ସୁନ୍ଦରଗଡ/ରାଉରକେଲା, ୨୪/୯: ବାବା ବେଶରେ ଆସି ଜଣେ ମହିଳାଙ୍କୁ ଭୟଭୀତ କରି ସୁନା ବଳା ଲୁଟି ନେବା ଅଭିଯୋଗରେ ୩ ଜଣଙ୍କୁ ଗିରଫ କରିଛି ରାଉରକେଲା ସେକ୍ଟର-୭ ଥାନା ପୋଲିସ। ବୁଧବାର ସକାଳେ ଚେଣ୍ଡ ପେଟ୍ରୋଲ ପମ୍ପ ନିକଟରେ ଏହି ଘଟଣା ଘଟିଥିବା ପୋଲିସ ସୂଚନା ଦେଇଛି।ପୋଲିସ ସୂଚନା ଅନୁସାରେ, ସକାଳ ପ୍ରାୟ ୧୧ଟା ୧୫ ମିନିଟରେ ବାବା ବେଶରେ ଥିବା ୩ ଜଣ ବ୍ୟକ୍ତି ସ୍ନେହଲତା ଜେନା ନାମକ ଜଣେ ମହିଳାଙ୍କୁ ଅଟକାଇଥିଲେ। ପ୍ରଥମେ ସେମାନେ ମହିଳାଙ୍କୁ ଟଙ୍କା ମାଗିଥିଲେ। ମହିଳା ଟଙ୍କା ଦେବାକୁ ମନା କରିବା ପରେ ତାଙ୍କୁ ଭୟଭୀତ କରି ଅଳଙ୍କାର ଦେବାକୁ ଧମକ ଦେଇଥିବା ଅଭିଯୋଗ ହୋଇଛି।ଏହାପରେ ଅଭିଯୁକ୍ତମାନେ ମହିଳାଙ୍କ ହାତରୁ ଗୋଟିଏ ସୁନା ବଳା ନେଇ ଘଟଣାସ୍ଥଳରୁ ଖସିଯିବାକୁ ଉଦ୍ୟମ କରିଥିଲେ। ମହିଳା ଜଣକ ଜୋରରେ ପାଟି କରିବାରୁ ଆଖପାଖରେ ଥିବା ଲୋକେ ଘଟଣାସ୍ଥଳରେ ପହଞ୍ଚି ୩ ଜଣଙ୍କୁ କାବୁ କରିଥିଲେ। ପରେ ପୋଲିସକୁ ଖବର ଦିଆଯିବାରୁ ସେକ୍ଟର-୭ ଥାନା ପୋଲିସ ପହଞ୍ଚି ଅଭିଯୁକ୍ତମାନଙ୍କୁ ଥାନାକୁ ନେଇଥିଲା।ସ୍ନେହଲତା ଜେନାଙ୍କ ଲିଖିତ ଅଭିଯୋଗ ଆଧାରରେ ସେକ୍ଟର-୭ ଥାନାରେ କେସ୍ ନମ୍ବର ୨୨୪ରେ ମାମଲା ରୁଜୁ ହୋଇଛି। BNSର ଧାରା ୩୦୮(୫)/୩(୫) ଅନୁଯାୟୀ ମାମଲା ରୁଜୁ କରି ପୋଲିସ ତଦନ୍ତ ଜାରି ରଖିଛି।ଗିରଫ ହୋଇଥିବା ୩ ଅଭିଯୁକ୍ତ ହେଲେ କରମବୀର ନାଥ (୩୦), ଗୋରଖ ନାଥ (୪୫) ଏବଂ ରାଜନ ନାଥ (୨୫)। ପୋଲିସ ଅନୁସାରେ, କରମବୀର ଓ ଗୋରଖ ନାଥ ଦକ୍ଷିଣ-ପୂର୍ବ ଦିଲ୍ଲୀର ଜାଫରପୁର ଥାନା ଅଞ୍ଚଳର ହୋଇଥିବା ବେଳେ ରାଜନ ନାଥ ହରିୟାଣାର ସୋନିପତ ଅଞ୍ଚଳର ବାସିନ୍ଦା।ପୋଲିସ ସେମାନଙ୍କ ନିକଟରୁ ଗୋଟିଏ ସୁନା ବଳା, କମଣ୍ଡଳୁ, ରୁଦ୍ରାକ୍ଷ ମାଳା, ଲୁହା ଚେନ୍, ଲୁହା ଓ ପିତ୍ତଳ ବଳା, ପିତ୍ତଳ ବାଲ୍ଟି, ୨ଟି ବ୍ୟାଗ୍, ଶଙ୍ଖ ଏବଂ ୧,୪୫୦ ଟଙ୍କା ନଗଦ ଜବତ କରିଛି।ଗିରଫ ୩ ଜଣଙ୍କର ପୂର୍ବ ଅପରାଧିକ ରେକର୍ଡ ରହିଛି କି ନାହିଁ ଏବଂ ଏଭଳି ଅନ୍ୟ ଘଟଣାରେ ସେମାନଙ୍କ ସମ୍ପୃକ୍ତି ଅଛି କି ନାହିଁ, ସେନେଇ ପୋଲିସ ଯାଞ୍ଚ କରୁଛି। ଘଟଣାର ଅଧିକ ତଦନ୍ତ ଜାରି ରହିଛି।
