CEC ଜ୍ଞାନେଶ କୁମାରଙ୍କ ଇସ୍ତଫା ଦାବି, ନହେଲେ ଦେଶବ୍ୟାପୀ ଆନ୍ଦୋଳନ: କକ୍ରୋଚ୍ ଜନତା ପାର୍ଟି

ମୁମ୍ବାଇ: ମୁଖ୍ୟ ନିର୍ବାଚନ କମିଶନର (CEC) ଜ୍ଞାନେଶ କୁମାରଙ୍କ ଇସ୍ତଫା ଦାବିକୁ ନେଇ ପୁଣିଥରେ ଆନ୍ଦୋଳନର ଚେତାବନୀ ଦେଇଛି କକ୍ରୋଚ୍ ଜନତା ପାର୍ଟି (CJP)। ଦଳର ପ୍ରତିଷ୍ଠାତା ଅଭିଜିତ ଦୀପକେ ଗୁରୁବାର ମୁମ୍ବାଇ ପ୍ରେସ୍ କ୍ଲବ୍‌ରେ ସାମ୍ବାଦିକଙ୍କୁ ସମ୍ବୋଧିତ କରି CECଙ୍କ ଇସ୍ତଫା ଦାବି କରିଛନ୍ତି।ଦୀପକେ କହିଛନ୍ତି ଯେ, ଜ୍ଞାନେଶ କୁମାର ତୁରନ୍ତ CEC ପଦରୁ ଇସ୍ତଫା ଦିଅନ୍ତୁ ଏବଂ ତାଙ୍କ ବିରୋଧରେ ଅପରାଧିକ ମାମଲା ରୁଜୁ କରାଯାଉ। ଦାବିଗୁଡ଼ିକ ପୂରଣ ନହେଲେ ଦଳ ପକ୍ଷରୁ ଦେଶବ୍ୟାପୀ ଆନ୍ଦୋଳନ ଜାରି ରହିବ ବୋଲି ସେ ଚେତାବନୀ ଦେଇଛନ୍ତି।CJP ପକ୍ଷରୁ ଅକ୍ଟୋବର ୨ରୁ ମୁମ୍ବାଇରୁ ଆନ୍ଦୋଳନ ଆରମ୍ଭ କରିବାକୁ ଘୋଷଣା କରାଯାଇଛି। ପରେ ଦେଶର ବିଭିନ୍ନ ରାଜ୍ୟରେ ପ୍ରତିବାଦ କରାଯିବ ଏବଂ ଦାବି ପୂରଣ ନହେଲେ ଦିଲ୍ଲୀର ଜନ୍ତର-ମନ୍ତରରେ ଆନ୍ଦୋଳନ କରାଯିବ ବୋଲି ଦୀପକେ କହିଛନ୍ତି।ଏଥିସହ CEC ନିଯୁକ୍ତି ପ୍ରକ୍ରିୟାକୁ ଅଧିକ ସ୍ୱଚ୍ଛ କରିବା ଏବଂ ଏଥିରେ ସିଭିଲ୍ ସୋସାଇଟିର ଭୂମିକା ରଖିବାକୁ CJP ଦାବି କରିଛି। ୨୦୨୫ର ଭୋଟର ତାଲିକାକୁ ଫ୍ରିଜ୍ କରି ଏଥିରେ ଆଉ ପରିବର୍ତ୍ତନ ନକରିବାକୁ ମଧ୍ୟ ଦଳ ଦାବି କରିଛି।ଭୋଟର ତାଲିକାର Special Intensive Revision (SIR)କୁ ନେଇ ନିର୍ବାଚନ କମିଶନକୁ ବିରୋଧୀ ଦଳଗୁଡ଼ିକ ସମାଲୋଚନା କରୁଥିବା ବେଳେ CJP ମଧ୍ୟ ଏହି ପ୍ରସଙ୍ଗରେ ନିଜର ଆପତ୍ତି ଜଣାଇଛି। ଅନ୍ୟପଟେ, ନିର୍ବାଚନ କମିଶନ ପକ୍ଷରୁ SIR ସମେତ ନିଷ୍ପତ୍ତିଗୁଡ଼ିକ ତିନି ସଦସ୍ୟ ବିଶିଷ୍ଟ କମିଶନଙ୍କ ସର୍ବସମ୍ମତିକ୍ରମେ ନିଆଯାଇଥିବା କୁହାଯାଇଛି।ମୁମ୍ବାଇରେ CEC ଓ ନିର୍ବାଚନ କମିଶନ ବିରୋଧରେ ଅନ୍ୟ ରାଜନୈତିକ ସଂଗଠନଗୁଡ଼ିକ ମଧ୍ୟ ପ୍ରତିବାଦ ଘୋଷଣା କରିଥିବାରୁ SIRକୁ ନେଇ ରାଜନୈତିକ ବିବାଦ ଜାରି ରହିଛି।