ପାଟଣା ବନାଞ୍ଚଳ ସ୍ତରୀୟ ସମୀକ୍ଷା ବୈଠକ: ବନ ପରିଚାଳନା ଓ ମଣିଷ–ହାତୀ ସଂଘର୍ଷ ଉପରେ ଗୁରୁତ୍ୱ

ପାଟଣା,୧୨/୯, ପାଟଣା ବନାଞ୍ଚଳ କାର୍ଯ୍ୟାଳୟ ପରିସରରେ ବନାଞ୍ଚଳ ଅଧିକାରୀ ଆର୍ତ୍ତତ୍ରାଣ ମିର୍ଦ୍ଧାଙ୍କ ଅଧ୍ୟକ୍ଷତାରେ ବନାଞ୍ଚଳ ସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଛି।ବୈଠକରେ ବନ ପରିଚାଳନା ସମ୍ପର୍କିତ ବିଭିନ୍ନ ବିଷୟ ଉପରେ ବିସ୍ତୃତ ସମୀକ୍ଷା କରାଯାଇଥିଲା। ବିଦ୍ୟୁତ ପ୍ରହରୀ କାର୍ଯ୍ୟକ୍ରମ, ବିଦ୍ୟୁତ ସୁରକ୍ଷା ନିରୀକ୍ଷଣ, ପ୍ରଥମ ବର୍ଷର ଚାରାରୋପଣର ଜୀବନ୍ତତା ହାର, ବାଉଁଶ, ପଶୁଖାଦ୍ୟ ଓ ଫଳଜାତୀୟ ଚାରାରୋପଣ ସହ ଚାରା ବଣ୍ଟନ ନେଇ ଆଲୋଚନା ହୋଇଥିଲା।ସେହିପରି ସୌର ଆଲୋକ ବ୍ୟବସ୍ଥା, ଭିଏସଏସ୍‌  ରିଭଲଭିଂ ଫଣ୍ଡ ଋଣ ପରିଶୋଧ, ମଣିଷ–ହାତୀ ସଂଘର୍ଷ ରୋକିବା ଓ ନିରାକରଣ ପାଇଁ ନିଆଯାଉଥିବା ପଦକ୍ଷେପ ଏବଂ ଅନୁକମ୍ପା ସର୍ଭେ ଅନୁମୋଦନ ସମ୍ପର୍କିତ ବିଷୟ ଉପରେ ମଧ୍ୟ ସମୀକ୍ଷା କରାଯାଇଥିଲା।ବୈଠକରେ ପାଟଣା ବନାଞ୍ଚଳର ସମସ୍ତ ଫରେଷ୍ଟର, ଫରେଷ୍ଟ ଗାର୍ଡ, ପାରା କର୍ମଚାରୀ ଏବଂ ସ୍ୱେଚ୍ଛାସେବୀ ଦଳର ସଦସ୍ୟମାନେ ଉପସ୍ଥିତ ଥିଲେ। ବନପାଳ ନିରଞ୍ଜନ ସେଠୀ ସଭାକାର୍ଯ୍ୟ ପରିଚାଳନା କରିଥିଲେ।

ସଭା କାର୍ଯ୍ୟ ପରେ ସାହାରପଡା ସେକ୍ସନର ଗୁରୁଚରଣ ମହାନ୍ତଙ୍କୁ ନୟାଜଗନ୍ନାଥପୁରରେ ବନୀକରଣର ରକ୍ଷଣାବେକ୍ଷଣ କାର୍ଯ୍ୟ ପାଇଁ ବନଖଣ୍ଡ ଅଧିକାରୀଙ୍କ ପକ୍ଷରୁ ପ୍ରଦାନ କରାଯାଇଥିବା ମାନପତ୍ର ଓ ପୁରସ୍କାର ରାଶି ଏହି ଅବସରରେ ପ୍ରଦାନ କରାଯାଇଥିଲା।

ରାତି ପେଟ୍ରୋଲିଂ ବେଳେ ବୋଲେରୋ ଜବତ, ଛେଳି ଚୋରିରେ ବ୍ୟବହୃତ ସାମଗ୍ରୀ ମିଳିଲା

ପାଟଣା: ୧୧/୯: ଗତରାତି ପାଟଣା ବନ ବିଭାଗ ପକ୍ଷରୁ ରାତ୍ରି ପେଟ୍ରୋଲିଂ ସମୟରେ କାଠ ଚାଲାଣ ସନ୍ଦେହରେ ଏକ ବୋଲେରୋ ଗାଡ଼ିକୁ ଅଟକ କରାଯାଇଥିଲା। ତେବେ ବନ ବିଭାଗ ଗାଡ଼ିକୁ ଅଟକାଇବା ପରେ ଡ୍ରାଇଭର ଗାଡ଼ି ଛାଡ଼ି ଦୌଡ଼ି ପଳାଇଥିବା ଜଣାପଡ଼ିଛି।ବନ ବିଭାଗ ପକ୍ଷରୁ ବୋଲେରୋଟିକୁ ତଲାସ କରାଯିବା ପରେ ଗାଡ଼ିରେ କୌଣସି କାଠ ନଥିବା ଦେଖିବାକୁ ମିଳିଥିଲା। ଏନେଇ ତୁରନ୍ତ ପାଟଣା ଥାନା ଅଧିକାରୀ କିରଣ ପ୍ରସାଦ ସାହୁଙ୍କୁ ସୂଚନା ଦିଆଯାଇଥିଲା।ସୂଚନା ପାଇ ପାଟଣା ଥାନା ପୁଲିସ ଘଟଣାସ୍ଥଳରେ ପହଞ୍ଚି ବୋଲେରୋଟିକୁ ପୁନର୍ବାର ତଲାସ କରିଥିଲା। ଏହି ସମୟରେ ଗାଡ଼ି ଭିତରୁ ଛେଳି ନେବା ପାଇଁ ବ୍ୟବହୃତ ନେଣ୍ଡି ସହ ଚୋରିରେ ବ୍ୟବହୃତ ହେଉଥିବା କିଛି ସାମଗ୍ରୀ ଜବତ କରାଯାଇଥିଲା।

ପରେ ପାଟଣା ଥାନା ପୁଲିସ ବୋଲେରୋଟିକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି। ଗାଡ଼ି ଛାଡ଼ି ପଳାଇଥିବା ଡ୍ରାଇଭରଙ୍କ ସମ୍ପର୍କରେ ମଧ୍ୟ ପୁଲିସ ତଦନ୍ତ ଜାରି ରଖିଛି। ବୋଲେରୋଟିକୁ ପାଟଣା ଥାନା ପରିସରକୁ ଅଣାଯାଇଥିବା ଜଣାପଡ଼ିଛି।

ସାହାରପଡ଼ା ବନପାଳଙ୍କ ପକ୍ଷରୁ ଚାରାରୋପଣ, ଏଫ୍.ଇ.ଏସ୍.ର ସହଯୋଗ

ପାଟଣା, ୧୧/୯: କେନ୍ଦୁଝର ଜିଲ୍ଲା ସାହାରପଡ଼ା ବନପାଳ ଅନ୍ତର୍ଗତ ଦାମାହୁଦା ପଞ୍ଚାୟତ ଅଞ୍ଚଳରେ ବ୍ୟାପକ ଚାରାରୋପଣ କାର୍ଯ୍ୟକ୍ରମ ହୋଇଛି। ଦାମାହୁଦା ଛକ ନିକଟରୁ ଗଜାପଥର, କୁଦାବେଡ଼ା ଦେଇ କେନ୍ଦୁଯୋଡ଼ା ପର୍ଯ୍ୟନ୍ତ ପ୍ରାୟ ୭ କିଲୋମିଟର ରାସ୍ତାର ଉଭୟ ପାର୍ଶ୍ୱରେ ବିଭିନ୍ନ ପ୍ରଜାତିର ଚାରା ରୋପଣ କରାଯାଇଛି।ରାସ୍ତାର ଉଭୟ ପାର୍ଶ୍ୱରେ କଦମ୍ବ, ଶିଶୁ, ଜାମୁ, କୃଷ୍ଣଚୂଡ଼ା, ଓଉ ଓ ଆମ୍ବ ଆଦି ଗଛର ଚାରା ରୋପଣ କରାଯାଇଛି। ପରିବେଶ ସୁରକ୍ଷା ସହିତ ରାସ୍ତା ପାର୍ଶ୍ୱର ସବୁଜିମା ବୃଦ୍ଧି କରିବା ଏହି ଚାରାରୋପଣର ମୁଖ୍ୟ ଉଦ୍ଦେଶ୍ୟ ବୋଲି ଜଣାପଡ଼ିଛି।ସାହାରପଡ଼ା ବନପାଳ କାର୍ଯ୍ୟାଳୟର ବନରକ୍ଷୀ ଅଶ୍ୱିନୀ ସାହୁଙ୍କ ନେତୃତ୍ୱରେ ଏହି ଚାରାରୋପଣ କାର୍ଯ୍ୟ ଚାଲିଥିଲା। ଏଥିରେ ଏଫ୍.ଇ.ଏସ୍.ର କାର୍ଯ୍ୟରତ ଏମ୍.ଟି. ନିରଞ୍ଜନ ବିଶ୍ୱାଳ, ଏଫ୍.ଟି. ଅନାଦି ଚରଣ ମହାନ୍ତ ଓ ବିଜୟ କୁମାର କାରୁଆ ପ୍ରମୁଖ ସହଯୋଗ କରିଥିଲେ।

ସାହାରପଡ଼ା ବନପାଳ କାର୍ଯ୍ୟାଳୟ ଓ ଏଫ୍.ଇ.ଏସ୍.ର ମିଳିତ ସହଯୋଗରେ ହୋଇଥିବା ଏହି ଚାରାରୋପଣ ଦ୍ୱାରା ଅଞ୍ଚଳର ପରିବେଶ ସୁରକ୍ଷା ଓ ସବୁଜିମା ବୃଦ୍ଧି ପାଇବ ବୋଲି ଆଶା କରାଯାଉଛି।