୍ଲୀ ଭୁଟ୍ଟୋ, ଧ୍ରୁବ ଚରଣ ଘଣା, ଦୁଷ୍ମନ୍ତ ସିଂ, ଏସ୍.କେ.କେ. ଇସ୍ରାଏଲ, ରବୀନ୍ଦ୍ର ନାୟକ ଓ ମେଘନାଦ ନାୟକ ପ୍ରମୁଖ ନେତୃତ୍ୱ ନେଇଥିଲେ।

ଢେଙ୍କିକୋଟରେ ୮୮୦ ଛେଳି ଉଦ୍ଧାର, ୪ ଟ୍ରକ୍ ଓ ୧ ପିକ୍‌ଅପ୍ ଜବତ; ୧୦ ଅଟକ

କେନ୍ଦୁଝର/ଢେଙ୍କିକୋଟ, ୮/୧୦: କେନ୍ଦୁଝର ଜିଲ୍ଲାର ଢେଙ୍କିକୋଟ ନିକଟରେ ୨୦ ନମ୍ବର ଜାତୀୟ ରାଜପଥରୁ ୮୮୦ଟି ଛେଳିକୁ ଉଦ୍ଧାର କରିଛି ଘଟଗାଁ ପୁଲିସ। ଅମାନୁଷିକ ଭାବେ ଛେଳି ପରିବହନ ଅଭିଯୋଗରେ ୪ଟି ଆଇଚର ଟ୍ରକ୍ ଓ ଗୋଟିଏ ପିକ୍‌ଅପ୍ ଗାଡ଼ିକୁ ଜବତ କରାଯିବା ସହ ଗାଡ଼ିରେ ଥିବା ୧୦ ଜଣଙ୍କୁ ଅଟକ ରଖାଯାଇଛି।ସୂଚନା ଅନୁଯାୟୀ, ଓଡ଼ିଶା ବନ୍ଦ ଚାଲିଥିବା ବେଳେ ବାହାର ରାଜ୍ୟରୁ ଛେଳିଗୁଡ଼ିକୁ ନେଇ ୫ଟି ଗାଡ଼ି କଟକ ଓ ଭୁବନେଶ୍ୱର ଅଭିମୁଖେ ଯାଉଥିଲା। ପାର୍ବଣ ଋତୁ ପାଇଁ ଏହି ଛେଳିଗୁଡ଼ିକୁ ନିଆଯାଉଥିବା ଜଣାପଡ଼ିଛି।ଗଦାଧରପୁର ନିକଟରେ ଘଟଗାଁ ଥାନାର ଏସ୍‌ଆଇ ପ୍ରଶାନ୍ତ କୁମାର ବେହେରା ଗାଡ଼ିଗୁଡ଼ିକୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ସମୟରେ ଛେଳିଗୁଡ଼ିକୁ ଅତ୍ୟଧିକ ସଂଖ୍ୟାରେ ଗାଡ଼ିରେ ଭର୍ତ୍ତି କରି ପରିବହନ କରାଯାଉଥିବା ଜଣାପଡ଼ିଥିଲା।ପ୍ରତ୍ୟେକ ଆଇଚର ଟ୍ରକ୍‌ରେ ସର୍ବାଧିକ ୫୦ଟି ଛେଳି ପରିବହନ କରିବା ପରିବର୍ତ୍ତେ ପ୍ରାୟ ୨୦୦ଟି ଲେଖାଏଁ ଛେଳି ନିଆଯାଉଥିଲା। ଏହିପରି ୪ଟି ଟ୍ରକ୍‌ରୁ ୮୦୦ଟି ଏବଂ ଗୋଟିଏ ପିକ୍‌ଅପ୍‌ରୁ ୮୦ଟି ଛେଳିକୁ ମିଶାଇ ମୋଟ ୮୮୦ଟି ଛେଳି ଉଦ୍ଧାର କରାଯାଇଥିଲା।ଏହି ଘଟଣାରେ ଘଟଗାଁ ଥାନାରେ କେସ୍ ନମ୍ବର ୪୯୫/୨୦୨୬ ଅନୁଯାୟୀ ମାମଲା ରୁଜୁ ହୋଇଛି। ଉଦ୍ଧାର ହୋଇଥିବା ଛେଳିଗୁଡ଼ିକୁ ମେଲାଣ ଗୋଶାଳାକୁ ପଠାଯାଇଛି। ଢେଙ୍କିକୋଟ ପୁଲିସ ବିଟ୍ ଅଧିକାରୀ ତ୍ରିନାଥ ନାଏକ ଏହି ଘଟଣାର ତଦନ୍ତ ଦାୟିତ୍ୱ ନେଇଛନ୍ତି।

ପରିଚୟ ପତ୍ର ପାଇଁ ଅତିରିକ୍ତ ଅର୍ଥ ଦାବି ଅଭିଯୋଗ, ଉଚ୍ଚ ମାଧ୍ୟମିକ ବିଦ୍ୟାଳୟ ଫାଟକ ଆଗରେ ଛାତ୍ରଛାତ୍ରୀଙ୍କ ଧାରଣା

କେନ୍ଦୁଝର/ଢେଙ୍କିକୋଟ, ୫/୧୦: କେନ୍ଦୁଝର ଜିଲ୍ଲା ଢେଙ୍କିକୋଟ ଫାଣ୍ଡି ଅନ୍ତର୍ଗତ ଆଞ୍ଚଳିକ ଏସ୍‌.ଏନ୍‌. ଉଚ୍ଚ ମାଧ୍ୟମିକ ବିଦ୍ୟାଳୟରେ ପରିଚୟ ପତ୍ର (ଆଇ-କାର୍ଡ) ବଣ୍ଟନକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବିଦ୍ୟାଳୟ କର୍ତ୍ତୃପକ୍ଷ ପରିଚୟ ପତ୍ର ପାଇଁ ଅତିରିକ୍ତ ଅର୍ଥ ଦାବି କରୁଥିବା ଅଭିଯୋଗ କରି ସୋମବାର ସକାଳୁ ବହୁ ସଂଖ୍ୟାରେ ଛାତ୍ରଛାତ୍ରୀ ବିଦ୍ୟାଳୟର ମୁଖ୍ୟ ଫାଟକ ସମ୍ମୁଖରେ ଧାରଣାରେ ବସିଥିଲେ।ଛାତ୍ରଛାତ୍ରୀଙ୍କ ଅଭିଯୋଗ ଅନୁସାରେ, ନାମଲେଖା ସମୟରେ ନିୟମ ଅନୁଯାୟୀ ସମସ୍ତ ଧାର୍ଯ୍ୟ ଫି’ ପୈଠ କରାଯାଇଥିଲା। ଏହା ସତ୍ତ୍ୱେ ପୁଣି ପରିଚୟ ପତ୍ର ପ୍ରଦାନ ପାଇଁ ଅତିରିକ୍ତ ଅର୍ଥ ଦାବି କରାଯାଉଥିବାରୁ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ତୀବ୍ର ହୋଇଥିଲା।ଏହାର ପ୍ରତିବାଦରେ ଛାତ୍ରଛାତ୍ରୀମାନେ ଏକତ୍ରିତ ହୋଇ ବିଦ୍ୟାଳୟ ମୁଖ୍ୟ ଫାଟକ ଆଗରେ ଧାରଣା ଦେବା ସହ ବିନା ଅତିରିକ୍ତ ମୂଲ୍ୟରେ ନିୟମାନୁସାରେ ପରିଚୟ ପତ୍ର ପ୍ରଦାନ କରିବାକୁ ଦାବି କରିଥିଲେ। ଘଟଣାକୁ ନେଇ ବିଦ୍ୟାଳୟ ପରିସରରେ କିଛି ସମୟ ପାଇଁ ଚାପା ଉତ୍ତେଜନା ସୃଷ୍ଟି ହୋଇଥିଲା।ଛାତ୍ରଛାତ୍ରୀମାନେ ଚେତାବନୀ ଦେଇଥିଲେ ଯେ, ସମସ୍ୟାର ତୁରନ୍ତ ସମାଧାନ ନହେଲେ ଆଗାମୀ ଦିନରେ ଆନ୍ଦୋଳନକୁ ଆହୁରି ବ୍ୟାପକ କରାଯିବ।ଧାରଣା ସମ୍ପର୍କରେ ଖବର ପାଇ ଘଟଗାଁ ଥାନାଧିକାରୀ ଶୁଭ୍ରାନ୍ତ କୁମାର ଜେନା ଓ ଢେଙ୍କିକୋଟ ଏଏସ୍‌ଆଇ ତ୍ରିନାଥ ନାଏକ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ଛାତ୍ରଛାତ୍ରୀ ଓ ବିଦ୍ୟାଳୟ ଅଧ୍ୟକ୍ଷଙ୍କ ସହ ଆଲୋଚନା କରିଥିଲେ। ଆଲୋଚନା ପରେ ୧୫ ଦିନ ମଧ୍ୟରେ ସମସ୍ୟାର ସମାଧାନ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ମଧ୍ୟାହ୍ନରେ ଛାତ୍ରଛାତ୍ରୀମାନେ ଧାରଣାରୁ ଓହରି ଯାଇଥିଲେ।

ଢେଙ୍କିକୋଟରେ କ୍ଲଷ୍ଟରସ୍ତରୀୟ ଶିଶୁ ମହୋତ୍ସବ ‘ସୁରଭି’: ବିଭିନ୍ନ ପ୍ରତିଯୋଗିତାରେ ଭାଗନେଲେ ଛାତ୍ରଛାତ୍ରୀ

କେନ୍ଦୁଝର/ଘଟଗାଁ, ୩୦/୯: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ଢେଙ୍କିକୋଟ କ୍ଲଷ୍ଟରସ୍ତରୀୟ ଶିଶୁ ମହୋତ୍ସବ ‘ସୁରଭି’ ସତ୍ୟନାରାୟଣ ବିଦ୍ୟାପୀଠ, ଢେଙ୍କିକୋଟ ପରିସରରେ ଅନୁଷ୍ଠିତ ହୋଇଯାଇଛି। ଆଞ୍ଚଳିକ ସାଧନା କେନ୍ଦ୍ର ସଂଯୋଜକ ଜିତେନ୍ଦ୍ର କୁମାର ଗିରିଙ୍କ ସଭାପତିତ୍ୱରେ ଆୟୋଜିତ ଏହି ଶିଶୁ ମହୋତ୍ସବକୁ ସାଂସଦ ପ୍ରତିନିଧି ଅଖିଳ କୁମାର ପାତ୍ର ମୁଖ୍ୟ ଅତିଥି ଭାବେ ଯୋଗଦେଇ ଉଦ୍‌ଘାଟନ କରିଥିଲେ।ପ୍ରଥମ, ଦ୍ୱିତୀୟ ଓ ତୃତୀୟ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ଚିତ୍ରାଙ୍କନ, ଗଳ୍ପ କଥନ, ଗଣିତ କୁଇଜ୍‌ ଓ ଗଣିତ ଦୌଡ଼ ଭଳି ପ୍ରତିଯୋଗିତା ଆୟୋଜିତ ହୋଇଥିଲା।ସେହିପରି ୪ର୍ଥରୁ ୭ମ ଶ୍ରେଣୀ କନିଷ୍ଠ ବର୍ଗ, ୮ମରୁ ୧୦ମ ଶ୍ରେଣୀ ବରିଷ୍ଠ ବିଭାଗ ଏବଂ ୧୧ଶ ଓ ୧୨ଶ ଶ୍ରେଣୀ ଉଚ୍ଚ ମାଧ୍ୟମିକ ବିଭାଗର ଛାତ୍ରଛାତ୍ରୀଙ୍କ ପାଇଁ ଚିତ୍ରାଙ୍କନ, ପ୍ରବନ୍ଧ, ବକ୍ତୃତା, ତର୍କ, ଦେଶାତ୍ମବୋଧକ ସଙ୍ଗୀତ ଓ ଅନ୍ୟାନ୍ୟ ପ୍ରତିଯୋଗିତା ହୋଇଥିଲା। ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ପାଇଁ ମଧ୍ୟ ଚିତ୍ର ଓ ସଙ୍ଗୀତ ପ୍ରତିଯୋଗିତା ରହିଥିଲା। ଏଥିସହ ସାଂସ୍କୃତିକ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରାଯାଇଥିଲା।ଏହି କ୍ଲଷ୍ଟରସ୍ତରୀୟ ସୁରଭି କାର୍ଯ୍ୟକ୍ରମରେ ୧୩ଟି ପ୍ରାଥମିକ ବିଦ୍ୟାଳୟ, ୭ଟି ଉଚ୍ଚ ପ୍ରାଥମିକ ବିଦ୍ୟାଳୟ, ଉଚ୍ଚ ବିଦ୍ୟାଳୟ ଓ ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ।କାର୍ଯ୍ୟକ୍ରମ ପରିଚାଳନାରେ ଶିକ୍ଷକ ରାଜକିଶୋର ମିଶ୍ର, ଭଗବତୀ କର, ମୀନତି ମହାରଣା, କମଳ କୁମାର ନାୟକ, ହରେକୃଷ୍ଣ ପାତ୍ର, ବିଷ୍ଣୁ ପ୍ରସାଦ ସାହୁ, ଚନ୍ଦ୍ରକାନ୍ତ ବେହେରା, ଶୁଭଶ୍ରୀ ପହୀ, କଳାବତୀ ବିନିଶିୟା, ଭାଗ୍ୟଶ୍ରୀ ପଲେଇ, ଦୀପ୍ତିମୟୀ ଚାନ୍ଦ, ଅମୂଲ୍ୟ ଦତ୍ତ, ଜଗବନ୍ଧୁ ମହାନ୍ତ, ହରପ୍ରିୟା ବେହେରା, ବୃନ୍ଦାବନ ମାଝି ଓ ଶାନ୍ତିଲତା ସା ପ୍ରମୁଖ ସହଯୋଗ କରିଥିଲେ।ମଧ୍ୟାହ୍ନ ପୂର୍ବରୁ ଘଟଗାଁ ବିଇଓ ହରେକୃଷ୍ଣ ନାୟକ, ସାମ୍ବାଦିକ ନୀଳମଣି ମଣ୍ଡଳ, ସଞ୍ଜୟ କୁମାର ସାହୁ, ପ୍ରଧାନ ଶିକ୍ଷୟିତ୍ରୀ ସସ୍ମିତାରାଣୀ ପଣ୍ଡା ଓ ସାମାଜିକ କର୍ମୀ କୃଷ୍ଣଚନ୍ଦ୍ର ବାରିକ ପ୍ରମୁଖ ଯୋଗଦେଇ ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ।କାର୍ଯ୍ୟକ୍ରମର ଅନ୍ତିମ ପର୍ଯ୍ୟାୟରେ ଘଟଗାଁ ବ୍ଲକ ଏଲିମେଣ୍ଟାରି ଶିକ୍ଷକ ସଂଘ ସଭାପତି କୃତ୍ତି ପ୍ରତିଯୋଗୀମାନଙ୍କୁ ପ୍ରମାଣପତ୍ର ଓ ପୁରସ୍କାର ପ୍ରଦାନ କରିଥିଲେ।

ଢେଙ୍କିକୋଟରେ ଜିଲ୍ଲା ସ୍ତରୀୟ ଚେସ ଓ ଯୋଗ ପ୍ରତିଯୋଗିତା: ରାଜ୍ୟସ୍ତରକୁ ମନୋନୀତ ହେଲେ ଚେସ ବିଜେତା

କେନ୍ଦୁଝର/ଢେଙ୍କିକୋଟ, ୨୬/୯: ସ୍କୁଲ ଗେମ୍ସ ଫେଡେରେସନ ଅଫ୍ ଇଣ୍ଡିଆ ପକ୍ଷରୁ ରାଜ୍ୟ ସରକାରଙ୍କ ତତ୍ତ୍ୱାବଧାନରେ ବିଦ୍ୟାଳୟସ୍ତରୀୟ ବିଭିନ୍ନ କ୍ରୀଡ଼ା ପ୍ରତିଯୋଗିତା ଆୟୋଜିତ ହେଉଛି। ଏହି କ୍ରମରେ କେନ୍ଦୁଝର ଜିଲ୍ଲାର ଢେଙ୍କିକୋଟସ୍ଥିତ ସତ୍ୟନାରାୟଣ ବିଦ୍ୟାପୀଠ ପରିସରରେ ଜିଲ୍ଲା ସ୍ତରୀୟ ଚେସ ଓ ଯୋଗ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି।ପ୍ରତିଯୋଗିତାରେ ଜିଲ୍ଲାର ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀ ଉତ୍ସାହର ସହ ଅଂଶଗ୍ରହଣ କରିଥିଲେ। ୧୭ ବର୍ଷରୁ କମ୍ ଚେସ ବାଳକ ବର୍ଗରେ ଟିକିରା ଓଡ଼ିଶା ଆଦର୍ଶ ବିଦ୍ୟାଳୟର ଛାତ୍ର ଆଶୁତୋଷ ଖୁଣ୍ଟିଆ ପ୍ରଥମ ସ୍ଥାନ ଅଧିକାର କରିଥିବା ବେଳେ ବାଳିକା ବର୍ଗରେ ସୁଆଁପଦା ଓଡ଼ିଶା ଆଦର୍ଶ ବିଦ୍ୟାଳୟର ଛାତ୍ରୀ ଦେବପ୍ରିୟଦର୍ଶିନୀ ନାଏକ ପ୍ରଥମ ହୋଇଛନ୍ତି।ସେହିପରି ୧୭ ବର୍ଷରୁ କମ୍ ଯୋଗ ବାଳକ ବର୍ଗରେ ପଦ୍ମପୁର ଉଚ୍ଚ ବିଦ୍ୟାଳୟର ବିଜୟ କୁମାର ପାତ୍ର ଏବଂ ବାଳିକା ବର୍ଗରେ ପଳାସପଙ୍ଗା ପିଏମ୍ ଶ୍ରୀ ଉଚ୍ଚ ବିଦ୍ୟାଳୟର ସ୍ୱାତୀ ମୁଣ୍ଡା ପ୍ରଥମ ସ୍ଥାନ ହାସଲ କରିଛନ୍ତି।୧୪ ବର୍ଷରୁ କମ୍ ଯୋଗ ବାଳକ ବର୍ଗରେ କଳିଙ୍ଗା ଧବଳେଶ୍ୱର ଉଚ୍ଚ ବିଦ୍ୟାଳୟର ଛାତ୍ର ମନିହେଶ ମହାନ୍ତ ଏବଂ ବାଳିକା ବର୍ଗରେ ପଳାସପଙ୍ଗା ପିଏମ୍ ଶ୍ରୀ ଉଚ୍ଚ ବିଦ୍ୟାଳୟର ମାଳତୀ ମାଝୀ ପ୍ରଥମ ସ୍ଥାନ ଅଧିକାର କରିଛନ୍ତି।ଚେସ ପ୍ରତିଯୋଗିତାରେ ପ୍ରଥମ ସ୍ଥାନ ହାସଲ କରିଥିବା ଆଶୁତୋଷ ଖୁଣ୍ଟିଆ ଓ ଦେବପ୍ରିୟଦର୍ଶିନୀ ନାଏକ ଆଗାମୀ ରାଜ୍ୟସ୍ତରୀୟ ଚେସ ପ୍ରତିଯୋଗିତାରେ କେନ୍ଦୁଝର ଜିଲ୍ଲାର ପ୍ରତିନିଧିତ୍ୱ କରିବେ।ଉଦଘାଟନ ଓ ଉଦଯାପନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ସାଂସଦ ଅନନ୍ତ ନାୟକଯୋଗଦେଇଥିଲେ। ସମ୍ମାନିତ ଅତିଥି ଭାବେ ସାଂସଦ ପ୍ରତିନିଧି ଅଖିଳ ପାତ୍ର, ମୁଖ୍ୟବକ୍ତା ଭାବେ ଆଦର୍ଶ ବିଦ୍ୟାଳୟ ଅଧ୍ୟକ୍ଷ ଭ୍ରମର ବର ମଲ୍ଲିକ, ମଣ୍ଡଳ ସଭାପତି ରଞ୍ଜିତ ନାୟକ, ରାମଚନ୍ଦ୍ର ସାହୁ, କୃଷ୍ଣଚନ୍ଦ୍ର ବାରିକ, ସାମ୍ବାଦିକ ନୃସିଂହନାଥ ସିଂହ ଓ ନୀଳମଣି ମଣ୍ଡଳ ପ୍ରମୁଖ ଉପସ୍ଥିତ ଥିଲେ।ସତ୍ୟନାରାୟଣ ବିଦ୍ୟାପୀଠର ପ୍ରଧାନଶିକ୍ଷୟିତ୍ରୀ ସସ୍ମିତା ରାଣୀ ପଣ୍ଡା ଓ ଜିଲ୍ଲା ଶାରୀରିକ ଶିକ୍ଷା ଅଧିକାରୀ ରାମକୃଷ୍ଣ ବେହେରାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପ୍ରତିଯୋଗିତା ପରିଚାଳିତ ହୋଇଥିଲା। ସଞ୍ଜୟ କୁମାର ସାହୁ କାର୍ଯ୍ୟକ୍ରମର ସଂଯୋଜନା କରିଥିଲେ।ବିଦ୍ୟାପୀଠର ବରିଷ୍ଠ ଶିକ୍ଷୟିତ୍ରୀ ସ୍ୱର୍ଣ୍ଣଲତା ସାହୁ, ଦୀପାଞ୍ଜଳି ସେଠୀ, ଲମ୍ବୋଦର ନାୟକ, ବନଲତା ଚାନ୍ଦ, ରଞ୍ଜିତା ମୁର୍ମୁ, ଦୀନବନ୍ଧୁ ପଣ୍ଡା, ମଦନ ମୋହନ ମହାନ୍ତ, କ୍ରୀଡ଼ା ଶିକ୍ଷକ ପ୍ରଶାନ୍ତ କୁମାର ମହାନ୍ତି ଓ ମଧୁସ୍ମିତା ମହାପାତ୍ର ପ୍ରମୁଖ ପ୍ରତିଯୋଗିତା ପରିଚାଳନାରେ ସହଯୋଗ କରିଥିଲେ।

ମହାଲକ୍ଷ୍ମୀ ପୂଜା ପାଇଁ ମାଟି ଅନୁକୂଳ, ଢେଙ୍କିକୋଟରେ ଆରମ୍ଭ ହେଲା ପୂଜା ପ୍ରସ୍ତୁତି

କେନ୍ଦୁଝର/ଢେଙ୍କିକୋଟ, ୨୬/୯: ଘଟଗାଁ ବ୍ଲକ ଅନ୍ତର୍ଗତ ଢେଙ୍କିକୋଟର ସର୍ବପୁରାତନ ମହାଲକ୍ଷ୍ମୀ ପୂଜା କମିଟି ପକ୍ଷରୁ ପବିତ୍ର ଇନ୍ଦ୍ରୋତ୍ସବ ପୂର୍ଣ୍ଣିମା ଅବସରରେ ମହାଲକ୍ଷ୍ମୀ ପୂଜା ପାଇଁ ମାଟି ଅନୁକୂଳ କାର୍ଯ୍ୟ ସମ୍ପନ୍ନ ହୋଇଛି। ମହୁଲଗାଡିଆ ନିକଟସ୍ଥ ଭାଲୁଦୁମା ଠାରୁ ପାରମ୍ପରିକ ରୀତିନୀତି ଅନୁସାରେ ମାଟି ଅନୁକୂଳ କରାଯାଇଥିଲା।ସକାଳ ପ୍ରାୟ ୧୦ଟା ସମୟରେ ପ୍ରଥମେ ଲକ୍ଷ୍ମୀ ମଣ୍ଡପରେ ପୂଜାର୍ଚ୍ଚନା କରାଯାଇଥିଲା। ପୂଜା କମିଟିର କର୍ତ୍ତା ରାମଚନ୍ଦ୍ର ସାହୁଙ୍କ ଦ୍ୱାରା ମଣ୍ଡପରେ ପୂଜା କାର୍ଯ୍ୟ ସମ୍ପନ୍ନ ହେବା ପରେ ମାଟି ଅନୁକୂଳ ପାଇଁ ଶ୍ରଦ୍ଧାଳୁମାନେ ଭାଲୁଦୁମା ଅଭିମୁଖେ ଯାତ୍ରା କରିଥିଲେ।ଏହି ଅବସରରେ ଘଣ୍ଟ, ଶଙ୍ଖ ଓ ବାଦ୍ୟର ତାଳେତାଳେ ପୂଜା କମିଟିର ସଦସ୍ୟମାନେ ମଣ୍ଡପରୁ ଭାଲୁଦୁମା ପର୍ଯ୍ୟନ୍ତ ଯାଇଥିଲେ। ସେଠାରେ ପୂଜକ ଟିକିନା ଦାଶଙ୍କ ଦ୍ୱାରା ବିଧିବିଧାନ ଅନୁସାରେ ପୂଜା କାର୍ଯ୍ୟ କରାଯାଇ ମାଟି ଅନୁକୂଳ କରାଯାଇଥିଲା।ମାଟି ଅନୁକୂଳ କାର୍ଯ୍ୟରେ ରାମଚନ୍ଦ୍ର ସାହୁ, ସଞ୍ଜୀବ କୁମାର ସାହୁ, ରମେଶ ଚନ୍ଦ୍ର ମହାନ୍ତ, ମହେଶ୍ୱର ସାହୁ, ଦିଗାମ୍ବର ନାୟକ, ମକରଧ୍ୱଜ ସାହୁ, ଶଙ୍କର୍ଷଣ ସାହୁ, ନୀଳମଣି ମଣ୍ଡଳ, ତାପସ ଓଝା, ଅଜୟ କୁମାର ବେଜ, ସୁଶାନ୍ତ ସେନାପତି, ସୌମ୍ୟପ୍ରକାଶ ମଣ୍ଡଳଙ୍କ ସମେତ ପୂଜା କମିଟିର ସମସ୍ତ ସଦସ୍ୟ ଉପସ୍ଥିତ ଥିଲେ।ମାଟି ଅନୁକୂଳ ସହିତ ଢେଙ୍କିକୋଟରେ ଚଳିତ ବର୍ଷର ମହାଲକ୍ଷ୍ମୀ ପୂଜା ପାଇଁ ଆନୁଷ୍ଠାନିକ ଭାବେ ପ୍ରସ୍ତୁତି ଆରମ୍ଭ ହୋଇଛି। ପାରମ୍ପରିକ ରୀତିନୀତି ଓ ଭକ୍ତିମୟ ପରିବେଶରେ ଆୟୋଜିତ ଏହି ମାଟି ଅନୁକୂଳ କାର୍ଯ୍ୟରେ ସ୍ଥାନୀୟ ଶ୍ରଦ୍ଧାଳୁଙ୍କ ମଧ୍ୟରେ ଉତ୍ସାହ ଦେଖାଯାଇଥିଲା।

ପିପିଳିଆ ଉଚ୍ଚ ମାଧ୍ୟମିକ ବିଦ୍ୟାଳୟରେ ମାଗଣା ସ୍ୱାସ୍ଥ୍ୟ ଶିବିର

କେନ୍ଦୁଝର/ଢେଙ୍କିକୋଟ, ୨୫/୯: ଘଟଗାଁ ବ୍ଲକ ଅନ୍ତର୍ଗତ ପିପିଳିଆସ୍ଥିତ ଲକ୍ଷ୍ମୀ ନାରାୟଣ ଉଚ୍ଚ ମାଧ୍ୟମିକ ବିଦ୍ୟାଳୟରେ ଏନ୍‌ଏସ୍‌ଏସ୍‌ ଓ ଯୁବ ରେଡକ୍ରସ୍‌ ସହାୟତାରେ ଏକ ଦିବସୀୟ ମାଗଣା ସ୍ୱାସ୍ଥ୍ୟ ଶିବିର ଆୟୋଜିତ ହୋଇଛି।ବିଦ୍ୟାଳୟର ଅଧ୍ୟକ୍ଷ ନିରାକାର ସ୍ୱାଇଁଙ୍କ ତତ୍ତ୍ୱାବଧାନରେ ଆୟୋଜିତ ଏହି ଶିବିରରେ ପ୍ରାଧ୍ୟାପକ ସତ୍ୟାନନ୍ଦ ପଣ୍ଡା, ଯତୀନ୍ଦ୍ର କୁମାର ସାହୁ, ଚନ୍ଦ୍ରଶେଖର ଭୁଁୟା, ରତ୍ନାକର ମହାନ୍ତ, ସମୀର ସାହୁ, ଘନଶ୍ୟାମ ମହାନ୍ତ, ବତନ୍ମୟ ବଳ, ପ୍ରାଧ୍ୟାପିକା ଅନୁସ୍ମିତା ପାଣିଗ୍ରାହୀ, ରଶ୍ମିତା ପୃଷ୍ଟି ଓ କାଞ୍ଚନ ଲତା ସାହୁଙ୍କ ସମେତ ଅଣଶିକ୍ଷକ କର୍ମଚାରୀ ନନ୍ଦଲାଲ ମହାନ୍ତ, ଜଗମୋହନ ମହାନ୍ତ, ମୁରଲୀ ନାୟକ, ପ୍ରଫୁଲ୍ଲ ମହାନ୍ତ ଓ ଦାମୋଦର ସିଂ ଉପସ୍ଥିତ ରହି କାର୍ଯ୍ୟକ୍ରମରେ ସହଯୋଗ କରିଥିଲେ।ଘଟଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଡାକ୍ତର ରାଜମୋହନ ମହାନ୍ତି ଓ ତାଙ୍କ ସହଯୋଗୀମାନେ ଶିବିରରେ ଉପସ୍ଥିତ ରହି ବିଦ୍ୟାଳୟର ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟ ପରୀକ୍ଷା କରିଥିଲେ। ଆବଶ୍ୟକତା ଅନୁଯାୟୀ ଛାତ୍ରଛାତ୍ରୀଙ୍କୁ ଔଷଧ ମଧ୍ୟ ପ୍ରଦାନ କରାଯାଇଥିଲା।ଜାତୀୟ ସେବା ଯୋଜନାର କାର୍ଯ୍ୟକ୍ରମ ଅଧିକାରୀ ଅଲେଖ ପ୍ରସାଦ ସାହୁ ଓ ଯୁବ ରେଡକ୍ରସ୍‌ ପରାମର୍ଶଦାତା ହେମନ୍ତ ମିଶ୍ର ସ୍ୱେଚ୍ଛାସେବୀମାନଙ୍କ ସହାୟତାରେ ଶିବିରକୁ ଆସିଥିବା ଛାତ୍ରଛାତ୍ରୀଙ୍କ ନାମ ପଞ୍ଜିକରଣ କରିଥିଲେ।ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟ ପ୍ରତି ସଚେତନତା ବୃଦ୍ଧି ଓ ସମୟୋଚିତ ସ୍ୱାସ୍ଥ୍ୟ ପରୀକ୍ଷା ଉଦ୍ଦେଶ୍ୟରେ ଆୟୋଜିତ ଏହି ମାଗଣା ସ୍ୱାସ୍ଥ୍ୟ ଶିବିରରେ ବିଦ୍ୟାଳୟ ପକ୍ଷରୁ ଆବଶ୍ୟକ ସହଯୋଗ ପ୍ରଦାନ କରାଯାଇଥିଲା। ଶେଷରେ ବିଦ୍ୟାଳୟର ଅଧ୍ୟକ୍ଷ ନିରାକାର ସ୍ୱାଇଁ ଉପସ୍ଥିତ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।

ପିପିଳିଆ ଲକ୍ଷ୍ମୀ ନାରାୟଣ ଉଚ୍ଚ ମାଧ୍ୟମିକ ବିଦ୍ୟାଳୟରେ ଜାତୀୟ ସେବା ଯୋଜନା ଦିବସ ପାଳିତ

କେନ୍ଦୁଝର/ଢେଙ୍କିକୋଟ, ୨୪/୯: ଘଟଗାଁ ବ୍ଲକ ଅନ୍ତର୍ଗତ ପିପିଳିଆସ୍ଥିତ ଲକ୍ଷ୍ମୀ ନାରାୟଣ ଉଚ୍ଚ ମାଧ୍ୟମିକ ବିଦ୍ୟାଳୟରେ ଅଧ୍ୟକ୍ଷ ନିରାକାର ସ୍ୱାଇଁଙ୍କ ସଭାପତିତ୍ୱରେ ଜାତୀୟ ସେବା ଯୋଜନା (NSS) ଦିବସ ପାଳିତ ହୋଇଯାଇଛି।କାର୍ଯ୍ୟକ୍ରମର ପ୍ରାରମ୍ଭରେ ଏନ୍‌ଏସ୍‌ଏସ୍‌ ସଙ୍ଗୀତ ପରିବେଷଣ କରାଯାଇଥିଲା। ଏହି ଅବସରରେ ଅଧ୍ୟକ୍ଷ ନିରାକାର ସ୍ୱାଇଁ ଛାତ୍ରଛାତ୍ରୀମାନଙ୍କୁ ସମାଜ ପାଇଁ ସେବାମୂଳକ କାର୍ଯ୍ୟ କରିବାକୁ ପ୍ରେରଣା ଦେଇଥିଲେ।ଏନ୍‌ଏସ୍‌ଏସ୍‌ର କାର୍ଯ୍ୟକ୍ରମ ଅଧିକାରୀ ଅଲେଖ ପ୍ରସାଦ ସାହୁ ଉପସ୍ଥିତ ଅତିଥିମାନଙ୍କୁ ସ୍ୱାଗତ କରିଥିଲେ। ପୂର୍ବତନ କାର୍ଯ୍ୟକ୍ରମ ଅଧିକାରୀ ତଥା ଅଧ୍ୟାପକ ଯତୀନ୍ଦ୍ର ସାହୁ, ହେମନ୍ତ କୁମାର ମିଶ୍ର, ସମୀର ସାହୁ, ପ୍ରାଧ୍ୟାପିକା ଅନୁସ୍ମିତା ପାଣିଗ୍ରାହୀ ଓ ରଶ୍ମୀତା ପୃଷ୍ଟି ପ୍ରମୁଖ ଯୋଗଦେଇ ଏନ୍‌ଏସ୍‌ଏସ୍‌ ସମ୍ପର୍କରେ ବିଭିନ୍ନ ଉପାଦେୟ କଥା କହିଥିଲେ।ଏହି ଅବସରରେ ସ୍ୱେଚ୍ଛାସେବୀ ଛାତ୍ରଛାତ୍ରୀମାନଙ୍କ ଦ୍ୱାରା ନୃତ୍ୟ ପରିବେଷଣ କରାଯାଇ କାର୍ଯ୍ୟକ୍ରମକୁ ମନୋରମ କରାଯାଇଥିଲା। ଶେଷରେ ଏନ୍‌ଏସ୍‌ଏସ୍‌ କାର୍ଯ୍ୟକ୍ରମ ଅଧିକାରୀ ଅଲେଖ ପ୍ରସାଦ ସାହୁ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।

ଜିଲ୍ଲା ସ୍ତରୀୟ ତର୍କ ପ୍ରତିଯୋଗିତାରେ ଓଡ଼ିଶା ଆଦର୍ଶ ବିଦ୍ୟାଳୟର ଛାତ୍ର ବୋଧିପ୍ରିୟ ପ୍ରଥମ

କେନ୍ଦୁଝର/ଢେଙ୍କିକୋଟ: ୨୪/୯ଜିଲ୍ଲା ସ୍ତରୀୟ ସେବା ସଂକଳ୍ପ ଅଭିଯାନ-୨୦୨୬ କାର୍ଯ୍ୟକ୍ରମ ଅବସରରେ କେନ୍ଦୁଝରରେ ଆୟୋଜିତ ତର୍କ ପ୍ରତିଯୋଗିତାରେ ଓଡ଼ିଶା ଆଦର୍ଶ ବିଦ୍ୟାଳୟ, ଟିକିରା, ଢେଙ୍କିକୋଟର ଷଷ୍ଠ ଶ୍ରେଣୀ ଛାତ୍ର ବୋଧିପ୍ରିୟ ବିଶ୍ୱମୋହନ ନାୟକ ପ୍ରଥମ ସ୍ଥାନ ହାସଲ କରିଛନ୍ତି।ସେବା ସଂକଳ୍ପ ଅଭିଯାନ ମାଧ୍ୟମରେ ବିକଶିତ ଓଡ଼ିଶା ଓ ବିକଶିତ ଭାରତର ଲକ୍ଷ୍ୟ ହାସଲ ସମ୍ପର୍କିତ ବିଷୟକୁ ନେଇ ଏହି ତର୍କ ପ୍ରତିଯୋଗିତା ଆୟୋଜିତ ହୋଇଥିଲା।ବୋଧିପ୍ରିୟ ପୂର୍ବରୁ ବ୍ଲକ ସ୍ତରୀୟ ତର୍କ ପ୍ରତିଯୋଗିତାରେ ମଧ୍ୟ ପ୍ରଥମ ସ୍ଥାନ ହାସଲ କରି ଜିଲ୍ଲା ସ୍ତରକୁ ମନୋନୀତ ହୋଇଥିଲେ। ଜିଲ୍ଲା ସ୍ତରରେ ମଧ୍ୟ ନିଜର ପ୍ରତିଭା ପ୍ରଦର୍ଶନ କରି ପ୍ରଥମ ସ୍ଥାନ ହାସଲ କରିଛନ୍ତି।ଜିଲ୍ଲା ସ୍ତରୀୟ ସେବା ସଂକଳ୍ପ ଅଭିଯାନ କାର୍ଯ୍ୟକ୍ରମରେ କେନ୍ଦୁଝର ସାଂସଦ ଅନନ୍ତ ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଜିଲ୍ଲା ଶିକ୍ଷାଧିକାରୀ ପୂର୍ଣ୍ଣଚନ୍ଦ୍ର ବରିହାଙ୍କ ଉପସ୍ଥିତିରେ ବୋଧିପ୍ରିୟଙ୍କୁ ପୁରସ୍କୃତ କରିଥିଲେ।ଜିଲ୍ଲା ସ୍ତରରେ ପ୍ରଥମ ସ୍ଥାନ ହାସଲ କରିଥିବା ବୋଧିପ୍ରିୟ ଆଗାମୀ ସେପ୍ଟେମ୍ବର ୨୮ ତାରିଖରେ ରାଜ୍ୟ ସ୍ତରୀୟ ତର୍କ ପ୍ରତିଯୋଗିତାରେ ଅଂଶଗ୍ରହଣ କରିବେ।ଉଲ୍ଲେଖଯୋଗ୍ୟ, ପୁରସ୍କୃତ ବୋଧିପ୍ରିୟ ବିଶ୍ୱମୋହନ ନାୟକ ରାଜ୍ୟର ଜଣେ ପ୍ରତିଷ୍ଠିତ ଯୁବ କବି ତଥା ଘଟଗାଁ ଏବିଡିଓ ଚିତ୍ତରଞ୍ଜନ ନାୟକଙ୍କ ପୁତ୍ର ଅଟନ୍ତି।

ଢେଙ୍କିକୋଟ ଶକ୍ତିକେନ୍ଦ୍ର ବୈଠକରେ ସାଂସଦ ଅନନ୍ତ ନାୟକ

କେନ୍ଦୁଝର/ଢେଙ୍କିକୋଟ, ୨୩/୯: ଢେଙ୍କିକୋଟ ଶକ୍ତିକେନ୍ଦ୍ରର ଏକ ଜରୁରୀକାଳୀନ ବୈଠକ ସ୍ଥାନୀୟ ଡାକବଙ୍ଗଳା ପରିସରରେ ଅନୁଷ୍ଠିତ ହୋଇଯାଇଛି। ବୈଠକରେ କେନ୍ଦୁଝର ସାଂସଦ ଅନନ୍ତ ନାୟକ ଉପସ୍ଥିତ ରହି ଆଗାମୀ ଏକ ମାସ ଧରି ହେବାକୁ ଥିବା ସେବା ସଙ୍କଳ୍ପ ଅଭିଯାନକୁ ସଫଳ କରିବା ନେଇ କର୍ମକର୍ତ୍ତା ଓ କର୍ମୀମାନଙ୍କୁ ମାର୍ଗଦର୍ଶନ ଦେଇଥିଲେ। ଓଡ଼ିଶାରେ ଏହି ଅଭିଯାନ ସେପ୍ଟେମ୍ବର ୧୭ରୁ ଅକ୍ଟୋବର ୧୭ ପର୍ଯ୍ୟନ୍ତ ଚାଲିବା ନେଇ ରିପୋର୍ଟ ପ୍ରକାଶ ପାଇଛି।ବୈଠକରେ ମଣ୍ଡଳ ସଭାପତି ରଞ୍ଜିତ କୁମାର ନାୟକ, ସାଂସଦ ପ୍ରତିନିଧି ଅଖିଳ ପାତ୍ର, ଶକ୍ତିକେନ୍ଦ୍ର ପ୍ରମୁଖ ଗତିକୃଷ୍ଣ ଦଳେଇ, କୃଷ୍ଣଚନ୍ଦ୍ର ବାରିକ, ଏସ୍‌.କେ. ଜାବେର, ରାମଚନ୍ଦ୍ର ସାହୁ, ସୌମ୍ୟପ୍ରକାଶ ମଣ୍ଡଳ, ନିର୍ମଳ ନାଏକଙ୍କ ସମେତ ବହୁ କର୍ମକର୍ତ୍ତା ଓ କର୍ମୀ ଉପସ୍ଥିତ ଥିଲେ।ବୈଠକ ଶେଷରେ ଡାକବଙ୍ଗଳା ପରିସରରେ ସାଂସଦ ଅନନ୍ତ ନାୟକ ଏକ ଅଁଳା ଚାରା ରୋପଣ କରିଥିଲେ। ଏଥିସହ ଦଳର ସମସ୍ତ କର୍ମୀଙ୍କୁ ‘ମା’ ପାଇଁ ଗଛଟିଏ’ ଅଭିଯାନରେ ସାମିଲ ହୋଇ ଚାରାରୋପଣ କରିବାକୁ ଆହ୍ୱାନ ଦିଆଯାଇଥିଲା।

୫ ମୂଲ୍ୟବାନ ବ୍ୟବସାୟିକ ସହଯୋଗୀଙ୍କୁ ସମ୍ବର୍ଦ୍ଧିତ କଲା ବ୍ୟାଙ୍କ ଅଫ ଇଣ୍ଡିଆ

କେନ୍ଦୁଝର/ଢେଙ୍କିକୋଟ୧୯/୯: କେନ୍ଦୁଝର ଜିଲ୍ଲାର ଢେଙ୍କିକୋଟସ୍ଥିତ ବ୍ୟାଙ୍କ ଅଫ ଇଣ୍ଡିଆ ଶାଖା ପକ୍ଷରୁ ୨୦୨୫-୨୬ ଆର୍ଥିକ ବର୍ଷରେ ବ୍ୟାଙ୍କର ଅଗ୍ରଣୀ ଓ ମୂଲ୍ୟବାନ ବ୍ୟବସାୟିକ ସହଯୋଗୀ ଭାବେ ୫ ଜଣଙ୍କୁ ସମ୍ବର୍ଦ୍ଧିତ କରାଯାଇଛି।ବ୍ୟାଙ୍କ ଅଫ ଇଣ୍ଡିଆର ୧୨୧ତମ ପ୍ରତିଷ୍ଠା ଦିବସ ଅବସରରେ ଢେଙ୍କିକୋଟ ଶାଖାରେ ଏହି ସମ୍ବର୍ଦ୍ଧନା କାର୍ଯ୍ୟକ୍ରମ ଆୟୋଜିତ ହୋଇଥିଲା। ଶାଖା ପରିଚାଳିକା ଶ୍ରଦ୍ଧାଞ୍ଜଳୀ ପ୍ରଧାନ ଓ ସହପରିଚାଳକ ସନ୍ଦୀପ କୁମାର ମହାନ୍ତିଙ୍କ ସମେତ ବ୍ୟାଙ୍କ କର୍ମଚାରୀଙ୍କ ଉପସ୍ଥିତିରେ ଚୟନିତ ବ୍ୟବସାୟିକ ସହଯୋଗୀମାନଙ୍କୁ ସ୍ମୃତି ଫଳକ ପ୍ରଦାନ କରି ସମ୍ମାନିତ କରାଯାଇଥିଲା।

ସମ୍ମାନିତ ହୋଇଥିବା ବ୍ୟକ୍ତିମାନେ ହେଲେ ପ୍ରଫେସର ଯୁଗଳ କିଶୋର ଦାଶ, ନବକିଶୋର ସାହୁ, ସଞ୍ଜୁଲତା ବାରିକ, ମହେଶ୍ୱର ସାହୁ ଓ ଦିଗାମ୍ବର ନାୟକ। ବ୍ୟାଙ୍କର ବ୍ୟବସାୟିକ ବିକାଶ ଓ ଗ୍ରାହକ ସେବା କ୍ଷେତ୍ରରେ ସହଯୋଗ ପାଇଁ ସେମାନଙ୍କୁ ଏହି ସମ୍ମାନ ପ୍ରଦାନ କରାଯାଇଛି।

ପନିକିରେ ହାଣି ଯୁବକଙ୍କ ହତ୍ୟା: ୩୩ ମାସ ପରେ ଭୂବନରୁ ଅଭିଯୁକ୍ତ ଗିରଫ

କେନ୍ଦୁଝର/ଢେଙ୍କିକୋଟ, ୧୮/୯: କେନ୍ଦୁଝର ଜିଲ୍ଲା ଘଟଗାଁ ଥାନା ଅଞ୍ଚଳରେ ୨୦୨୩ ମସିହାରେ ଘଟିଥିବା ଯୁବକ ହତ୍ୟା ଘଟଣାରେ ପ୍ରାୟ ୩୩ ମାସ ପରେ ଜଣେ ଅଭିଯୁକ୍ତଙ୍କୁ ଢେଙ୍କାନାଳ ଜିଲ୍ଲା ଭୂବନରୁ ପୁଲିସ ଗିରଫ କରିଛି। ଗିରଫ ଅଭିଯୁକ୍ତ ହେଲେ ଭୂବନ ଅଞ୍ଚଳର ବିରେନ୍ଦ୍ର ସାହୁ (୩୭)।

ପୁଲିସ ସୂଚନା ଅନୁଯାୟୀ, ୨୦୨୩ ଡିସେମ୍ବର ୬ ତାରିଖ ରାତିରେ ଘଟଗାଁ ଥାନା ଅଧୀନ ଢେଙ୍କିକୋଟ ପୁଲିସ ବିଟ୍ ଅଞ୍ଚଳର ପାତ୍ର ସାହିରେ ଖଣ୍ଟଘର ଗ୍ରାମର ଭାରତ ଭୂଷଣ ନାୟକ ଓରଫ ଛବି (୨୮)ଙ୍କୁ ପନିକିରେ ଆକ୍ରମଣ କରି ହତ୍ୟା କରାଯାଇଥିଲା।ଘଟଣା ସମୟରେ ଭାରତ ଭୂଷଣ ଜଣେ ମହିଳାଙ୍କ ଘରେ ଶୋଇଥିବା ବେଳେ ତାଙ୍କୁ ହତ୍ୟା କରାଯାଇଥିବା ପୁଲିସ ପକ୍ଷରୁ କୁହାଯାଇଛି। ହତ୍ୟା ପରେ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିଲେ।

ଏନେଇ ଘଟଗାଁ ଥାନାରେ ହତ୍ୟା ମାମଲା ନମ୍ବର ୨୮୨/୨୦୨୩ ରୁଜୁ ହୋଇଥିଲା। ଘଟଣା ସହ ଜଡ଼ିତ ଜଣେ ମହିଳାଙ୍କୁ ପୁଲିସ ପୂର୍ବରୁ ଗିରଫ କରିଥିଲା। ସେ ବର୍ତ୍ତମାନ ଜାମିନରେ ଥିବା ଜଣାପଡ଼ିଛି।ମାମଲାର ତଦନ୍ତ ତତ୍କାଳୀନ ଥାନା ଅଧିକାରୀ ଅଞ୍ଜନ କୁମାର ପାତ୍ର କରିଥିଲେ। ତେବେ ଘଟଣା ପରଠାରୁ ଅଭିଯୁକ୍ତ ବିରେନ୍ଦ୍ର ସାହୁ ଫେରାର ଥିବାରୁ ତାଙ୍କୁ ଗିରଫ କରାଯାଇପାରିନଥିଲା।ବର୍ତ୍ତମାନ ଘଟଗାଁ ଥାନା ଅଧିକାରୀ ଶୁଭ୍ରାନ୍ତ କୁମାର ଜେନା ମାମଲାକୁ ଗୁରୁତ୍ୱ ଦେଇ ଅଭିଯୁକ୍ତଙ୍କୁ ଧରିବା ପାଇଁ ତଦନ୍ତକୁ ଜୋରଦାର କରିଥିଲେ। ଶେଷରେ ପୁଲିସ ଟିମ୍ ଢେଙ୍କାନାଳ ଜିଲ୍ଲା ଭୂବନରେ ଚଢ଼ଉ କରି ବିରେନ୍ଦ୍ର ସାହୁଙ୍କୁ ଗିରଫ କରିଥିବା ଜଣାପଡ଼ିଛି।ଅଭିଯୁକ୍ତଙ୍କୁ ଧରିବା ଓ ତଦନ୍ତ ପ୍ରକ୍ରିୟାରେ ଏସ୍‌ଆଇ ଗାଙ୍ଗିଆ ଲାକ୍ରା, ପ୍ରଶାନ୍ତ ବେହେରାଙ୍କ ସମେତ ପୁଲିସ କର୍ମଚାରୀମାନେ ସହଯୋଗ କରିଥିଲେ। ମାମଲାର ତଦନ୍ତକୁ ଗୁରୁତ୍ୱ ସହ ନିଆଯାଇଥିବା ନେଇ ଥାନା ଅଧିକାରୀ ଶୁଭ୍ରାନ୍ତ କୁମାର ଜେନା ସୂଚନା ଦେଇଛନ୍ତି।

ଢେଙ୍କିକୋଟ ଶିବ ମନ୍ଦିରରେ ସାଂସଦଙ୍କ ଦୀପ ଦାନ, ପ୍ରଧାନମନ୍ତ୍ରୀଙ୍କ ଦୀର୍ଘ ଓ ନିରାମୟ ଜୀବନ କାମନା

କେନ୍ଦୁଝର/ଢେଙ୍କିକୋଟ, ୧୭/୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୭୬ତମ ଜନ୍ମଦିନ ଅବସରରେ ଢେଙ୍କିକୋଟ ଶିବ ମନ୍ଦିର ପ୍ରାଙ୍ଗଣରେ ଦୀପ ପ୍ରଜ୍ଜ୍ୱଳନ କାର୍ଯ୍ୟକ୍ରମ ଆୟୋଜିତ ହୋଇଛି। ଏହି କାର୍ଯ୍ୟକ୍ରମରେ କେନ୍ଦୁଝର ସାଂସଦ ଅନନ୍ତ ନାୟକ ଉପସ୍ଥିତ ରହି ଦୀପ ପ୍ରଜ୍ଜ୍ୱଳନ କରିଥିଲେ।ଢେଙ୍କିକୋଟ ମଣ୍ଡଳ ସଭାପତି ରଣଜିତ ନାୟକଙ୍କ ନେତୃତ୍ୱରେ ଆୟୋଜିତ ଏହି ଦୀପ ଦାନ କାର୍ଯ୍ୟକ୍ରମରେ ସାଂସଦ ପ୍ରତିନିଧି ଅଖିଳ ଚନ୍ଦ୍ର ପାତ୍ର, ରାମଚନ୍ଦ୍ର ସାହୁ, ବାବୁଲା ସାହୁ, ସୌମ୍ୟରଞ୍ଜନ ମଣ୍ଡଳ, ଅର୍ଜୁନ ଚରଣ ବାରିକ, କୃଷ୍ଣ ଚନ୍ଦ୍ର ବାରିକଙ୍କ ସମେତ ବହୁ କାର୍ଯ୍ୟକର୍ତ୍ତା ଯୋଗଦେଇଥିଲେ।ଏହି ଅବସରରେ ଶିବ ମନ୍ଦିର ପ୍ରାଙ୍ଗଣରେ ଦୀପ ପ୍ରଜ୍ଜ୍ୱଳନ କରାଯାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୀର୍ଘ ଓ ନିରାମୟ ଜୀବନ କାମନା କରି ପ୍ରାର୍ଥନା କରାଯାଇଥିଲା। ସାଂସଦ ଅନନ୍ତ ନାୟକଙ୍କ ସମେତ ଉପସ୍ଥିତ କାର୍ଯ୍ୟକର୍ତ୍ତାମାନେ ଦେଶର ମଙ୍ଗଳ ଓ ପ୍ରଧାନମନ୍ତ୍ରୀଙ୍କ ସୁସ୍ଥ ଜୀବନ ପାଇଁ ପ୍ରାର୍ଥନା କରିଥିଲେ ।