କେନ୍ଦୁଝର, ୨୮/୧୦: କେନ୍ଦୁଝରସ୍ଥିତ ଓଡ଼ିଶା ସ୍କୁଲ୍ ଅଫ୍ ମାଇନିଂ ଇଞ୍ଜିନିୟରିଂ (ଓଏସ୍ଏମ୍ଇ) କଲେଜରେ ଛାତ୍ରଙ୍କୁ ଆକ୍ରମଣ ଅଭିଯୋଗକୁ ନେଇ ଚର୍ଚ୍ଚା ଜୋର ଧରିଛି। ଅଟୋମୋବାଇଲ ବିଭାଗର ଦ୍ୱିତୀୟ ବର୍ଷର ଜଣେ ଛାତ୍ର ପ୍ରଥମ ବର୍ଷ ଡ୍ରିଲିଂ ବିଭାଗର ଛାତ୍ର ସୌମ୍ୟରଞ୍ଜନ ମହାନ୍ତ (୧୯)ଙ୍କୁ ଲୁହା ରଡ୍ରେ ଆକ୍ରମଣ କରିବା ସହ ମାଡ଼ ମାରିଥିବା ଅଭିଯୋଗ ହୋଇଛି। ଏହି ଘଟଣାରେ ସୌମ୍ୟରଞ୍ଜନ ଗୁରୁତର ଆହତ ହୋଇ କେନ୍ଦୁଝର ଧରଣୀଧର ମେଡିକାଲ କଲେଜ ଓ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।ଆହତ ଛାତ୍ରଙ୍କ ଘର ପାଟଣା ବ୍ଲକର ବାଲିବନ୍ଧ ଗ୍ରାମରେ। ଆକ୍ରମଣରେ ତାଙ୍କ ମୁଣ୍ଡ ଫାଟିବା ସହ ଡାହାଣ ହାତ ଭାଙ୍ଗିଯାଇଥିବା ଜଣାପଡ଼ିଛି।
ହଷ୍ଟେଲ ସମ୍ମୁଖରେ ଆକ୍ରମଣ ଅଭିଯୋଗ
ଆହତ ଛାତ୍ରଙ୍କ ପିତା ରଞ୍ଜିତ ମହାନ୍ତଙ୍କ ଅଭିଯୋଗ ଅନୁଯାୟୀ, ଗତ ୨୬ ତାରିଖ ଅପରାହ୍ନ ପ୍ରାୟ ୨ଟା ସମୟରେ ଖଣ୍ଡାଧାର ହଷ୍ଟେଲ ସମ୍ମୁଖରେ ଏହି ଘଟଣା ଘଟିଥିଲା। ପୂର୍ବ ଯୋଜନା ଅନୁଯାୟୀ ତାଙ୍କ ପୁଅଙ୍କୁ ଆକ୍ରମଣ କରାଯାଇଥିବା ସେ ଅଭିଯୋଗ କରିଛନ୍ତି।ଏହି ଘଟଣାକୁ ନେଇ ରଞ୍ଜିତ ମହାନ୍ତ କେନ୍ଦୁଝର ଟାଉନ ଥାନା ଓ କଲେଜ ଅଧ୍ୟକ୍ଷଙ୍କ ନିକଟରେ ଲିଖିତ ଅଭିଯୋଗ କରିବା ସହ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ପୋଲିସ ତଦନ୍ତ, କଲେଜର ପ୍ରତିକ୍ରିୟାକୁ ଅପେକ୍ଷା
ଘଟଣା ସମ୍ପର୍କରେ ଟାଉନ ପୋଲିସ ତଦନ୍ତ ଆରମ୍ଭ କରିଥିବା ସୂଚନା ମିଳିଛି। ଅନ୍ୟପକ୍ଷରେ, ଏହି ଘଟଣା ନେଇ କଲେଜ କର୍ତ୍ତୃପକ୍ଷଙ୍କ ପ୍ରତିକ୍ରିୟା ଏଯାଏଁ ମିଳିପାରିନାହିଁ।ଶିକ୍ଷାନୁଷ୍ଠାନ ପରିସରରେ ଛାତ୍ରଙ୍କ ସୁରକ୍ଷା ଓ ଶୃଙ୍ଖଳାକୁ ନେଇ ଏହି ଘଟଣା ପ୍ରଶ୍ନ ଉଠାଇଛି। ଘଟଣାର ନିରପେକ୍ଷ ତଦନ୍ତ କରାଯାଇ ଦୋଷୀଙ୍କ ବିରୋଧରେ ଆଇନ ଅନୁଯାୟୀ ପଦକ୍ଷେପ ନିଆଯିବାକୁ ଦାବି ହେଉଛି।
