ଭୁବନେଶ୍ୱର: ଦୁର୍ଗାପୂଜା ଓ ଦଶହରା ଉତ୍ସବ ମଧ୍ୟରେ ପାଣିପାଗକୁ ନେଇ ବଢ଼ିଲା ଚିନ୍ତା। ଆସନ୍ତା ଅକ୍ଟୋବର ୧୩ ତାରିଖ ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ଥିବାରୁ ରାଜ୍ୟରେ ବର୍ଷା ଓ ସମ୍ଭାବ୍ୟ ବାତ୍ୟାକୁ ନେଇ ଚର୍ଚ୍ଚା ଜୋର ଧରିଛି। ତେବେ ଲଘୁଚାପଟି ବାତ୍ୟାର ରୂପ ନେବ କି ନାହିଁ, ସେନେଇ ଏପର୍ଯ୍ୟନ୍ତ ସ୍ପଷ୍ଟ ଆକଳନ କରାଯାଇନାହିଁ।
୧୩ ତାରିଖରେ ଲଘୁଚାପ ସମ୍ଭାବନା
ପାଣିପାଗ ପୂର୍ବାନୁମାନ ଅନୁଯାୟୀ, ବର୍ତ୍ତମାନ ଥାଇଲ୍ୟାଣ୍ଡ ଉପସାଗର ଓ ଏହାର ଆଖପାଖ ଅଞ୍ଚଳରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି। ଏହା ଅକ୍ଟୋବର ୧୧ ତାରିଖ ବେଳକୁ ଆଣ୍ଡାମାନ ସାଗରରେ ପ୍ରବେଶ କରିବା ପରେ ୧୩ ତାରିଖ ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗରରେ ଲଘୁଚାପର ରୂପ ନେଇପାରେ।ପରବର୍ତ୍ତୀ ସମୟରେ ଏହା ଅଧିକ ଘନୀଭୂତ ହୋଇ ଉତ୍ତର-ପଶ୍ଚିମ ଦିଗକୁ ଗତି କରିବା ସହ ଉତ୍ତର ତାମିଲନାଡୁ ଓ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ମୁହାଁଇବାର ସମ୍ଭାବନା ରହିଛି।
ଦଶହରା ଉତ୍ସବରେ ପଡ଼ିବ କି ପ୍ରଭାବ?
ଲଘୁଚାପ ପ୍ରଭାବରେ ପାର୍ବଣ ସମୟରେ ବର୍ଷା ହେଲେ ଦୁର୍ଗାପୂଜା ମଣ୍ଡପ, ମେଢ଼ ଦର୍ଶନ ଓ ଦଶହରା ଉତ୍ସବ ଉପରେ ପ୍ରଭାବ ପଡ଼ିପାରେ। ତେବେ ବର୍ଷାର ପରିମାଣ, ଲଘୁଚାପର ଗତିପଥ ଏବଂ ଏହାର ତୀବ୍ରତା ସମ୍ପର୍କରେ ଅଧିକ ସ୍ପଷ୍ଟତା ମିଳିବା ପରେ ହିଁ ପାଣିପାଗର ପ୍ରକୃତ ସ୍ଥିତି ଜଣାପଡ଼ିବ।
ଓଡ଼ିଶାକୁ ଘାରୁଛି ବାତ୍ୟା ଭୟ
ଅକ୍ଟୋବର ମାସରେ ଓଡ଼ିଶା ଅତୀତରେ ଅନେକ ଭୟଙ୍କର ସାମୁଦ୍ରିକ ଝଡ଼ର ସାମ୍ନା କରିଛି। ୧୯୯୯ର ମହାବାତ୍ୟା, ୨୦୧୩ରେ ଫାଇଲିନ୍, ୨୦୧୪ରେ ହୁଡହୁଡ୍ ଏବଂ ୨୦୧୮ରେ ତିତଲି ଓଡ଼ିଶାରେ ବ୍ୟାପକ ପ୍ରଭାବ ପକାଇଥିଲା। ଏଥିପାଇଁ ଅକ୍ଟୋବର ମାସରେ ସମ୍ଭାବ୍ୟ ଲଘୁଚାପକୁ ନେଇ ଲୋକଙ୍କ ମଧ୍ୟରେ ଆଶଙ୍କା ବଢ଼ିଥାଏ।ଅନ୍ୟପକ୍ଷରେ, ରାଜ୍ୟର ବିଭିନ୍ନ ସ୍ଥାନରେ ଝଡ଼ବର୍ଷା ଜାରି ରହିଥିବା ବେଳେ ଆଜି ୮ଟି ଜିଲ୍ଲା ପାଇଁ ୟେଲୋ ଆଲର୍ଟ ଜାରି ହୋଇଥିବା ସୂଚନା ମିଳିଛି।
ବର୍ତ୍ତମାନ ସମସ୍ତଙ୍କ ନଜର ସମ୍ଭାବ୍ୟ ଲଘୁଚାପର ଗତିପଥ ଓ ତୀବ୍ରତା ଉପରେ। ଏହା ବାତ୍ୟାର ରୂପ ନେବ କି ନାହିଁ ଏବଂ ଓଡ଼ିଶାର ପାଣିପାଗ ଉପରେ କେତେ ପ୍ରଭାବ ପକାଇବ, ତାହା ଆଗାମୀ ପାଣିପାଗ ଅପଡେଟ୍ରୁ ସ୍ପଷ୍ଟ ହେବ।
