ନୂଆଦିଲ୍ଲୀ: କନ୍ନଡ଼ ଅଭିନେତା ସତୀଶ ନିନାସମ ଓ ଅଭିନେତ୍ରୀ ରଚିତା ରାମଙ୍କ ଅଭିନୀତ ଚଳଚ୍ଚିତ୍ର ‘ଅଯୋଗ୍ୟ ୨’ ଥିଏଟରରେ ୫୦ ଦିନ ପୂରା କରିଛି। ମହେଶ କୁମାରଙ୍କ ନିର୍ଦ୍ଦେଶନାରେ ନିର୍ମିତ ଏହି କନ୍ନଡ଼ ଫିଲ୍ମକୁ ଦର୍ଶକଙ୍କଠାରୁ ଭଲ ପ୍ରତିକ୍ରିୟା ମିଳିଛି।ବର୍ତ୍ତମାନ ସମୟରେ ଅଧିକାଂଶ ଫିଲ୍ମ ଥିଏଟରରେ ଅଳ୍ପ ସମୟ ଚାଲୁଥିବା ବେଳେ ‘ଅଯୋଗ୍ୟ ୨’ର ୫୦ ଦିନର ଥିଏଟର ରନ୍ ଫିଲ୍ମର ପୂରା ଟିମ୍ ପାଇଁ ଏକ ବିଶେଷ ଉପଲବ୍ଧି ହୋଇଛି। ରାଜ୍ୟର ପ୍ରାୟ ୨୫ଟି ପରଦାରେ ଏହି ଫିଲ୍ମ ଏବେ ମଧ୍ୟ ପ୍ରଦର୍ଶିତ ହେଉଥିବା କୁହାଯାଇଛି।ଏହି ସଫଳତାକୁ ପାଳନ କରିବା ପାଇଁ ଅଭିନେତା ସତୀଶ ନିନାସମ, ନିର୍ଦ୍ଦେଶକ ମହେଶ କୁମାରଙ୍କ ସମେତ ଫିଲ୍ମର ଅନ୍ୟ ସଦସ୍ୟମାନେ ମହୀଶୂରର ଲିଡୋ ଥିଏଟରରେ ପହଞ୍ଚିଥିଲେ। ସେଠାରେ ପ୍ରଶଂସକଙ୍କ ସହ କେକ୍ କାଟି ‘ଅଯୋଗ୍ୟ ୨’ର ୫୦ ଦିନ ପୂର୍ତ୍ତି ପାଳନ କରିଥିଲେ।
ଏହି ଅବସରରେ ସତୀଶ ନିନାସମ କହିଥିଲେ ଯେ, ଏବେ ଗୋଟିଏ ଫିଲ୍ମ ଥିଏଟରରେ ଏକ କିମ୍ବା ଦୁଇ ସପ୍ତାହ ଚାଲିବା ମଧ୍ୟ କଷ୍ଟକର ହୋଇପଡ଼ିଛି। ଏଭଳି ସମୟରେ ‘ଅଯୋଗ୍ୟ ୨’ ୫୦ ଦିନ ପୂରା କରିବା ତାଙ୍କ ପାଇଁ ଖୁସିର ବିଷୟ ବୋଲି ସେ କହିଥିଲେ। ଏଥିପାଇଁ ସେ ସମସ୍ତ ଦର୍ଶକ ଓ ପ୍ରଶଂସକଙ୍କୁ ଧନ୍ୟବାଦ ଜଣାଇଥିଲେ।ଏହା ସହ ପ୍ରଶଂସକଙ୍କୁ ଆଉ ଏକ ଖୁସି ଖବର ଦେଇଛନ୍ତି ସତୀଶ ନିନାସମ। ସେ କହିଛନ୍ତି ଯେ ‘ଅଯୋଗ୍ୟ ୩’ ନେଇ ପ୍ରାରମ୍ଭିକ ଯୋଜନା ଆରମ୍ଭ ହୋଇସାରିଛି। ଖୁବଶୀଘ୍ର ଏହାକୁ ଦର୍ଶକଙ୍କ ପାଖକୁ ଆଣିବା ପାଇଁ ଚେଷ୍ଟା ଚାଲିଛି।ଏମ୍. ମୁନେଗୌଡାଙ୍କ ପ୍ରଯୋଜନାରେ ନିର୍ମିତ ‘ଅଯୋଗ୍ୟ ୨’ରେ ସଙ୍ଗୀତ ଦେଇଛନ୍ତି ଅର୍ଜୁନ ଜନ୍ୟା। ସତୀଶ ନିନାସମ ଓ ରଚିତା ରାମଙ୍କ ବ୍ୟତୀତ ଭି. ରବିଚନ୍ଦ୍ରନ, ପି. ରବି ଶଙ୍କର, ସାଧୁ କୋକିଲା ଏବଂ ଶିବରାଜ କେଆର ପେଟେଙ୍କ ଭଳି ଅଭିନେତା ମଧ୍ୟ ଏହି ଫିଲ୍ମରେ ଅଭିନୟ କରିଛନ୍ତି।
