ପୁରୀ: ୯/୯: ପୁରୀ ଜିଲ୍ଲା ସାକ୍ଷୀଗୋପାଳ କମ୍ୟୁନିଟି ହେଲ୍ଥ ସେଣ୍ଟର (CHC)ରେ ବିଦ୍ୟୁତ୍ ବିଭ୍ରାଟକୁ ନେଇ ରୋଗୀ ଓ ସମ୍ପର୍କୀୟମାନେ ହଇରାଣ ହୋଇଥିବା ଅଭିଯୋଗ ହୋଇଛି। ପ୍ରାୟ ଏକ ଘଣ୍ଟା ଧରି ହସ୍ପିଟାଲର କିଛି ଅଂଶ ଅନ୍ଧାରରେ ରହିଥିବା ବେଳେ ମୋବାଇଲ୍ ଫୋନ୍ର ଫ୍ଲାସ୍ ଲାଇଟ୍ରେ ରୋଗୀଙ୍କ ଚିକିତ୍ସା ଓ ଡ୍ରେସିଂ କରାଯାଇଥିବା ଜଣାପଡ଼ିଛି।ବିଦ୍ୟୁତ୍ ଯୋଗାଣ ବନ୍ଦ ହେବା ଯୋଗୁଁ ହସ୍ପିଟାଲର ଡ୍ରେସିଂ ରୁମ୍, ପୁରୁଷ ୱାର୍ଡ ଓ ଡାଇରିଆ ୱାର୍ଡ ପ୍ରଭାବିତ ହୋଇଥିଲା। ବିଦ୍ୟୁତ୍ ନଥିବା ସମୟରେ ଆବଶ୍ୟକ ଚିକିତ୍ସା ଓ ଡ୍ରେସିଂ କାର୍ଯ୍ୟ ପାଇଁ ମେଡିକାଲ୍ କର୍ମଚାରୀମାନେ ମୋବାଇଲ୍ ଫୋନ୍ର ଫ୍ଲାସ୍ ଲାଇଟ୍ର ସହାୟତା ନେଇଥିଲେ।ହସ୍ପିଟାଲରେ ଡିଜିଟାଲ୍ ଜେନେରେଟର ଥିଲେ ମଧ୍ୟ ବିଦ୍ୟୁତ୍ କାଟ୍ ସମୟରେ ଏହା ବ୍ୟବହାର ହୋଇନଥିବା ଅଭିଯୋଗ ହୋଇଛି। ଜେନେରେଟର ଚଳାଇବା ପାଇଁ ନିୟମିତ କର୍ମଚାରୀ ନଥିବାରୁ ଏହା ଚାଲୁ କରାଯାଇପାରିନଥିବା କୁହାଯାଇଛି।ତେବେ ମାତୃତ୍ୱ ଓ ମହିଳା ୱାର୍ଡରେ ବିଦ୍ୟୁତ୍ ବିଭ୍ରାଟର ବିଶେଷ ପ୍ରଭାବ ପଡ଼ିନଥିଲା। ଏହି ୱାର୍ଡଗୁଡ଼ିକରେ ଇନଭର୍ଟର ସୁବିଧା ଥିବାରୁ ବିଦ୍ୟୁତ୍ କାଟ୍ ସମୟରେ ବ୍ୟାକ୍ଅପ୍ ପାୱାର ମିଳିଥିଲା। ଅନ୍ୟ ୱାର୍ଡଗୁଡ଼ିକରେ ଇନଭର୍ଟର ସୁବିଧା ନଥିବାରୁ କିଛି ସମୟ ପାଇଁ ଅନ୍ଧାର ରହିଥିଲା।ମେଡିକାଲ୍ ଅଥରିଟି ଦେବାଶିଷ ନାୟକଙ୍କ ସୂଚନା ଅନୁସାରେ, ହସ୍ପିଟାଲର ବିଦ୍ୟୁତ୍ ତାର ଓ ବିଦ୍ୟୁତ୍ ବ୍ୟବସ୍ଥା ପୁରୁଣା ହୋଇଯାଇଛି। ଗତ ଦୁଇ ମାସ ଧରି ହସ୍ପିଟାଲର ସମଗ୍ର ବିଦ୍ୟୁତ୍ ବ୍ୟବସ୍ଥାର ନବୀକରଣ କାମ ଚାଲିଛି। ଏହି କାମ ଯୋଗୁଁ କେତେକ ଫେଜ୍ରେ ବିଦ୍ୟୁତ୍ ଯୋଗାଣ ପ୍ରଭାବିତ ହୋଇଥିବା ଆଶଙ୍କା କରାଯାଉଛି। ଏଥିସହ ଇନଭର୍ଟର ମଧ୍ୟ କାମ କରିନଥିବା ସେ କହିଛନ୍ତି।ସାକ୍ଷୀଗୋପାଳ CHCରେ ବିଦ୍ୟୁତ୍ ବିଭ୍ରାଟ ଯୋଗୁଁ ରୋଗୀଙ୍କ ଚିକିତ୍ସା ଯେପରି ପ୍ରଭାବିତ ନହୁଏ, ସେଥିପାଇଁ ତୁରନ୍ତ ବିଦ୍ୟୁତ୍ ସମସ୍ୟାର ସମାଧାନ ସହ ବିକଳ୍ପ ବିଦ୍ୟୁତ୍ ବ୍ୟବସ୍ଥାକୁ ସୁଦୃଢ଼ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଖୁବ୍ଶୀଘ୍ର ସମସ୍ୟାର ସମାଧାନ ପାଇଁ ଆବଶ୍ୟକ ପଦକ୍ଷେପ ନିଆଯିବ ବୋଲି ମେଡିକାଲ୍ ଅଧିକାରୀମାନେ ଆଶ୍ୱାସନ ଦେଇଛନ୍ତି।
