କେନ୍ଦୁଝର/ପାଟଣା, ୭/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଏରେଣ୍ଡେଇସ୍ଥିତ ସ୍ୱେଚ୍ଛାସେବୀ ଅନୁଷ୍ଠାନ ‘ଭାରତ’ କାର୍ଯ୍ୟାଳୟ ପରିସରରେ ସହଭାଗୀ ଶିକ୍ଷା ଓ କାର୍ଯ୍ୟ ସମ୍ବନ୍ଧୀୟ ଦୁଇଦିନିଆ ପ୍ରଶିକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ଗତ ୫ ଓ ୬ ତାରିଖ ଦୁଇଦିନ ଧରି ‘ସେହାଟ’ ପ୍ରକଳ୍ପ ପକ୍ଷରୁ ଏହି ପ୍ରଶିକ୍ଷଣ ଆୟୋଜିତ ହୋଇଥିଲା।ଏଥିରେ କେନ୍ଦୁଝର ଜିଲ୍ଲାର ୪ଟି ବ୍ଲକର ଗୋଷ୍ଠୀ ସେବା ପ୍ରଦାନକାରୀ କର୍ମୀ ଓ ହାଟ ସେବା ପ୍ରଦାନକାରୀ କର୍ମୀମାନେ ଯୋଗଦେଇଥିଲେ। ପ୍ରଶିକ୍ଷକ ଭାବେ ‘ଏକଜୁଟ୍’ ସଂସ୍ଥାର ରେବତୀ ସାହୁ, ସୁମିତ୍ରା ଗାଗରାଇ, ପବିତ୍ର ମୋହନ ବିଶ୍ୱାଳ, ନିରାଶ ମହାନ୍ତ ଓ ବିବେକାନନ୍ଦ ବେହେରା ପ୍ରମୁଖ ଯୋଗଦେଇ ପ୍ରଶିକ୍ଷଣ ପ୍ରଦାନ କରିଥିଲେ।କାର୍ଯ୍ୟକ୍ରମକୁ ‘ଭାରତ’ର ପ୍ରକଳ୍ପ ସଂଯୋଜକ ଶିବନାଥ ପ୍ରଧାନ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ। ଉଦ୍ଯାପନୀ ଉତ୍ସବରେ ଅନୁଷ୍ଠାନର ସମ୍ପାଦକ ନବକିଶୋର ମିଶ୍ର ଯୋଗଦେଇଥିଲେ।
ପ୍ରଶିକ୍ଷଣର ମୁଖ୍ୟ ଉଦ୍ଦେଶ୍ୟ ଥିଲା ମା’ ଓ ଶିଶୁଙ୍କୁ ପ୍ରଭାବିତ କରୁଥିବା ପୋଷଣ ସମ୍ବନ୍ଧୀୟ ବିଭିନ୍ନ ସମସ୍ୟାକୁ ଚିହ୍ନଟ କରିବା, ଏହାର ପ୍ରଭାବ ବିଶ୍ଳେଷଣ କରିବା ଏବଂ ଗୋଷ୍ଠୀର ସହଯୋଗରେ ସମସ୍ୟାର ସମାଧାନ ପାଇଁ ରଣନୀତି ପ୍ରସ୍ତୁତ କରିବା।ପ୍ରଶିକ୍ଷଣ ସମୟରେ କାହାଣୀ ମାଧ୍ୟମରେ ସଚେତନତା ସୃଷ୍ଟି, ଚିତ୍ରର ବ୍ୟବହାର ଏବଂ ଲୋକଙ୍କ ମଧ୍ୟରେ ବ୍ୟବହାରିକ ପରିବର୍ତ୍ତନ କିପରି ଆଣିହେବ ସେ ସମ୍ପର୍କରେ ବିଭିନ୍ନ ବିଷୟ ଉପରେ ଆଲୋଚନା ହୋଇଥିଲା।‘ଉନ୍ନତ ପୁଷ୍ଟିସାର ପାଇଁ ଭାରତୀୟ ଖାଦ୍ୟ ପ୍ରଣାଳୀ’ (ଇନ୍ଫ୍ୟୁଜନ୍) ପ୍ରକଳ୍ପ ଏକ ଗବେଷଣାଭିତ୍ତିକ ଅଧ୍ୟୟନ ପାଇଁ ଚାଲିଥିବା ବେଳେ ଲଣ୍ଡନ ସ୍କୁଲ ଅଫ୍ ହାଇଜିନ୍ ଆଣ୍ଡ ଟ୍ରପିକାଲ ମେଡିସିନ୍ ଓ ସେଫିଲ୍ଡ ବିଶ୍ୱବିଦ୍ୟାଳୟ ଏହାକୁ ସହାୟତା କରୁଛନ୍ତି। ରାଷ୍ଟ୍ରୀୟ ପୋଷଣ ସଂସ୍ଥା, ହାଇଦ୍ରାବାଦ ପକ୍ଷରୁ ଏହାର ପରାମର୍ଶ ଓ ତଦାରଖ ଜାରି ରହିଛି।
ବିଶେଷକରି ଗ୍ରାମାଞ୍ଚଳର ସାପ୍ତାହିକ ହାଟର ଉନ୍ନତି ସହିତ ଗୋଷ୍ଠୀର ମା’ ଓ ଶିଶୁମାନଙ୍କ ପୋଷଣ ସ୍ଥିତିରେ ଉନ୍ନତି ଆଣିବା ଏହି ପ୍ରକଳ୍ପର ମୁଖ୍ୟ ଲକ୍ଷ୍ୟ ବୋଲି ଜଣାପଡ଼ିଛି।
କାର୍ଯ୍ୟକ୍ରମକୁ ଅନୁଷ୍ଠାନର କର୍ମୀ ଝରଣା ଦାଶ, ରଣଜିତ ମହାନ୍ତ, ଜ୍ୟୋତିରଞ୍ଜନ ବାରିକ, ଅର୍ଜୁନ ସେଠୀ ପ୍ରମୁଖ ସହଯୋଗ କରିଥିଲେ।
