ମୁମ୍ବାଇ, ୩୦/୦୯: ମହାରାଷ୍ଟ୍ରର ଠାଣେରେ ଶିବସେନା ନେତାଙ୍କୁ ଗୁଳି କରି ହତ୍ୟା ଘଟଣାକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ଉଦ୍ଧବ ଠାକରେଙ୍କ ଗୋଷ୍ଠୀର ଶିବସେନା ନେତା ତଥା ମାନପଡା ବିଭାଗ ମୁଖ୍ୟ ପ୍ରଦୀପ ପୂର୍ଣ୍ଣେକରଙ୍କୁ ଦୁର୍ବୃତ୍ତମାନେ ଗୁଳି କରି ହତ୍ୟା କରିଥିବା ଜଣାପଡ଼ିଛି।ମଙ୍ଗଳବାର ରାତିରେ ମନୋରମାନଗର ଅଞ୍ଚଳରେ ଥିବା ପ୍ରଦୀପଙ୍କ କାର୍ଯ୍ୟାଳୟ ନିକଟରେ ଏହି ଘଟଣା ଘଟିଥିଲା। ହେଲମେଟ୍ ଓ ମାସ୍କ ପିନ୍ଧି କିଛି ଦୁର୍ବୃତ୍ତ ସେଠାରେ ପହଞ୍ଚି ତାଙ୍କ ଉପରେ ଏକାଧିକ ରାଉଣ୍ଡ ଗୁଳିମାଡ଼ କରିଥିବା ସୂଚନା ମିଳିଛି।
ଗୁଳିମାଡ଼ ପରେ ହସ୍ପିଟାଲରେ ମୃତ୍ୟୁ
ଗୁଳିମାଡ଼ରେ ପ୍ରଦୀପ ଗୁରୁତର ଆହତ ହୋଇଥିଲେ। ତାଙ୍କ ଶରୀରରେ ଦୁଇଟି ଗୁଳି ବାଜିଥିବା ଜଣାପଡ଼ିଛି। ତାଙ୍କୁ ତୁରନ୍ତ ନିକଟସ୍ଥ ହସ୍ପିଟାଲକୁ ନିଆଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ପୋଲିସର ପ୍ରାଥମିକ ସୂଚନା ଅନୁସାରେ, ଦୁଇ ଜଣ ଦୁର୍ବୃତ୍ତ ଅଫିସ ଭିତରକୁ ପଶି ପ୍ରଦୀପଙ୍କ ଉପରେ ଗୁଳି ଚଳାଇବା ସହ ଧାରୁଆ ଅସ୍ତ୍ରରେ ମଧ୍ୟ ଆକ୍ରମଣ କରିଥିଲେ।
ହତ୍ୟାର କାରଣ ଅସ୍ପଷ୍ଟ, ତଦନ୍ତ ଜାରି
ଶିବସେନା ନେତା ପ୍ରଦୀପ ପୂର୍ଣ୍ଣେକରଙ୍କୁ କେଉଁ କାରଣରୁ ହତ୍ୟା କରାଗଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଘଟଣାରେ କେତେଜଣ ସାମିଲ ଥିଲେ ଏବଂ ସେମାନଙ୍କ ପାଖରେ କେଉଁ ଅସ୍ତ୍ର ଥିଲା, ସେନେଇ ପୋଲିସ ତଦନ୍ତ ଜାରି ରଖିଛି।
ଅଭିଯୁକ୍ତମାନେ ଘଟଣା ପରେ ଫେରାର ହୋଇଯାଇଥିବା ଜଣାପଡ଼ିଛି। ସେମାନଙ୍କୁ ଧରିବା ପାଇଁ ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଛି।
ହତ୍ୟାକାଣ୍ଡକୁ ବିରୋଧ, ଦୋକାନ-ବଜାର ବନ୍ଦ
ଶିବସେନା ନେତାଙ୍କ ହତ୍ୟାକାଣ୍ଡକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ଘଟଣାର ପ୍ରତିବାଦରେ ବୁଧବାର ସ୍ଥାନୀୟ ଅଞ୍ଚଳରେ ଦୋକାନ-ବଜାର ବନ୍ଦ ରହିଛି। ସୁରକ୍ଷା ଦୃଷ୍ଟିରୁ ସ୍କୁଲ ଓ କଲେଜଗୁଡ଼ିକୁ ମଧ୍ୟ ବନ୍ଦ ରଖାଯାଇଥିବା ସୂଚନା ମିଳିଛି।
ଠାଣେ ଶିବସେନା ନେତା ହତ୍ୟା ଘଟଣା ପରେ ଅଞ୍ଚଳରେ ପୋଲିସ ସୁରକ୍ଷା ବଢ଼ାଯାଇଛି।
