ଘଟଗାଁ, ୨୪/୮: (ନଜର ଓଡ଼ିଶା)କେନ୍ଦୁଝର ଜିଲ୍ଲା ଘଟଗାଁ ରେଞ୍ଜ ଢେଙ୍କିକୋଟ ସେକ୍ସନ ଅନ୍ତର୍ଗତ କାଶିବେଡା ଗ୍ରାମରେ ଥମିବାର ନାଁ ଧରୁନି ହାତୀପଲଙ୍କ ଉପଦ୍ରବ। ପ୍ରାୟ ୨୦ଟି ହାତୀଙ୍କ ଏକ ପଲ ଗତ ୫ ଦିନ ଧରି ଗାଁ ଓ ଚାଷଜମିରେ ଘୁରି ବୁଲିବା ସହ ଏକର ଏକର ଧାନ, ମକା ଓ ବୋଇତାଳୁ ଫସଲ ନଷ୍ଟ କରିଛନ୍ତି। ହାତୀଙ୍କ ଲଗାତାର ଉପଦ୍ରବ ଯୋଗୁଁ ଗ୍ରାମବାସୀ ଓ ଚାଷୀଙ୍କ ମଧ୍ୟରେ ଭୟର ବାତାବରଣ ଲାଗି ରହିଛି।ଗତ ବିଳମ୍ବିତ ରାତିରେ ହାତୀପଲ ଗ୍ରାମର ମହେନ୍ଦ୍ର ନାୟକ, ରାଧାକାନ୍ତ ନାୟକ ଓ ରତ୍ନାକର ନାୟକଙ୍କ ଘରର କାନ୍ଥ ଭାଙ୍ଗି ଦେଇଛନ୍ତି। ଘର ଭିତରେ ମହେନ୍ଦ୍ରଙ୍କ ପରିବାର ଶୋଇଥିବା ସମୟରେ ହାତୀ କାନ୍ଥ ଭାଙ୍ଗିଥିଲା। ତେବେ ଅଳ୍ପକେ ବଡ଼ ଅଘଟଣରୁ ପରିବାର ଲୋକେ ବର୍ତ୍ତିଯାଇଥିବା ଜଣାପଡ଼ିଛି। ହାତୀମାନେ ଘର ଭିତରେ ପଶି ଧାନ ଓ ଚାଉଳ ଖାଇବା ସହ ଘରର ବ୍ୟାପକ କ୍ଷତି କରିଛନ୍ତି। ସେହିପରି ଗ୍ରାମର ସନାତନ ବାରିକ, ଦଶରଥ ବାରିକ, ଅଗସ୍ତି ବାରିକ, ଗୋପବନ୍ଧୁ ଘଟଣା ଓ ଜଳଧର ମାଝୀଙ୍କ ସମେତ ଅନେକ ଚାଷୀଙ୍କ ଧାନ ଫସଲ ହାତୀପଲ ଖାଇବା ସହ ଦଳିମକଚି ନଷ୍ଟ କରିଛନ୍ତି। ଫଳରେ ଚାଷୀମାନେ ବ୍ୟାପକ ଆର୍ଥିକ କ୍ଷତିର ସମ୍ମୁଖୀନ ହୋଇଛନ୍ତି।ଗ୍ରାମ ନିକଟସ୍ଥ ଜଙ୍ଗଲରେ ହାତୀପଲ ଡେରା ପକାଇଥିବାରୁ ସନ୍ଧ୍ୟା ହେଲେ ଗ୍ରାମବାସୀଙ୍କ ମଧ୍ୟରେ ଭୟ ବଢ଼ିଯାଉଛି। ହାତୀଙ୍କ ଗତିବିଧି ଉପରେ ନିୟମିତ ନଜର ରଖିବା ସହ ହାତୀପଲଙ୍କୁ ଗାଁ ଓ ଚାଷଜମି ଠାରୁ ଦୂରେଇବା ପାଇଁ ବନ ବିଭାଗ ତୁରନ୍ତ ପଦକ୍ଷେପ ନେବାକୁ ଚାଷୀ ଓ ଗ୍ରାମବାସୀ ଦାବି କରିଛନ୍ତି। ଏଥିସହ ହାତୀ ଉପଦ୍ରବରେ ଭାଙ୍ଗିଥିବା ଘର ଏବଂ ନଷ୍ଟ ହୋଇଥିବା ଫସଲର ତୁରନ୍ତ କ୍ଷୟକ୍ଷତି ଆକଳନ କରି ନିୟମାନୁଯାୟୀ କ୍ଷତିପୂରଣ ପ୍ରଦାନ କରିବାକୁ ଗ୍ରାମବାସୀ ଦାବି କରିଛନ୍ତି।
