ଗଞ୍ଜାମ/ପୁରୁଷୋତ୍ତମପୁର,୨୪।୯: ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ନିକଟସ୍ଥ ପ୍ରସିଦ୍ଧ ତାରାତାରିଣୀ ମନ୍ଦିର ନିକଟ ପାହାଡ଼ରୁ ପୁଣି ପଥର ଓ ମାଟି ଖସିଛି। ଲଗାଣ ବର୍ଷା ଯୋଗୁଁ ଗତ ରାତିରେ ଦ୍ୱିତୀୟ ଥର ପାଇଁ ପାହାଡ଼ରୁ ପଥର ଓ ମାଟି ଧସି ରାସ୍ତା ନିକଟରେ ଜମା ହୋଇଥିଲା। ଫଳରେ ଯାତାୟାତ କିଛି ସମୟ ପାଇଁ ବାଧାପ୍ରାପ୍ତ ହୋଇଥିଲା।ପୂର୍ବରୁ ମଧ୍ୟ ଏହି ପାହାଡ଼ରୁ ପଥର ଓ ମାଟି ଖସିଥିଲା। ସେତେବେଳେ ପ୍ରଶାସନ ପକ୍ଷରୁ ରାସ୍ତା ଉପରୁ ପଥର ଓ ମାଟି ହଟାଇ ଯାତାୟାତ ସ୍ୱାଭାବିକ କରାଯାଇଥିଲା। ତେବେ ଗଭୀର ଅବପାତ ପ୍ରଭାବରେ ଲଗାଣ ବର୍ଷା ଜାରି ରହିଥିବାରୁ ପୁଣିଥରେ ପାହାଡ଼ରୁ ବଡ଼ ପଥର ଓ ମାଟି ଖସିଥିବା ଜଣାପଡ଼ିଛି।
ଘଟଣା ସମ୍ପର୍କରେ ସୂଚନା ପାଇ ପୁରୁଷୋତ୍ତମପୁର ତହସିଲଦାର ତଥା ତାରାତାରିଣୀ ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ବିନୋଦ ବେହେରା, ପୁରୁଷୋତ୍ତମପୁର ଆଇଆଇସି କୂଳମଣି ସେଠୀ, ପୂର୍ତ୍ତ ବିଭାଗ ଏସ୍ଡିଓ ସୁରେଶ କୁମାର ମିଶ୍ର ଓ ଜେଇ ସୋନିଆ ପ୍ରଧାନ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ।ପ୍ରଶାସନ ପକ୍ଷରୁ ଜେସିବି ମେସିନ୍ ନିୟୋଜିତ କରାଯାଇ ପାହାଡ଼ରୁ ଖସିଥିବା ପଥର ଓ ମାଟିକୁ ହଟାଇ ରାସ୍ତା ସଫା କରାଯାଇଛି। ବର୍ଷା ଜାରି ରହିଥିବାରୁ ପାହାଡ଼ ଅଞ୍ଚଳରେ ଅଧିକ ସତର୍କତା ଅବଲମ୍ବନ କରାଯାଉଛି।
