ଫୁଲବାଣୀ/ଚକାପାଦ/ସାରଙ୍ଗଡ଼, ୨୦/୦୯: ନିଜକୁ ମୋଟର ଯାନ ନିରୀକ୍ଷକ (MVI) ଭାବେ ପରିଚୟ ଦେଇ ମହିଳାଙ୍କୁ ବିବାହ ପ୍ରସ୍ତାବ ଦେବା ସହ ସରକାରୀ ଚାକିରି କରାଇଦେବାର ପ୍ରଲୋଭନ ଦେଇ ଲକ୍ଷାଧିକ ଟଙ୍କା ଠକେଇ ଅଭିଯୋଗରେ ଜଣେ ଯୁବକଙ୍କୁ ଗିରଫ କରିଛି ସାରଙ୍ଗଡ଼ ପୁଲିସ। ଅଭିଯୁକ୍ତ ଜଣକ ହେଲେ ଚକାପାଦ ଥାନା ଅନ୍ତର୍ଗତ ତୋଟାସାହିର ଧର୍ମେନ୍ଦ୍ର କୁମାର ବେହେରା (୩୦)।ପୁଲିସ ସୂଚନା ଅନୁସାରେ, ଧର୍ମେନ୍ଦ୍ର ନିଜର ପରିଚୟ ଲୁଚାଇ ନିଖିଲ କୁମାର ପଟ୍ଟନାୟକ ଓ ଧର୍ମେଶ କୁମାର ପଟ୍ଟନାୟକ ନାମରେ ଲୋକଙ୍କୁ ପରିଚୟ ଦେଉଥିଲେ। ନିଜକୁ MVI ବୋଲି କହି ମହିଳାଙ୍କ ପରିବାରର ବିଶ୍ୱାସ ଜିତୁଥିଲେ। ଏହାପରେ ବରିଷ୍ଠ ସରକାରୀ ଅଧିକାରୀଙ୍କ ସହ ସମ୍ପର୍କ ଥିବା ଏବଂ ସରକାରୀ ଚାକିରି କରାଇଦେବାର ପ୍ରଭାବ ଥିବା କହି ଟଙ୍କା ନେଉଥିବା ଅଭିଯୋଗ ରହିଛି।ଚାକିରି ଦେବା ନାଁରେ ୭ ଲକ୍ଷରୁ ଅଧିକ ଟଙ୍କା ଠକେଇ ପ୍ରାୟ ଏକ ବର୍ଷ ପୂର୍ବେ ସାରଙ୍ଗଡ଼ ଅଞ୍ଚଳର ଜଣେ ମହିଳାଙ୍କୁ ଧର୍ମେନ୍ଦ୍ର ବିବାହ ପ୍ରସ୍ତାବ ଦେଇଥିଲେ। ନିଜକୁ MVI ବୋଲି ପରିଚୟ ଦେବା ସହ ସରକାରୀ ଚାକିରି କରାଇଦେବାକୁ କହି ମହିଳାଙ୍କ ବିଶ୍ୱାସ ହାସଲ କରିଥିଲେ।ପୁଲିସର ସୂଚନା ଅନୁସାରେ, ଚାକିରି ପାଇବା ଆଶାରେ ମହିଳା ଜଣକ ଅଭିଯୁକ୍ତଙ୍କୁ ୭ ଲକ୍ଷ ୧୮ ହଜାର ୮୫୧ ଟଙ୍କା ଦେଇଥିଲେ। କିନ୍ତୁ ପରେ ଚାକିରି ନ ହେବାରୁ ମହିଳା ଟଙ୍କା ଫେରସ୍ତ ମାଗିଥିଲେ। ଏହାପରେ ଅଭିଯୁକ୍ତ ଧରାଛୁଆଁ ଦେଇନଥିବା ଅଭିଯୋଗ ହୋଇଛି।ଏନେଇ ମହିଳା ଜଣକ ସେପ୍ଟେମ୍ବର ୧୭ ତାରିଖରେ ସାରଙ୍ଗଡ଼ ଥାନାରେ ଲିଖିତ ଅଭିଯୋଗ କରିଥିଲେ।ନକଲି MVI ସାଜି ଯାଞ୍ଚ କରୁଥିବା ବେଳେ ଧରିଲା ପୁଲିସ ଅଭିଯୋଗ ପରେ ସାରଙ୍ଗଡ଼ ପୁଲିସ ଘଟଣାର ତଦନ୍ତ ଆରମ୍ଭ କରିଥିଲା। ଶନିବାର ବିଶ୍ୱସ୍ତ ସୂତ୍ରରୁ ସୂଚନା ପାଇ ପାବୁରିଆ ଛକ ନିକଟରେ ଚଢ଼ାଉ କରିଥିଲା ପୁଲିସ।ସେଠାରେ ଧର୍ମେନ୍ଦ୍ର ନିଜକୁ ନକଲି MVI ଭାବେ ପରିଚୟ ଦେଇ ଯାନବାହନ ଯାଞ୍ଚ କରୁଥିବା ବେଳେ ପୁଲିସ ତାଙ୍କୁ କାବୁ କରିଥିଲା। ପରେ ଚକାପାଦ ପୁଲିସର ସହାୟତାରେ ଅଭିଯୁକ୍ତଙ୍କ ଘରେ ଚଢ଼ାଉ କରି ବିଭିନ୍ନ ସାମଗ୍ରୀ ଜବତ କରାଯାଇଥିଲା।୨ଟି କାର୍, MVI ୟୁନିଫର୍ମ ଓ ନକଲି ପରିଚୟପତ୍ର ଜବତ ପୁଲିସ ଅଭିଯୁକ୍ତଙ୍କ ନିକଟରୁ ୨ଟି କାର୍, ପରିବହନ ବିଭାଗର ୟୁନିଫର୍ମ, ନକଲି ନେମ୍ପ୍ଲେଟ୍, ନକଲି ପରିଚୟପତ୍ର, ବ୍ୟାଙ୍କ ପାସ୍ବୁକ୍ ଓ ଅନ୍ୟାନ୍ୟ କାଗଜପତ୍ର ଜବତ କରିଛି।ପୁଲିସର ପ୍ରାଥମିକ ତଦନ୍ତ ଅନୁସାରେ, ଧର୍ମେନ୍ଦ୍ର MVI ୟୁନିଫର୍ମ ପିନ୍ଧିବା ସହ ନିଜ ଗାଡ଼ିରେ କମଳା ରଙ୍ଗର ଲାଇଟ୍ ବ୍ୟବହାର କରୁଥିଲେ। ଏହା ମାଧ୍ୟମରେ ସେ ନିଜକୁ ଜଣେ ସରକାରୀ ମୋଟର ଯାନ ନିରୀକ୍ଷକ ଭାବେ ଦର୍ଶାଉଥିବା ପୁଲିସ କହିଛି।କନ୍ଧମାଳ ଓ ଗଞ୍ଜାମରେ ମଧ୍ୟ ଠକେଇର ତଦନ୍ତ
ପୁଲିସର ପ୍ରାଥମିକ ତଦନ୍ତରୁ ଧର୍ମେନ୍ଦ୍ର କନ୍ଧମାଳ ଓ ଗଞ୍ଜାମ ଜିଲ୍ଲାର ବିଭିନ୍ନ ସ୍ଥାନରେ ନକଲି ଅଫିସର ସାଜି ଯାନବାହନ ଯାଞ୍ଚ କରୁଥିବା ସୂଚନା ମିଳିଛି। ଏଥିସହ ବିଭିନ୍ନ ସରକାରୀ କାର୍ଯ୍ୟାଳୟକୁ ଯାଇ ନିଜକୁ ସରକାରୀ ଅଧିକାରୀ ବୋଲି ପରିଚୟ ଦେଇ ସୁବିଧା ହାସଲ କରୁଥିବା ଅଭିଯୋଗର ମଧ୍ୟ ତଦନ୍ତ ଚାଲିଛି।ଏକାଧିକ ମହିଳାଙ୍କୁ ବିବାହ ପ୍ରସ୍ତାବ ଦେଇ ଆର୍ଥିକ ଠକେଇ କରିଥିବା ଅଭିଯୋଗ ମଧ୍ୟ ତଦନ୍ତ ବେଳେ ସାମ୍ନାକୁ ଆସିଥିବା ପୁଲିସ ପକ୍ଷରୁ କୁହାଯାଇଛି।ଆହୁରି ଠକେଇର ତଥ୍ୟ ଖୋଜୁଛି ପୁଲିସ ଠକେଇ ମାଧ୍ୟମରେ ମିଳିଥିବା ଟଙ୍କା ଅଭିଯୁକ୍ତ ନିଜର ବିଳାସପୂର୍ଣ୍ଣ ଜୀବନଯାପନରେ ବ୍ୟବହାର କରୁଥିବା ପୁଲିସ କହିଛି। ଅଭିଯୁକ୍ତ କେତେ ଟଙ୍କା ଠକେଇ କରିଛନ୍ତି ଏବଂ ଏହି ଘଟଣାରେ ଆଉ କେତେଜଣ ଲୋକ ସମ୍ପୃକ୍ତ ଅଛନ୍ତି, ସେନେଇ ପୁଲିସ ତଦନ୍ତ ଜାରି ରଖିଛି।କନ୍ଧମାଳ ଏସ୍ପି ରମେନ୍ଦ୍ର ପ୍ରସାଦ କହିଛନ୍ତି, ଏଭଳି ଠକେଇର ଶିକାର
ହୋଇଥିବା ଅନ୍ୟ କୌଣସି ବ୍ୟକ୍ତି ଥିଲେ ସେମାନେ ନିକଟସ୍ଥ ଥାନାରେ ଅଭିଯୋଗ କରନ୍ତୁ। ଅଭିଯୋଗ ମିଳିଲେ ପୁଲିସ ଆଇନ ଅନୁସାରେ ତଦନ୍ତ ଓ କାର୍ଯ୍ୟାନୁଷ୍ଠାନ ଗ୍ରହଣ କରିବ।ସାମ୍ବାଦିକ ସମ୍ମିଳନୀରେ ଘୁ. ଉଦୟଗିରିର ଦାୟିତ୍ୱରେ ଥିବା ଏସ୍ଡିପିଓ ବିବେକାନନ୍ଦ ସ୍ୱାଇଁ, ସାରଙ୍ଗଡ଼ ଥାନା ଅଧିକାରୀ ସ୍ମିତା ଜେନା ଏବଂ ରାଇକିଆ ଥାନା ଅଧିକାରୀ ସ୍ୱର୍ଣ୍ଣଲତା ପାତ୍ର ଉପସ୍ଥିତ ଥିଲେ।
