କେନ୍ଦୁଝର/ପାଟଣା, ୨୯/୯: କେନ୍ଦୁଝର ଜିଲ୍ଲା ସାହାରପଡ଼ା ବ୍ଲକ କପୁଣ୍ଡି ଗ୍ରାମପଞ୍ଚାୟତ ଅନ୍ତର୍ଗତ କପୁଣ୍ଡି ଗ୍ରାମର ଉନ୍ନୀତ ଉଚ୍ଚ ପ୍ରାଥମିକ ବିଦ୍ୟାଳୟରେ ଭିତ୍ତିଭୂମି ସମସ୍ୟା ଯୋଗୁଁ ପାଠପଢ଼ା ପ୍ରଭାବିତ ହେଉଥିବା ଅଭିଯୋଗ ହୋଇଛି। ଜରାଜୀର୍ଣ୍ଣ ଶ୍ରେଣୀଗୃହ ଓ କୋଠରୀ ଅଭାବ ଯୋଗୁଁ ଛାତ୍ରଛାତ୍ରୀଙ୍କୁ ବାରଣ୍ଡାରେ ବସି ପାଠ ପଢ଼ିବାକୁ ପଡ଼ୁଥିବା ଜଣାପଡ଼ିଛି।ସୂଚନା ଅନୁଯାୟୀ, ୧୯୫୪ ମସିହାରୁ ଚାଲିଆସୁଥିବା ଏହି ବିଦ୍ୟାଳୟରେ ବର୍ତ୍ତମାନ ୧୦୯ ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି। ଶିଶୁ ବାଟିକାକୁ ମିଶାଇ ବିଦ୍ୟାଳୟରେ ମୋଟ ୮ଟି ଶ୍ରେଣୀ ରହିଛି। କିନ୍ତୁ ଏତେ ସଂଖ୍ୟକ ଛାତ୍ରଛାତ୍ରୀଙ୍କ ପାଠପଢ଼ା ପାଇଁ ବ୍ୟବହାରଯୋଗ୍ୟ ମାତ୍ର ୨ଟି କୋଠରୀ ରହିଥିବା ଜଣାପଡ଼ିଛି।ବିଦ୍ୟାଳୟର ଅନ୍ୟ କୋଠରୀଗୁଡ଼ିକ ଜରାଜୀର୍ଣ୍ଣ ହୋଇପଡ଼ିଥିବାରୁ ସେଗୁଡ଼ିକ ବ୍ୟବହାର କରିବା ସମ୍ଭବ ହେଉନାହିଁ। ବଡ଼ ଶ୍ରେଣୀଗୃହଗୁଡ଼ିକ ମଧ୍ୟ ନଷ୍ଟ ହୋଇଥିବା ଅଭିଯୋଗ ରହିଛି। ଫଳରେ ୮ଟି ଶ୍ରେଣୀର ଛାତ୍ରଛାତ୍ରୀଙ୍କୁ ମାତ୍ର ୨ଟି କୋଠରୀ ଉପରେ ନିର୍ଭର କରିବାକୁ ପଡ଼ୁଛି।
ବିଦ୍ୟାଳୟରେ ମୋଟ ୫ ଜଣ ଶିକ୍ଷକ ରହିଛନ୍ତି। ଛାତ୍ରଛାତ୍ରୀଙ୍କ ସଂଖ୍ୟା, ଶ୍ରେଣୀ ସଂଖ୍ୟା ଓ ଉପଲବ୍ଧ ଶ୍ରେଣୀଗୃହ ମଧ୍ୟରେ ଥିବା ଅସମନ୍ୱୟ ଏବେ ବିଦ୍ୟାଳୟ ପାଇଁ ବଡ଼ ସମସ୍ୟା ହୋଇଛି। ବିଶେଷକରି ଜରାଜୀର୍ଣ୍ଣ କୋଠରୀଗୁଡ଼ିକରେ ପାଠପଢ଼ା କରାଇବା ସୁରକ୍ଷିତ କି ନୁହେଁ, ତାହା ନେଇ ମଧ୍ୟ ପ୍ରଶ୍ନ ଉଠିଛି।ଏହି ପରିସ୍ଥିତିରେ ବିଦ୍ୟାଳୟର ଭିତ୍ତିଭୂମିର ତୁରନ୍ତ ଯାଞ୍ଚ କରାଯାଇ ଜରାଜୀର୍ଣ୍ଣ କୋଠରୀଗୁଡ଼ିକର ମରାମତି କିମ୍ବା ଆବଶ୍ୟକ ସ୍ଥାନରେ ନୂତନ ଶ୍ରେଣୀଗୃହ ନିର୍ମାଣ କରିବାକୁ ଅଭିଭାବକ ଓ ସ୍ଥାନୀୟ ଲୋକେ ଦାବି କରିଛନ୍ତି।
ପୁରାତନ ଏହି ବିଦ୍ୟାଳୟର ଭିତ୍ତିଭୂମି ସମସ୍ୟାର ସ୍ଥାୟୀ ସମାଧାନ କରାଗଲେ ଛାତ୍ରଛାତ୍ରୀଙ୍କୁ ସୁରକ୍ଷିତ ଓ ଉପଯୁକ୍ତ ପରିବେଶରେ ପାଠପଢ଼ିବାର ସୁଯୋଗ ମିଳିପାରିବ ବୋଲି ସ୍ଥାନୀୟ ମହଲରେ ମତ ପ୍ରକାଶ ପାଇଛି।
