ୟୁଏଇ ଗସ୍ତ ସାରି ଓଡ଼ିଶା ଫେରିଲେ CM ମୋହନ ମାଝୀ, ୨.୪୩ ଲକ୍ଷ କୋଟି ନିବେଶର ଆଶା

ଭୁବନେଶ୍ୱର: ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ୫ ଦିନିଆ ଗସ୍ତ ସାରି ଓଡ଼ିଶା ଫେରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ୟୁଏଇ ଗସ୍ତ ସମୟରେ ଓଡ଼ିଶା ନିବେଶକ ସମ୍ମିଳନୀରେ ଯୋଗଦେବା ସହ ବିଭିନ୍ନ ଶିଳ୍ପପତି ଓ ନିବେଶକଙ୍କ ସହ ଆଲୋଚନା କରିଥିଲେ।ଭୁବନେଶ୍ୱର ବିମାନବନ୍ଦରରେ ମୁଖ୍ୟମନ୍ତ୍ରୀ ଫେରିବା ପରେ ତାଙ୍କୁ ଭବ୍ୟ ସ୍ୱାଗତକରାଯାଇଥିଲା। ଗସ୍ତ ସମୟରେ ୩ ଦିନ ଧରି ନିବେଶକମାନଙ୍କ ସହ ବ୍ୟାପକ ଆଲୋଚନା ହୋଇଥିବା ଜଣାପଡ଼ିଛି।ଓଡ଼ିଶାକୁ ଅଧିକ

ପୁଞ୍ଜିନିବେଶ ଆଣିବା ଏବଂ ରାଜ୍ୟରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବା ମୁଖ୍ୟମନ୍ତ୍ରୀଙ୍କ ୟୁଏଇ ଗସ୍ତର ପ୍ରମୁଖ ଲକ୍ଷ୍ୟ ଥିଲା।ଗସ୍ତ ପରେ ମୁଖ୍ୟମନ୍ତ୍ରୀ କହିଛନ୍ତି ଯେ, ଓଡ଼ିଶାକୁ ପ୍ରାୟ ୨ ଲକ୍ଷ ୪୩ ହଜାର କୋଟି ଟଙ୍କାର ନିବେଶ ଆସିବାର ଆଶା ରହିଛି। ଏହି ନିବେଶ ମାଧ୍ୟମରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ୮ ଲକ୍ଷରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହୋଇପାରେ ବୋଲି ସେ ଆଶା ପ୍ରକାଶ କରିଛନ୍ତି।ଅନ୍ୟପଟେ, ୟୁଏଇ ଗସ୍ତ ପରେ ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ ମଧ୍ୟ ପ୍ରେସମିଟ୍‌ କରି ଗସ୍ତର ସଫଳତା ସମ୍ପର୍କରେ ସୂଚନା ଦେଇଛନ୍ତି। ତାଙ୍କ ସୂଚନା ଅନୁସାରେ, ୨୪ଟି ପ୍ରକଳ୍ପ ପାଇଁ ଏମ୍‌ଓୟୁ ସ୍ୱାକ୍ଷର ହୋଇଛି। ଏହି ପ୍ରକଳ୍ପଗୁଡ଼ିକ ମାଧ୍ୟମରେ ପ୍ରାୟ ୨.୪୩ ଲକ୍ଷ କୋଟି ଟଙ୍କାର ନିବେଶ ଆସିବାର ସମ୍ଭାବନା ରହିଛିବିଶେଷକରି ଆଇଟି ଓ ସ୍ୱାସ୍ଥ୍ୟ କ୍ଷେତ୍ରରେ ବିଦେଶୀ ପୁଞ୍ଜିନିବେଶ ଆସିବାର ଆଶା ରହିଛି। ଏହି ନିବେଶ ପ୍ରସ୍ତାବଗୁଡ଼ିକ ବାସ୍ତବ ରୂପ ନେଲେ ଓଡ଼ିଶାର ଶିଳ୍ପାୟନ, ଅର୍ଥନୈତିକ ବିକାଶ ଓ ନିଯୁକ୍ତି କ୍ଷେତ୍ରରେ ବଡ଼ ପରିବର୍ତ୍ତନ ଆସିପାରେ।ମୁଖ୍ୟମନ୍ତ୍ରୀଙ୍କ ବିଦେଶ ଗସ୍ତକୁ ନେଇ ବିରୋଧୀଙ୍କ ଅଭିଯୋଗକୁ ମଧ୍ୟ ଶିଳ୍ପ ମନ୍ତ୍ରୀ ଖଣ୍ଡନ କରିଛନ୍ତି। ୟୁଏଇରୁ ଆସିଥିବା ନିବେଶ ପ୍ରସ୍ତାବଗୁଡ଼ିକ ଓଡ଼ିଶାରେ ଶିଳ୍ପ ଓ ରୋଜଗାର କ୍ଷେତ୍ରକୁ ନୂଆ ଗତି ଦେବ ବୋଲି ସରକାର ଆଶା ପ୍ରକାଶ କରିଛନ୍ତି।

ଓଡ଼ିଶା ପୋଲିସର ନୂଆ ଡିଜିଟାଲ ପଦକ୍ଷେପ: ‘ଆମ ସାଥୀ’ ହ୍ୱାଟ୍ସଆପ୍ ବଟ୍‌ରେ ମିଳିବ ୧୪ ପୋଲିସ ସେବା

ଭୁବନେଶ୍ୱର: ୧୧/୯: ଏଣିକି ବିଭିନ୍ନ ପୋଲିସ ସେବା ପାଇଁ ଥାନା କିମ୍ବା ସମ୍ପୃକ୍ତ ପୋଲିସ କାର୍ଯ୍ୟାଳୟକୁ ବାରମ୍ବାର ଯିବାର ଆବଶ୍ୟକତା କମିବ। ଘରେ ବସି ହ୍ୱାଟ୍ସଆପ୍ ମାଧ୍ୟମରେ ୧୪ଟି ପୋଲିସ-ନାଗରିକ ସେବା ପାଇପାରିବେ ଓଡ଼ିଶାର ଲୋକେ। ଏଥିପାଇଁ ଓଡ଼ିଶା ପୋଲିସ ପକ୍ଷରୁ ‘ଆମ ସାଥୀ’ ହ୍ୱାଟ୍ସଆପ୍ ବଟ୍‌ ସେବା ଆରମ୍ଭ କରାଯାଇଛି।ଡିଜିପି ବିନୟତୋଷ ମିଶ୍ର ଭୁବନେଶ୍ୱରସ୍ଥିତ ଡିଜିପି କ୍ୟାମ୍ପ ଅଫିସ୍‌ରେ ଏହି ପୋଲିସ ସେବାର ଶୁଭାରମ୍ଭ କରିଛନ୍ତି। ଏହି ପଦକ୍ଷେପ ମାଧ୍ୟମରେ ପୋଲିସ ସେବାକୁ ଅଧିକ ସରଳ, ଦ୍ରୁତ, ସ୍ୱଚ୍ଛ ଓ ନାଗରିକ-କେନ୍ଦ୍ରିକ କରିବାକୁ ଲକ୍ଷ୍ୟ ରଖାଯାଇଛି।

‘ଆମ ସାଥୀ’ ହ୍ୱାଟ୍ସଆପ୍ ବଟ୍ କ’ଣ?

‘ଆମ ସାଥୀ’ ହେଉଛି ଓଡ଼ିଶା ସରକାରଙ୍କ ୨୪×୭ ଡିଜିଟାଲ୍ ସହାୟକ ବ୍ୟବସ୍ଥା। ହ୍ୱାଟ୍ସଆପ୍ ମାଧ୍ୟମରେ ବିଭିନ୍ନ ସରକାରୀ ସେବାକୁ ଲୋକଙ୍କ ନିକଟରେ ସହଜରେ ପହଞ୍ଚାଇବା ଏହାର ମୁଖ୍ୟ ଉଦ୍ଦେଶ୍ୟ।ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୨୫ ଡିସେମ୍ବର ୨୦୨୫ରେ ସୁଶାସନ ଦିବସ ଅବସରରେ ‘ଆମ ସାଥୀ’ ହ୍ୱାଟ୍ସଆପ୍ ବଟ୍‌ର ଶୁଭାରମ୍ଭ କରିଥିଲେ। ଓଡ଼ିଶା ସରକାରଙ୍କ Centre for Modernizing Government Initiative (CMGI), State Crime Records Bureau (SCRB), ଓଡ଼ିଶା ପୋଲିସ ଏବଂ Meta India (WhatsApp)ର ସହଭାଗିତାରେ ଏହି ୟୁନିଫାଏଡ୍ ହ୍ୱାଟ୍ସଆପ୍ ବଟ୍ ବିକଶିତ କରାଯାଇଛି।

‘ଆମ ସାଥୀ’ରେ ମିଳିବ ୧୪ଟି ପୋଲିସ ସେବା

ଗୃହ ବିଭାଗର ୟୁନିଫାଏଡ୍ ପ୍ଲାଟଫର୍ମର ORTPSA ଅଧୀନରେ ଏବେ ୧୪ଟି ପୋଲିସ-ନାଗରିକ ସେବା ‘ଆମ ସାଥୀ’ ସହ ସମନ୍ୱିତ ହୋଇଛି।

୧. ଚରିତ୍ର ପ୍ରମାଣପତ୍ର

୨. ବରିଷ୍ଠ ନାଗରିକ ପଞ୍ଜୀକରଣ

୩. କର୍ମଚାରୀ ସତ୍ୟାପନ

୪. ହଜିଯାଇଥିବା ସମ୍ପତ୍ତି/ଦଲିଲ୍ ସମ୍ପର୍କିତ ରିପୋର୍ଟ

୫. ଲାଉଡ୍‌ସ୍ପିକର୍ ଅନୁମତି ପାଇଁ NOC

୬. ଭଡ଼ାଟିଆ/PG ସତ୍ୟାପନ

୭. ହଜିଯାଇଥିବା ସମ୍ପତ୍ତି ପଞ୍ଜୀକରଣ

୮. ନିଖୋଜ ବ୍ୟକ୍ତି ସମ୍ପର୍କିତ ସୂଚନା ଓ ପଞ୍ଜୀକରଣ

୯. ଅଭିଯୋଗ ପଞ୍ଜୀକରଣ

୧୦. କର୍ମଚାରୀ/ଘରୋଇ ସହାୟକ ନିୟୋଜନ ସତ୍ୟାପନ

୧୧. କାର୍ଯ୍ୟକ୍ରମ/ପ୍ରଦର୍ଶନ ପାଇଁ ଅନୁମତି

୧୨. ଧାରଣା/ଧର୍ମଘଟ ପାଇଁ ଅନୁମତି

୧୩. FIRର ନକଲ ପ୍ରଦାନ

୧୪. ସଡ଼କ ଦୁର୍ଘଟଣା, ଚୋରି ଯାନବାହନ ଓ ଚୋରି ମାମଲା ସମ୍ପର୍କିତ Final Formର ନକଲ ପ୍ରଦାନ

କିପରି ବ୍ୟବହାର କରିବେ ‘ଆମ ସାଥୀ’?

‘ଆମ ସାଥୀ’ ହ୍ୱାଟ୍ସଆପ୍ ବଟ୍ ବ୍ୟବହାର କରିବା ପାଇଁ ନିଜ ମୋବାଇଲ୍‌ରେ ୯୪୩୭୨୯୨୦୦୦ ନମ୍ବରଟି ସେଭ୍ କରନ୍ତୁ।

ପ୍ରଥମ ପଦକ୍ଷେପ: ହ୍ୱାଟ୍ସଆପ୍‌ରେ ଏହି ନମ୍ବରକୁ ‘Hi’ ଲେଖି ପଠାନ୍ତୁ।

ଦ୍ୱିତୀୟ ପଦକ୍ଷେପ: ଭାଷା ଚୟନ କରି ଆବଶ୍ୟକ ପୋଲିସ ସେବା ବାଛନ୍ତୁ।

ତୃତୀୟ ପଦକ୍ଷେପ: ସେବା ଅନୁଯାୟୀ ଆବଶ୍ୟକ ତଥ୍ୟ ଓ ଦଲିଲ୍ ହ୍ୱାଟ୍ସଆପ୍ ମାଧ୍ୟମରେ ଦାଖଲ କରନ୍ତୁ।

ଚତୁର୍ଥ ପଦକ୍ଷେପ: ଆବେଦନ ଦାଖଲ ହେବା ପରେ ଏକ ରେଫରେନ୍ସ/ଆବେଦନ ନମ୍ବର ମିଳିବ।

ପଞ୍ଚମ ପଦକ୍ଷେପ: ରେଫରେନ୍ସ ନମ୍ବର ବ୍ୟବହାର କରି ହ୍ୱାଟ୍ସଆପ୍‌ରେ ଆବେଦନର ସ୍ଥିତି ଜାଣିପାରିବେ।

ଷଷ୍ଠ ପଦକ୍ଷେପ: ଯେଉଁ ସେବାରେ ଡିଜିଟାଲ୍ ଦଲିଲ୍ ପ୍ରଦାନର ସୁବିଧା ରହିଛି, ପ୍ରକ୍ରିୟା ସମାପ୍ତ ପରେ ଅନୁମୋଦିତ ଦଲିଲ୍ ହ୍ୱାଟ୍ସଆପ୍ ମାଧ୍ୟମରେ ପାଇପାରିବେ।ନାଗରିକଙ୍କ ପାଇଁ ସହଜ ହେବ ପୋଲିସ ସେବା

‘ଆମ ସାଥୀ’ରେ ୧୪ଟି ପୋଲିସ ସେବା ଯୋଡ଼ାଯିବା ଦ୍ୱାରା ଓଡ଼ିଶାରେ ଡିଜିଟାଲ୍ ଓ ନାଗରିକ-କେନ୍ଦ୍ରିକ ପୋଲିସିଂ ଆହୁରି ସୁଦୃଢ଼ ହେବ। ପ୍ରଯୁକ୍ତିର ବ୍ୟବହାର ମାଧ୍ୟମରେ ପୋଲିସ ସେବାକୁ ଲୋକଙ୍କ ହାତପାହାନ୍ତାରେ ସହଜରେ ପହଞ୍ଚାଇବା ଏହି ପଦକ୍ଷେପର ମୁଖ୍ୟ ଲକ୍ଷ୍ୟ ବୋଲି ଡିଜିପି ବିନୟତୋଷ ମିଶ୍ର କହିଛନ୍ତି।

ଘଟଗାଁ ଆଦର୍ଶ ବିଦ୍ୟାଳୟରେ ୧୧ତମ ପ୍ରତିଷ୍ଠା ଦିବସ ପାଳିତ

ଘଟଗାଁ, ୧୧/୯: ଘଟଗାଁ ବ୍ଲକ ଅନ୍ତର୍ଗତ ଢେଙ୍କିକୋଟ ଟିକିରାସ୍ଥିତ ଆଦର୍ଶ ବିଦ୍ୟାଳୟର ୧୧ତମ ପ୍ରତିଷ୍ଠା ଦିବସ ଗୁରୁବାର ବିଦ୍ୟାଳୟ ପରିସରରେ ଉତ୍ସାହ ଓ ଆନନ୍ଦର ସହ ପାଳିତ ହୋଇଯାଇଛି।ଭାରପ୍ରାପ୍ତ ଅଧ୍ୟକ୍ଷ ଭ୍ରମରବର ମଲ୍ଲିକଙ୍କ ଅଧ୍ୟକ୍ଷତାରେ ଆୟୋଜିତ ଏହି ପ୍ରତିଷ୍ଠା ଦିବସ ସମାରୋହରେ ମୁଖ୍ୟ ଅତିଥି ଭାବେ ସାଂସଦ ପ୍ରତିନିଧି ଅଖିଳ ପାତ୍ର ଯୋଗଦେଇଥିଲେ। ମୁଖ୍ୟ ବକ୍ତା ଭାବେ ଘଟଗାଁ ବ୍ଲକ ଶିକ୍ଷାଧିକାରୀ ହରେକୃଷ୍ଣ ନାୟକ ଯୋଗଦେଇ ଶିକ୍ଷାର ଗୁରୁତ୍ୱ ଓ ଛାତ୍ରଛାତ୍ରୀଙ୍କ ଭବିଷ୍ୟତ ଗଠନରେ ବିଦ୍ୟାଳୟର ଭୂମିକା ସମ୍ପର୍କରେ ଆଲୋକପାତ କରିଥିଲେ।ସମ୍ମାନିତ ଅତିଥି ଭାବେ ବିଡିଓ ଖଗେଶ୍ୱର ବରାଳ ଓ ସିଆରସିସି ଜିତେନ୍ଦ୍ର କୁମାର ଗିରି ଯୋଗଦେଇଥିଲେ। ସେମାନେ ବିଦ୍ୟାଳୟର ଗୁରୁତ୍ୱ, ଶିକ୍ଷା କ୍ଷେତ୍ରରେ ଏହାର ସଫଳତା, ଗୁଣାତ୍ମକ ଶିକ୍ଷା ପ୍ରଦାନ ସହ ସମାଜ ପ୍ରତି ବିଦ୍ୟାଳୟର ଦାୟିତ୍ୱ ଓ ପ୍ରତିବଦ୍ଧତା ଉପରେ ମତବ୍ୟକ୍ତ କରିଥିଲେ।ଏହି ଅବସରରେ ବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ୱାରା ଏକ ମନୋରଞ୍ଜନଧର୍ମୀ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା। ବିଭିନ୍ନ ସାଂସ୍କୃତିକ ପ୍ରଦର୍ଶନ ମାଧ୍ୟମରେ ଛାତ୍ରଛାତ୍ରୀମାନେ ନିଜର ପ୍ରତିଭା ଓ ସୃଜନଶୀଳତାର ପରିଚୟ ଦେଇଥିଲେ।

କାର୍ଯ୍ୟକ୍ରମକୁ ଶିକ୍ଷକ ଲକ୍ଷ୍ମୀଧାର ସାମଲ ଓ ଶିକ୍ଷୟିତ୍ରୀ କଲ୍ୟାଣୀ ମଲ୍ଲିକ ପରିଚାଳନା କରିଥିବା ବେଳେ ରମାକାନ୍ତ ସେଠୀ ଧନ୍ୟବାଦ ଅର୍ପଣ କରିଥିଲେ।

ଭୂତ ଭାଇ’ଙ୍କ ସହ ଆମ ନଜର ଓଡ଼ିଶାର ଚା’ ଖଟି, ଜାଣନ୍ତୁ ଏହି ନିଆରା ମଣିଷଙ୍କ କାହାଣୀ

ପାଟଣା, ୮/୯ : ନାଁ ଭତୃହରି ମହାନ୍ତ। କିନ୍ତୁ ଏହି ନାଁରେ ତାଙ୍କୁ ଜାଣୁଥିବା ଲୋକଙ୍କ ସଂଖ୍ୟା ଯେତିକି, ‘ଭୂତ ଭାଇ’ ନାଁରେ ଜାଣୁଥିବା ଲୋକଙ୍କ ସଂଖ୍ୟା ବୋଧହୁଏ ତା’ଠାରୁ ଅଧିକ। ପାଟଣା ଅଞ୍ଚଳରୁ କେନ୍ଦୁଝର ଜିଲ୍ଲା, ଏପରିକି ଜିଲ୍ଲା ବାହାରେ ମଧ୍ୟ ‘ଭୂତ ଭାଇ’ ନାଁଟି ତାଙ୍କର ଏକ ନିଆରା ପରିଚୟ ପାଲଟିଛି।ନିଆରା ହେୟାର ଷ୍ଟାଇଲ୍‌, ଭିନ୍ନ ଢଙ୍ଗର କଥାବାର୍ତ୍ତା ଏବଂ ବାଇକ୍‌ରେ ବଡ଼ ଅକ୍ଷରରେ ଲେଖା ‘ଭୂତ ଭାଇ’। ତାଙ୍କୁ ଦେଖିଲେ ଥରେ ନଜର ଅଟକିଯିବା ସ୍ୱାଭାବିକ। ତେବେ ଏହି ନିଆରା ଷ୍ଟାଇଲ୍‌ ପଛରେ ଲୁଚିଛି ଜଣେ ଅତ୍ୟନ୍ତ ସରଳ, ମେଳାପୀ ଓ ଭଦ୍ର ମଣିଷଙ୍କ ଚେହେରା।

☕ ଖବର ଖୋଜୁ ଖୋଜୁ ‘ଭୂତ ଭାଇ’ଙ୍କ ଉପରେ ପଡ଼ିଲା ନଜର

ପାଟଣା ମୁଖ୍ୟାଳୟରେ ଖବର ସଂଗ୍ରହ କରୁଥିବା ସମୟରେ ହଠାତ୍‌ ଆମ ନଜର ଓଡ଼ିଶା ଟିମ୍‌ର ନଜର ପଡ଼ିଥିଲା ଏହି ନିଆରା ମଣିଷଙ୍କ ଉପରେ।

ଆମର ଟ୍ୟାଗ୍‌ଲାଇନ୍‌—“ଓଡ଼ିଶାର ପ୍ରତିଟି ଖବର ଉପରେ ନଜର”।

ତେଣୁ ଯେତେବେଳେ ‘ଭୂତ ଭାଇ’ ନଜରରେ ପଡ଼ିଗଲେ, ତାଙ୍କୁ ନଜରଅନ୍ଦାଜ କରି ଚାଲିଯିବା କେମିତି ସମ୍ଭବ! ଖବର ଖୋଜୁ ଖୋଜୁ ଆରମ୍ଭ ହେଲା ଏକ ନିଆରା ସାକ୍ଷାତ, ଆଉ ସେହି ସାକ୍ଷାତ ପରେ ଜମିଗଲା ଚା’ ଖଟି।ଭୂତ ଭାଇ’ ଆମ ଟିମ୍‌କୁ ସାଦର ସମ୍ମାନ ଜଣାଇବା ସହ ଚା’ ପିଇବାକୁ ଦେଇଥିଲେ। ଚା’ କପ୍‌ରୁ ଉଠୁଥିବା ଧୂଆଁ ସାଙ୍ଗକୁ ଜମିଥିଲା ଗପସପ। କିଛି ସମୟର ଏହି ଖଟିରେ ତାଙ୍କ ଜୀବନ, ବ୍ୟକ୍ତିତ୍ୱ ଓ ଲୋକଙ୍କ ସହ ତାଙ୍କ ସମ୍ପର୍କର ଅନେକ କଥା ସାମ୍ନାକୁ ଆସିଥିଲା।

👻 ‘ଭୂତ ଭାଇ’ ନାଁଟି କେମିତି ହେଲା ପରିଚୟ?

କପୁଣ୍ଡି ନିକଟବର୍ତ୍ତୀ ମିରିଗିଖୋଜୀ ଗ୍ରାମ ପଞ୍ଚାୟତ ଅଞ୍ଚଳର ଭତୃହରି ମହାନ୍ତଙ୍କୁ ଲୋକେ ସ୍ନେହରେ ‘ଭୂତ ଭାଇ’ ବୋଲି ଡାକନ୍ତି। ତାଙ୍କ ହେୟାର ଷ୍ଟାଇଲ୍‌, କଥାବାର୍ତ୍ତା ଓ ନିଆରା ଚାଲିଚଳଣ ହିଁ ତାଙ୍କୁ ଏକ ଅଲଗା ପରିଚୟ ଦେଇଛି।

ବାଇକ୍‌ରେ ବି ଲେଖା ରହିଛି—‘ଭୂତ ଭାଇ’।

ଫଳରେ ରାସ୍ତାରେ ବାଇକ୍‌ ଧରି ଯାଉଥିବା ବେଳେ ଦୂରରୁ ମଧ୍ୟ ଲୋକେ ଚିହ୍ନି ଯାଆନ୍ତି—ଆରେ, ଏ ତ ‘ଭୂତ ଭାଇ’!ଏଠି ସେଠି ସବୁଠି ଭୂତ ଭାଇ, ବାଇକ୍‌ ଧରି ବୁଲନ୍ତି ଘାଇଁ ଘାଇଁ। ଏହି ନିଆରା ଷ୍ଟାଇଲ୍‌ ହିଁ ତାଙ୍କୁ ଲୋକଙ୍କ ମଧ୍ୟରେ ଚର୍ଚ୍ଚିତ କରିଛି।

❤️ ନାଁ ଭୂତ, ହେଲେ ହୃଦୟ ମଣିଷପଣିଆରେ ଭରା

‘ଭୂତ ଭାଇ’ ନାଁଟି ଶୁଣିଲେ ହୁଏତ ମନରେ ଏକ ଅଲଗା ଚିତ୍ର ଆସିପାରେ। କିନ୍ତୁ ତାଙ୍କୁ ନିକଟରୁ ଭେଟିଲେ ଜଣାପଡ଼େ, ନାଁ ଯେତେ ନିଆରା, ମଣିଷଟି ସେତେ ଆପଣାର।ଭତୃହରି ମହାନ୍ତ ଅଞ୍ଚଳରେ ଜଣେ ସମାଜସେବୀ ଓ ମେଳାପୀ ମଣିଷ ଭାବରେ ପରିଚିତ। ଲୋକଙ୍କ ସୁଖରେ ସାମିଲ ହେବା ହେଉ କି ଦୁଃଖ ସମୟରେ ପାଖରେ ଛିଡ଼ା ହେବା—ସେ ସବୁବେଳେ ଲୋକଙ୍କ ସହ ରହିବାକୁ ପସନ୍ଦ କରନ୍ତି।

ସେଥିପାଇଁ ତାଙ୍କ ପରିଚୟ କେବଳ ‘ଭୂତ ଭାଇ’ରେ ସୀମିତ ନୁହେଁ। ତାଙ୍କ ମିଳାମିଶା ସ୍ୱଭାବ ଓ ମଣିଷଙ୍କ ପ୍ରତି ଭଲପାଇବା ପାଇଁ ସେ ଅନେକଙ୍କ ହୃଦୟରେ ନିଜର ଏକ ସ୍ଥାନ କରିପାରିଛନ୍ତି।

📸 ଆମ ନଜରରେ ଆସିଥିବା ଏକ ନିଆରା କାହାଣୀ

ପାଟଣା ମୁଖ୍ୟାଳୟରେ ଘଟିଥିବା ଏହି ଛୋଟ ସାକ୍ଷାତ ହୁଏତ କିଛି ମିନିଟ୍‌ର ଥିଲା, କିନ୍ତୁ ଏହା ଆମ ସାମ୍ନାରେ ଖୋଲିଦେଇଥିଲା ଜଣେ ନିଆରା ମଣିଷଙ୍କ ଜୀବନର ଏକ ଛୋଟ ଅଧ୍ୟାୟ।ନାଁ ‘ଭୂତ ଭାଇ’, ଷ୍ଟାଇଲ୍‌ ନିଆରା, ବାଇକ୍‌ ବି ନିଆରା; ହେଲେ ହୃଦୟଟି ଖୁବ୍‌ ସରଳ ଓ ଆପଣାର।

ଆଉ ଏହି ଘଟଣା ହୁଏତ ପୁଣିଥରେ ମନେ ପକାଇଦିଏ—

ପରିଚୟ କେବଳ ନାଁ କିମ୍ବା ଷ୍ଟାଇଲ୍‌ରେ ନୁହେଁ, ଜଣେ ମଣିଷର ପ୍ରକୃତ ପରିଚୟ ତାଙ୍କ ମଣିଷପଣିଆରେ।