ପାଟଣା:୨୪/୮ (ନଜର ଓଡ଼ିଶା)ଦେଶ ସ୍ୱାଧୀନତାର ୮୦ ବର୍ଷ ପୂରଣ କରିବାକୁ ଯାଉଥିଲେ ହେଁ ଗ୍ରାମାଞ୍ଚଳରେ ମୌଳିକ ସୁବିଧା ସୁଯୋଗର ଅଭାବ ଏବେ ବି ଯୋଜନାର ଅସଲ ଚେହେରା ପଦାରେ ପକାଉଛି। କେନ୍ଦୁଝର ଜିଲ୍ଲା ପାଟଣା ବ୍ଲକ୍ କେନ୍ଦେଇପଶି ପଞ୍ଚାୟତର ସିଲିଦା ଜହ୍ମେଇ ନାଳରୁ ଖୁଣ୍ଟାପଡ଼ା ପ୍ରାଥମିକ ବିଦ୍ୟାଳୟ ପର୍ଯ୍ୟନ୍ତ ୨.୬ କିଲୋମିଟର ରାସ୍ତା ଏହାର ଏକ ଜ୍ୱଳନ୍ତ ଉଦାହରଣ।
ଦୀର୍ଘଦିନ ଧରି ଏହି ରାସ୍ତାଟି ସମ୍ପୂର୍ଣ୍ଣ କଚ୍ଚା ଓ ପରିତ୍ୟକ୍ତ ଅବସ୍ଥାରେ ପଡ଼ିରହିଥିବା ବେଳେ ବର୍ଷା ଦିନ ଆସିଲେ ଏଠାରେ ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଉଛି। ଫଳରେ ସ୍ଥାନୀୟ ଅଞ୍ଚଳବାସୀଙ୍କ ପାଇଁ ଗମନାଗମନ ଏବେ ଏକ ବଡ଼ ଦୁଃସ୍ୱପ୍ନ ପାଲଟିଛି। ଚାଲିଚାଲି ଯିବା ମଧ୍ୟ ଅସମ୍ଭବ ହୋଇପଡ଼ୁଛି।
ଅଭିଯୋଗ ଅନୁଯାୟୀ, ଏହି ୨.୬ କିଲୋମିଟର ରାସ୍ତା ଉପରେ କେବଳ କେନ୍ଦେଇପଶି ନୁହେଁ, ବରଂ ଆଖପାଖ ୪ଟି ଗ୍ରାମପଞ୍ଚାୟତର ପ୍ରାୟ ୪୩ଟି ଗାଁର ହଜାର ହଜାର ଜନସାଧାରଣ ସମ୍ପୂର୍ଣ୍ଣ ନିର୍ଭରଶୀଳ। ସ୍ଥାନୀୟ ଲୋକେ ନିଜ ଦୈନନ୍ଦିନ ଆବଶ୍ୟକତା, ହାଟବଜାର, ବ୍ୟାଙ୍କ କାର୍ଯ୍ୟାଳୟ, ପଞ୍ଚାୟତ ସେବାକେନ୍ଦ୍ର ଏବଂ ଛାତ୍ରଛାତ୍ରୀମାନେ ସ୍କୁଲ ଓ କଲେଜ ଯିବା ପାଇଁ ଏହି ରାସ୍ତାକୁ ବ୍ୟବହାର କରିଥାନ୍ତି।ମାତ୍ର ମଝିରେ ଥିବା ଦୁଇଟି କ୍ଷୁଦ୍ର ପୋଲ ଭାଙ୍ଗିରୁଜି ନଷ୍ଟ ହୋଇଯାଇ ଥିବାରୁ ସାମାନ୍ୟ ବର୍ଷରେ ନାଳ ର ଜଳସ୍ତର ବୃଦ୍ଧି ପାଇ ରାସ୍ତା ଉପରେ ପାଣି ଚାଲୁଛି।ଫଳରେ ବାଇକ୍,ସାଇକେଲ ତ ଦୂରର କଥା ଲୋକ ପଦରେ ଚାଲି ଚାଲି ଯିବା ମଧ୍ୟ ଅସମ୍ଭବ ହୋଇପଡ଼ିଛି। ବର୍ଷା ଦିନେ ରାସ୍ତା ବିଚ୍ଛିନ୍ନ ହୋଇଯାଉଥିବାରୁ କୋମଳମତି ଛାତ୍ର ଛାତ୍ରୀ ମାନେ ସ୍କୁଲ ଯାଇ ନପାରି ପାଠ ପଢ଼ାରୁ ବଞ୍ଚିତ ହେଉଛନ୍ତି ।ସବୁଠାରୁ ଗୁରୁତର ବିଷୟ ହେଉଛି, ଏହି ଦୟନୀୟ ରାସ୍ତା ଯୋଗୁଁ ଜରୁରୀକାଳୀନ ସ୍ୱାସ୍ଥ୍ୟସେବା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଗ୍ରାମକୁ ଆମ୍ବୁଲାନ୍ସ ଆସିବା ପାଇଁ ବାଟ ନଥିବାରୁ ଗୁରୁତର ରୋଗୀ ଓ ଗର୍ଭବତୀ ମହିଳାମାନେ ଅତ୍ୟଧିକ ଯନ୍ତ୍ରଣା ଭୋଗୁଛନ୍ତି। ସମୟରେ ରୋଗୀଙ୍କୁ ଖଟିଆ, ଭାର କିମ୍ବା ଅନ୍ୟ କୌଣସି ଉପାୟରେ ପ୍ରାୟ ୨ କିଲୋମିଟରରୁ ଊର୍ଦ୍ଧ୍ୱ କାଦୁଅ ରାସ୍ତା ଅତିକ୍ରମ କରି ମୁଖ୍ୟ ରାସ୍ତା ପର୍ଯ୍ୟନ୍ତ ଆଣିବାକୁ ପଡ଼ୁଛି।
ସ୍ଥାନୀୟ ଅଞ୍ଚଳବାସୀ ଏହି ଜ୍ୱଳନ୍ତ ସମସ୍ୟାର ସ୍ଥାୟୀ ସମାଧାନ ପାଇଁ ଦୃଢ଼ ଦାବି କରିଛନ୍ତି। ଏହି ୨.୬ କିଲୋମିଟର ଦୀର୍ଘ ରାସ୍ତାକୁ ତୁରନ୍ତ ‘ମୁଖ୍ୟମନ୍ତ୍ରୀ ସଡ଼କ ଯୋଜନା’ରେ ସାମିଲ କରି ପକ୍କା ରାସ୍ତା ନିର୍ମାଣ କରାଯାଉ। ଏହାସହିତ ଭାଙ୍ଗି ପଡ଼ିଥିବା ଦୁଇଟି ପୋଲର ପୁନଃନିର୍ମାଣ କରି ଯାତାୟାତ ସୁଗମ କରିବା ପାଇଁ ଅଞ୍ଚଳବାସୀ କେନ୍ଦୁଝର ମାଟିର ପୁଅ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ପ୍ରତ୍ୟକ୍ଷ ହସ୍ତକ୍ଷେପ ଲୋଡ଼ିଛନ୍ତି।
