ଘଟଗାଁ: ୮/୯: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ପିପିଳିଆ ଗ୍ରାମପଞ୍ଚାୟତ ଅନ୍ତର୍ଗତ ଅସନବଣି ଗ୍ରାମରେ ସଫଳ ବର୍ଷା ଜଳ ପରିଚାଳନା ପ୍ରକଳ୍ପକୁ ଅନୁଧ୍ୟାନ କରିଛନ୍ତି କର୍ଣ୍ଣାଟକର ବାନ୍ଦିପୁର ଅଞ୍ଚଳର ପଞ୍ଚାୟତିରାଜ ପ୍ରତିନିଧି ଓ ସରକାରୀ ଅଧିକାରୀଙ୍କ ଏକ ପ୍ରତିନିଧି ଦଳ।ମଙ୍ଗଳବାର ପୂର୍ବାହ୍ନରେ ପ୍ରତିନିଧି ଦଳ ଅସନବଣି ଗ୍ରାମରେ ପହଞ୍ଚି ଆଦର୍ଶ ବର୍ଷା ଜଳ ପରିଚାଳନା ପ୍ରକଳ୍ପର ବିଭିନ୍ନ କାର୍ଯ୍ୟ ବୁଲି ଦେଖିଥିଲେ। ପ୍ରକଳ୍ପର ସବିଶେଷ ତଥ୍ୟ ନେବା ସହ ଜଙ୍ଗଲ ଓ ପାହାଡ଼ ମଧ୍ୟରେ ପ୍ରାୟ ୪ କିଲୋମିଟର ପାଦରେ ଚାଲି ପ୍ରକଳ୍ପର ସଫଳତା ଓ କାର୍ଯ୍ୟପ୍ରଣାଳୀ ଅନୁଧ୍ୟାନ କରିଥିଲେ।ସୂଚନା ଅନୁଯାୟୀ, କର୍ଣ୍ଣାଟକ ସରକାର ରାଜ୍ୟର ଜଳକ୍ଳିଷ୍ଟ ଓ ମରୁଡ଼ି ପ୍ରବଣ ଅଞ୍ଚଳରେ ବର୍ଷା ଜଳ ପରିଚାଳନା ପ୍ରକଳ୍ପକୁ ଅଗ୍ରାଧିକାର ଦେଇ କାର୍ଯ୍ୟକାରୀ କରୁଛନ୍ତି। ଏହି ପରିପ୍ରେକ୍ଷୀରେ ଅସନବଣି ଗ୍ରାମର ସଫଳ ବର୍ଷା ଜଳ ପରିଚାଳନା ପ୍ରକଳ୍ପକୁ ଏକ ଆଦର୍ଶ ମଡେଲ ଭାବେ ଅଧ୍ୟୟନ କରାଯାଉଛି।ପ୍ରାୟ ୧୪ ବର୍ଷ ପୂର୍ବେ କେନ୍ଦୁଝର ଜିଲ୍ଲା ପ୍ରଶାସନ, ଘଟଗାଁ ବ୍ଲକ ପ୍ରଶାସନ ଓ ସ୍ବେଚ୍ଛାସେବୀ ସଂଗଠନ ୱସ୍କାର ମିଳିତ ସହଭାଗିତାରେ ଅସନବଣି ଗ୍ରାମରେ ଏହି ପ୍ରକଳ୍ପ ଆରମ୍ଭ ହୋଇଥିଲା। ସେତେବେଳେ ଗ୍ରାମରେ ଜଳର ଉତ୍କଟ ଅଭାବ ଦେଖାଦେଉଥିଲା। ବର୍ଷର ଅଧା ସମୟ ଅଞ୍ଚଳ ଶୁଷ୍କ ରହୁଥିବାରୁ କୃଷି କାର୍ଯ୍ୟ ମଧ୍ୟ ପ୍ରଭାବିତ ହେଉଥିଲା।ପାହାଡ଼ରୁ ତଳକୁ ବୋହିଯାଉଥିବା ବର୍ଷା ଜଳକୁ ଛୋଟ ଛୋଟ ଆଡ଼ିବନ୍ଧ ମାଧ୍ୟମରେ ରୋକିବା ଆରମ୍ଭ କରାଯାଇଥିଲା। ପରବର୍ତ୍ତୀ ସମୟରେ ପାହାଡ଼ର ବିସ୍ତୃତି ଅନୁଯାୟୀ ପ୍ରାୟ ୪ କିଲୋମିଟର ଅଞ୍ଚଳରେ ବିଭିନ୍ନ ଜଳ ସଂରକ୍ଷଣ ବ୍ୟବସ୍ଥା କରାଯାଇଥିଲା।ପ୍ରକଳ୍ପ ଆରମ୍ଭ ସମୟରେ ଅନେକ ଲୋକ ଏହାକୁ ନେଇ ସନ୍ଦେହ ପ୍ରକାଶ କରିଥିଲେ। ତେବେ ମାତ୍ର ଦୁଇ ବର୍ଷ ମଧ୍ୟରେ ଏହାର ସଫଳ ପରିଣାମ ଦେଖାଦେଇଥିଲା। ଭୂତଳ ଜଳସ୍ତର ବୃଦ୍ଧି ପାଇବା ସହ କୂଅରେ ପାଣି ରହିବା ଆରମ୍ଭ ହୋଇଥିଲା। ଚାଷଜମି ସବୁଜିମାରେ ଭରିଯିବା ସହ ଗ୍ରାମର କୃଷି କାର୍ଯ୍ୟରେ ମଧ୍ୟ ଉନ୍ନତି ଆସିଥିଲା।ଅସନବଣିର ସଫଳତା ପରେ କେନ୍ଦୁଝର ଜିଲ୍ଲାର ଅନ୍ୟାନ୍ୟ ବ୍ଲକରେ ମଧ୍ୟ ଏହି ପ୍ରକଳ୍ପକୁ ଆଦର୍ଶ ଭାବେ ଗ୍ରହଣ କରାଯାଇ ବିଭିନ୍ନ ଅଞ୍ଚଳରେ ଜଳ ସଂରକ୍ଷଣ କାର୍ଯ୍ୟ କରାଯାଇଛି। ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ପଦସ୍ଥ ଅଧିକାରୀ ଓ ପଞ୍ଚାୟତିରାଜ ପ୍ରତିନିଧି ଅସନବଣି ଗସ୍ତ କରି ଏହି ପ୍ରକଳ୍ପର ସଫଳତାକୁ ପ୍ରଶଂସା କରିଛନ୍ତି।ବର୍ତ୍ତମାନ କର୍ଣ୍ଣାଟକର ବାନ୍ଦିପୁର ଅଞ୍ଚଳ ମରୁଡ଼ି ପ୍ରବଣ ହୋଇଥିବାରୁ ଅସନବଣିର ବର୍ଷା ଜଳ ପରିଚାଳନା ମଡେଲକୁ ସେଠାରେ ଅନୁସରଣ କରିବା ପାଇଁ ପ୍ରକଳ୍ପର ବିଭିନ୍ନ କାର୍ଯ୍ୟ ଓ ସଫଳତା ସମ୍ପର୍କିତ ତଥ୍ୟ ଅଧ୍ୟୟନ କରାଯାଉଛି।ଏହି ଅବସରରେ ସ୍ବେଚ୍ଛାସେବୀ ସଂଗଠନ ୱସ୍କା ପକ୍ଷରୁ ଶିଶିର ସିଂ ସାମନ୍ତ, ବ୍ଲକ ପ୍ରଶାସନ ପକ୍ଷରୁ ଏବିଡିଓ ଚିତ୍ତରଞ୍ଜନ ନାୟକ ଓ ଭାରପ୍ରାପ୍ତ ସହକାରୀ ନିର୍ବାହୀ ଯନ୍ତ୍ରୀ ସୁପାୟ କିସ୍କୁ ପ୍ରମୁଖ ଉପସ୍ଥିତ ରହି କର୍ଣ୍ଣାଟକ ପ୍ରତିନିଧି ଦଳକୁ ପ୍ରକଳ୍ପ ସମ୍ପର୍କରେ ସବିଶେଷ ତଥ୍ୟ ଓ ଆବଶ୍ୟକ ସହାୟତା ପ୍ରଦାନ କରିଥିଲେ।
