କେନ୍ଦୁଝର/ପାଟଣା, ୯/୧୦: କେନ୍ଦୁଝର ଜିଲ୍ଲା ପାଟଣାସ୍ଥିତ ସ୍ୱାମପାଟଣା ଆଞ୍ଚଳିକ ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନକୁ ନେଇ ଉତ୍ସାହ ଦେଖାଦେଇଛି। ଶୁକ୍ରବାର ନିର୍ଦ୍ଧାରିତ ତାରିଖ ଅନୁଯାୟୀ ବିଭିନ୍ନ ପଦବୀ ପାଇଁ ଛାତ୍ରଛାତ୍ରୀମାନେ ନିଜ ନିଜର ନାମାଙ୍କନ ପତ୍ର ଦାଖଲ କରିଛନ୍ତି। ନିର୍ବାଚନ ପ୍ରକ୍ରିୟାକୁ ଶାନ୍ତିଶୃଙ୍ଖଳାର ସହ ସମ୍ପନ୍ନ କରିବା ପାଇଁ କଲେଜ ପରିସରରେ କଡ଼ା ପୁଲିସ ସୁରକ୍ଷା ବ୍ୟବସ୍ଥା କରାଯାଇଥିଲା।
ପୁଲିସ ସୁରକ୍ଷା ମଧ୍ୟରେ ନାମାଙ୍କନ ଦାଖଲ
ଛାତ୍ର ସଂସଦ ନିର୍ବାଚନକୁ ନେଇ କଲେଜ ପରିସରରେ ଶତାଧିକ ଛାତ୍ରଛାତ୍ରୀଙ୍କ ଗହଳି ଲାଗିଥିଲା। ନିର୍ବାଚନ ସମୟରେ କୌଣସି ଅପ୍ରୀତିକର ପରିସ୍ଥିତି ଏଡ଼ାଇବା ଏବଂ ଶାନ୍ତି ବଜାୟ ରଖିବା ପାଇଁ ପୁଲିସ ପ୍ରଶାସନ ପକ୍ଷରୁ ସୁରକ୍ଷାକୁ କଡ଼ାକଡ଼ି କରାଯାଇଥିଲା।ପାଟଣା ଥାନାଧିକାରୀ କିରଣ ପ୍ରସାଦ ସାହୁଙ୍କ ନେତୃତ୍ୱରେ ପୁଲିସ ମୁତୟନ ହୋଇଥିଲେ। ପୁଲିସ ସୁରକ୍ଷା ମଧ୍ୟରେ ପ୍ରାର୍ଥୀମାନେ କଲେଜ କାଉଣ୍ଟରରେ ପହଞ୍ଚି ନିଜ ନାମାଙ୍କନ ପତ୍ର ଯାଞ୍ଚ କରାଇବା ସହ ଦାଖଲ କରିଥିଲେ।
ସଭାପତି ପଦ ପାଇଁ ୪ ପ୍ରାର୍ଥୀଙ୍କ ନାମାଙ୍କନ କାଏମ
ନାମାଙ୍କନ ପତ୍ର ଯାଞ୍ଚ ପରେ ସଭାପତି ପଦ ପାଇଁ ୪ ଜଣ ପ୍ରାର୍ଥୀଙ୍କ ନାମାଙ୍କନ କାଏମ ରହିଛି। ସେମାନେ ହେଲେ ସଲୋନୀ ତ୍ରିପାଠୀ, ଶୁଭମ କୁମାର ମହାନ୍ତ, ପୁଣ୍ୟବନ୍ତ ପ୍ରଧାନ ଓ ପୂର୍ଣ୍ଣିମା ବେହେରା।ସେହିପରି ଉପସଭାପତି ପଦ ପାଇଁ ତ୍ରିଦେବ ମହାନ୍ତ ଓ ବିଶ୍ୱପ୍ରକାଶ ନାୟକ ଏବଂ ସାଧାରଣ ସମ୍ପାଦକ ପଦ ପାଇଁ ଆକାଶ ପାତ୍ର ଓ ଅଙ୍କିତା ବାରିକ ପ୍ରାର୍ଥୀ ହୋଇଛନ୍ତି।ଅନ୍ୟ ପଦବୀଗୁଡ଼ିକ ମଧ୍ୟରେ ସହ ସମ୍ପାଦକ ପାଇଁ ୨ ଜଣ, ଡିଏସଏ ସମ୍ପାଦକ ପାଇଁ ୨ ଜଣ, ଆସିଷ୍ଟାଣ୍ଟ ଡିଏସଏ ପାଇଁ ୨ ଜଣ, କ୍ରୀଡ଼ା ସମ୍ପାଦକ ପାଇଁ ୨ ଜଣ, ସହ କ୍ରୀଡ଼ା ସମ୍ପାଦକ ପାଇଁ ୧ ଜଣ, ଡ୍ରାମାଟିକ ସମ୍ପାଦକ ପାଇଁ ୩ ଜଣ ଏବଂ ସହ ଡ୍ରାମାଟିକ ସମ୍ପାଦକ ପଦ ପାଇଁ ୨ ଜଣ ପ୍ରାର୍ଥୀ ନାମାଙ୍କନ ଦାଖଲ କରିଛନ୍ତି।
ଆସନ୍ତାକାଲି ପ୍ରାର୍ଥୀପତ୍ର ପ୍ରତ୍ୟାହାର
ଆସନ୍ତାକାଲି ପ୍ରାର୍ଥୀପତ୍ର ପ୍ରତ୍ୟାହାର ସହ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ଏହାକୁ ନେଇ ପ୍ରାର୍ଥୀମାନେ ନିଜ ନିଜ ସମର୍ଥକଙ୍କ ସହ ନିର୍ବାଚନୀ ପ୍ରସ୍ତୁତି ଓ ପ୍ରଚାର କାର୍ଯ୍ୟ ଆରମ୍ଭ କରିଦେଇଛନ୍ତି।କଲେଜ ଛାତ୍ର ସଂସଦ ନିର୍ବାଚନକୁ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ କରିବା ପାଇଁ କଲେଜ କର୍ତ୍ତୃପକ୍ଷ ଓ ସ୍ଥାନୀୟ ପ୍ରଶାସନ ସଜାଗ ରହିଛନ୍ତି। ଆଗାମୀ ଦିନରେ ନିର୍ବାଚନୀ ମାହୋଲ ଆହୁରି ସରଗରମ ହେବା ଆଶା କରାଯାଉଛି।
